Tag: ن لیگ

ملتان : پاکستان تحریک انصاف کے چیئرمین عمران خان نے کہا ہے کہ این اے ایک سوبائیس میں ن لیگ کی مڈل اسٹمپ اڑنے والی ہے۔ میرا دل کہہ رہاہے کہ دو ہزار پندرہ تبدیلی کا سال ہے۔

ان خیالات اظہار انہوں نے ملتان کے اسپورٹس گراؤنڈ میں جلسے سے خطاب کرتے ہوئے کیا، جلسہ گاہ میں لوگوں کی بڑی تعداد موجود تھی،عمران خان نے شرکاء سے خطاب میں کہا کہ قوم غریب اور حکمران ٹولہ امیر ہو رہا ہے۔

انیس سو ستر سے آج تک یہ جماعتیں اپنی اپنی باریاں لے رہے ہیں، اور اب انہوں نے اپنے بچوں کو تیار کر لیا ہے، ملتان کے شہری حکومت کو بتا دیں کہ اس نے عوام سے کئے گئے اپنے وعدے پورے نہیں کئے۔

چیئرمین تحریک انصاف نے کہا کہ موٹر ویز، انڈر پاسز، فلائی اوورز اور سڑکیں بنانے سے قومیں ترقی نہیں کر سکتیں۔ کیا پاکستان میں میڑو بسوں کی ضرورت تھی یا تعلیم اور صحت کی سہولیات کی؟۔ قوم اس وقت ترقی کرتی جب عوام اور تعلیم پر پیسہ خرچ کیا جائے۔

پاکستان کے ڈھائی کروڑ بچے اسکول جانے سے محروم ہیں لیکن حکمران کبھی ایسا نہیں کریں گے کیونکہ میٹرو بس، انڈر پاسز اور سڑکیں بنانے سے ہی انھیں کمیشن ملتا ہے۔

ان کا کہنا تھا کہ پاکستان کے سب سے بڑے شہر میں کوئی میرٹ سسٹم نہیں ہے۔ کراچی میں پولیس کو سیاسی کر دیا گیا ہے۔ پنجاب پولیس بھی صرف شریفوں کی فورس بن چکی ہے۔

دوسری جانب خیبر پختونخوا کی پولیس ہماری پالیسیوں کی وجہ سے مثالی بن گئی ہے۔ خیبر پختونخوا میں پچھلے ایک سال میں 60 فیصد جرائم پر قابو پایا جا چکا ہے۔

وہاں عام عوام کو انصاف کی فراہمی ہو رہی ہے۔انہوں نے کہا کہ جب تک عوام اپنے حقوق کیلئے کھڑے نہیں ہونگے تب تک ان کو اپنے جائز حقوق نہیں ملیں گے۔

ان کا کہنا تھا کہ ایسا پاکستان چاہتے ہیں جس میں عوام کی قدر ہو، انہوں نے کہا کہ یہ دو نظریات اور دو سوچوں کا مقابلہ ہے۔  انہوں نے سوال کیا کہ کیا حکمرانوں کے وعدوں کے باوجود ملک سے لوڈشیڈنگ کا خاتمہ ممکن ہو سکا ہے؟

عوام آج بھی کرپشن اور لوڈشیڈنگ کے عذاب کا سامنا کر رہے ہیں۔ ملتان کے شہری ضمنی انتخابات میں اپنے ووٹ سے ثابت کریں کہ وہ حکومت کی پالیسیوں کے خلاف ہیں۔

عمران خان کا کہنا تھا کہ میں صرف ایک ضمنی الیکشن کیلئے جلسہ کرنے نہیں آیا بلکہ ملتان کے عوام کو جگانے آیا ہوں۔