اسلام آباد : مسلم لیگ ن کے سینیٹر عرفان صدیقی نے کہا ہے کہ ن لیگ کی حکومت 2018 کے بعد آج تک نہیں آئی۔
یہ بات انہوں نے اے آر وائی نیوز کے پروگرام سوال یہ ہے میں میزبان ماریہ میمن سے خصوصی گفتگو کرتے ہوئے کہی، انہوں نے کہا کہ
اگر کسی وزیراعظم کا تعلق ن لیگ سے تھا بھی تو اس کا مطلب یہ نہیں کہ وہ اسی کی حکومت تھی، پی ڈی ایم حکومت میں 13جماعتیں شامل تھیں سب فیصلوں میں شریک رہتے تھے، اتحادی حکومت میں دیگر لوگ بھی اہم عہدوں پر فائز تھے۔
سینیٹرعرفان صدیقی کا کہنا تھا کہ انتخابات کے وقت سب اپنے منشور کے ساتھ میدان میں آتے ہیں، اتحادی حکومت ساتھ ہی قانون سازی کرتی رہی ہے، گزشتہ اقدامات سے لاتعلقی کرنا کوئی انوکھی بات نہیں، انتخابی ماحول میں سب ایسی باتیں کرتے ہیں۔
ایک سوال کے جواب میں ان کا کہنا تھا کہ آج جو ملکی معاشی حالات ہیں اس کے ذمہ دار وہ ہیں جو4سال حکومت میں رہے، عوام ان کا گریبان میں پکڑیں جنہوں نے4سال میں بجلی پیدا نہیں کی، 4سالہ دور میں گردشی قرضے بڑھے، ایک میگاواٹ بھی بجلی پیدا نہیں ہوئی۔
انہوں نے کہا کہ ہم ڈیڑھ سال کے دوران فائر فائٹنگ کرتے رہے،جو گزشتہ 4سال میں کیا گیا ہم تو ان ہی مسائل سے لڑتے رہے، 16ماہ کارکردگی دکھانے کیلئے نہیں فائرفائٹنگ کے تھے،
ن لیگ کے سینیٹر کا کہنا تھا کہ لوگ بنگلادیش کی مثال دیتے ہیں تو وہاں حسینہ واجد15سال سے بیٹھی ہیں، ان کو 15سال سے کسی نے نہیں ہٹایا، اگر بھارت کی مثال دیتے ہیں تو مودی 8سال سے وہاں بیٹھا ہے۔
انتخابات کے انعقاد پر ان کا مؤقف تھا کہ الیکشن کمیشن 90دن میں انتخابات کرا سکتا ہے ضرورکرائے، 90دن کا تقاضہ آئینی ہے جسے ہم بھی مانتے ہیں، آئین یہ بھی کہتا ہے کہ مردم شماری منظوری کے بعد حلقہ بندیاں ہوں اور حلقہ بندیوں کے بغیر الیکشن نہیں ہوسکتا حلقہ بندیاں بھی اسی آئین میں لکھی ہیں جہاں 90دن لکھا ہے۔
