Tag: وائرل ویڈیو

کراچی: شہر قائد میں کلفٹن بلاک 2 سیمنٹ ٹاور کے قریب تیز رفتار ویگو گاڑی کی ٹکر سے کار سوار شخص جاں بحق اور ان کی بیٹی شدید زخمی ہو گئی تھی، پولیس نے ڈرائیور اور گاڑی کے مالک کو گرفتار کر لیا ہے۔

تفصیلات کے مطابق ساؤتھ پولیس کا کہنا ہے کہ بوٹ بیسن میں گزشتہ روز پیش آنے والے ٹریفک حادثے کے ذمہ دار ڈرائیور شبیر اور گاڑی کے مالک سجاد کو گرفتار کر لیا گیا ہے، ان کے خلاف مقدمہ بھی درج ہو گیا۔

واقعے کا مقدمہ حادثے میں جاں بحق شخص کیپٹن جمشید ملک کی اہلیہ نازیہ ناہید کی مدعیت میں بوٹ بیسن تھانے میں درج کیا گیا ہے، حادثے میں جمشید ملک کی 15 سالہ بیٹی فاطمہ ملک شدید زخمی ہوئی تھی، جس کا اسپتال میں علاج جاری ہے۔

مقدمے کے متن کے مطابق یہ واقعہ تیز رفتاری، غفلت اور لاپرواہی کی وجہ سے پیش آیا، مدعی مقدمہ نے کہا میرے شوہر اپنی بیٹی فاطمہ ملک کو فیز 8 میں اسکول سے لے کر آ رہے تھے، کہ دوسری گاڑی نے آ کر ٹکر مار دی، حادثے میں کیپٹن جمشید ملک شدید زخمی ہوئے جو نجی اسپتال میں زخموں کی تاب نہ لاتے ہوئے انتقال کر گئے، جب کہ میری بیٹی شدید زخمی ہے اور نجی اسپتال میں زندگی اور موت کی کشمکش میں مبتلا ہے۔

ترجمان ایس ایس پی ڈسٹرکٹ ساؤتھ پولیس کراچی کے مطابق بوٹ بیسن پولیس نے حادثے کے بعد چند منٹ کے اندر ہی موقع پر پہنچ کر ویگو گاڑی پر سوار دونوں ملزمان کو گرفتار کر لیا تھا۔

موقع سے ملنے والی سی سی ٹی وی فوٹیج کے مطابق حادثہ اس وقت پیش آیا جب کار سوار زخمی شخص اسی روڈ پر یو ٹرن لے رہا تھا، جس پر دوسری جانب سے ایک سفید ویگو گاڑی تیز رفتاری سے چلی آ رہی تھی۔ گرفتار ملزمان کی شناخت شبیر سمیع ولد عبدالسمیع اور سجاد ولد ریاض کے نام سے ہوئی ہے۔

پولیس نے موقع سے شواہد اکٹھے کر لیے ہیں، جب کہ ملزمان کی گاڑی بھی قبضے میں لے لی گئی ہے۔

حیدرآباد: سندھ کے شہر حیدرآباد میں ایک ویڈیو وائرل ہوئی ہے، جس میں افطاری کا سامان نہ دیے جانے پر پولیس افسر نے بیکری ملازم کو دھمکیاں دی ہیں۔

تفصیلات کے مطابق حیدرآباد میں مبینہ طور پر مفت افطاری نہ ملنے پر پولیس افسر آپے سے باہر ہو گیا، بیکری ملازم کو سنگین نتائج بھگتنے کی دھمکیاں دیں، واقعے کی ویڈیو وائرل ہو گئی ہے۔

ویڈیو میں نظر آنے والے پولیس افسر کی شناخت اختر کٹپر کے نام سے ہوئی ہے جو کہ مختلف تھانوں میں ایس ایچ او رہ چکا ہے۔ اختر کٹپر کا مؤقف بھی سامنے آ گیا ہے، پولیس افسر نے کہا ’’میں نے مفت میں سامان کا نہیں کہا، بیکری میں آدھا سامان دے کر رقم پوری لی گئی تھی۔‘‘

ویڈیو میں دیکھا جا سکتاہے کہ ایس ایچ او خالد بیکری ملازم غفار ہاجانو کو کہتا ہے کون ہو تم، سب چور ہو تم لوگ، میں نے کئی لوگوں کو پکڑا ہے جی آر او کالونی میں، سیری اور مٹیاری کی ہاجانو برادری کو جانتا ہوں، ایسے جوتے ماروں گا کہ زندگی بھر یاد رکھو گے، وہ حال کروں گا کہ رات کو گھر بھی نہیں جا پاؤ گے، کیا سمجھتے ہو تم خود کو سب چور ہو۔

پولیس افسر نے کہا تم نے کیسے کہہ دیا کہ روزہ کھولنے کے لیے سامان نہیں ہے، جاؤ اپنے وڈیروں کو لے کر آؤ، سب کو جانتا ہوں، مہمان میرے گھر بیٹھے ہیں اور یہ کہتا ہے کہ سامان نہیں ہے۔