ARYNews.tv | Urdu – Har Lamha Bakhabar

Tag: وائرل ویڈیو

  • گائے چھت پر کیسے پہنچی؟ حیرت انگیز ویڈیو وائرل

    گائے چھت پر کیسے پہنچی؟ حیرت انگیز ویڈیو وائرل

    بے ضرر جانوروں کے شرارتی پن سے تو سب ہی واقف ہیں، یہ اپنی معصومیت میں اکثر غیر معمولی جگہوں اور صورتحال میں پھنس جاتے ہیں۔

    تاہم اس قسم کی شرارتیں عموماً بلیاں زیادہ کرتی ہیں جو کبھی کسی اونچی جگہ چڑھ جاتی ہیں، کہیں پھنس جاتی ہیں یا پھر ادھر سے ادھر چھلانگ لگاتے ہوئے گر جاتی ہیں۔

    لیکن کیا آپ نے کبھی کسی گائے کو کسی غیر معمولی جگہ پر دیکھا ہے؟

    سماجی رابطے کی ویب سائٹ ٹویٹر پر ایک گائے کی ویڈیو وائرل ہورہی ہے جو ایک گودام کی چھت پر موجود ہے۔

    گائے نہ صرف وہاں موجود ہے بلکہ آرام سے چہل قدمی بھی کر رہی ہے۔

    آس پاس کوئی شخص بھی موجود نہیں جس سے ظاہر ہوتا ہے کہ گائے نے تنہائی پا کر کھیل ہی کھیل میں خود کو مشکل صورتحال میں پھنسا لیا ہے۔

    گائے وہاں کیسے چڑھی، یا بعد ازاں اسے کیسے اتارا گیا، یہ واضح نہیں ہوسکا۔

    ٹویٹر پر لوگ اس ویڈیو کو دیکھ کر بے حد محظوظ ہوئے اور اس پر دلچسپ تبصرے کیے۔

  • سعودی عرب: طالب علم پر تشدد کرنے والے ٹیچر کے خلاف کارروائی

    سعودی عرب: طالب علم پر تشدد کرنے والے ٹیچر کے خلاف کارروائی

    ریاض: سعودی عرب کے ایک پرائیوٹ اسکول میں طالب علم پر تشدد کرنے والے ٹیچر کے خلاف کارروائی کی جائے گی، تشدد کی ویڈیو سوشل میڈیا پر وائرل ہوگئی تھی۔

    اردو نیوز کے مطابق سعودی عرب میں حفر الباطن کمشنری کے محکمہ تعلیم نے پرائیوٹ اسکول میں طالب علم کو زد و کوب کیے جانے کی ویڈیو وائرل ہونے پر ٹیچر کے خلاف کارروائی کا فیصلہ کیا ہے۔

    محکمہ تعلیم نے پرائیوٹ اسکول میں طالب علم پر تشدد کا نوٹس لیا جس پر وائرل ویڈیو کے حوالے سے تحقیقاتی کمیٹی قائم کی ہے۔

    وائرل ویڈیو میں دیکھا جاسکتا ہے کہ ایک ٹیچر کلاس روم میں طالب علم کو اس کے ساتھیوں کے سامنے بری طرح زد و کوب کر رہا ہے۔

    محکمہ تعلیم کا کہنا ہے کہ اس قسم کے واقعات کے منظر عام پر آتے ہی مقررہ قوانین و ضوابط کے تحت کارروائی کی جاتی ہے، کسی کے ساتھ رعایت نہیں کی جاتی۔ طلبہ پر تشدد تعلیمی پالیسی کے سراسر منافی ہے۔

  • دو سر والا خوفناک جانور، حیران کن ویڈیو

    سوشل میڈیا پر بعض اوقات ایسی ویڈیوز وائرل ہوجاتی ہیں جو نظر کو دھوکا دینے والی اور دماغ گھما دینے والی ہوتی ہیں، حال ہی میں ایسی ایک اور ویڈیو نے سوشل میڈیا صارفین کو شش و پنج میں مبتلا کردیا۔

    ٹویٹر پر پوسٹ کی گئی اس ویڈیو میں ایک آنٹ ایٹر کو دیکھا جاسکتا ہے، سؤر سے مشابہہ یہ جانور چیونٹیاں اور کیڑے مکوڑے کھاتا ہے۔

    ویڈیو میں یوں محسوس ہورہا ہے جیسے اس کے دو سر ہیں جو دونوں ہی چیونٹیاں کھا رہے ہیں۔

    اس منظر کو دیکھ کر خوف کی ایک لہر رگ و پے میں دوڑ جاتی ہے۔

    تاہم حقیقت یہ نہیں، اسی ٹویٹر صارف نے ایک اور تصویر پوسٹ کی ہے جس میں دیکھا جاسکتا ہے کہ دوسرا سر سمجھا جانے والا دراصل اس جانور کا پاؤں ہے جو سر کی طرح دکھائی دے رہا ہے۔

    کیا آپ کو اس جانور کی یہ حقیقت معلوم تھی؟

  • لڑکا بہن کو ریاضی پڑھاتے ہوئے زار و قطار رونے لگا، ویڈیو وائرل

    چین میں ایک لڑکا اپنی بہن کو ریاضی پڑھاتے ہوئے زار و قطار رونے لگا، اس دل چسپ واقعے کی ویڈیو سوشل میڈیا پر وائرل ہو گئی ہے۔

    دراصل ریاضی سیکھنا اور سکھانا کوئی آسان کام نہیں ہے، اس کے لیے بلاشبہ ایک اچھے استاد کی ضرورت ہوتی ہے، اور طالب علم کو بھی خود کو ایک اچھا سیکھنے والا ثابت کرنا ہوتا ہے ورنہ صورت حال اس ویڈیو جیسی بھی ہو سکتی ہے۔

    جب کوئی سکھانے والا دیکھتا ہے کہ سیکھنے والا سیکھ نہیں پا رہا ہے، تو مایوسی فطری ہوتی ہے، اس ویڈیو میں ایسا ہی کچھ پیش آیا ہے، لیکن صورت حال اتنی دل چسپ ہے کہ معاملہ مزاحیہ رخ اختیار کر گیا۔

    ویڈیو کے مطابق ایک چینی لڑکا اپنی بہن کو ریاضی پڑھاتے ہوئے اتنا مایوس ہوا کہ وہ زار و قطار رونے لگا، کیوں کہ اس کی بہن کو میتھ بالکل سمجھ نہیں آ رہی تھی۔

    انسٹاگرام پر شیئر ہونے والی یہ ویڈیو تیزی سے وائرل ہوئی، اور اب تک اسے ایک کروڑ بار دیکھا جا چکا ہے، ویڈیو شروع ہوتے ہی ایک لڑکے کو اپنی چھوٹی بہن کو ریاضی پڑھاتے ہوئے مایوسی سے روتے ہوئے دیکھا جا سکتا ہے۔

    اس کی ماں، جو ویڈیو ریکارڈ کر رہی ہیں، پس منظر میں کہتی ہیں کہ وہ استاد نہیں بن سکتا کیوں کہ وہ آسانی سے مایوس ہو جاتا ہے۔

    لڑکے نے روتے روتے کہا ’’میں نے اسے جواب بھی بتا دیا ہے، تصویر میں تین صحیح زاویے ہیں، لیکن یہ اصرار کر رہی ہے کہ صرف دو زاویے ہیں۔‘‘

    ویڈیو میں دیکھا جا سکتا ہے کہ بے بس لڑکا پوری ویڈیو میں روتا رہا، ایسے میں اس کی ماں اپنی ہنسی پر قابو نہیں پا رہی تھیں، جب کہ چھوٹی بچی، جسے پڑھایا جا رہا ہے،اسے بھی روتے ہوئے دیکھا جا سکتا ہے۔

  • گہرے سمندر میں شارک سے سامنا، رونگھٹے کھڑے کردینے والی ویڈیو

    تفریح یا تحقیق کے لیے زیر آب جانا ایک طرف تو بہت ایڈونچرس ہوسکتا ہے لیکن اس کے ساتھ ساتھ یہ خطرناک بھی ہوتا ہے کیونکہ آپ خطرناک آبی جانوروں کی پناہ گاہ میں مداخلت کرنے جارہے ہوتے ہیں۔

    زیر آب جانے والے کئی ڈائیورز کے ساتھ خوفناک واقعات پیش آتے رہتے ہیں جو عموماً شارک کے ساتھ مڈ بھیڑ کے ہوتے ہیں، کچھ خوش قسمت ڈائیور ہی ایسے موقع پر اپنی جان بچانے میں کامیاب رہتے ہیں۔

    حال ہی میں ایسی ہی ایک رونگھٹے کھڑے کردینے والی ویڈیو سوشل میڈیا پر وائرل ہو رہی ہے۔

    ویڈیو کہاں کی ہے اس بارے میں کوئی معلومات نہیں، البتہ اس میں سبز رنگ کا دھند بھرا پانی دکھائی دے رہا ہے جس میں حد نگاہ بے حد کم ہے۔

    کیمرے کے سامنے ایک ڈائیور موجود ہے، 6 سیکنڈ کی اس ویڈیو میں اچانک ڈائیور کے پیچھے سے ایک قوی الجثہ شارک اپنا منہ کھولے نمودار ہوتی ہے۔

    خوش قسمتی سے ڈائیور کو بھی کسی کی موجودگی کا احساس ہوتا ہے اور عین اسی وقت وہ پنا سر نیچے جھکا لیتا ہے، جس کے بعد شارک اس کے سر کے عین اوپر سے ذرا سا فاصلے سے گزر جاتی ہے۔

    اس ویڈیو کو دیکھ کر سوشل میڈیا صارفین نے بھی اپنے دل تھام لیے، کئی افراد نے اسے خوفناک اور رونگھٹے کھڑے کردینے والی ویڈیو قرار دیا۔

  • بچوں نے دیگچی کے نیچے پٹاخہ رکھ دیا، پھر کیا ہوا؟ ویڈیو وائرل

    سوشل میڈیا پر متحرک رہنے والے افراد اکثر و بیشتر انوکھا مواد پوسٹ کرتے رہتے ہیں جس کا مقصد سوشل میڈیا پر توجہ حاصل کرنا ہوتا ہے۔

    ایسی ہی ایک وائرل ویڈیو میں 2 کم عمر بچیوں کو دیکھا جاسکتا ہے جو ایک خطرناک تجربہ کر رہی ہیں۔

    ویڈیو میں 14 سے 15 سال کی 2 بچیاں موجود ہیں، ایک بچی پٹاخہ جلاتی ہے اور اس کے اوپر اسٹیل کی دیگچی رکھ دیتی ہے، اس کے بعد دونوں بچیاں کانوں پر ہاتھ رکھ کر دور ہٹ جاتی ہیں۔

    اگلے ہی لمحے دیگچی ایک دھماکے سے اڑ کر اتنی بلندی تک جاتی ہے کہ کیمرے میں نظر آنا بند ہوجاتی ہے، اور پھر تھوڑی دیر بعد بجلی کی تاروں پر گرتی ہے اور وہیں پھنس جاتی ہے۔

    پس منظر میں دونوں بچیوں کی مسرت بھری چیخوں کی آوازیں سنائی دے رہی ہیں۔

    ویڈیو نے سوشل میڈیا کی صارفین کی توجہ کھینچ لی اور بے شمار لوگوں نے اسے لائیک کیا، تاہم کچھ صارفین نے اس حرکت کو خطرناک بھی قرار دیا اور کہا کہ اس سے کوئی ناخوشگوار حادثہ بھی ہوسکتا تھا۔

  • ہیلمٹ پہننے کا مشورہ نظر انداز کرنے والی بائیکر کے ساتھ کیا ہوا؟

    موٹر سائیکل کی سواری کرتے ہوئے ہیلمٹ پہننا نہایت ضروری ہے، ورنہ کسی حادثے کی صورت میں شدید جسمانی نقصان اٹھانا پڑ سکتا ہے، تاہم کچھ لوگ ایسے بھی ہوتے ہیں جو بائیک چلاتے ہوئے ہیلمٹ پہننا ضروری نہیں سمجھتے۔

    سوشل میڈیا پر ایک ایسی ہی لڑکی کی ویڈیو وائرل ہورہی ہے جس نے ہیلمٹ پہننے کا مشورہ نظر انداز کردیا اور نقصان اٹھایا۔

    وائرل ویڈیو بظاہر بھارت کی ہے، ویڈیو میں دیکھا جاسکتا ہے کہ ایک لڑکی اسکوٹی پر تیز رفتاری سے جارہی ہے۔

    برابر میں ایک اور بائیکر اسے ہیلمٹ پہننے کا مشورہ دیتا ہے اور کہتا ہے کہ آگے پولیس ناکا ہے وہ روک لیں گے، تاہم لڑکی اسے نظر انداز کر کے آگے بڑھ جاتی ہے۔

     

    View this post on Instagram

     

    A post shared by Shivam Kashyap (@kashyap_memer)

    لیکن تھوڑی ہی دیر بعد اسکوٹی کی ایک بائیک سے ٹکر ہوتی ہے جس پر اسکوٹی لڑکھڑاتی ہے اور لڑکی نیچے گر جاتی ہے۔

    خوش قسمتی سے سائیڈ ریلنگ کی وجہ سے لڑکی بلندی سے گرنے سے محفوظ رہتی ہے۔

    اس موقع پر ہیلمٹ پہننے کا مشورہ دینے والا شخص ہی اس کی مدد کرتا ہے اور اس کی اسکوٹی اٹھاتا ہے۔

    لڑکی کے ہاتھوں پر چوٹ لگتی ہے اور خوش قسمتی سے وہ کسی بڑی چوٹ سے محفوظ رہتی ہے۔

  • نظر کا دھوکا یا جادو؟ سنہری بلی کے اندر سے اچانک سیاہ بلی نمودار

    معصوم اور شرارتی بلیاں اپنی شرارتوں سے ہمیں لطف اندوز کرتی رہتی ہیں، یہ ایسا جانور ہے جو کچھ بھی برا کر جائے، اپنی معصومیت کی وجہ سے سزا سے بچ جاتا ہے۔

    سوشل میڈیا پر حال ہی میں وائرل ہونے والی ویڈیو بھی بلیوں کی شرارت کی ہے۔ آنکھوں کو دھوکا دینے والی اس ویڈیو میں ایک بلی اچانک دو بلیوں میں بدل جاتی ہے۔

    ویڈیو میں ایک سنہری بلی دکھائی دے رہی ہے جو شیشے کے دروازے کے پیچھے موجود ہے اور گھر کے اندر داخل ہونے کی نیت رکھتی ہے۔

    سبزے کے ساتھ موجود دیوار پر چلتی ہوئی بلی کھلے دروازے سے چپکے سے اندر داخل ہوتی ہے لیکن اس سے پہلے ذرا رک کر ادھر ادھر دیکھتی ہے۔

    پھر جیسے ہی وہ اندر داخل ہوتی ہے اچانک ایک جادو ہوتا ہے، کہیں سے ایک سیاہ بلی بھی نمودار ہوجاتی ہے جیسے وہ سنہری بلی کے اندر سے برآمد ہوئی ہو۔

    بظاہر یوں لگتا ہے جیسے سیاہ بلی پہلی بلی کے ساتھ چھپ کر اندر داخل ہوئی ہے، لیکن معاملہ اتنا آسان نہیں ہے۔

    اگر آپ ویڈیو کو غور سے دیکھیں تو آپ کو اس کا راز معلوم ہوگا۔

    سنہری بلی نے اندر داخل ہونے سے پہلے جب رک کر سبزے کی طرف دیکھا تو وہاں دراصل پہلے ہی ایک سیاہ بلی موجود تھی۔

    اس کے بعد شرارتی سیاہ بلی کونے سے پہلی بلی کے ساتھ ہی اچانک چھلانگ لگا کر اندر داخل ہوگئی۔ چونکہ سیاہ بلی پہلے دکھائی نہیں دی اور اچانک سامنے آئی تو یوں لگ رہا ہے جیسے وہ جادو سے سامنے آگئی ہو۔

    کیا آپ کو اس ویڈیو کا راز سمجھ آگیا تھا؟

  • سوشل میڈیا کیسے گمراہ کرتا ہے؟ یہ وائرل ویڈیو دیکھیں

    سوشل میڈیا پر آپ کا واسطہ ’فیک نیوز‘ کی طرح کچھ ایسی ویڈیوز سے بھی پڑ سکتا ہے، جنھیں دیکھتے ہوئے بہ ظاہر کوئی مسئلہ نہیں ہوتا، لیکن وہ آپ کو گمراہ کر سکتی ہیں۔

    ہم نے اکثر لوگوں کو یہ کہتے سنا ہے کہ سوشل میڈیا گمراہ کر سکتا ہے، صرف یہی نہیں بلکہ بعض اوقات بہت سے لوگوں نے یہ ثابت کرنے کی کوشش بھی کی ہے، کہ جو چیزیں ہم عام طور پر آن لائن دیکھتے ہیں وہ حقیقی نہیں ہوتیں۔

    اب ایک ویڈیو وائرل ہوئی ہے، جس سے پتا چلتا ہے کہ سوشل میڈیا کس طرح گمراہ کن ثابت ہو سکتا ہے، Tansu Yeğen نامی ٹویٹر صارف نے ایک ویڈیو شیئر کی ہے جس میں ایسا ہی کچھ دکھایا گیا ہے۔

    ویڈیو میں آپ دیکھ سکتے ہیں کہ ایک چھوٹا بچہ دور سے پانی کی ایک کٹی ہوئی بوتل میں کنکر پھینک رہا ہے، اور وہ سیدھا جا کر بوتل میں گر رہے ہیں، ایک بھی کنکر باہر نہیں گرتا۔

    دیکھنے والے اس کے نشانے کی تعریف کرنے لگتے ہیں، لیکن جب کیمرہ زوم آؤٹ ہوتا ہے، تو اب آپ دیکھ سکتے ہیں کہ ایک اور لڑکا پانی کی بوتل کے بالکل پاس بیٹھا ہے اور وہ اس میں اوپر سے پتھر ڈال رہا ہے۔

    ویڈیو کے شروع میں کیمرے کے زاویے سے یہ وہم ہوتا ہے کہ کچھ فاصلے پر موجود لڑکا بالکل نشانے سے پتھر پھینک رہا ہے، تاہم حقیقت کچھ اور نکلتی ہے۔

    یہ ویڈیو یکم جنوری کو شیئر کی گئی تھی، اور شیئر کیے جانے کے بعد سے اب تک اسے تقریباً 60 لاکھ بار دیکھا جا چکا ہے، اور اسے ایک لاکھ سے زائد لوگوں نے لائک کیا ہے۔

  • تیز رفتار گاڑی ڈھابے میں گھس کر لوگوں پر چڑھ دوڑی، دل دہلا دینے والی ویڈیو

    تیز رفتار گاڑی ڈھابے میں گھس کر لوگوں پر چڑھ دوڑی، دل دہلا دینے والی ویڈیو

    گجرات: بھارتی ریاست گجرات کے شہر سورت میں ایک تیز رفتار گاڑی ڈھابے کی دیوار توڑتے ہوئے وہاں بیٹھے لوگوں پر چڑھ دوڑی، اس واقعے کی دل دہلا دینے والی ویڈیو سامنے آئی ہے۔

    تفصیلات کے مطابق سورت میں سڑک کے کنارے بنے ڈھابہ ہوٹل میں ایک تیز رفتار ٹیمپو گھس گئی، اور وہاں بیٹھے لوگوں کو کچل دیا، حادثے میں 3 افراد شدید زخمی ہو گئے۔

    ڈھابے پر باپانو بگیچو (باپ کا باغ) کا بورڈ لگا ہوا تھا، جو سرولی کے علاقے میں واقع ہے، سی سی ٹی وی کیمرے میں ڈھابے میں اچانک گھسنے والی گاڑی کا دل دہلا دینے والا منظر محفوظ ہو گیا۔

    تیز رفتار گاڑی نے ڈھابے کی دیوار توڑ دی تھی، اور رکھا فرنیچر بھی تہس نہس ہو گیا تھا، وہاں چند لوگ کرسیوں پر بیٹھے ہوئے تھے، ان پر بھی گاڑی چڑھ دوڑی۔

    اطلاعات کے مطابق ڈرائیور نے پک اپ گاڑی کا کنٹرول کھو دیا تھا، واقعے کے وقت ڈھابے کے اندر 8 سے 10 گاہک موجود تھے۔ حادثے کے بعد ڈرائیور موقع سے فرار ہو گیا۔