معروف گلوکار اور پاکستانی پاپ بینڈ اسٹرنگز کا حصہ رہنے والے بلال مقصود نے انکشاف کیا ہے کہ انہیں ایک بار معروف بینڈ وائٹل سائنز میں شامل ہونے کی پیشکش کی گئی تھی۔
تفصیلات کے مطابق بلال مقصود نے سماجی رابطے کی ویب سائٹ انسٹا گرام پر وائٹل سائنز کا ایک گانا تم مل گئے گاتے ہوئے اپنی ویڈیو پوسٹ کی اور ایک دلچسپ واقعہ سنایا۔
انہوں نے لکھا کہ 90 کی دہائی میں روحیل حیات نے ان سے پوچھا تھا کہ کیا وہ وائٹل سائنز میں شامل ہونا چاہیں گے؟
بلال نے لکھا کہ وہ اس وقت ان کے اسٹوڈیو میں بیٹھے تھے اور روحیل حیات نے ان سے پوچھنے کے بعد جنید جمشید کو کال کی اور کہا کہ ہمیں اپنے بینڈ میں بلال مقصود کو شامل کرنا چاہیئے۔
لیکن جنید جمشید نے واضح طور پر منع کردیا اور کہا، نہیں۔ اس کے بعد روحیل نے فون رکھا اور کہا معاف کرنا ایسا ممکن نہیں۔ بلال نے لکھا کہ ایسا ہوا تھا کہ مجھے وائٹل سائنز میں شمولیت کی پیشکش کی گئی اور وہ پیشکش 15 سیکنڈز بعد ہی غائب ہوگئی۔
خیال رہے کہ بلال مقصود کے بینڈ اسٹرنگز کے 2 البم مداحوں کے لیے ریلیز کیے جاچکے ہیں جبکہ ان کا گانا دور بے حد مشہور ہوا اور پسند کیا گیا تھا۔