بیروت: لبنان کے دارالحکومت بیروت میں ہونے والے دھماکوں کی تحقیقات کرنے والے جج نے اعلیٰ افسر سمیت 2 افراد کے وارنٹ گرفتاری جاری کر دیے۔
غیر ملکی خبر رساں ادارے کے مطابق جج فادی ساون نے دھماکوں کی تحقیقات کے سلسلے میں دو افراد کے وارنٹ گرفتاری جاری کر دیے۔
لبنان کی سرکاری نیوز ایجنسی این این اے نے کسٹم اتھارٹی کے ڈائریکٹر ہنا فارس اور جس گودام میں دھماکے ہوئے اس کے ایک کنٹریکٹر نائلہ الحاج کے وارنٹ جاری کرنے کی تصدیق کی ہے۔
دھماکوں کے سلسلے میں تحقیقات کا سامنا کرنے والے 25 افراد میں سے 6 افراد کے وارنٹ گرفتاری جاری کر دیے گئے ہیں، ان میں بیروت پورٹ کے ڈائریکٹر جنرل حسن کورائیتم اور کسٹم کے ڈائریکٹر جنرل بدری شامل ہیں۔
حکومت کی جانب سے کی جانے والی تحقیقات میں غیر ملکی ماہرین معاونت کر رہے ہیں جن میں امریکی ایف بی آئی کے اہلکار بھی شامل ہیں۔
فرانس کی جانب سے بھی دھماکوں کی الگ تحقیقات کی جا رہی ہے، فرانس کے کئی شہری ان دھماکوں میں مارے گئے تھے۔
اسلام آباد : احتساب عدالت نے توشہ خانہ ریفرنس میں نوازشریف کے اشتہار اورآصف زرداری کےوارنٹ جاری کردئیے، فاضل جج نے کہا نوازشریف دانستہ عدالتی کارروائی کاحصہ نہیں بن رہے اور یہ کرمنل کیس ہے، آصف زرداری کو بھی پیش ہونا پڑے گا۔
تفصیلات کے مطابق احتساب عدالت میں سابق صدر آصف زرداری اور سابق وزیراعظم نواز شریف کےخلاف توشہ خانہ ریفرنس پرسماعت ہوئی ، مسلسل عدم پیشی پر عدالت نےنوازشریف کواشتہاری قرار دینے کی کارروائی شروع کی اور جج محمد اصغر علی نے نواز شریف کے اشتہار جاری کر دیے۔
جج اصغر علی نے کہا نواز شریف کےناقابل ضمانت وارنٹس پر کوئی عملدرآمد نہ ہو سکا، نواز شریف دانستہ طور پر عدالتی کارروائی کا حصہ نہیں بن رہے، جس پر نیب کے وکیل کا کہنا تھا کہ کیس میں3ملزمان ہیں،نوازشریف کےنام عدالت نےوارنٹ جاری کیے۔
نیب نے نواز شریف کو سمن برطانیہ بھجوانے کی رپورٹ عدالت میں پیش کر دی اور بتایا نوازشریف برطانیہ میں ہیں،دفترخارجہ کےذریعے وارنٹ بھیجے،
جج اصغر علی نے قرار دیا کہ کرمنل کیس ہے آصف زرداری کو پیش تو ہونا پڑےگا، وکیل فاروق ایچ نائیک نے کہا کوروناکےدن ہیں اور آصف زرداری کی عمر زیادہ ہے، ان کے آنےسےلوگ اکٹھے ہوں گے رش بنے گا، جس پرجج کا کہنا تھا کہ آصف زرداری کو کورونا ہے تونہیں، آصف علی زرداری کےوارنٹ جاری کردیتے ہیں۔
فاروق ایچ نائیک نے کہا آصف زرداری کی جانب سےمیں پیش ہو رہا ہوں، تو جج اصغرعلی کا کہنا تھا کہ طویل تاریخ دےدیتا ہوں پھرآصف زرداری پیش ہو جائیں، جورپورٹ پیش کی ہے وہ اطمینان بخش نہیں۔
وکیل نیب سردارمظفر نے کہا فاروق ایچ نائیک کہہ رہےہیں آصف زرداری کےپیش ہونےسےرش ہو گا، اگررش ہو گاتویہ انتظامیہ کا کام ہےکہ وہ کنٹرول کریں، کوئی رعایت نہ کی جائے،ناقابل ضمانت وارنٹ جاری کیےجائیں، یوسف رضا گیلانی کوعدالت نےاستثنیٰ دیا توآج ان کا وکیل بھی پیش نہیں ہوا، یوسف رضا گیلانی کا استثنیٰ بھی ختم کیا جانا چاہیے۔
فاروق ایچ نائیک نے بتایا کہ آصف زرداری کو ہائیکورٹ نےطبی بنیادپرضمانت دی تھی،آصف زرداری پرکیس پہلی بار نہیں بنائے گئے، 20 سال سے آصف زرداری کےخلاف کیس بنتےدیکھ رہا ہوں، وارنٹ توتب جاری کیے جائیں جب آصف زرداری پیش نہ ہوں، آئندہ سماعت پرآصف زرداری عدالت میں پیش ہوجائیں گے۔
وکیل فاروق ایچ نائیک کا کہنا تھا کہ یوسف رضاگیلانی کوروناوائرس کاشکارہوئےتھے، میں یوسف رضاگیلانی کےساتھ تھااس لیےآئسولیشن میں چلاگیاتھا، عدالت کہےتویوسف رضاگیلانی کی طرف سےبیان حلفی دےدیتاہوں۔
فاروق ایچ نائیک نے کہا بیان دے رہا ہوں آصف زرداری آئندہ سماعت پرپیش ہوں گے، بطورسینئر وکیل بیان حلفی دےرہاہوں،یہ بڑی بات ہوتی ہے ، آصف زرداری سابق صدرپاکستان ہیں وہ کہیں بھاگ نہیں رہے۔
احتساب عدالت کے جج نے کہا میں نے اب آرڈر کر دیا ہے اب واپس نہیں ہو گا، عدالت نےآپ سے ایڈریس لے کر سمن جاری کیالیکن وہ پھربھی پیش نہیں ہوئے۔
احتساب عدالت نے نواز شریف کے اشتہار اور آصف زرداری کے وارنٹ جاری کرتےہوئے ریفرنس پر سماعت 17 اگست تک ملتوی کردی۔
لاہور : ماڈل ٹاؤن کچہری عدالت نے غیر قانونی طور پر مگر مچھ اور اژدھے پالنے پر گلوکارہ رابی پیرزادہ کے قابل ضمانت وارنٹ گرفتاری جاری کر دیئے۔
تفصیلات کے مطابق لاہور میں ماڈل ٹاؤن کچہری عدالت گلوکارہ رابی پیرزادہ پر مگرمچھ ،اژدھا پالنے کیخلاف درخواست پر سماعت ہوئی ، عدالتی حکم کے باوجود رابی پیرزادہ پیش نہ ہوئیں ، عدم حاضری پر عدالت نے رابی پیرزادہ کےقابل ضمانت وارنٹ گرفتاری جاری کردیئے۔
جوڈیشل مجسٹریٹ نے سماعت 11 اکتوبر تک ملتوی کردی۔
رابی پیرزادہ کے وکیل نے عدالت میں وکالت نامہ جمع کرا دیا اور کہا وائلڈلائف کی رپورٹ عدالت میں پیش نہیں کی گئی، جس پر وائلڈ لائف کا کہنا تھا کہ ملزمہ نے غیر قانونی طورپر اژدھے اورمگر مچھ پال رکھے ہیں۔
یاد رہے 13 ستمبر کو غیرقانونی طور پر اژدھے، مگرمچھ اور سانپ رکھنے پر گلوکارہ کے خلاف محکمہ جنگلی حیات نے کارروائی کا آغاز کیا تھا اور رابی پیرزادہ کے خلاف چالان مرتب کرکے مقامی عدالت میں پیش کیا تھا۔
ذرائع کا کہنا تھا کہ رابی پیرزادہ کے خلاف کارروائی سوشل میڈیا پر موجود ویڈیوز کا نوٹس لے کر عمل میں لائی گئی۔
محکمہ جنگلی حیات نے رابی پیرزادہ پر الزام عائد کیا تھا کہ انہوں نے مگرمچھ، سانپ ، اژدھے رکھے ہیں جو کہ وائلد لائف ایکٹ کی خلاف ورزی ہے۔
واضح رہے کہ گلوکارہ رابی پیرزادہ اکثر اپنے سوشل میڈیا اکاؤنٹ ٹویٹر اور انسٹاگرام پر سانپ، اژدھے اور مگر مچھ کے ہمراہ ویڈیو اور تصاویر شیئر کرچکی ہیں۔
خیال رہے کہ رابی پیرزادہ نے سانپ اور مگرمچھ کے ساتھ ایک ویڈیو بنائی تھی، جس میں انہوں نے بھارتی وزیراعظم نریندر مودی کو دھمکی دیتے ہوئے کہا تھا کہ یہ نریندری مودی کے لیے تحفہ ہے۔
راولپنڈی: جعلی اکاؤنٹ کیس میں آصف زرداری کی بہن فریال تالپور کے وارنٹ گرفتاری جاری کردئیے گئے۔
تفصیلات کے مطابق نیب ذرائع کا کہنا ہے کہ جعلی اکاؤنٹ کیس میں آصف زرداری کی بہن فریال تالپور کے وارنٹ گرفتاری جاری کردئیے گئے ہیں، فریال تالپور کے وارنٹ گرفتاری نیب راولپنڈی کے حوالے کردئیے گئے۔
نمائندہ اے آر وائی نیوز ذوالقرنین حیدر کے مطابق چیئرمین نیب جسٹس (ر) جاوید اقبال نے وارنٹ گرفتاری جاری کرنے کی منظوری دی۔
آصف زرداری کی ہمشیرہ فریال تالپور کی گرفتاری کے لیے نیب راولپنڈی کی ٹیم تشکیل دے دی گئی ہے۔
ذرائع کے مطابق فریال تالپور کے مقام کی تصدیق نہیں ہوسکی ہے، نیب کی ٹیم نے اسلام آباد میں ان کی رہائش گاہ پر چھاپہ مارا البتہ غیر موجودگی پر وہ وہاں سے ناکام لوٹے۔
ذرائع کا یہ بھی کہنا ہے کہ فریال تالپور کی رہائش گاہ کو سب جیل قرار دئیے جانے کا امکان ہے انہیں سب جیل میں رکھ کر ہی تفتیش کی جائے گی۔
واضح رہے کہ دو روز قبل احتساب عدالت نے جعلی اکاؤنٹ کیس میں گرفتار سابق صدر آصف علی زرداری کو 21 جون تک جسمانی ریمانڈ پر نیب کے حوالے کیا ہے، نیب نے زرداری کے 14 روزہ جسمانی ریمانڈ کی استدعا کی تھی۔
یاد رہے کہ کیس میں آصف زرداری،فریال تالپورکی عبوری ضمانت میں 6 بار توسیع کی جا چکی تھی۔
آصف زرداری اور فریال تالپور پر جعلی اکاؤنٹس کے ذریعے غیر قانونی طریقے سے رقم منتقلی کا الزام ہے، اس ضمن میں منی لانڈرنگ کیس احتساب عدالت میں زیر التوا ہے۔
لاہور : نواز شریف، شاہد خاقان عباسی کے خلاف بغاوت کا مقدمہ درج کرنے کی درخواست پر سماعت کے دوران لاہور ہائی کورٹ نے شاہد خاقان عباسی کے وارنٹ گرفتاری جاری کر دیئے جبکہ اسلام آباد پولیس کو سرل المیڈا سے بھی نوٹس کی تعمیل کرانے کا حکم دیا۔
تفصیلات کے مطابق جسٹس مظاہر علی اکبر نقوی کی سربراہی میں تین رکنی بنچ نے نواز شریف اور شاہد خاقان عباسی کیخلاف بغاوت کا مقدمہ درج کرنے کی درخواست پر سماعت کی۔
بنچ کے سربراہ جسٹس مظاہرہ علی اکبر نقوی نے استفسار کیا کہ شاہد خاقان عباسی ہیش کیوں نہیں ہوئے، فل بنچ نے سابق وزیراعظم کے پیش نہ ہونے پر ان کے قابل ضمانت وارنٹ گرفتاری جاری کر دیئے۔
عدالت نے سابق وزیراعظم کو دس لاکھ کے مچلکے جمع کرانے کی ہدایت کی۔
عدالت نے نواز شریف کو سپرنڈنٹ اڈیالہ جیل اور صحافی سرل الیمیڈا کو ایس ایس پی اسلام آباد کے ذریعے نوٹس جاری کئے اور ایس ایس پی آپریشنز اسلام آباد کوسرل المیڈا سے نوٹس کی تعمیل کرانے کا حکم بھی دیا گیا۔
درخواست گزار کے وکیل نے دلائل میں کہا نواز شریف نے بمبئی حملوں کے متعلق بیان دیا، جس پر سیکیورٹی کونسل کا اجلاس بلایا گیا اور سابق وزیر اعظم شاہد خاقان عباسی نے بند کمرے کی کارروائی کی تفصیلات نواز شریف کو بتائیں اور اس طرح اپنے حلف کی پاسداری نہیں کی۔
درخواست گزار نے کہا نواز شریف نے ممبئی حملوں کے متعلق سرل المیڈا کو انٹرویو دیا، جس سے ملکی سالمیت کو نقصان پہنچا اور شاہد خاقان عباسی نے مکمل معاونت کی لہذا عدالت نواز شریف اور شاہد خاقان عباسی اور سرل المیڈا کیخلاف بغاوت کا مقدمہ درج کرنے کا حکم دے۔
یاد رہے سابق وزیر اعظم نواز شریف نے اپنے انٹرویو میں کہا تھا کہ ممبئی حملوں میں پاکستان میں متحرک عسکریت پسند تنظیمیں ملوث تھیں، یہ لوگ ممبئی میں ہونے والی ہلاکتوں کے ذمہ دار ہیں، مجھے سمجھائیں کہ کیا ہمیں انہیں اس بات کی اجازت دینی چاہیے کہ سرحد پار جا کر ممبئی میں 150 لوگوں کو قتل کردیں۔
اسلام آباد: وزیر خزانہ اسحق ڈار کے تمام بینک اکاؤنٹس منجمد کردیئے گئے نیب کی ٹیم نے ان کے گھر پر چھاپہ بھی مارا، جب کہ ان کی تمام جائیداد کی خرید و فروخت اور منتقلی پر پابندی عائد کردی گئی ہے۔
اے آر وائی نیوز کے نمائندے ذوالقرنین حیدر کے مطابق نیب حکام کی جانب سے مختلف شہروں میں اسحق ڈار کی تمام جائیداد کی خریدو وفروخت اور منتقلی پر پابندی کا حکم نامہ جاری کردیا گیا ساتھ ہی بینک اکاؤنٹس بھی منجمد کردیئے گئے ہیں۔
نمائندے کے مطابق نیب لاہور کی جانب سے ایک خط ایل ڈی اے، اسلام آباد اتھارٹی، ڈی ایچ اے سوسائٹی، سینیٹ کی ہاؤسنگ سوسائٹی سمیت مختلف بینکوں کو بھی لکھا گیا ہے۔
خط میں کہا گیا ہے کہ وزیر خزانہ اسحق ڈار کے خلاف بدعنوانی کے مقدمات کی تحقیقات چل رہی ہے اس لیے ان کی جتنی بھی جائیداد ہے اس کی خریدو فروخت اور منتقلی پر پابندی عائد کردی جائے۔
اس حوالے سے نیب حکام کا کہنا ہے کہ اسحاق ڈار کےخلاف کیس چل رہا ہے، لہٰذا ان کی جائیداد نہ تو خریدی جاسکتی ہے اور نہ کسی کو منتقل کی جاسکتی ہے۔
نیب نے بینکوں کو ہدایت دی ہے کہ اسحق ڈار کے اکاؤنٹس میں موجود تمام رقم کہیں منتقل نہیں ہوسکتی انہیں منجمد کردیا جائے، اگر کسی ادارے نے بھی قانون کی خلاف ورزی کی تو اس کے خلاف سخت کارروائی عمل میں لائی جائے گی۔
اطلاعات ہیں کہ بینکوں نے ان کے اکاؤنٹس اور اداروں نے ان کی جائیداد کی فروخت یا کسی اور کو منتقلی پر پابندی عائد کردی ہے۔
نیب کا خط اے آر وائی نیوز نےحاصل کرلیا، اسحاق ڈارکی جائیداد ضبط کرنے کی خبر سب سے پہلے اے آر وائی نیوز نےگزشتہ روز نشر کی تھی۔
نیب نے اسحاق ڈارکے گھر پر چھاپہ نہیں مارا، نوٹس دینے گئے، ترجمان
تازہ ترین اطلاعات کے مطابق نیب کی ٹیم نے اسحاق ڈار کے گھر پر چھاپہ مارا ہے اور ملازمین سے پوچھ گچھ کی ہے، تاہم نیب ترجمان نے خبر کی تردید کرتے ہوئے کہا ہے کہ اسحاق ڈار کے گھر چھاپہ نہیں مارا، ان کی رہائش گاہ پر نوٹس دینے گئے تھے۔
نیب عدالت کی جانب سے آج ہی وارنٹ جاری ہوئے ہیں اور نیب کے تفتیشی افسر کی سربراہی میں دو رکنی ٹیم نے اسی بنیاد پر آج منسٹرز انکلیو میں واقع ان کے گھر پرنوٹس ارسال کیا ہے۔
خیال رہے کہ اسحاق ڈار اس وقت ملک میں نہیں ہیں، تاہم اطلاعات ہیں کہ اسحاق ڈار نے نیب کی ٹیم کو یقین دہانی کرائی ہے کہ وہ جلد وطن واپس پہنچیں گے۔
وزیرخزانہ اسحاق ڈار کے خلاف احتساب عدالت نے اثاثہ جات کیس میں وارنٹ گرفتاری وزارت داخلہ کو بھیج دیئے، اسحاق ڈار نے نیب ریفرنس پر ضمانت قبل از گرفتاری کروانے کا فیصلہ کر لیا ہے۔
آج بروز بدھ اسلام آباد کی احتساب عدالت میں وزیر خزانہ اسحاق ڈار کے خلاف آمدنی سے زیادہ اثاثے بنانے کے نیب ریفرنس کی سماعت ہوئی۔ عدالت میں ان کی عدم پیشی پر برہمی کا اظہار کیا گیا، سماعت کے دوران نیب نے وفاقی وزیرِ خزانہ کے وارنٹ گرفتاری جاری کرنے کی استدعا کی۔
وفاقی وزیرِ خزانہ اور مسلم لیگ ن کے اہم رہنما اسحاق ڈار کی جانب سے ان کے پروٹوکول آفیسر فضل داد احتساب عدالت کے سامنے پیش ہوئے۔
عدالت نے نیب کی درخواست پر پیش رفت کرتے ہوئے اثاث جات کیس میں اسحاق ڈار کے قابلِ گرفتاری وارنٹ جاری کیے اور حکم دیا کہ انہیں 25 ستمبر کو گرفتار کرکے عدالت میں پیش کیا جائے۔
گرفتاری کے احکامات جاری کرنے کے ساتھ ہی عدالت نے یہ بھی قرار دیا کہ وفاقی وزیرِ خزانہ اسحاق ڈار10لاکھ روپےکےمچلکوں کےعوض ضمانت کراسکتےہیں۔
ذرائع کے مطابق نیب کے بھیجے گئے وارنٹ گرفتاری وزارت خارجہ کو موصول ہوگئے ہیں، وزارت خارجہ اسحاق ڈار کے لندن کے گھر کے باہر وارنٹ چسپاں کرنے کو یقینی بنائے گی۔
ذرائع کا مزید کہنا ہے کہ وفاقی وزیر خزانہ اسحاق ڈار نے نیب ریفرنس پر ضمانت قبل از گرفتاری کروانے کا فیصلہ کر لیاہے۔
یاد رہے کہ سپریم کورٹ کے فیصلے کے بعد ڈپٹی پراسیکیوٹرجنرل نیب کی سربراہی میں نیب پراسیکیوشن ونگ نے سابق وزیراعظم نوازشریف اور ان کے بچوں ، داماد اور اسحاق ڈار کے خلاف احتساب عدالت میں ریفرنسزدائرکیے تھے۔قومی احتساب بیورو کی ٹیم نے شریف خاندان کے خلاف 3 اور وزیرخزانہ اسحاق ڈار کے خلاف 1 ریفرنس دائر کیا تھا۔
وزیرخزانہ اسحاق ڈار کے خلاف سیکشن 14 سی لگائی گئی ہے ‘جو آمدن سے زائد اثاثے رکھنے سے متعلق ہے۔ نیب کی دفعہ 14 سی کی سزا 14 سال مقرر ہے۔
یاد رہے کہ 28 جولائی کوسپریم کورٹ کے پانچ رکنی بینچ نے پاناما کیس کے فیصلے میں سابق وزیراعظم نوازشریف کو نااہل قرار دیتے ہوئے ان کے اور ان کے خاندان کے افراد کے خلاف نیب میں ریفرنس دائر کرنے کا حکم دیا تھا۔
واضح رہے کہ سپریم کورٹ نے نیب کو حکم دیا تھا کہ وہ 6 ہفتے کے اندر نوازشریف اور ان کے بچوں مریم نواز، حسین نواز، حسن نواز اور اسحاق ڈار کے خلاف ریفرنس دائر کرے اور 6 ماہ میں ان پر کارروائی مکمل کی جائے۔
کیا حکومت کو اسحاق ڈار کے سوا کوئی بندہ نہیں ملا ؟ کامل علی آغا
علاوہ ازیں سینیٹر کامل علی آغا نے کہا ہے کہ وزیرخزانہ ملک میں موجود نہیں این ایف سی پر کیا بات کریں؟ حکومت کی نااہلی ہے کہ ایسا شخص وزیر بنایا گیا جس کےوارنٹ گرفتاری نکلے ہوئے ہیں۔
وزیرخزانہ بھاگے ہوئے ہیں، اشتہاری قراردیئےجاسکتےہیں، کامل علی آغا کا کہنا تھا کہ کیا حکومت کو اور کوئی بندہ نہیں ملا اس وزارت کیلئے؟
انہوں نے پیشکش کی کہ اگرکوئی بندہ نہیں تو ہم حکومت کو شبلی فراز ادھار پر دے سکتے ہیں، یہ سنجیدہ مسئلہ ہے اس کانوٹس لیاجائے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
اسلام آباد : نیب نے ڈی ایچ اے اسکینڈل میں ملوث کامران کیانی کے وارنٹ گرفتاری جاری کر دیئے۔
نیب ذرائع کے مطابق کامران کیانی پر 16 ارب روپے کی کرپشن کا الزام ہے، کامران کیانی کو متعدد نوٹس بھجوائے گئے لیکن وہ تحقیقات کا حصہ نہیں بنے۔
نیب ذرائع کے مطابق کامران کیانی کے اکاؤنٹس کی تفصیلات حاصل کرنے کیلئے اسٹیٹ بنک کو خط لکھ دیا گیا ہے جبکہ ان کی کمپنی کو بلیک لسٹ کرنے کا فیصلہ بھی کر لیا گیا ہے۔
ذرائع کے مطابق کامران کیانی ملک سے باہر ہیں، تاحال ان کی گرفتاری عمل میں نہیں لائی گئی۔
یاد رہے کہ نیب نے اربوں روپے کا فراڈ کے کیس میں میجر ریٹائرڈ کامران کیانی اور بریگیڈئیر ریٹائرڈ امجد کیانی کو نوٹس جاری کئے تھے۔
ذرائع کےمطابق نیب نےڈی ایچ اے کو معاہدہ کے باوجود زمینیں فراہم نہ کرنے پرتحقیقات کیں، نیب راولپنڈی نے ڈی ایچ اے کی شکایت پر کروڑوں روپے کےفارم ہاؤسز فروخت کرنے پر بھی تحقیقات کی تھیں۔
ڈی ایچ اے کے ساتھ کمپنی میسرز الیزیم نےتین ہزارکینال زمین خرید کرترقیاتی کام کرنے کا معاہدہ کیاتھا۔
اسلام آباد : دفعہ ایک سو چوالیس کی خلاف ورزی پر عمران خان اور طاہر القادری سمیت ستائیس افراد کے وارنٹ گرفتاری جاری کر دیئے گئے۔
تفصیلات کے مطابق اسلام آباد میں تحریک انصاف اور پاکستان عوامی دھرنے کے دوران دفعہ 144کی خلاف ورزی پر عمران خان اور طاہرالقادری سمیت 27رہنماﺅں کے وارنٹ گرفتاری جاری ہو گئے۔
مجسٹریٹ وقاص رشید نےدھرنا اور ہنگامہ آرائی کیس میں عمران خان اور ڈاکٹر طاہرالقادری سمیت ستائیس رہنماؤں اورکارکنان کو طلب کیا تھا۔
مذکورہ افراد سماعت پر پیش نہ ہوئے تو سب کی گرفتاری کے وارنٹ جاری کر دیئے۔ سماعت کے دوران ڈی جے بٹ کے خلاف بھی عبوری چالان پیش کیا گیا۔
عدالت نے مقدمے میں ڈی جے بٹ کی بریت کی درخواست بھی خارج کردی۔ واضح رہے کہ تئیس فروری کوغیرحاضری پر دونوں رہنما اشتہاری قرار پا سکتے ہیں۔
کراچی کی مقامی عدالت نے جنگ، جیو کے مالک میر شکیل الرحمان کے ناقابل ضمانت وارنٹ گرفتاری جاری کردیئے
جنگ، جیو کے مالک میر شکیل الرحمان کے ناقابل ضمانت وارنٹ گرفتاری جاری کردیئے گئے۔
جنگ، جیو گروپ نے اپنے اخبارات میں ڈیفنس میں جاری کریک ڈیولپمنٹ پروجیکٹ کے خلاف من گھڑت اور بے بنیاد خبریں شائع کی تھیں جس پر درخواست گزار یاسین ڈھیڈی نے میر شکیل اور وجاہت خان کے خلاف درخواست دائر کی تھیں۔
جس میں موقف اختیار کیا گیا تھا کہ جنگ گروپ کےاخبارات نے منظم طریقے سے عقیل کریم ڈھیڈی کیخلاف بےبنیاد خبریں شائع کی ہیں، جس پر عدالت نے میرشکیل الرحمان اور وجاہت خان کےناقابل ضمانت وارنٹ گرفتاری جاری کیے۔
عدالت کے باربار طلب کرنے پر وجاہت خان تو پیش ہوگئے تاہم میر شکیل اپنی روش کو برقرار رکھتے ہوئے پیش نہ ہوئے، عدالت نے آئندہ سماعت پر میر شکیل کو گرفتار کرکے پیش کرنے کا حکم دیا۔
کراچی : مقامی عدالت نے کم عمری کی شادی کے قانون کے تحت مقدمے میں دولہا اور گواہان کے اکیس مارچ کیلئے ناقابل ضمانت وارنٹ گرفتاری جاری کردیئے۔
تفصیلات کے مطابق سندھ اسمبلی میں کم عمری کی شادیوں سے متعلق قانون سازی کے بعد درج ہونیوالے پہلے مقدمے میں دولہا پینتیس سالہ عزیز اللہ ، نکاح خواں گواہان اور وکلاء کے ناقابل ضمانت وارنٹ گرفتاری جاری کر دئیے ہیں۔
نو سالہ آمنہ کی والدہ نے الزام لگایا ہے کہ ان کی بیٹی کو اغواء کرکے شادی کی گئی ہے، ناقابل ضمانت وارنٹ گرفتاری کیخلاف دولہا عزیز اللہ نے سندھ ہائی کورٹ سے رجوع کیا۔
عدالت نے میڈیکل رپورٹ طلب کرتے ہوئے لڑکی کو شیلٹر ہوم بھیجنے کا حکم جاری کردیا ہے ، ماہر قانون دان نور ناز آغا کا کہنا ہے کہ قانون سازی کے بعد اب ملزمان سزا سے نہیں بچ سکیں گے۔
کم عمری کی شادی سے متعلق اس مقدمے میں معاشرتی طور پر افسوس ناک بات یہ ہے کہ دولہا عزیز اللہ کم عمر آمنہ کا خالو ہے۔
