Tag: وارنٹ گرفتاری

اسلام آباد : احتساب عدالت کے جج محمد بشیر نے وفاقی وزیر خزانہ اسحاق ڈار کے ناقابل ضمانت وارنٹ گرفتاری سے متعلق تحریری حکم نامہ جاری کردیا.

تفصیلات کے مطابق احتساب عدالت کے جج محمد بشیر نے 3 صفحات پرمشتمل حکم نامہ جاری کیا ہے جس میں کہا گیا ہے کہ اسحاق ڈار کی صحت سے متعلق میڈیکل رپورٹ پیش نہیں کی گئی پہلے ڈاکٹر کرسٹوفر بیکر اور پھر ڈاکٹررنجیت کی رپورٹس جمع کرائی گئی ہیں.

جس میں سے ایک رپورٹ انجیوگرافی اور دوسری رپورٹ دل کی شریان سے متعلق تھی جب کہ 6 نومبر کو تیار ہونے والی بھارتی ڈاکٹر رنجیت کی جمع کرائی گئی رپورٹ بھی نئی نہیں ہے.

احتساب عدالت جج نے کہا کہ ان حقائق کو مد نظر رکھتے ہوئے وفاقی وزیر خزانہ اسحاق ڈار کی حاضری سے استثنیٰ کی درخواست کو تسلیم نہیں کیا جاسکتا، ملزم جان بوجھ کرعدالت کے سامنے پیش نہیں ہو رہا چنانچہ اسحاق ڈار کے ناقابل ضمانت وارنٹ گرفتاری جاری کردیئے گئے ہیں.

حکم نامے کے متن کے مطابق ضامن نے آئندہ سماعت پر ملزم کو پیش نہ کیا تو مچلکے ضبط ہوں گے جب کہ پراسیکیوٹر نیب نے وفاقی وزیر اسحاق ڈار کو اشتہاری قرار دینے کی کارروائی شروع کرنے کی استدعا بھی کی ہے.

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

اسلام آباد: سابق چیئرمین سینیٹ نیئر حسین بخاری کے وارنٹ گرفتاری جاری کر دیئے گئے ہیں، پولیس ان کے گھر پہنچ گئی ہے۔

سول جج اسلام آباد جواد حسین عادل نے پولیس اہلکار کو احاطہ عدالت میں تھپڑ مارنے اور سنگین نتائج کی دھمکیاں دینے کے الزام میں سابق چیئرمین سینیٹ کے وارنٹ جاری کرتے ہوئے تھانہ مارگلہ کی پولیس کو حکم دیا ہے کہ نیئر حسین بخاری کو فوری طور پر گرفتار کیا جائے۔

عدالتی حکم کے بعد پولیس آج شام ان کے گھر پہنچ گئی، تاہم پولیس کو ہدایت کی گئی ہے کہ سابق چیرمین سینیٹ کے گھر کے اندر داخل نہ ہوا جائے اور جب وہ گھر کے باہر آئیں تو انہیں حراست میں لیا جائے۔ پولیس ان کے گھر کے باہر اور آنے جانے والے راستوں پر نگرانی کررہی ہے۔

گذشتہ روز نیئر حسین بخاری اسلام آباد کچہری میں داخل ہوتے وقت تلاشی دینے کے معاملے پر پولیس اہلکار سے الجھ پڑے تھے۔

انہوں نے پولیس اہلکار کو دھکا دیا جبکہ ان کے بیٹے نے اس کو تھپڑ مارا۔ پولیس اہلکار کی درخواست پران کیخلاف مقدمہ درج کیا گیا تھا۔