واشنگٹن : عالمی جریدے واشنگٹن ٹائمز نے فیلڈمارشل سید عاصم منیر کو مرد آہن قرار دے دیا اور کہا فیلڈمارشل جنوبی ایشیا میں صدرٹرمپ کے نئے اسٹریٹجک پارٹنر بن سکتے ہیں۔
تفصیلات کے مطابق پاکستانی فوج کے سربراہ فیلڈ مارشل سید عاصم منیر کی قائدانہ صلاحیتوں اور ملٹری ڈپلومیسی کو بین الاقوامی سطح پر سراہا جا رہا ہے۔
امریکی اخبار واشنگٹن ٹائمز نے اپنی رپورٹ میں انہیں "مرد آہن” قرار دیتے ہوئے لکھا ہے کہ وہ جنوبی ایشیا میں صدر ڈونلڈ ٹرمپ کے ممکنہ اسٹریٹجک پارٹنر کے طور پر ابھر سکتے ہیں۔
رپورٹ میں کہا گیا کہ ۔ فیلڈ مارشل عاصم منیر انتہائی مضبوط اعصاب کے مالک اور سخت فیصلے کرنے کی بھرپور صلاحیت رکھتے ہیں، فیلڈ مارشل عاصم منیر نے امریکی سینٹرل کمانڈ اور پینٹاگون سے تعلقات بحال کیے، انہیں امریکا میں جنوبی ایشیا کی سیکیورٹی کے حوالے سے انتہائی بااثر ترین شخصیت کے طور پر دیکھا جا رہا ہے۔
امریکی اخبار نے آرمی چیف فیلڈ مارشل سید عاصم منیر کی قائدانہ صلاحیتوں اور پیشہ ورانہ خدمات کو زبردست خراجِ تحسین پیش کرتے ہوئے انہیں ایک پیشہ ور، خاموش طبع اور نظم و ضبط کے پابند فوجی افسر قرار دیا ہے۔
اخبار کے مطابق فیلڈ مارشل سید عاصم منیر کو نہ خود نمائی میں دلچسپی ہے اور نہ ہی سیاست میں کوئی رغبت رکھتے ہیں، پاک بھارت کشیدگی کے دوران ان کی عوامی مقبولیت میں نمایاں اضافہ ہوا جبکہ ان کی خوبیاں انہیں صدر ڈونلڈ ٹرمپ کے لیے ایک فطری اسٹریٹجک شراکت دار بناتی ہیں۔
عالمی جریدے نے لکھا کہ بھارت کے ساتھ بگڑتے تعلقات کے پس منظر میں فیلڈ مارشل عاصم منیر کی صدر ٹرمپ سے ملاقات نہایت اہمیت کی حامل رہی ، صدر ٹرمپ نے مداخلت کر کے پاکستان اور بھارت میں جنگ بندی کرائی، پاکستان نے اس پر امریکی صدر کا شکریہ ادا کیا جبکہ بھارتی وزیراعظم نریندر مودی نے ثالثی کی پیشکش کو مسترد کر دیا۔
رپورٹ میں مزید کہا گیا کہ فیلڈ مارشل نے افغانستان اور ایران سے لاحق خطرات سے نمٹنے کے لیے فوجی حکمتِ عملی کی تشکیل میں اہم کردار ادا کیا اور دہشت گرد تنظیموں کے خلاف مؤثر کارروائی کا مطالبہ کیا۔
اخبار کے مطابق فیلڈ مارشل عاصم منیر کی کامیاب ڈپلومیسی کے نتیجے میں پاک امریکا تعلقات خصوصاً انسدادِ دہشت گردی میں تعاون مزید مستحکم ہوا، پاکستان نے کابل ایئرپورٹ حملے کے ماسٹر مائنڈ کو گرفتار کر کے امریکا کے حوالے کیا، جس پر صدر ٹرمپ نے دہشت گردی کے خلاف پاکستان کی کاوشوں کی تعریف کی۔
رپورٹ میں یہ بھی کہا گیا کہ ٹرمپ انتظامیہ پاکستان کے ساتھ تعلقات کی بحالی اور اسٹریٹجک تعاون کو فروغ دینے کے لیے سرگرم نظر آ رہی ہے۔
فیلڈ مارشل عاصم منیر نے امریکی سینٹرل کمانڈ اور پینٹاگون سے تعلقات بحال کیے اور انہیں جنوبی ایشیا کی سکیورٹی کے حوالے سے انتہائی بااثر ترین شخصیت کے طور پر دیکھا جا رہا ہے۔
