Tag: واشنگٹن

واشنگٹن: وزیر اعظم عمران خان اور امریکی وزیر خارجہ مائیک پومپیو کی پاکستان ہاؤس، واشنگٹن ڈی سی میں ہونے والی ملاقات کا اعلامیہ جاری کر دیا گیا ہے۔

تفصیلات کے مطابق امریکی وزیر خارجہ مائیک پومپیو سے ملاقات میں وزیر اعظم عمران خان نے کہا کہ افغانستان کے سیاسی حل کی امید سے خطے میں امن کی راہ ہم وار ہو رہی ہے، پُر امن اور مستحکم افغانستان پاکستان کے لیے ناگزیر ہے.

وزیر اعظم کا کہنا تھا کہ افغان امن عمل میں پاکستان، امریکا کے درمیان گہرے روابط کی ضرورت ہے۔

ملاقات سے متعلق جاری اعلامیے میں کہا گیا ہے کہ وزیر اعظم نے امریکی صدر ڈونلڈ ٹرمپ کے ساتھ ملاقات پر اظہار اطمینان کیا اور کہا کہ مشترکہ مفادات کے لیے پاکستان اور امریکا کے مضبوط تعلقات ضروری ہیں۔

یہ بھی پڑھیں:  ڈونلڈ ٹرمپ سے ملاقات میں نہ تو امداد مانگی، نہ ہی ہم امداد چاہتے ہیں، عمران خان

عمران خان کا کہنا تھا کہ پاک امریکا مضبوط تعلقات خطے میں امن، استحکام اور خوش حالی کی ضمانت ہے، نیز ہم امریکا سے تعلقات میں مختلف شعبوں میں توسیع چاہتے ہیں۔

اعلامیے میں کہا گیا ہے کہ دونوں رہنماؤں نے پاکستان اور امریکا کے درمیان قریبی تعاون کی اہمیت پر زور دیا، دریں اثنا، وزیر اعظم نے امریکی وزیر خارجہ کو حکومتی کام یابیوں کے بارے میں بھی آگاہ کیا۔

اعلامیے کے مطابق ملاقات میں دہشت گردی کے خاتمے اور خطے میں امن کی کوششوں کا بھی خصوصی ذکر کیا گیا، کہا گیا کہ تمام پڑوسی ممالک کے ساتھ پر امن تعلقات پاکستان کی خواہش ہے، نیز پاکستان نے مدارس کو قومی دھارے میں لانے کے لیے بھی اقدامات کیے ہیں۔

ملاقات میں وزیر اعظم نے بھارت سے تعلقات کی بہتری کے لیے اقدامات پر بھی بات کی، کہا گیا کہ پر امن ہمسائیگی سے جنوبی ایشیا میں امن ،ترقی اور خوش حالی ہوگی۔

واشنگٹن: وزیر اعظم عمران خان سے صحت اور خوراک کے شعبوں سے وابستہ سرمایہ کاروں نے ملاقات کی، یہ ملاقات پاکستانی سفارت خانے میں ہوئی۔

تفصیلات کے مطابق امریکا میں پاکستان کے سفارت خانے میں وزیر اعظم عمران خان سے تاجروں اور سرمایہ کاروں نے ملاقات کی، وزیر خارجہ، مشیر خزانہ، مشیر تجارت اور وفاقی وزرا بھی ملاقات میں موجود تھے۔

سرمایہ کاروں نے وزیر اعظم سے خوراک اور صحت کے شعبوں میں سرمایہ کاری کی خواہش کا اظہار کیا، وفد نے شعبۂ صحت میں بہتری سے متعلق اقدامات پر بھی تبادلۂ خیال کیا۔

ملاقات میں پاکستان کے دور دراز علاقوں میں صحت سے متعلق سہولیات کی تجاویز پر مشاورت کی گئی، امریکا میں مقیم پاکستانی فزیشنز نے پاکستان واپسی پر بھی تبادلہ خیال کیا۔

یہ بھی پڑھیں:  واشنگٹن : وزیراعظم عمران خان تین روزہ دورے پرامریکا پہنچ گئے

دریں اثنا، وزیر اعظم عمران خان نے سرمایہ کاروں کی تجاویز کا خیر مقدم کیا، اور کہا کہ پاکستان میں سرمایہ کاروں کے لیے بے پناہ مواقع موجود ہیں۔

خیال رہے کہ وزیر اعظم عمران خان تین روزہ دورے پر امریکا میں ہیں، امریکا میں مقیم پاکستانیوں کا بھرپور جوش و خروش دیکھنے میں آ رہا ہے، کیپٹل ون ارینا میں وزیر اعظم کے جلسے کی تیاریاں مکمل ہو چکی ہیں جس میں 22 ہزار افراد کی شرکت متوقع ہے۔

کیپٹل ایرینا کے باہر لوگوں کی بڑی تعداد موجود ہے اور پاکستان زندہ باد کے نعرے لگا رہے ہیں، وزیر اعظم پاکستانی کمیونٹی سے رات 2 بجے خطاب کریں گے، جلسے کی براہ راست کوریج اے آر وائی نیوز پر دیکھی جا سکے گی۔