گوجرانوالہ: پیرس پیرالمپکس میں میڈل جیتنے والے حیدرعلی آبائی شہر پہنچے تو شہریوں نے قومی ہیروں کا والہانہ استقبال کیا۔
وطن واپسی کے بعد ایتھلیٹ حیدرعلی گوجرانوالہ پہنچ گئے جہاں لوگوں کی جانب سے ان کا بس اسٹاپ پر شاندار استقبال کیا گیا، قومی پیرا ایتھلیٹ حیدر علی کو ریلی کی شکل میں ان کی رہائش گاہ کھیالی لےجایا گیا۔
حیدرعلی نے پیرالمپکس گیمز 2024 کے ڈسکس تھرو مقابلوں میں عمدہ کارکردگی کا مظاہرہ کرتے ہوئے برانزمیڈل جیتنے کا اعزاز حاصل کیا تھا۔
اس سے قبل پیرس پیرالمپکس میں شرکت کے بعد حیدر علی غیرملکی ایئرلائن کی پرواز سے آج اسلام آباد پہنچے تھے۔
اسلام آباد ایئرپورٹ پر پاکستان اسپورٹس بورڈ کے افسران اور نیشنل پیرا لمپکس کمیٹی کے عہدیداران کے سوا کوئی بھی حیدر علی کے استقبال کے لیے موجود نہیں تھا۔
وزیراعظم شہباز شریف اور یوتھ پروگرام کے چیئرمین رانا مشہود کی تصاویر والا بینر حیدر علی کے استقبال کیلئے پہنچایا گیا تھا، جس کی تصاویر بھی سامنے آئی ہیں۔
حیدر علی نے پیرا لمپکس میں ڈسکس تھرو مقابلوں میں کانسی کا تمغہ جیتا تھا جو کہ پیرا لمپکس کی تاریخ میں پاکستانی پیرا ایتھلیٹ کا چوتھا میڈل تھا۔
یہ بات قابل ذکر ہے کہ حیدر علی ٹوکیو اولمپکس میں گولڈ میڈل جیت چکے ہیں، اس کے علاوہ حیدر علی ورلڈ پیرا گیمز اور ایشین پیرا گیمز میں بھی پاکستان کے لیے متعدد میڈلز حاصل کرچکے ہیں۔
