اسلام آباد : نگراں وزیراعظم نے ملک کی پہلی واٹر پالیسی کی منظوری دے دی، ناصرالملک نے متعلقہ مسائل کے حل کیلئے وزارت آبی وسائل کو اہم ہدایات جاری کردیں۔
تفصیلات کے مطابق اسلام آباد میں نگراں وزیراعظم ناصرالملک کی زیرصدارت اعلیٰ سطح کا اجلاس منعقد ہوا، اجلاس میں وزیر اعظم کو آبی وسائل اور پانی کے ذخائرسے متعلق بریفنگ دی۔
حکام نے بتایا کہ درجہ حرارت بڑھنے سے گلیشیئر پگھلنے کا عمل تیزی سےجاری ہے، اور ان گلیشیئرز کے پگھلنے سے پانی کی آمد میں حوصلہ افزا اضافہ ہوا ہے۔
اجلاس میں نگراں وزیراعظم کو قومی واٹر پالیسی کے نکات پر بھی تفصیلی بریفنگ دی گئی، نگراں وزیراعظم نے ملک کی پہلی واٹر پالیسی کی منظوری دے دی۔
وزیراعظم نے مستقبل کی ضروریات کے مطابق پالیسی ترتیب دینے کو سراہا، جسٹس ریٹائرڈ ناصرالملک نے مسائل کےحل کیلئے وزارت آبی وسائل کو ہدایات جاری کردیں۔
ان کا کہنا تھا کہ مستقبل میں پانی کی کمی سے نمٹنے کیلئے جدید ٹیکنالوجی کا استعمال انتہائی ضروری ہے، اس کے علاوہ پانی کےغیر ضروری استعمال کی روک تھام اور بچت پرعمل بھی ضروری ہے۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
