ٓممبئی: آریان منشیات کیس میں آریان خان کی گرفتاری کے بعد بالی وڈ کنگ شاہ رُخ خان اور نارکوٹکس کنٹرول بیورو (این سی بی) کے سابق زونل چیف سمیر وانکھیڑے کے درمیان ہونے والی گفتگو لیک ہو گئی ہے۔
گزشتہ دنوں سابق زونل چیف پر الزام لگایا گیا تھا کہ انہوں نے شاہ رُخ خان کے بیٹے آریان کو رہا کرنے کے لیے 25 کروڑ روپے کا مطالبہ کیا ہے۔
جس کے جواب میں آریان منشیات کیس میں نارکوٹکس کنٹرول بیورو (این سی بی) کے سابق افسر سمیر وانکھیڑے کی جانب سے ممبئی ہائیکورٹ میں گزشتہ روز سماعت کے دوران اپنے اور شاہ رُخ خان کے درمیان ہونے والی واٹس ایپ چیٹس کے اسکرین شاٹس جمع کرائے گئے ہیں جس میں شاہ رخ خان اِن سے اپنے بیٹے آریان خان کو گھر بھیجنے اور بیٹے کو جیل میں نہ ڈالنے کی التجا کر رہے ہیں۔
بھارتی میڈیا رپورٹس کے مطابق شاہ رخ خان نے سمیر وانکھیڑے کو پہلا پیغام 3 اکتوبر 2021ء کو بھیجا تھا جس میں انہوں نے کہا کہ سمیر صاحب، کیا میں آپ سے چند منٹ بات کر سکتا ہوں؟ میں جانتا ہوں کہ یہ قانونی نہیں ہے۔
آریان خان کیخلاف منشیات کیس میں چونکا دینے والے انکشافات
’ لیکن ایک باپ کی حیثیت سے، میں آپ سے بات کرنا چاہتا ہوں، آپ نے مجھے جو معلومات فراہم کی ہیں اس کے لیے میں آپ کا شکریہ ادا نہیں کر سکتا، مجھے امید ہے کہ وہ (آریان) ایک ایسا شخص بن جائے گا جس پر آپ اور مجھے فخر ہو سکتا ہے‘۔
شاہ رخ خان کے اس میسج کے جواب میں سمیر وانکھیڑے کا کہنا ہے کہ باپ ہونے کے ناطے میں صورتحال کو سمجھتا ہوں، فکر نہ کریں سب ٹھیک ہو جائے گا۔
اس میسج پر شاہ رُخ خان کہتے ہیں کہ پلیز میرے بیٹے کو گھر بھیج دیں، ایک باپ ہونے کے ناطے میں آپ سے درخواست کرتا ہوں، سمیر نے جواب میں کہا کہ ڈیئر شاہ رخ، میری خواہش ہے کہ میں آپ کو ایک دوست کی حیثیت سے اس صورتحال کی وضاحت کر سکتا نہ کہ زونل ڈائریکٹر کے طور پر۔
اس پر شاہ رخ کا کہنا تھا کہ پلیز میرے بیٹے کو گھر بھیج دیں، ایک باپ ہونے کے ناطے میں آپ سے درخواست کرتا ہوں، یہ ایک باپ سے ایک باپ کی درخواست ہے، میں اپنے بچوں سے اتنا ہی پیار کرتا ہوں جتنا آپ اپنے بچوں سے کرتے ہیں، سمیر پلیز میرا بھروسہ مت توڑیں، ورنہ میرا آپ اور سسٹم پر سے اعتماد اٹھ جائے گا۔
شاہ رُخ خان کا اس میسج میں مزید لکھنا ہے کہ پلیز ایک بار مجھ سے بات کریں، میں آپ سے باپ بن کر بات کروں گا، آپ قانون کے دائرے میں رہ کر میری مدد کر سکتے ہیں، میں ہمیشہ آپ کا مقروض رہوں گا، گھر والے اسے کسی بھی قیمت پر گھر لانا چاہتے ہیں۔
جس پر سمیر کا کہنا تھا کہ شاہ رخ، کاش میں آپ سے ایک دوست کی طرح بات کر سکتا اور سارا معاملہ سمجھا سکتا، میں آریان کو اچھا ماحول دینا چاہتا ہوں، اس کی بھلائی کے لیے سوچنا چاہتا ہوں، لیکن کچھ فضول لوگ اپنی خود غرضی کے لیے اس کام کو خراب کرنے میں لگے ہوئے ہیں۔
سمیر وانکھیڑے نے اپنے خلاف سی بی آئی کی کارروائی سے متعلق ممبئی ہائیکورٹ میں عرضی داخل کی اور دعویٰ کیا ہے کہ میرے خلاف انتقامی کارروائی کی جا رہی ہے، مجھ پر پہلے بھی بدعنوانی کے الزامات لگے جس کے ثبوت نہیں ملے، سی بی آئی کو بھی ثبوت نہیں ملے گا۔
واضح رہے کہ سمیر وانکھیڑے نے 2 اکتوبر 2021ء کو ممبئی سے گوا جانے والی کورڈیلیا کروز میں پارٹی کی اطلاع ملنے پر چھاپہ مارا تھا اور آریان خان کو یہاں سے گرفتار کیا تھا۔
اس کے بعد آریان خان 27 دن تک پولیس کی حراست میں رہے، آریان خان کو منشیات کیس میں آرتھر روڈ جیل بھی بھیجا گیا تھا، ٹھوس ثبوت نہ ہونے کے سبب آریان کو 28 اکتوبر کو رہا کردیا گیا تھا۔
