کراچی: پیپلز پارٹی کے رہنما شرجیل میمن نے وطن واپسی کا اعلان کردیا اور کہاہے کہ وہ وطن آکر تمام مقدمات کا سامنا کریں گے ،مقدمات جھوٹے اور بے بنیاد ہیں۔
اے آر وائی نیوز کے پروگرام الیونتھ آور میں میزبان وسیم بادامی سے دبئی سے لائیو بات کرتے ہوئے انہوں نے کہا کہ رواں ماہ اکتوبر میں ہی وطن واپس آکر نہ صرف مقدمات کا سامنا کروں گا بلکہ بےبنیاد مقدمات سے بری بھی ہوجاؤں گا، پہلے بھی مجھ پر لگائے گئے الزامات جھوٹے ثابت ہوئے امید ہے یہ بھی جھوٹےثابت ہوں گے۔
پلی بارگین کے سوال پر انہوں نے کہا کہ بارگین وہ کرے جس نے کرپشن کی ہو، میں نے نہ کوئی غلط کام کیا اور نہ کررہا ہوں، اپنا دفاع بھرپور طریقے سے کرسکتا ہوں، میں نے کہیں بھی اختیارات سے تجاوز نہیں کیا اسی لیے مقدمات کا سامنا کرنے آرہا ہوں، ای سی ایل میں میرا نام بلاوجہ ڈالا گیا۔
انہوں نے کہا کہ ممکن ہے مجھے انصاف نہ ملے میں بیمار ہوں، میرا علاج ہورہا ہے اس کے باوجود پاکستان آرہا ہوں چونکہ سیاسی ورکر ہوں اس لیے مقدمات کا سامنا ضرور کروں گا۔
ایک سوال پر شرجیل میمن کا کہنا تھا کہ میری واپسی سے متعلق پارٹی شریک چیرمین آصف زرداری سے بات نہیں ہوئی۔
انہوں نے مزید کہا کہ بغیر ریفرنس کے میرا نام ایک سال سے ای سی ایل میں ہے تو جن کے خلاف ریفرنس موجود ہے تو ان کا نام کیوں ای سی ایل میں نہیں ہے، اپنے دفاع کے لیے ٹرائل کورٹ بھی جائوں گا۔
واضح رہے کہ اربوں روپے کی کرپشن کے الزام میں شرجیل میمن کے ناقابل ضمانٹ وارنٹ جاری ہوچکے ہیں اور عدالت نے انہیں اشتہاری ملزم قرار دیا ہوا ہے۔
