ARYNews.tv | Urdu – Har Lamha Bakhabar

Tag: ورلڈ کپ 2019

  • ورلڈ کپ میں پاکستان کا شاندار کم بیک، انگلینڈ کو 14 رنز سے شکست

    ورلڈ کپ میں پاکستان کا شاندار کم بیک، انگلینڈ کو 14 رنز سے شکست

    ناٹنگھم: ورلڈ کپ 2019 کے اپنے دوسرے میچ میں پاکستان نے میزبان انگلینڈ کو 14 رنز سے شکست دے دی، جو روٹ اور جوز بٹلر کی سنچریاں بھی انگلینڈ کے کام نہ آسکیں، محمد حفیظ میچ کے بہترین کھلاڑی قرار پائے۔

    تفصیلات کے مطابق ناٹنگھم میں کھیلے جانے والے میچ میں پاکستان کی جانب دئیے جانے والے 349 رنز ہدف کے تعاقب میں انگلینڈ کی ٹیم 9 وکٹوں کے نقصان پر 334 رنز بناسکی، وہاب ریاض نے تین وکٹیں حاصل کیں۔

    انگلینڈ کی پہلی وکٹ 12 رنز پر گری جب شاداب خان نے جیسن رائے کو 8 رنز پر پویلین روانہ کیا، بیرسٹو 32 رنز بنا کر وہاب ریاض کی گیند پر سرفراز احمد کو کیچ دے بیٹھے۔

    جو روٹ نے 9 رنز پر بابر اعظم کی جانب سے کیچ ڈراپ کیے جانے کے بعد 107 رنز کی شاندار اننگز کھیلی، کپتان اوئن مورگن کو 9 رنز پر محمد حفیظ نے بولڈ کیا۔

    بین اسٹوکس 13 رنز بنا کر شعیب ملک کا شکار بنے، جوز بٹلر نے برق رفتار 103 رنز کی اننگز کھیلی، بٹلر کو محمد عامر نے آؤٹ کیا، معین علی 19 رنز پر ہمت ہار گئے۔

    کرس ووکس 21 رنز بنا کر وہاب ریاض کی گیند پر سرفراز احمد کو کیچ دے بیٹھے، جوفرا آرچر نے ایک رن پر پویلین لوٹ گئے۔

    پاکستان کے وہاب ریاض نے تین کھلاڑیوں کو پویلین کی راہ دکھائی، شاداب خان اور محمد عامر نے دو، دو وکٹیں حاصل کیں جبکہ محمد حفیظ کے حصے میں ایک وکٹ آئی۔

    قبل ازیں ناٹنگھم میں کھیلے جانے والے میچ میں گرین شرٹس نے مقررہ اوورز میں 8 وکٹوں کے نقصان پر 348 رنز بنائے اور میزبان انگلینڈ کو جیت کے لیے 349 رنز کا ہدف دے دیا، بابر اعظم اور سرفراز احمد نے نصف سنچریاں اسکور کیں۔

    قومی کرکٹ ٹیم کے اوپنرز فخر زمان اور امام الحق نے 82 رنز کا شاندار آغاز فراہم کیا، فخر زمان 36 رنز بنا کر معین علی کی گیند پر اسٹمپڈ آؤٹ ہوئے، امام الحق کو بھی 44 رنز پر معین علی نے پویلین روانہ کیا۔

    بابر اعظم نے 63 رنز کی شاندار اننگز کھیلی، محمد حفیظ 62 گیندوں پر 84 رنز بنا کر نمایاں رہے، حفیظ کی اننگز میں 8 چوکے اور 2 چھکے شامل تھے۔

    کپتان سرفراز احمد نے 55 رنز کی شاندار اننگز کھیلی انہیں ووکس نے آؤٹ کیا، آصف علی 14 رنز بنا کر کرس ووکس کا نشانہ بنے، شعیب ملک صرف 8 رنز بنا کر پویلین لوٹ گئے۔

    وہاب ریاض کو 4 رنز بنا کر کرس ووکس نے آؤٹ کیا، حسن علی اور شاداب خان 10، 10 رنز بنا کر ناٹ آؤٹ رہے۔

    انگلینڈ کے کرس ووکس نے 3 کھلاڑیوں کو پویلین کی راہ دکھائی، معین علی نے بھی تین وکٹیں حاصل کیں، مارک ووڈ نے دو وکٹیں لیں۔

    قبل ازیں انگلینڈ نے پاکستان کے خلاف ٹاس جیت کر فیلڈنگ کا فیصلہ کر لیا تھا، انگلش کپتان کا کہنا ہے کہ پچ اچھی لگ رہی ہے، باؤنڈریز بھی چھوٹی ہیں۔

    انگلش کپتان اوئن مورگن کا کہنا ہے کہ کوشش کریں گے پاکستان کو کم رنز پر روکیں، ٹیم میں مارک ووڈ کو شامل کیا گیا ہے۔

    دوسری طرف پاکستان ٹیم میں 2 تبدیلیاں کی گئی ہیں، حارث سہیل اور عماد وسیم کی جگہ شعیب ملک اور آصف علی کو ٹیم میں شامل کیا گیا ہے۔

    یہ بھی پڑھیں:  ورلڈ کپ 2019: ویسٹ انڈیز نے پاکستان کو 7 وکٹوں سے شکست دے دی

    کپتان سرفراز احمد نے کہا کہ ٹاس جیت جاتے تو پہلے بولنگ ہی کرتے، پچ اچھی ہے، کوشش کریں گے اچھا کھیلیں اور اچھا اسکور کریں۔

    پاکستان ٹیم کے کپتان کا کہنا تھا کہ ویسٹ انڈیز کے خلاف میچ بھلا کر اچھا کھیلیں گے، خیال رہے کہ پاکستان نے اپنا پہلا میچ ویسٹ انڈیز کے مقابل ہار دیا تھا۔

    31 مئی کو کھیلے گئے میں ویسٹ انڈیز نے پاکستان کو 7 وکٹوں سے شکست دی، پاکستان کی جانب سے دیا جانے والا 106 رنز کا ہدف، پاکستان کا ورلڈ کپ میں دوسرا کم ترین اسکور تھا جسے ویسٹ انڈین ٹیم نے 13.4 اوورز میں 3 وکٹوں کے نقصان پر پورا کر لیا۔

    یہ ایونٹ کا چھٹا میچ ہے، دونوں ٹیمیں اپنا ایک ایک میچ کھیل چکی ہیں جس میں انگلینڈ کو کام یابی اور پاکستان کو ناکامی کا سامنا کرنا پڑا۔

  • ورلڈ کپ کا پہلا اپ سیٹ، بنگلہ دیش کے ہاتھوں جنوبی افریقہ کو شکست

    ورلڈ کپ کا پہلا اپ سیٹ، بنگلہ دیش کے ہاتھوں جنوبی افریقہ کو شکست

    لندن: ورلڈ کپ 2019 کے پانچویں میچ میں بنگلہ دیش نے جنوبی افریقہ کو 21 رنز سے شکست دے دی، کپتان فاف ڈوپلیسی کے 62 رنز بھی ٹیم کے کام نہ آسکے۔

    تفصیلات کے مطابق اوول میں کھیلے جانے والے میچ میں بنگلہ دیش کی جانب سے دئیے جانے والے 331 رنز ہدف کے تعاقب میں جنوبی افریقی ٹیم 8 وکٹوں کے نقصان پر 309 رنز تک محدود رہی، مستفیض الرحمان نے تین وکٹیں حاصل کیں۔

    جنوبی افریقا کی پہلی وکٹ 49 رنز پر گری جب ڈی کوک 23 رنز پر رن آؤٹ ہوکر پویلین لوٹ گئے، مرکرام 45 رنزبنا کر شکیب الحسن کا شکار بنے، کپتان فاف ڈوپلیسی نے 62 رنز کی اننگز کھیلی۔

    ڈیوڈ ملر 38 رنز بنا کر مستیفض الرحمان کی گیند پر مہدی حسن کو کیچ دے بیٹھے، وین در ڈوسن کو 41 رنز پر محمد سیف الدین نے کلین بولڈ کیا۔

    فلک وائیو 8 اور کرس مورس صرف 10 رنز پر پویلین لوٹ گئے، جین پال ڈومینی 45 رنز پر ہمت ہار گئے، ربادا 13 اور عمران طاہر 10 رنز بنا کر ناٹ آؤٹ رہے۔

    بنگلہ دیش کے مستفیض الرحمان نے تین کھلاڑیوں کو پویلین کی راہ دکھائی، محمد سیف الدین نے دو وکٹیں حاصل کیں، مہدی حسن اور شکیب الحسن نے ایک، ایک وکٹ حاصل کی۔

    اس سے قبل جنوبی افریقہ نے ٹاس جیت کر بنگلہ دیش کو پہلے بیٹنگ کی دعوت دی، بنگلہ دیش نے مقررہ اوورز میں 6 وکٹوں کے نقصان پر 330 رنز بنائے اور جنوبی افریقہ کو جیت کے لیے 331 رنز کا ہدف دیا۔

    بنگلہ دیش کی پہلی وکٹ 60 رنز پر گری جب تمیم اقبال 16 رنز بنا کر پویلین لوٹ گئے، سومیا سرکار نے 30 گیندوں پر 42 رنز کی اننگز کھیلی، سومیا سرکار کو مورس نے آؤٹ کیا۔

    دو وکٹیں گرنے کے بعد شکیب الحسن اور مشفیق الرحیم کے درمیان شاندار شراکت داری قائم ہوئی، مشفیق الرحیم نے 78 اور شکیب الحسن نے 75 رنز کی شاندار اننگز کھیلی۔

    محمد متھن 21 رنز بنا کر عمران طاہر کا نشانہ بنے، محمود اللہ نے 46 رنز کی ناقابل شکست برق رفتار اننگز کھیلی، مصدق حسین 46 رنز بنا کر مورس کا شکار بنے مہدی حسن 5 رنز بنا کر ناٹ آؤٹ رہے۔

    جنوبی افریقہ کے عمران طاہر، فلک وائیو اور مورس نے دو، دو کھلاڑیوں کو پویلین کی راہ دکھائی۔

    واضح رہے کہ جنوبی افریقا اپنا ورلڈ کپ کا دوسرا میچ کھیل رہا ہے جبکہ پہلے میچ میں پروٹیز کو میزبان انگلینڈ نے 104 رنز سے شکست دی تھی۔

  • امید ہے کل کے میچ میں کم بیک کریں گے، اظہر محمود

    امید ہے کل کے میچ میں کم بیک کریں گے، اظہر محمود

    ناٹنگھم: قومی کرکٹ ٹیم کے بولنگ کوچ اظہر محمود نے کہا ہے کہ مومنٹم حاصل کرنے کے لیے ایک جیت کی تلاش ہے، امید ہے کل کے میچ میں کم بیک کریں گے۔

    تفصیلات کے مطابق قومی کرکٹ ٹیم کے بولنگ کوچ اظہر محمود نے کہا ہے کہ مجھے یقین ہے کہ ٹیم باؤنس بیک کرے گی، سابق کھلاڑیوں کو چاہئے کہ ٹیم کو سپورٹ کریں۔

    اظہر محمود نے کہا کہ فاسٹ بولر محمد عامر کا فارم میں آنا خوش آئند ہے، ہماری بولنگ میں اتنی صلاحیت ہے کہ وہ انگلینڈ کو 300 سے کم پر آؤٹ کردے گی۔

    قومی کرکٹ ٹیم کے بولنگ کوچ نے کہا کہ انگلینڈ کو بڑا اسکور کرنے کے لیے 300 گیندیں کھیلنی ہے جبکہ پاکستانی بولرز کو بس 10 اچھی گیندیں پھینکنی ہیں۔

    واضح رہے کہ قومی ٹیم ورلڈ کپ میں اپنا دوسرا میچ کل انگلینڈ کے خلاف کھیلے گی، قومی ٹیم نے ٹرینٹ برج ناٹنگھم میں بھرپور پریکٹس کی۔

    مزید پڑھیں: ورلڈ کپ کا آغاز مایوس کن ہوا: مکی آرتھر

    بارش کے باوجود پاکستانی پلیئرز فیلڈ میں رہے، بارش تھمنے کے بعد بلے بازوں نے پریکٹس کی اور آصف علی کو ہارڈ ہٹنگ کی بھرپور پریکٹس کرائی گئی۔

    خیال رہے کہ پاکستانی ہیڈ کوچ کا کہنا تھا کہ ہم نے شارٹ پچ بولنگ کی بہترین تیاری کی تھی، معلوم تھا کہ ان کے فاسٹ بولر ز شارٹ کریں گے۔ مکی آرتھر نے امید ظاہر کی کہ انگلینڈ کے خلاف ہونے والے آئندہ میچ میں بہترکارکردگی ہوگی۔

    یاد رہے کہ ورلڈ کپ کے پہلے میچ میں قومی ٹیم کو ویسٹ انڈیز کے ہاتھوں 7 وکٹوں سے شکست ہوئی تھی، پاکستانی ٹیم 105 رنز پر ڈھیر ہوگئی تھی۔

  • شعیب اختر نے سرفراز احمد کو موٹاپے کا شکار قرار دے دیا

    شعیب اختر نے سرفراز احمد کو موٹاپے کا شکار قرار دے دیا

    لاہور: ورلڈ کپ 2019 میں‌ویسٹ انڈیز کے خلاف عبرت ناک شکست نے قومی ٹیم کے کپتان سرفراز احمد کو ناقدین کا ہدف بنا دیا.

    تفصیلات کے مطابق میگا ایونٹ‌ کا مایوس کن آغاز کرنے پر گرین شرٹس پر تنقید کا سلسلہ جاری ہے، تجزیہ کاروں کی اکثریت کا رخ کپتان اور ٹیم مینجمنٹ کی جانب ہے.

    دنیائے کرکٹ‌کی تاریخ کے تیز ترین بالر شعیب اختر نے بھی ٹیم کو آڑے ہاتھوں‌ لیا،  سرفراز احمد کی فٹنس سے وہ شدید ناراض نظر آئے.

    شعیب اختر کا کہنا ہے کہ انھوں نے آج تک سرفرازجیسا موٹا کپتان نہیں دیکھا، سرفرازسے موٹاپے کی وجہ سے ہلا نہیں جاتا اور کیپنگ بھی نہیں ہوتی.

    مزید پڑھیں: بلے بازوں نے غلطیاں کیں اور وکٹیں گنوائیں، سرفراز احمد

    سابق ٹیسٹ کرکٹر اور سو میل کی نفیساتی حد کو عبور کرنے والے شعیب اختر نے نے ٹیم سلیکشن پربھی اعتراض اٹھایا، انھوں نے کہا کہ شعیب ملک کو نہ کھلاکرغلط کیا، اگلے میچ میں جب کھیلا جائے گا، تو کیا جواز ہوگا.

    خیال رہے کہ راولپنڈی ایکسپریس کو بھی اپنے کیریر کے آخر میں‌فٹنس اور بڑھتے وزن کے مسائل کا سامنا رہا تھا. یہ بھی یاد رہے کہ سری لنکا کو 1996 کا ورلڈ کپ جتوانے رانا ٹنگا ایک فربہ کرکٹر تھے.

  • ورلڈ کپ 2019: نیوزی لینڈ کا فاتحانہ آغاز،سری لنکا کو باآسانی شکست

    ورلڈ کپ 2019: نیوزی لینڈ کا فاتحانہ آغاز،سری لنکا کو باآسانی شکست

    کارڈف: ورلڈ کپ 2019 کے تیسرے میچ میں نیوزی لینڈ نے سری لنکا کو باآسانی شکست دے کر فاتحانہ آغاز کردیا۔

    تفصیلات کے مطابق کارڈف میں ہونے والے میچ میں  نیوزی لینڈ اور سری لنکا کی ٹیمیں مدمقابل تھیں، نیوزی لینڈ کے کپتان نے ٹاس جیت کر پہلے فیلڈنگ کا فیصلہ کیا اور سری لنکا کو بیٹنگ کی دعوت دی۔

    کیویز باؤلر میچ کے پہلے ہی اوور سے مخالف ٹیم پر بھاری نظر آئے، سری لنکا کا پہلا کھلاڑی چار کے مجموعی اسکور پر پویلین لوٹے تو اُس کے بعد کوئی بھی زیادہ دیر تک وکٹ پر نہ ٹک سکا، دوسری اور تیسری وکٹ بھی 46 پر گری، 53 پر چوتھی، 59 پر پانچویں، 60 پر چھٹی، 112 پر ساتویں، 114 پر آٹھویں، 130 پر نویں اور 136 پر دسویں وکٹ گری۔

    سری لنکن ٹیم نیوزی لینڈ کے خلاف 136 رنز پر ڈھیر ہوگئی جبکہ کپتان کرو نارتنے ناقابل شکست 52 رنز بنا کر نمایاں بلے باز رہے جبکہ نیوزی لینڈ کے ہینری اور ایل ایچ فرگوسن نے تین تین کھلاڑیوں کو پویلین کی راہ دکھائی جبکہ بولٹ، گرانڈ ہوم، نیشہم اور سانٹنر نے ایک ایک کھلاڑی کو آؤٹ کیا۔

    سری لنکا نے نیوزی لینڈ کو جیت کے لیے 137 رنز کا ہدف دیا جس کا تعاقب کرنے کے لیے کیویز کی جانب سے بیٹنگ کا آغاز گپتل اور منرو نے کیا۔ دونوں ہی بلے بازوں نے خوب جم کر اسٹروکس کھیلے اور ناقبل شکست رہے۔

    نیوزی لینڈ کی ٹیم نے 8.47 کی اوسط سے 137 رنز کا ہدف 16.1 اوورز میں ہی حاصل کرلیا۔ گپتل نے 51 گیندوں پر 2 چھکوں اور 8 چوکوں کی مدد سے 73 رنز بنائے جبکہ منرو نے 47 گیندوں کا سامنا کرتے ہوئے 1 چھکے اور 6 چوکوں کی مدد سے 58 کی ناقابلِ شکست اننگز کھیلی۔

    ورلڈ کپ 2019 کے تیسرے روز آج 4 ٹیمیں مدمقابل ہیں، نیوزی لینڈ اور سری لنکا کے درمیان میچ کے بعد دوسرا مقابلہ آسٹریلیا اور افغانستان کے درمیان کاؤنٹی گراؤنڈ برسٹول میں ہورہا ہے۔

    خیال رہے کہ آئی سی سی ورلڈ کپ کے لیے 10 ٹیمیں ایونٹ میں حصہ لے رہی ہیں۔ ٹیموں کو 2 گروپس میں تقسیم کیے جانے کے بجائے تمام ٹیمیں ایک دوسرے کے خلاف میچ کھیلیں گی۔

    ایونٹ میں دفاعی چیمپیئن آسٹریلیا، بھارت، پاکستان، انگلینڈ، نیوزی لینڈ، جنوبی افریقہ، ویسٹ انڈیز، بنگلہ دیش، سری لنکا اور افغانستان شامل ہیں۔

    آئی سی سی ورلڈ کپ کے ایونٹ میں 48 میچز کھیلے جائیں گے، فائنل اور سیمی فائنل سے قبل تمام ٹیمیں 9، 9 میچز کھیلیں گی جن میں سے 4 ٹیمیں سیمی فائنل میں جگہ بنائیں گی۔ فائنل 14 جولائی کو کھیلا جائے گا۔

  • کرس گیل نے ایک اور ریکارڈ اپنے نام کرلیا

    کرس گیل نے ایک اور ریکارڈ اپنے نام کرلیا

    ناٹنگھم: ویسٹ انڈیز کے جارح مزاج بلے باز کرس گیل نے اپنے کیریئر کے آخری ورلڈ کپ کا شاندار آغاز کرتے ہوئے ایک اور ریکارڈ اپنے نام کرلیا۔

    تفصیلات کے مطابق یونیورس باس کرس گیل نے پاکستان کے خلاف میچ میں تین چھکے لگا کر ورلڈ کپ کی تاریخ میں سب سے زیادہ 40 چھکے لگانے کا اعزاز حاصل کرلیا۔

    کرس گیل نے آج پاکستان کے خلاف میچ میں 34 گیندوں پر 50 رنز کی اننگز کھیلی، ان کی اننگز میں تین چھکے اور چھ چوکے شامل تھے، انہوں نے سب سے زیادہ چھکے مارنے کا ریکارڈ ورلڈ کپ کے 27 میچ کھیل کر حاصل کیا۔

    اس سے قبل یہ ریکارڈ جنوبی افریقی بلے باز اے بی ڈی ویلیئرز کے پاس تھا، ڈی ویلیئرز 23 میچوں میں 37 چھکے لگا کر دوسرے نمبر پر موجود ہیں۔

    آسٹریلوی ٹیم کے سابق کپتان رکی پونٹنگ ورلڈ کپ کے 46 میچوں میں 31 چھکے لگا کر تیسرے نمبر پر ہیں، نیوزی لینڈ کے اوپنر بلے باز برینڈن میکولم 34 میچوں میں 29 چھکے لگا کر چوتھے نمبر پر موجود ہیں۔

    بھارتی بلے باز سچن ٹنڈولکر اور سری لنکا کے سابق کھلاڑی سنتھ جے سوریا 27 چھکوں کے ساتھ پانچویں نمبر پر براجمان ہیں۔

    واضح رہے کہ ٹی ٹوینٹی انٹرنیشنل میں سب سے زیادہ چھکے لگانے کا اعزاز بھی کرس گیل کو حاصل ہے، کرس گیل نے ٹی ٹوینٹی کرکٹ میں 105 چھکے لگائے ہیں۔

  • بلے بازوں نے غلطیاں کیں اور وکٹیں گنوائیں، سرفراز احمد

    بلے بازوں نے غلطیاں کیں اور وکٹیں گنوائیں، سرفراز احمد

    ناٹنگھم: قومی کرکٹ ٹیم کے کپتان سرفراز احمد نے ویسٹ انڈیز کے خلاف شکست کا ذمہ دار بلے بازوں کو قرار دے دیا۔

    تفصیلات کے مطابق قومی کرکٹ ٹیم کے کپتان سرفراز احمد نے ویسٹ انڈیز سے عبرتناک شکست پر کہا ہے کہ آج کا دن ہمارے لیے بہت ہی برا تھا، بلے بازوں نے غلطیاں کیں اور وکٹیں گنوائیں۔

    سرفراز احمد نے کہا کہ بیٹنگ لائن مکمل فلاپ رہی جس کا نقصان ہوا، امید ہے ٹیم آئندہ میچز میں کم بیک کرے گی، ہمیں غلطیوں سے سیکھنا ہوگا۔

    ایک سوال کے جواب میں سرفراز احمد نے کہا کہ فاسٹ بولر محمد عامر کا وکٹیں لینا خوش آئند ہے۔

    دوسری جانب شائقین کرکٹ نے بھی پہلے ہی میچ میں قومی کرکٹ ٹیم کی کارکردگی کو مایوس کن قرار دیا ہے۔

    مزید پڑھیں: ورلڈ کپ 2019: ویسٹ انڈیز نے پاکستان کو 7 وکٹوں سے شکست دے دی

    واضح رہے کہ آج کھیلے جانے والے میچ میں ویسٹ انڈیز نے پاکستان کو 7 وکٹوں سے شکست دی، قومی ٹیم پہلے بیٹنگ کرتے ہوئے 105 رنز پر ڈھیر ہوگئی تھی۔

    ویسٹ انڈیز کے فاسٹ بولر اوشین تھامس کو میچ میں 4 وکٹیں حاصل کرنے پر مین آف دی میچ کا ایوارڈ دیا گیا۔

    قومی ٹیم ورلڈ کپ میں اپنا دوسرا میچ 3 جون بروز پیر کو میزبان انگلینڈ سے کھیلے گی، انگلینڈ نے اپنے پہلے میچ جنوبی افریقہ کو 104 رنز سے شکست دی تھی۔

  • ورلڈ کپ 2019: ویسٹ انڈیز نے پاکستان کو 7 وکٹوں سے شکست دے دی

    ورلڈ کپ 2019: ویسٹ انڈیز نے پاکستان کو 7 وکٹوں سے شکست دے دی

    ناٹنگھم: ورلڈ کپ 2019 کے دوسرے میچ میں ویسٹ انڈیز نے پاکستان کو 7 وکٹوں سے شکست دے دی۔ پاکستان کی جانب سے دیا جانے والا 106 رنز کا ہدف، پاکستان کا ورلڈ کپ میں دوسرا کم ترین اسکور ہے۔

    تفصیلات کے مطابق ورلڈ کپ 2019 کے دوسرے میچ میں پاکستانی ٹیم نے ویسٹ انڈیز کو جیت کے لیے 106 رنز کا ہدف دیا جو ویسٹ انڈین ٹیم نے 13.4 اوورز میں 3 وکٹوں کے نقصان پر پورا کرلیا، کرس گیل نے 50 رنز کی اننگز کھیلی۔

    ویسٹ انڈیز کی پہلی وکٹ 36 رنز پر گری جب شائے ہوپ 11 رنز بنا کر محمد عامر کا شکار بنے، ڈیرن براؤو بغیر کوئی رن بنائے پویلین لوٹ گئے، کرس گیل نے 34 گیندوں پر 50 رنز کی برق رفتار اننگز کھیلی۔

    پورن 34 رنز بنا کر ناٹ آؤٹ رہے، جبکہ ہیٹ میئر نے 7 رنز بنائے، پاکستان کی جانب سے محمد عامر نے تینوں وکٹیں حاصل کی۔

    قبل ازیں پاکستان اور ویسٹ انڈیز کے درمیان میچ میں ویسٹ انڈیز نے ٹاس جیت کر پہلے فیلڈنگ کا فیصلہ کیا۔ پہلے ہی میچ میں پاکستان کی بیٹنگ بری طرح ناکام ہوگئی اور پوری ٹیم 105 رنز پر ڈھیر ہوگئی۔ پاکستان کی پوری بیٹنگ لائن صرف 21.4 اوورز میں پویلین لوٹ گئی۔ فخر زمان اور بابر اعظم 22، 22 رنز بنا کر آؤٹ ہوئے، پاکستان کے بقیہ 7 کھلاڑی ڈبل فگر بھی نہ بنا سکے۔

    ویسٹ انڈین بولرز نے پاکستانی بیٹنگ لائن کے پرخچے اڑا دیے، کپتان جیسن ہولڈر نے 3، تھامس نے 4 اور آندرے رسل نے 2 وکٹیں حاصل کیں۔ اننگز کے اختتام پر پاکستان نے ویسٹ انڈیز کو جیت کے لیے 106 رنز کا ہدف دیا، یہ پاکستان کا ورلڈ کپ میں دوسرا کم ترین اسکور ہے۔

    میچ سے قبل ناٹنگھم میں مقیم پاکستانیوں کی بڑی تعداد اسٹیڈیم میچ دیکھنے پہنچی۔ میچ کے آغاز سے قبل پاکستانی شائقین کا جوش و خروش دیدنی تھا، پاکستانیوں نے ڈبل ڈیکر بس پر جشن منایا جبکہ پاکستان زندہ باد کے نعرے بھی لگائے۔

    میچ سے قبل قومی ٹیم نے ٹرینٹ برج کے گراؤنڈ میں جم کر پریکٹس بھی کی۔ میچ کے لیے بارہ رکنی ٹیم میں فخر زمان، امام الحق، بابر اعظم، محمد حفیظ، سرفراز احمد، حارث سہیل، آصف علی، شاداب خان، عماد وسیم، محمد عامر، وہاب ریاض اور حسن علی شامل ہیں۔

    ٹاس جیتنے کے بعد ویسٹ انڈیز کے کپتان جیسن ہولڈر کا کہنا تھا کہ جلد وکٹیں لینے کی کوشش کریں گے، پہلے سے انگلینڈ آ کر تیاری کا اچھا موقع ملا۔

    قومی ٹیم کے کپتان سرفراز احمد کا کہنا تھا کہ ناٹنگھم کی پچ کا اندازہ ہے، ٹاس جیت جاتے تو ہم بھی بولنگ کا ہی فیصلہ کرتے۔ ورلڈ کپ سے پہلے بلے بازوں کا فارم میں آنا خوش آئند ہے۔

    اس سے قبل گزشتہ روز ورلڈ کپ کی میزبان ٹیم انگلینڈ نے ایونٹ کا فاتحانہ آغاز کیا تھا، پہلے میچ میں انگلینڈ نے جنوبی افریقہ کو 104 رنز سے شکست دے کر مخالفین کے لیے خطرے کی گھنٹی بجا دی ہے۔

    ماہرین کے مطابق ہوم گراؤنڈ پر انگلش ٹیم بڑا خطرہ ثابت ہوسکتی ہے، میزبان کے سیمی فائنل میں‌ پہنچنے کے امکانات پر بھی بات ہو رہی ہے۔

  • ورلڈ کپ 2019: آج گرین شرٹس کالی آندھی سے ٹکرائیں گے

    ورلڈ کپ 2019: آج گرین شرٹس کالی آندھی سے ٹکرائیں گے

    ناٹنگھم: ورلڈ کپ 2019 میں آج گرین شرٹس کالی آندھی سے ٹکرائیں گے، شائقین کانٹے دار مقابلے کی توقع کر رہے ہیں.

    تفصیلات کے مطابق قومی کرکٹ ٹیم دو مرتبہ کی عالمی چیمپئن ویسٹ انڈیز سے دو دو ہاتھ کرنے کے لیے تیار ہے.

    میگا ایونٹ‌کا یہ مقابلہ ناٹنگھم میں ہوگا، مقابلے سے قبل قومی ٹیم نے ٹرینٹ برج کے گراؤنڈ میں جم کر پریکٹس کی.

    میچ کے لیے بارہ رکنی ٹیم کا اعلان کردیا گیا،  ٹیم میں فخر زمان، امام الحق، بابر اعظم، محمد حفیظ، سرفراز احمد، حارث سہیل، آصف علی، شاداب خان، عماد وسیم، محمد عامر، وہاب ریاض اور حسن علی شامل ہیں۔

    کپتان سرفراز احمد نے اپنے ایک بیان میں کہا ہے کہ ٹیم کا مورال بلند ہے، پلیئنگ الیون دماغ میں ہے، میں خود پانچویں نمبر پر بیٹنگ کروں گا.

    تجزیہ کار دونوں ٹیموں‌میں‌کانٹے دار مقابلے کی توقع کر رہے ہیں. میچ پاکستان وقت کے مطابق ڈھائی بجے شروع ہوگا.

    دوسری جانب ورلڈ کپ کی میزبان ٹیم انگلینڈ کے ایونٹ کا فاتحانہ آغاز کر دیا، پہلے میچ میں جنوبی افریقہ کو ایک سو چار رنز سے شکست دے کر مخالفین کے لیے خطرے کی گھنٹی بجا دی.

    ماہرین کے مطابق ہوم گراؤنڈپر انگلش بڑا خطرہ ثابت ہوسکتی ہے، میزبان کے سیمی فائنل میں‌ پہنچنے کے امکانات پر بھی بات ہورہی ہے.

  • ورلڈ کپ 2019، ویسٹ انڈیز کے خلاف میچ کے لیے پاکستان کی 12 رکنی ٹیم کا اعلان

    ورلڈ کپ 2019، ویسٹ انڈیز کے خلاف میچ کے لیے پاکستان کی 12 رکنی ٹیم کا اعلان

    ناٹنگھم: ورلڈ کپ 2019 کا دوسرا میچ کل ویسٹ انڈیز اور پاکستان کے درمیان ناٹنگھم میں کھیلا جائے گا جس کے لیے قومی ٹیم کے 12 رکنی اسکواڈ کا اعلان کردیا گیا ہے۔

    تفصیلات کے مطابق ٹرینٹ برج ناٹنگھم میں ورلڈ کپ 2019 کا دوسرا میچ کل پاکستان اور ویسٹ انڈیز کی ٹیموں کے درمیان کھیلا جائے گا، جس کے لیے 12 کھلاڑیوں کے نام سامنے آگئے ہیں۔

    ویسٹ انڈیز کے خلاف میچ کے لیے پاکستانی کی 12 رکنی ٹیم میں فخر زمان، امام الحق، بابر اعظم، محمد حفیظ، سرفراز احمد، حارث سہیل، آصف علی، شاداب خان، عماد وسیم، محمد عامر، وہاب ریاض اور حسن علی شامل ہیں۔

    تجربہ کار مڈل آرڈر بلے باز شعیب ملک، فاسٹ بولر محمد حسنین اور شاہین شاہ آفریدی پہلے میچ میں قومی ٹیم کا حصہ نہیں ہوں گے۔

    مزید پڑھیں: ورلڈ کپ 2019: انگلینڈ کا فاتحانہ آغاز، جنوبی افریقہ کو 104 رنز سے شکست

    ورلڈ کپ میں پاکستان کے خلاف ویسٹ انڈیز کا پلڑا بھاری ہے، ورلڈ کپ میں اب تک 10 میچز کھیلے گئے ہیں جن میں ویسٹ انڈیز نے 7 مقابلوں میں کامیابی حاصل کی ہے جبکہ پاکستانی ٹیم صرف تین میچ ہی جیت سکی ہے۔

    سن 2015 کے ورلڈ کپ میں بھی ویسٹ انڈیز کے ہاتھوں پاکستان کو شکست کا سامنا کرنا پڑا تھا۔

    خیال رہے کہ افتتاحی میچ میں میزبان انگلینڈ نے جنوبی افریقہ کو یکطرفہ مقابلے کے بعد 104 رنز سے شکست دی تھی۔