ARYNews.tv | Urdu – Har Lamha Bakhabar

Tag: ورلڈ اکنامک فورم

  • عمران خان کی متاثر کن شخصیت، امریکی صدر کی بیٹی بھی ملنے آ گئیں

    عمران خان کی متاثر کن شخصیت، امریکی صدر کی بیٹی بھی ملنے آ گئیں

    ڈیووس: ورلڈ اکنامک فورم کے موقع پر وزیر اعظم عمران خان کی متاثر کن شخصیت عالمی رہنماؤں کی توجہ کا مرکز بنی رہی۔

    تفصیلات کے مطابق ڈیووس میں عالمی اقتصادی فورم کے موقع پر وزیر اعظم پاکستان کی شخصیت عالمی رہنماؤں کی توجہ کا مرکز بنی رہی، عمران خان سے امریکی صدر کی بیٹی ایوانکا ٹرمپ نے بھی ملاقات کی۔

    اس ملاقات میں پاکستان میں تعلیم و تربیت سے متعلق ایوانکا ٹرمپ کے ممکنہ پروگرام کے سلسلے میں گفتگو کی گئی۔

    وزیر اعظم عمران خان کی امریکی سیکریٹری برائے ٹرانسپورٹ سے بھی بات چیت ہوئی، فیس بک کی چیف آپریٹنگ آفیسر شیرل سینڈ برگ نے بھی وفد کے ہم راہ وزیر اعظم سے خصوصی ملاقات کی، جس میں پاکستان میں سوشل نیٹ ورکنگ ویب سائٹ کے مؤثر استعمال پر گفتگو کی گئی، انھوں نے عمران خان کو کیلی فورنیا میں واقع فیس بک ہیڈکوارٹرز کے دورے کی دعوت بھی دی۔

    وزیر اعظم سے ٹیلی نار کی چیئرپرسن گن ویئرسٹیڈ کی ملاقات

    وزیراعظم کو فیس بک ہیڈ کوارٹرز کے دورے کی دعوت

    وزیر اعظم سے ٹیلی نار کی چیئرپرسن گن ویئرسٹیڈ اور سی ای او سگوے بریکے نے بھی ملاقات کی، جس کے دوران گورننس کی ڈیجیٹل طریقوں سے بہتری پر مشاورت کی گئی، وزیر اعظم نے پاکستان میں 2005 سے 3.5 بلین امریکی ڈالرز کی سرمایہ کاری کے ساتھ موجودی کے ٹیلی نار کے اعتماد کو سراہا، اور کہا کہ حکومت کی کوشش ہے کہ موبائل کے ذریعے اقتصادی ٹرانزیکشنز بڑھائی جائیں اور اس طرح غربت میں کمی واقع ہو۔

    دریں اثنا، وزیر اعظم عمران خان سے یورپی پارلیمنٹ کے صدر ڈیوڈ سسولی نے بھی ملاقات کی، جس میں جی ایس پی پلس سے متعلق امور پر تبادلہ خیال کیا گیا، اور کہا کہ پاکستان یورپی یونین سے جی ایس پی پلس کی سہولت میں توسیع چاہتا ہے، یہ سہولت پاکستان کے ٹیکسٹائل سیکٹر کے لیے اہم ہے۔

  • جن وجوہ سے ملک تباہ ہوا اس ماضی کی طرف نہیں جائیں گے: وزیر اعظم

    جن وجوہ سے ملک تباہ ہوا اس ماضی کی طرف نہیں جائیں گے: وزیر اعظم

    ڈیووس: وزیر اعظم عمران خان نے کہا ہے کہ جن وجوہ سے ملک تباہ ہوا اس ماضی کی طرف نہیں جائیں گے، اب ہم نے فیصلہ کیا ہے کہ کسی کی جنگ کا حصہ نہیں بنیں گے۔

    تفصیلات کے مطابق وزیر اعظم عمران خان آج ڈیووس، سوئٹزرلینڈ میں پاکستان اسٹریٹیجی ڈائیلاگ سے خطاب کر رہے تھے، انھوں نے کہا کہ دہشت گردی کے خلاف جنگ میں پاکستان نے بھاری نقصان اٹھایا، اس جنگ کے دوران کلاشنکوف کلچر اور منشیات نے ہمارے معاشرے کو تباہ کر دیا، جن وجوہ سے ملک تباہ ہوا اس ماضی کی طرف نہیں جائیں گے۔

    وزیر اعظم پاکستان کا کہنا تھا کہ افغان جنگ سے کلاشنکوف اور منشیات کے کلچر نے جنم لیا، جس نے ہمارے معاشرے کو تباہ کیا، 80 کی دہائی میں عسکری گروپس سے ہونے والے نقصانات آج بھی ہم بھگت رہے ہیں، پاکستانی قوم نے دہشت گردی کے خلاف جنگ میں 70 ہزار جانوں کی قربانی دی، 70 کی دہائی میں قومیائی گئی صنعتوں کے باعث ترقی کو نقصان پہنچا، اب ہم نے فیصلہ کیا ہے کسی کی جنگ کا حصہ نہیں بنیں گے۔

    امریکی صدر نے ایک بار پھر مسئلہ کشمیر پر ثالثی کی پیشکش کر دی

    عمران خان نے کہا کہ پاکستان سیاحوں کی جنت ہے، جہاں مذہبی سیاحت کے مقامات کو کبھی فروغ نہیں ملا، پاکستان کی سرزمین کئی قدیم تہذیبوں کا مسکن ہے، سیاحت کو فروغ دے کر ملکی معیشت کو ترقی دی جا سکتی ہے، پاکستان زراعت اور قدرتی وسائل سے بھی مالامال ہے، ملک کی صنعت میں ترقی کے لیے منصوبہ بندی کر رہے ہیں۔

    ان کا کہنا تھا کہ ایران، سعودی عرب میں تصادم روکنے کے لیے پاکستان نے کردار ادا کیا، افغانستان میں امن سے پاکستان کی وسط ایشیائی ریاستوں تک رسائی ممکن ہوگی۔

  • پاکستان میں ڈیجیٹائزیشن کے عمل میں ہر قسم کے تعاون کے لیے تیار ہیں: ملکہ میکسیما

    پاکستان میں ڈیجیٹائزیشن کے عمل میں ہر قسم کے تعاون کے لیے تیار ہیں: ملکہ میکسیما

    ڈیووس: ہالینڈ کی ملکہ میکسیما نے کہا ہے کہ پاکستان میں ڈیجیٹائزیشن کے عمل میں ہالینڈ ہر قسم کے تعاون کے لیے تیار ہے۔

    تفصیلات کے مطابق ڈیووس میں جاری ورلڈ اکنامک فورم کے موقع پر ڈیجیٹل پاکستان کی سربراہ تانیہ ایدروس اور ہالینڈ کی ملکہ میکسیما میں ملاقات ہوئی، جس میں ڈیجیٹل پاکستان کے ویژن پر تفصیلی تبادلہ خیال کیا گیا۔

    ملاقات میں ملکہ میکسیما نے ڈیجیٹل شعبے میں پاکستان کی مدد کے بھرپور عزم کا اظہار کیا، انھوں نے اپنے حالیہ دورہ پاکستان کی یادیں بھی تازہ کیں اور دورے کا خصوصی ذکر کیا، انھوں نے کہا کہ ہالینڈ پاکستان میں ڈیجیٹائزیشن کے عمل میں ہر قسم کے تعاون کے لیے تیار ہے۔

    ملکہ میکسیما کا کہنا تھا کہ پاکستان میں عوامی فلاح کے طور پر ڈیجیٹل شناخت کا فروغ ضروری ہے، ڈیجیٹل پاکستان ملکی بہتری اور صنفی تقسیم کی کمی میں مددگار ہوگا۔

    عمران خان کی سنگاپور کے وزیر اعظم، آذربائیجان کے صدر سے ملاقاتیں

    ڈیجیٹل پاکستان کی سربراہ تانیہ ایدروس نے کہا کہ پاکستان میں وزیر اعظم عمران خان کی قیادت میں انقلابی منصوبہ شروع کیا گیا ہے، ملک میں ڈیجیٹائزیشن کے عمل سے ترقی کا نیا دور شروع ہوگا۔

    خیال رہے کہ ڈیووس میں ورلڈ اکنامک فورم جاری ہے جس کے لیے وزیر اعظم پاکستان عمران خان بھی گئے ہیں، عمران خان نے فورم کی سائیڈ لائن پر سنگاپور کے وزیر اعظم لی سیان لونگ اور آذربائیجان کے صدر الہام علیوف سے ملاقاتیں کیں۔ صدر الہام علیوف سے ملاقات میں باہمی اعتماد اور بھائی چارے پر مبنی دو طرفہ تعلقات کے تمام پہلوؤں پر گفتگو کی گئی، قومی معاملات میں ایک دوسرے کی حمایت جاری رکھنے کے عزم کا اعادہ کیا گیا، اور تمام شعبوں میں دو طرفہ تعلقات کو مزید وسعت دینے کا عزم ظاہر کیا گیا۔

  • عمران خان کی سنگاپور کے وزیر اعظم، آذربائیجان کے صدر سے ملاقاتیں

    عمران خان کی سنگاپور کے وزیر اعظم، آذربائیجان کے صدر سے ملاقاتیں

    ڈیووس: وزیر اعظم عمران خان نے سنگاپور کے وزیر اعظم لی سیان لونگ اور آذربائیجان کے صدر الہام علیوف سے ملاقاتیں کیں۔

    تفصیلات کے مطابق وزیر اعظم سے ورلڈ اکنامک فورم کی سائیڈ لائن پر آذربائیجان کے صدر الہام علیوف نے ملاقات کی جس میں باہمی اعتماد اور بھائی چارے پر مبنی دو طرفہ تعلقات کے تمام پہلوؤں پر گفتگو کی گئی، قومی معاملات میں ایک دوسرے کی حمایت جاری رکھنے کے عزم کا اعادہ کیا گیا، اور تمام شعبوں میں دو طرفہ تعلقات کو مزید وسعت دینے کا عزم ظاہر کیا گیا۔

    ملاقات کے دوران صدر الہام علیوف نے وزیر اعظم پاکستان کو دورہ آذربائیجان کی دعوت بھی دی، جب کہ وزیر اعظم نے کہا کہ نگورنو کاراباخ تنازعے پر پاکستان آذربائیجان کی حمایت جاری رکھے گا، صدر آذربائیجان نے اس تنازعے پر پاکستان کی مسلسل حمایت پر شکریہ ادا کیا۔

    آذربائیجان کے صدر الہام علیوف سے ملاقات کرتے ہوئے

    وزیراعظم سے ترک کمپنی کے چیئرمین کی ملاقات، معاشی امور پر گفتگو

    وزیر اعظم عمران خان نے الہام علیوف کو ملاقات کے دوران مقبوضہ کشمیر کی سنگین صورت حال سے بھی آگاہ کیا، انھوں نے بتایا کہ کشمیر میں انسانی حقوق کی منظم انداز میں خلاف ورزیاں جاری ہیں، بھارتی حکومت نے 5 اگست کو یک طرفہ اور غیر قانونی اقدام کیا، جس کے تباہ کن اثرات مرتب ہوئے، غیر انسانی لاک ڈاؤن بھی کیا گیا جو تاحال جاری ہے۔ دریں اثنا، وزیر اعظم نے کشمیر پر بہ حیثیت ممبر او آئی سی رابطہ گروپ آذربائیجان کو اس کی گراں قدر خدمات پر سراہا۔

    ڈیووس میں اکنامک فورم کے موقع پر وزیر اعظم عمران خان نے سنگاپور کے وزیر اعظم لی سیان لونگ سے بھی ملاقات کی، جس میں شاہ محمود قریشی، عبد الحفیظ شیخ، رزاق داؤد بھی شریک ہوئے، ملاقات میں دو طرفہ تعلقات اور اقتصادی شعبے میں تعاون بڑھانے پر تبادلہ خیال کیا گیا۔ اس ملاقات میں جنیوا میں پاکستان کے مستقل مندوب خلیل ہاشمی بھی موجود تھے۔

  • وزیراعظم عمران خان ورلڈ اکنامک فورم میں شرکت کے لیے ڈیووس پہنچ گئے

    وزیراعظم عمران خان ورلڈ اکنامک فورم میں شرکت کے لیے ڈیووس پہنچ گئے

    اسلام آباد : وزیراعظم عمران خان ورلڈ اکنامک فورم میں شرکت کے لیے ڈیووس پہنچ گئے، فورم میں معاشی، جیوپولیٹیکل اور ماحولیاتی موضوعات پرتبادلہ خیال ہوگا اور وزیراعظم عالمی اقتصادی فورم کی خصوصی نشست سےخطاب کریں گے۔

    تفصیلات کے مطابق وزیراعظم عمران خان  ورلڈاکنامک فورم میں شرکت کے لئے ڈیووس پہنچ گئے، وزیر خارجہ شاہ محمودقریشی اورعبدالرزاق داؤد ، ذوالفقارعباس بخاری اور ڈاکٹرمعید یوسف بھی ان کے ہمراہ ہیں، عالمی اقتصادی فورم کے بانی پروفیسر کلاوس شواب نے وزیراعظم کو دعوت دی ہے۔

    ترجمان دفترخارجہ کا کہنا ہے کہ نشست کا موضوع پائیداراورہم آہنگ دنیا کے فریق ہے، اس سال فورم اپنی پچاسویں سالگرہ منارہا ہے، فورم میں معاشی، جیوپولیٹیکل اور ماحولیاتی موضوعات پر تبادلہ خیال ہوگا اور وزیراعظم عالمی اقتصادی فورم کی خصوصی نشست سےخطاب کریں گے۔

    ترجمان کے مطابق وزیراعظم عالمی اقتصادی فورم کی خصوصی نشست سےخطاب کریں گے اور سی ای اوز اور کارپوریٹ لیڈرز سے پاکستان اسٹرٹیجی ڈائیلاگ بھی ہوں گے۔

    مزید پڑھیں : وزیر اعظم عمران خان کا ایک اور بڑا اعزاز

    دفترخارجہ کا کہنا ہے کہ وزیراعظم متعدد رہنماوں سے دوطرفہ ملاقاتیں بھی کریں گے ، جن میں بزنس، ٹیکنالوجی اور عالمی اداروں کےنمائندوں کےساتھ ملاقاتیں بھی شامل ہیں، ملاقاتوں میں مقبوضہ کشمیر کی صورتحال سےبھی رہنماؤں کوآگاہ کریں گے ، عالمی میڈیا کے نمائندوں اورایڈیٹرز سے بھی ملیں گے۔

    خیال رہے امریکی جریدے ٹائم میگزین نے وزیراعظم عمران خان کو ماحول کے لیے موثر آواز بلند کرنے والوں میں شامل کرلیا اور ڈیووس ایشو کے سرورق پر وزیراعظم کی اُن عالمی رہنماؤں کے ساتھ تصویر شائع کی، جو ماحولیات کے لیے شعور اجاگر کرنے کی کوشش کر رہے ہیں۔

    یاد رہے وزیراعظم عمران خان نے ڈیوس کے اخراجات کو بھی انتہائی کم رکھنے کی ہدایت کی تھی ، ذرائع کا کہنا تھا کہ وزیراعظم کے 3 روزہ دورے پر 68 ہزار ڈالرز خرچ ہوں گے، سابق دور حکومت میں ڈیوس دوروں پر لاکھوں ڈالرز اڑائے گئے تھے۔

    ڈیوس دوروں پر نواز شریف، شاہد خاقان عباسی اور یوسف رضا گیلانی نے خطیر رقم خرچ کی، سب سے زیادہ اخراجات نواز شریف کے دورے پر آئے تھے۔

    نواز شریف نے 7 لاکھ 62 ہزار ڈالرز قومی خزانے سے خرچ کیے، شاہد خاقان عباسی نے دورے پر 5 لاکھ 61 ہزار ڈالرز خرچ کیے، یوسف رضا گیلانی کے دورے پر 4 لاکھ 59 ہزار ڈالرز کا خرچ آیا تھا۔

  • موجودہ حکومت میں بے روزگاری میں ریکارڈ کمی آئی،امریکی صدر

    موجودہ حکومت میں بے روزگاری میں ریکارڈ کمی آئی،امریکی صدر

    ڈیووس: امریکی صدر ڈونلڈ ٹرمپ کا کہنا ہے کہ میرے دوراقتدار میں بے روزگاری میں ریکارڈ کمی آئی، پہلی بار بڑی تعداد میں خواتین امریکی ورک فورس کا حصہ ہیں۔

    تفصیلات کے مطابق امریکی صدر ڈونلڈ ٹرمپ نے ڈیووس میں ورلڈ اکنامک فورم سے خطاب کرتے ہوئے کہا کہ ورلڈ اکنامک فورم کے 50ویں اجلاس پر مبارکباد پیش کرتا ہوں۔ انہوں نے کہا کہ ہم نے پچھلے ہفتے 2 بڑے تجارتی معاہدے چین، میکسیکوسے کیے۔

    امریکی صدر کا کہنا تھا کہ اقتدار سنبھالا تو امریکی معیشت خراب تھی، ماہرین نے امریکی معیشت کے بارے میں منفی پیشگوئی کی تھی، امریکی ورکنگ کلاس کے لیے کوئی کام نہیں کیا گیا تھا۔

    ڈونلڈ ٹرمپ کے مطابق الیکشن جیتنے کے بعد امریکیوں کے مفاد میں معاشی اقدامات کیے، میرے دوراقتدار میں بے روزگاری میں ریکارڈ کمی آئی، رنگ،نسل، مذہب کے امتیاز کے بغیر امریکیوں کی بھلائی کے لیے کام کر رہے ہیں۔

    انہوں نے کہا کہ پہلی بار بڑی تعداد میں خواتین امریکی ورک فورس کا حصہ ہیں جبکہ ملازمین کی تنخواہوں میں سی ای اوز سے زیادہ اضافہ ہو رہا ہے، امریکا کی تاریخ کے سب سے بڑے ٹیکس ریفارم متعارف کرائیں۔

    ورلڈ اکنامک فورم سے خطاب کرتے ہوئے ڈونلڈ ٹرمپ کا کہنا تھا کہ جب عوامی مفاد کو اولیت دیتے ہیں تو وہ مستقبل کے لیے سرمایہ کاری ہوتی ہے، ہماری کوششوں سے سرمایہ کار امریکا کا رخ کر رہے ہیں۔

    چین سے متعلق امریکی صدر کا کہنا تھا کہ چین نے انٹلکچوئل پراپرٹی سے متعلق متعدد اقدامات پر پہلی باراتفاق کیا، چین کے صدرسے بہترین تعلقات ہیں، چین پر متعدد ٹیرف بات چیت کے دوسرے مرحلے تک رہیں گے۔

    ڈونلڈ ٹرمپ کا کہنا تھا کہ میری انتخابی مہم میں روزگار کے مواقع پیدا کرنا سب سے بڑا نعرہ تھا، ہم نے آؤٹ سورس اور تنخواہوں میں اضافہ کیا، پچھلی حکومت کے دورمیں بیروزگاری بڑھی تھی۔

    امریکی صدر کے مطابق ورکنگ کلاس کو پچھلی حکومتوں میں مشکلات کا سامنا تھا، صحت،سماجی بہبود کے شعبوں میں بھی کوئی کام نہیں کیا گیا تھا۔ انہوں نے کہا کہ یورپی اتحادی کلین انرجی کے ذخائر سے مستفید ہوسکتے ہیں، روایتی توانائی کے علاوہ ورچوئل انرجی پر بھی کام کر رہے ہیں۔

    ڈونلڈ ٹرمپ کا کہنا تھا کہ امریکا ایک ٹریلین درخت منصوبے کا حصہ بن رہا ہے، منصوبے کا ورلڈ اکنامک فورم نے پچھلے سال اعلان کیا تھا، یہ وقت امید اور کام کرنے کا ہے مایوسی کا نہیں ہے۔

  • وزیر اعظم ورلڈ اکنامک فورم میں شرکت کے لیے کل ڈیووس روانہ ہوں گے

    وزیر اعظم ورلڈ اکنامک فورم میں شرکت کے لیے کل ڈیووس روانہ ہوں گے

    اسلام آباد: وزیر اعظم عمران خان عالمی اقتصادی فورم (ورلڈ اکنامک فورم) میں شرکت کے لیے کل سوئٹزرلینڈ کے قصبے ڈیووس روانہ ہوں گے۔ مشیر تجارت رزاق داؤد اور معاون خصوصی زلفی بخاری سمیت دیگر حکام ان کے ساتھ ہوں گے۔

    تفصیلات کے مطابق وزیر اعظم عمران خان ورلڈ اکنامک فورم میں شرکت کے لیے 3 روزہ دورے پر کل سوئٹزرلینڈ کے قصبے ڈیووس روانہ ہوں گے، وزیر اعظم کے دورے کے ایجنڈے اور ملاقاتوں کے شیڈول کو حتمی شکل دے دی گئی۔

    ذرائع کے مطابق مشیر تجارت رزاق داؤد اور معاون خصوصی زلفی بخاری سمیت دیگر حکام ساتھ ہوں گے۔

    ذرائع کا کہنا ہے کہ وزیر اعظم ورلڈ اکنامک فورم کے کلیدی مقررین میں سے ہوں گے، وزیر اعظم پاکستان میں سرمایہ کاری، کاروباری مواقعوں اور پاکستان کی سرمایہ کار دوست پالیسیوں سے بھی آگاہ کریں گے۔

    وزیر اعظم عالمی رہنماؤں اور کاروباری شخصیات سے بھی ملاقاتیں کریں گے۔ وزیر اعظم 23 جنوری کو وطن واپس آئیں گے، ان کے بیرون ملک ہونے کے باعث کل کابینہ اجلاس نہیں ہوگا۔

    خیال رہے کہ وزیر اعظم عمران خان ممکنہ طور پر رواں ماہ کے آخر میں ملائیشیا کا بھی دورہ کریں گے جہاں ان کی ملائیشین ہم منصب مہاتیر محمد سے ملاقات ہوگی۔

  • ورلڈ اکنامک فورم میں شرکت،وزیراعظم کی 21 جنوری کو ڈیوس روانگی کا امکان

    ورلڈ اکنامک فورم میں شرکت،وزیراعظم کی 21 جنوری کو ڈیوس روانگی کا امکان

    اسلام آباد : وزیراعظم عمران خان کی  ورلڈ اکنامک فورم میں شرکت کیلئے 21 جنوری کو  ڈیوس روانگی کاامکان ہے، دورے کے دوران عمران خان عالمی رہنماؤں سے ملاقاتیں کریں گےاور عالمی سرمایہ کاروں سے بھی ملیں گے۔

    تفصیلات کے مطابق سوئٹزرلینڈ میں عالمی اقتصادی فورم کا چار روزہ سالانہ اجلاس 21 جنوری سے شروع ہو گا، وزیراعظم عمران خان کی اکیس جنوری کو ڈیوس روانگی کا امکان ہے۔

    ذرائع کے مطابق دفترخارجہ اور وزیراعظم آفس میں ایجنڈے اور دورے کے دوران ہونے والی ملاقاتوں کیلئے شیڈول پر تبادلہ خیال کیا گیا ہے، وزیراعظم کے بیرون ملک ہونے کے باعث اگلے ہفتے کابینہ کا اجلاس نہیں ہوگا۔

    ذرائع کا کہنا ہے کہ وزیراعظم عمران خان دورے کے دوران عالمی رہنماؤں سے ملاقاتیں کریں گے اور عالمی سرمایہ کاروں سے مل کر انہیں پاکستان میں سرمایہ کاری کی دعوت دیں گے۔

    ذرائع کے مطابق وزیراعظم عمران خان دورہ مکمل کرکے 22 جنوری کو وطن واپس پہنچیں گے۔

    مزید پڑھیں : عمران خان کی دورہ ڈیوس کے اخراجات کو انتہائی کم رکھنے کی ہدایت

    یاد رہے وزیراعظم عمران خان نے ڈیوس کے اخراجات کو بھی انتہائی کم رکھنے کی ہدایت کی تھی ، ذرائع کا کہنا تھا کہ وزیراعظم کے 3 روزہ دورے پر 68 ہزار ڈالرز خرچ ہوں گے، سابق دور حکومت میں ڈیوس دوروں پر لاکھوں ڈالرز اڑائے گئے تھے۔

    ڈیوس دوروں پر نواز شریف، شاہد خاقان عباسی اور یوسف رضا گیلانی نے خطیر رقم خرچ کی، سب سے زیادہ اخراجات نواز شریف کے دورے پر آئے تھے۔

    نواز شریف نے 7 لاکھ 62 ہزار ڈالرز قومی خزانے سے خرچ کیے، شاہد خاقان عباسی نے دورے پر 5 لاکھ 61 ہزار ڈالرز خرچ کیے، یوسف رضا گیلانی کے دورے پر 4 لاکھ 59 ہزار ڈالرز کا خرچ آیا تھا۔

  • پاکستان کی رینکنگ میں 15 درجے بہتری، ورلڈ اکنامک فورم کی بین الاقوامی رپورٹ جاری

    پاکستان کی رینکنگ میں 15 درجے بہتری، ورلڈ اکنامک فورم کی بین الاقوامی رپورٹ جاری

    اسلام آباد: دنیا بھر کی معیشت پر نظر رکھنے والے ادارے ورلڈ اکنامک فورم نے عالمی مسابقتی رپورٹ جاری کردی جس کے مطابق پاکستان کی رینکنگ میں 15 درجے بہتری آئی۔

    ورلڈ اکنامک فورم کی جانب سے جاری ہونے والی رپورٹ کے مطابق عالمی مسابقت کے معاملے پر دنیا میں پاکستان کا درجہ 15 درجے بہتری کے بعد 52ویں نمبر پر آگیا۔

    عالمی مسابقتی رپورٹ کے مطابق گزشتہ برس پاکستان کادرجہ 67تھا، گورننس کے معاملے پر پاکستان کے سکیورٹیز اینڈ ایکسچینج کمیشن دنیا کا ساتواں مؤثر ریگو لیٹر قرار دیا گیا۔

    رپورٹ میں بتایا گیا ہے کہ کاروبارشروع کرنےمیں  پاکستان کی درجہ بندی میں6پوائنٹس کی بہتری ہوئی، گزشتہ برس رینکنگ میں پاکستان کا نمبر 96 تھا مگر اب بہتری کے بعد 90ویں نمبر ہوگیا۔

    رپورٹ کے مطابق پاکستان کا شمار اُن چندممالک میں ہوتا ہے جہاں ایک ہی دن میں کمپنی رجسٹر ہوجاتی ہے، کاروباری لاگت سےمتعلق پاکستان کی رینکنگ گزشتہ سال کی پوزیشن پر مستحکم رہی۔

    مسابقتی رپورٹ میں بتایا گیا ہے کہ ایس ای سی پی نےڈیجیٹلائزیشن سےمتعلق کئی اصلاحات متعارف کرائیں۔

  • چھٹیاں گزارنے کے لیے آپ کس ملک کا انتخاب کرنا چاہیں‌ گے؟

    چھٹیاں گزارنے کے لیے آپ کس ملک کا انتخاب کرنا چاہیں‌ گے؟

    چھٹیاں گزارنے کے لیے زیادہ تر ملکوں کے شہری اہل خانہ کے ہمراہ دوسرے ممالک میں جانا پسند کرتے ہیں تاکہ اس لمحے کو ہمیشہ ہمیشہ کے لیے یادگار بنایا جائے اور اس طرح بچے بھی خوش ہوجاتے ہیں۔

    غیرملکی خبررساں ادارے کی رپورٹ کے مطابق چھٹیاں گزارنے کے لیے بہترین ممالک کی فہرست میں یورپی ملک اسپین پہلے نمبر پر آگیا ہے، اسپین سیاحوں کی توجہ کا مرکز بنا ہوا ہے، تفریح کے لیے اسپین وہ ملک جہاں امن و امان دیگر ممالک سے بہتر ہے۔

    ٹاپ ٹین ممالک کی فہرست میں یورپی ملک فرانس، اٹلی اور امریکا بھی شامل ہیں۔

    ٹریول اور ٹورازم کے لیے ورلڈ اکنامک فورم نے 140 خوبصورت جگہوں کی درجہ بندی مرتب کی گئی جس میں اسپین پہلے نمبر آیا ہے۔

    ورلڈ اکنامک فورم کے مطابق دنیا بھر کے تمام ملک میں فلائٹ کی موجودگی، روپے کی قدر، اور سفری حفاظت کو مدنظر رکھا گیا ہے، اسپین نے مسلسل تیسری بار پہلی پوزیشن حاصل کی ہے۔

    ورلڈ اکنامک فورم کے انڈیکس کے مطابق جن شعبوں کو اجاگر کیا گیا ہے ان ممالک کا قدرتی اور ثقافتی وسائل بھی دیکھا گیا ہے۔

    فہرست میں اسپین پہلے، فرانس دوسرے، جرمنی تیسرے، جاپان چوتھے، امریکا پانچویں، برطانیہ چھٹے، آسٹریلیا ساتویں، اٹلی آٹھویں، کینیڈا نویں اور سوئٹزرلینڈ دسویں نمبر پر موجود ہیں۔

    دوسری جانب ورلڈ اکنامک فورم کی جانب سے امن و امان کے لحاظ سے خراب ممالک کی فہرست بھی شائع کی گئی ہے جن میں یمن خانہ جنگی کی وجہ سے پہلے نمبر پر موجود ہے۔

    واضح رہے کہ یمن میں سعودی اتحادی فورسز اور حوثی باغیوں کی جنگ جاری ہے جس کے نتیجے میں متعدد حوثی باغی ہلاک ہوچکے ہیں اور باغیوں کی جانب سے سعودی عرب پر متعدد بار حملے بھی کیے جاچکے ہیں جنہیں عرب اتحاد کی جانب سے ناکام بنادیا جاتا ہے۔