Tag: وزارت خارجہ

اسلام آباد: امریکی نمایندہ خصوصی زلمے خلیل زاد نے وزارتِ خارجہ میں وزیر خارجہ شاہ محمود قریشی سے ملاقات کی ہے۔

تفصیلات کے مطابق افغان مفاہمتی عمل کے امریکی سفیر زلمے خلیل زاد نے آج وزارت خارجہ میں شاہ محمود سے خصوصی ملاقات کی، جس میں افغان امن عمل میں پیش رفت، خطے کی صورت حال اور باہمی دل چسپی کے امور پر تبادلۂ خیال کیا گیا۔

زلمے خلیل زاد نے دوحہ میں ہونے والے امریکا، طالبان مذاکرات کے 7 ویں دور میں پیش رفت سے آگاہ کیا، امریکی نمایندے نے اپنے حالیہ دورۂ کابل کی تفصیلات سے بھی آگاہ کیا۔

اس موقع پر وزیر خارجہ شاہ محمود قریشی نے کہا کہ دوحہ میں انٹرا افغان امن مذاکرات میں ہونے والی پیش رفت اور دوحہ مذاکرات کے بعد جاری ہونے والا مشترکہ اعلامیہ خوش آیند ہے۔

یہ بھی پڑھیں:  طالبان افغان حکومت کے ساتھ براہ راست مذاکرات کے لیے آمادہ

انھوں نے کہا کہ دوحہ مذاکرات میں افغان امن عمل کے سلسلے سے بنیادی روڈ میپ سے فریقین کا متفق ہونا نہایت مثبت پیش رفت ہے۔

وزیر خارجہ کا کہنا تھا کہ افغانستان میں امن و استحکام اور دیرپا تعمیر و ترقی کے لیے انٹرا افغان مذاکرات سنگِ میل ثابت ہوں گے۔

ان کا یہ بھی کہنا تھا کہ پاکستان افغان امن عمل میں مشترکہ ذمہ داری کے تحت اپنا مصالحانہ کردار ادا کرتا رہے گا۔

ذرایع کے مطابق امریکی عہدے دار کا دورۂ پاکستان انتہائی اہم نوعیت کا حامل ہے، زلمے خلیل زاد افغانستان سے امریکی فوج کے انخلا پر پاکستانی عہدے داران سے اہم مشاورت کرنے کے بعد دوحہ کے لیے روانہ ہوں گے۔

اسلام آباد: دفتر خارجہ نے لیبیا میں رہنے والے پاکستانیوں کو جنگ زدہ علاقوں سے دور رہنے کی ہدایت کر دی ہے۔

تفصیلات کے مطابق ترجمان دفتر خارجہ نے کہا ہے کہ لیبیا میں رہنے والے پاکستانی جنگ زدہ علاقوں سے دور اور محفوظ مقامات پر رہیں۔

دفتر خارجہ کے ترجمان ڈاکٹر محمد فیصل کا کہنا تھا کہ پاکستان لیبیا میں سیکورٹی صورت حال کا جائزہ لے رہا ہے۔

ترجمان نے کہا کہ پاکستان اور دیگر ممالک سے سفر کرنے والے پاکستانی لیبیا کے سفر سے گریز کریں۔

ڈاکٹر فیصل نے مزید بتایا کہ دفتر خارجہ اور تریپولی میں پاکستانیوں کی رہنمائی اور مدد کے لیے کرائسز مینجمنٹ سیل اور ہیلپ ڈیسک قائم کر دی گئی ہے۔

یہ بھی پڑھیں:  لیبیا کی قومی وفاقی حکومت کو داعش اور القاعدہ کی مدد حاصل ہے، ترجمان حفترفوج

واضح رہے کہ لیبیا کے دارالحکومت طرابلس پر قبضے کے لیے متحارب دھڑوں کے درمیان دو ہفتوں سے لڑائی جاری ہے، حالیہ کشیدگی کا آغاز اس وقت ہوا تھا جب لیبیا کے مشرقی حصے میں قائم متوازی حکومت کے حامی فوجی دستوں نے گزشتہ ہفتے مغرب میں واقع دارالحکومت طرابلس کی جانب پیش قدمی شروع کی تھی۔

پیش قدمی کرنے والے فوجی دستوں کی کمان طاقت ور کمانڈر خلیفہ حفتر کے پاس ہے جو ملک کے مشرقی حصے میں قائم حکومت کی پشت پناہی کرتے ہیں، خلیفہ حفتر کو متحدہ عرب امارات اور مصر کی حکومتوں کی مدد حاصل ہے۔

خلیفہ حفتر نے الزام عائد کیا ہے کہ قومی وفاقی حکومت طرابلس پر قبضہ قائم رکھنے کے لیے القاعدہ اور داعش سے مدد لے رہی ہے۔

اسلام آباد: نیوزی لینڈ کے شہر کرائسٹ چرچ میں مسجد حملے میں شہید ہونے والے پاکستانی شہری نعیم راشد کی والدہ کو نیوزی لینڈ کا ویزا جاری کر دیا گیا۔

تفصیلات کے مطابق نعیم راشد شہید کی والدہ کا نیوزی لینڈ کا ویزا جاری کر دیا گیا ہے، شہید کی والدہ نماز جنازہ اور تدفین میں شرکت کریں گی۔

نعیم راشد کی والدہ نے نیوزی لینڈ جانے کی خواہش کا اظہار کیا تھا، جس پر وزارتِ خارجہ کی جانب سے انھیں نیوزی لینڈ کا ویزا جاری کیا گیا۔

دریں اثنا، وزارتِ خارجہ میں سانحہ نیوزی لینڈ کے حوالے سے کرائسس مینجمنٹ سیل بھی قائم کر دیا گیا ہے، وزیر خارجہ کا کہنا تھا کہ شہدا کے لواحقین کو تمام ممکنہ سہولیات فراہم کی جائیں گی۔

شاہ محمود نے کہا کہ شہدا کے لواحقین کو درپیش مشکلات کے فوری ازالے کے لیے سیل قائم کیا گیا ہے، سانحے کے باقی شہدا کے لواحقین کے ساتھ بھی رابطے میں ہیں۔

یہ بھی پڑھیں:  سانحہ کرائسٹ چرچ: حکومت پاکستان کا پرچم سرنگوں کرنے کا اعلان

واضح رہے کہ کرائسٹ چرچ میں حملے کے سوگ میں پاکستان نے فیصلہ کیا ہے کہ کل قومی پرچم سرنگوں کیا جائے گا اور ملک بھر میں یومِ سوگ منایا جائے گا۔ پاکستان نے سانحے پر احتجاج بھی ریکارڈ کرایا ہے۔

میتوں کی حوالگی کا عمل کل سے شروع ہوگا، 6 خاندان اپنے افراد کی تدفین وہیں کرائسٹ چرچ میں کرنا چاہتے ہیں جب کہ 3 خاندانوں نے کہا ہے کہ وہ اپنے پیاروں کو پاکستان میں دفن کرنا چاہتے ہیں۔

اسلام آباد: بھارتی میڈیا کا ایک اور جھوٹ سامنے آ گیا، دفتر خارجہ کے ترجمان نے کہا ہے کہ بھارتی میگزین میں بھارتی ڈوزیئر مسترد کرنے کی خبر حقائق کے منافی ہے۔

تفصیلات کے مطابق بھارتی میڈیا نے انڈین ڈوزیئر سے متعلق جھوٹی خبر چلا دی، کہا کہ پاکستان نے بھارتی ڈوزیئر مسترد کر دیے، تاہم ترجمان دفتر خارجہ نے خبر جھوٹی قرار دے دی۔

ترجمان کا کہنا ہے کہ بھارتی ڈوزیئر کا جائزہ لیا جا رہا ہے، اس حوالے سے جلد جواب دیا جائے گا۔

خیال رہے کہ میگزین انڈیا ٹو ڈے نے دعویٰ کیا تھا کہ پاکستان نے بھارتی ڈوزیئر مسترد کر دیا ہے، جس پر ترجمان دفتر خارجہ نے کہا کہ بھارتی میڈیا میں چھپنے والی خبر حقائق کے منافی ہے۔

We have seen the news report in “India Today” which claims that Pakistan has ‘rejected’ the dossier given by India about the attack in Pulwama. This is incorrect. Dossier is being examined and we will soon convey our considered view on it.

— Dr Mohammad Faisal (@ForeignOfficePk) March 7, 2019

یاد رہے کہ 28 فروری کو دفتر خارجہ کے ترجمان ڈاکٹر فیصل نے کہا تھا کہ بھارت کے پلواما حملوں سے متعلق ڈوزیئر دفتر خارجہ کو موصول ہوگئے ہیں، اگر ایکشن ایبل ثبوت ہوئے تو پاکستان کارروائی کرے گا۔

یہ بھی پڑھیں:  پلواماحملوں پربھارتی ڈوزیئر موصول ہوگئے ہیں،ترجمان دفترخارجہ

پاکستانی دفتر خارجہ کا کہنا تھا کہ ڈوزیئر کا مشاہدہ کیا جائے گا اور موجود قانونی شواہد کا جائزہ لیا جائے گا، وزیر اعظم پاکستان بھی اس حوالے سے واضح اعلان کر چکے ہیں، پاکستان مذاکرات کے لیے تیار ہے، دہشت گردی کے علاوہ موضوعات پر بھی بات ہونی چاہیے۔

اسلام آباد: کینیڈین ڈپٹی وزیرِ خارجہ نے سیکریٹری خارجہ تہمینہ جنجوعہ سے ٹیلی فونک رابطہ کیا، رابطے میں دو طرفہ امور پر تفصیلی گفتگو کی گئی۔

تفصیلات کے مطابق کینیڈا کے ڈپٹی وزیر خارجہ ایان شوگرٹ نے پاکستانی سیکریٹری خارجہ کو فون کر کے دو طرفہ امور پر تفصیل کے ساتھ گفتگو کی۔

[bs-quote quote=”تہمینہ جنجوعہ نے کینیڈا کے ڈپٹی وزیر خارجہ کو پاکستانی شہریوں کو کینیڈین ویزے کے حصول میں درپیش مشکلات سے آگاہ کیا۔” style=”style-8″ align=”left”][/bs-quote]

ترجمان دفترِ خارجہ کا کہنا ہے کہ تہمینہ جنجوعہ اور ایان شوگرٹ کے درمیان ایک گھنٹے تک گفتگو ہوئی۔

ٹیلی فونک رابطے کے دوران دو طرفہ امور کے علاوہ علاقائی صورت حال پر بھی تبادلہ خیال کیا گیا، ایان شوگرٹ نے پاکستان کے کشیدگی کم کرنے کے خیر سگالی جذبے کو سراہا۔

دفتر خارجہ کے ترجمان نے کہا کہ تہمینہ جنجوعہ نے کینیڈا کے ڈپٹی وزیر خارجہ کو پاکستانی شہریوں کو کینیڈین ویزے کے حصول میں درپیش مشکلات سے آگاہ کیا۔

اس موقع پر ایان شوگر نے کہا کہ کینیڈا پاکستان اور بھارت کے درمیان سفارتی طریقے سے مسائل کے حل کا حامی ہے۔

یہ بھی پڑھیں:  پاک اوربھارت کے درمیان امن کے لیے مذاکرات ہی واحد راستہ ہیں، کینیڈا

یاد رہے کہ سیکریٹری خارجہ تہمینہ جنجوعہ نے 7 مارچ کو اوٹاوا کا دورہ کرنا تھا، تاہم یہ دورہ موجودہ سیکورٹی صورت حال کے پیش نظر منسوخ کیا گیا۔

واضح رہے کہ کینیڈین وزارت خارجہ نے پاک بھارت کشیدگی پر اظہار تشویش کرتے ہوئے کہا تھا کہ خطے میں امن و سلامتی کے لیے مذاکرات ہی واحد حل ہیں۔