Tag: وزارت خارجہ

اسلام آباد: ترجمان دفتر خارجہ نے ہفتہ وار بریفنگ میں کہا ہے کہ وزیر اعظم کا کسی ایک بلاک کا حصہ نہ بننا پاکستان کی پالیسی ہے۔

تفصیلات کے مطابق دفتر خارجہ نے کہا ہے کہ پاکستان کسی مخصوص بلاک کا حصہ نہیں، پاکستان ہر ایک کے ساتھ اچھے تعلقات کا خواہاں ہے، اقوام متحدہ کی ماحول سے متعلق گلاسگو کانفرنس میں عدم شرکت پر جو بیانات آئے ان میں کوئی حقیقت نہیں، امریکا کے ساتھ ہم مستقل رابطے میں ہیں، اور اعلیٰ سطح امریکی کمیٹیوں کے ارکان پاکستان کا دورہ کریں گے۔

ترجمان کا کہنا تھا کہ طلبہ کے معاملے پر چین کے ساتھ مکمل رابطے میں ہیں، امید ہے جلد چین اس مسئلے کو حل کر لے گا، پاکستان چین امریکا کے مابین اچھے تعلقات چاہتا ہے، چین میں سرمائی اولمپکس کے انعقاد کے لیے نیک خواہشات کا اظہار کرتے ہیں۔

انھوں نے کہا پاکستان اولمپکس میں شرکت کرے گا، کھیلوں کے ایونٹس کو سیاست کی نظر نہیں ہونا چاہیے، چینی اولمپکس کی مخالفت اچھا اقدام نہیں، تمام ممالک کو سرمائی اولمپکس میں بھرپور شرکت کرنی چاہیے۔

ترجمان کے مطابق پاکستان 19 دسمبر کو افغانستان پر او آئی سی اجلاس کی میزبانی کرے گا، امید ہے اجلاس سے افغانستان کی انسانی امداد کے اقدامات کیے جائیں گے۔

ترجمان دفتر خارجہ نے پریانتھا کمارا کی موت پر سری لنکا سے اظہار تعزیت بھی کی۔

اسلام آباد: فرانسیسی صدر ایمانویل میکرون کے توہین آمیز کارٹونز کے سلسلے میں مسلمانوں کے جذبات مجروح کرنے والے بیان پر آج فرانسیسی سفیر کو دفتر خارجہ طلب کر لیا گیا ہے۔

اے آر وائی نیوز کے مطابق فرانس کے سفیر کو دفتر خارجہ نے طلب کر لیا ہے، وزیر خارجہ شاہ محمود نے اس سلسلے میں بتایا کہ فرانسیسی سفیر کے ساتھ بیان پر احتجاج کیا جائے گا۔

دوسری طرف وزیر خارجہ نے اہم اعلان کرتے ہوئے کہا کہ او آئی سی کے وزرائے خارجہ کے آئندہ اجلاس میں، میں وزیر اعظم کی ہدایت پر اس حوالے سے ایک جامع قرارداد پیش کروں گا جس میں 15 مارچ کا دن، اسلاموفوبیا کے خلاف عالمی دن کے طور پر طے کرنے کی تجویز دیں گے۔

وزیر خارجہ نے اپنے بیان میں کہا کہ گستاخانہ خاکوں سے پوری دنیا میں غم و غصہ پایا جاتا ہے، فرانس کے صدر کے غیر ذمہ دارانہ بیانات نے جلتی پر تیل کا کام کیا، یہ پہلی مرتبہ ایسا نہیں ہوا، کچھ عرصہ قبل چارلی ہیبڈو نے گستاخانہ خاکے شایع کیے، کبھی قرآن پاک کو جلانے کے واقعات سامنے آتے ہیں، کبھی پتا چلتا ہے کہ حجاب پر پابندی کا فیصلہ کیا جا رہا ہے۔

توہین آمیز کارٹونز کی نمائش کی اجازت دینے والے منافقانہ قوانین کو تبدیل کرنا ہوگا: صدر عارف علوی

انھوں نے کہا اقوام متحدہ کو چاہیے کہ فی الفور اسلام کے خلاف اس نفرت انگیز بیانیے کا نوٹس لے اور ٹھوس اقدامات اٹھائے، لوگوں کے جذبات روندیں گے تو ری ایکشن سے معاشرے تقسیم ہوتے ہیں۔

شاہ محمود نے ایک ٹویٹ میں لکھا کہ وزیر اعظم عمران خان نے فیس بک کے بانی مارک زکر برک سے بھی مطالبہ کیا ہے کہ جس طرح آپ ہولوکاسٹ پر مبنی مواد کی اشاعت نہیں کرتے اسی طرح اسلام کے خلاف گستاخانہ مواد کی اشاعت کو بھی روکا جائے۔

اسلام آباد: وزارتِ خارجہ میں جدید سہولتوں سے آراستہ اسٹیٹ آف دی آرٹ میڈیا سینٹر کا قیام عمل میں آ گیا ہے، جس کا افتتاح آج وزیر خارجہ شاہ محمود قریشی نے کیا۔

اے آر وائی نیوز کے مطابق وزیر خارجہ شاہ محمود قریشی نے وزارت خارجہ میڈیا سینٹر کا افتتاح کیا، اس موقع پر سیکریٹری خارجہ سہیل محمود اور سینئر افسران او میڈیا نمائندگان موجود تھے۔

افتتاحی تقریب سے خطاب کرتے ہوئے شاہ محمود نے کہا ہماری زندگی پر سوشل میڈیا کے واضح اثرات مرتب ہو رہے ہیں، ایسے میں ڈیجیٹل ڈپلومیسی جدید دور کا تقاضا ہے۔

وزیر خارجہ نے کہا ڈیجٹیل ڈپلومیسی کی ضرورت روز بہ روز بڑھتی جا رہی ہے، میڈیا ریاست کا چوتھا ستون ہے، یہ کہاوت نہیں حقیقت ہے، میڈیا کاوقت کے ساتھ ساتھ اداروں سے تعلق بھی بڑھ گیا ہے ، ملکی تشخص کواجاگر کرنے کے لیے خارجہ پالیسی انتہائی اہم ہے۔

شاہ محمود قریشی کا کہنا تھا خارجہ پالیسی کو کامیاب بنانے میں میڈیا اہم کردار ادا کر سکتا ہے، جب کہ وزارت خارجہ کو بھی بدلتے وقت کے تقاضوں سے ہم آہنگ ہونا ہے۔

اس موقع پر انھوں نے مقبوضہ کشمیر کا بھی ذکر کیا، کہا مقبوضہ کشمیر کے عوام بھارت کے سفاکانہ تشدد کا نشانہ بن رہے ہیں، پاکستان نے عالمی سطح پر مقبوضہ کشمیر سے متعلق بیانیے کا سدباب کیا۔

وزیر خارجہ نے کہا 70 ہزار پاکستانی شہید ہوئے اور ہم پر دہشت گردی کا الزام لگایا جاتا ہے، بھارت کے منفی پروپیگنڈے کا سدباب کرنے کی ضرورت ہے، افغانستان کے معاملے پر دنیا نے پاکستان کے بیانیے کو تسلیم کیا۔