اسلام آباد: ایسے پاکستانی شہری جو تھائی لینڈ وزٹ کرنے کا ارادہ رکھتے ہیں ان کے لیے سیاحتی ویزا کی تفصیلات جانا کافی ضروری ہے۔
پاکستانی شہری، جو ملک کی سیر کا ارادہ رکھتے ہیں، سیاحتی ویزا کے لیے خود یا پاکستان میں تھائی سفارت خانے کے سرکاری ایجنٹوں کے ذریعے درخواست دے سکتے ہیں۔
پاکستان سمیت مختلف ممالک کے شہریوں کو سیاحت کے لیے تھائی لینڈ میں داخل ہونے کے لیے اس ملک کا وزٹ ویزا حاصل کرنا ضروری ہے۔
پاکستانی درخواست دہندگان کے لیے تھائی لینڈ دو قسم کے وزٹ ویزے پیش کرتا ہے جس میں سنگل انٹری اور ایک سے زیادہ انٹری ویزا شامل ہے، تھائی لینڈ کے وزٹ ویزا کے لیے کسی بھی پاکستانی شہری کو درج ذیل دستاویزات درکار ہونگی۔
سب سے پہلے درخواست فارم، کور لیٹر/ کمپنی ورکنگ لیٹر،ایک خالی پاسپورٹ صفحہ / 6 ماہ پاسپورٹ کی میعاد، بینک اسٹیٹمنٹ (ایک سال کی)، 2 پاسپورٹ سائز تصاویر ( جو 6 ماہ کے اندر لی گئی ہو) درکا ہوگا۔
اس کے علاوہ سی این آئی کی 2 کاپیاں، پاسپورٹ کی 2 کاپیاں، این ٹی این لیٹر، تصدیق شدہ ایئر ٹکٹ / ہوٹل بکنگ بھی تھائی لینڈ جانے کے خواہشمند افراد کے پاس ہونا ضروری ہے۔
تھائی لینڈ کے وزٹ ویزا فیس میں کوئی تبدیلی نہیں کی گئی ہے، تین ماہ کی میعاد کے ساتھ سنگل انٹری ٹورسٹ ویزا کی فیس 13,000 روپے ہے جبکہ چھ ماہ کی میعاد کے ساتھ ملٹی پل انٹری وزٹ ویزا کی فیس 65,000 روپے ہے۔
خیال رہے کہ تھائی لیںڈ اپنی ثقافت، شاندار ساحل، دلکش مناظر اور تاریخ کے بھرپور امتزاج کی وجہ سے جانا جاتا ہے، تھائی لینڈ کو بین الاقوامی سیاحوں کے لیے ایک پرکشش سیاحتی مقام خیال کیا جاتا ہے۔
