Tag: وزیراعظم

اسلام آباد (26 اگست 2025): وزیراعظم شہباز شریف نے کہا ہے مغرب ماحولیاتی آلودگی سے نمٹنے کے لیے پاکستان کی مدد کرے۔

اے آر وائی نیوز کے مطابق پاکستان کی نیو انرجی وہیکلز پالیسی کا افتتاح ہو گیا۔ اس سلسلے میں اسلام آباد میں افتتاحی تقریب منعقد ہوئی۔ جس میں وزیراعظم شہباز شریف نے ملک بھر کے ہونہار طلبہ میں ای بائیکس تقسیم کیں۔

تقریب سے خطاب کرتے ہوئے وزیراعظم نے کہا کہ پاکستان کا گرین گیسوں کے اخراج میں بہت ہی کم حصہ ہے لیکن ماحولیاتی آلودگی سے سب سے زیادہ متاثرہ ممالک میں شامل ہے۔ پاکستان ماحولیاتی چیلنج سے تنہا نہیں نمٹ سکتا۔ اس سے نمٹنے کے لیے مغرب کو ہماری مدد کرنا ہوگی۔

شہباز شریف کا کہنا تھا کہ ماحولیاتی آلودگی کی وجہ سے 2022 میں سندھ میں آنے والے تباہ کن سیلاب سے 30 ارب کا نقصان ہوا اور اب خیبر پختونخوا اور گلگت بلتستان میں بادل پھٹنے، سیلاب، دریاؤں میں طغیانی سے جانی ومالی نقصانات ہوئے۔ درجنوں دیہات صفحہ ہستی سے مٹ گئے اور سینکڑوں افراد جان سے گئے۔

View this post on Instagram

A post shared by ARY News (@arynewstv)

انہوں نے مزید کہا کہ ای وی پالیسی حکومت کے ماحول دوست اقدامات کی جانب اہم پیشرفت ہے۔ اس پالیسی سے موسمیاتی تبدیلی کے اثرات پر قابو پانے میں مدد ملے گی۔ پالیسی کی تشکیل میں معاونت پر تمام اسٹیک ہولڈرز اور برطانوی حکومت کے مشکور ہیں۔

https://urdu.arynews.tv/electric-bikes-distributed-to-talented-students-across-pakistan/

اسلام آباد(24 اگست 2025): وزیراعظم شہباز شریف نے غذر میں 300 انسانی جانیں بچانیوالے چرواہوں کو اسلام آباد مدعو کرلیا۔

گزشتہ دنوں گلگت بلتستان کے ضلع غذر کے علاقے تلی داس میں رات گئے گلیشیئر پھٹنے سے شدید سیلابی صورتحال پیدا ہوگئی تھی، جس کے باعث متعدد دیہات زیرآب آگئے اور درجنوں افراد پھنس گئے۔

تاہم گلیشئر پھٹنے کی برقت اطلاع دے کر بہادر چرواہا محمد خان کئی قیمتی جانیں بچانے کا سبب بنا تھا، واقعے کے حوالے سے گفتگو کرتے ہوئے محمد خان نے بتایا دھماکے کی آواز سن کر جاگا تھا، پھر بچوں کو محفوظ مقام پر منتقل کیا۔

چرواہے محمد خان نے بتایا تھا کہ جان کی پرواہ کیے بغیر لوگوں کو بچانے کی کوشش کی، ہماری اطلاع پر سیکڑوں جانیں بچ گئیں لیکن ہماری جان کو خطرہ تھا، پاک فوج بروقت ریسکیو نہ کرتی تو ہم 6 افراد زندہ نہ بچتے، ریسکیو کرنے پر پاک فوج کا انتہائی مشکور ہوں۔

اب ذرائع کا کہنا ہے کہ وزیراعظم شہباز شریف نے غذر میں 300 انسانی جانیں بچانیوالے چرواہوں کو اسلام آباد مدعو کرلیا ہے، وصیت خان، انصار اور محمد خان کو وزیراعظم سیکریٹریٹ کی جانب سے مدعو کیا گیا۔

ذرائع کا مزید کہنا ہے کہ وزیر اعظم شہباز شریف تینوں چرواہوں کی حوصلہ افزائی کریں گے اور انہیں انعامات دیں گے۔

https://urdu.arynews.tv/shepherd-ghizer-hundreds-lives-saved-glacier/

اسلام آباد (22 اگست 2025): وزیراعظم شہباز شریف کا کہنا ہے کہ کے پی میں قدرتی آفت سے نمٹنے کیلیے وفاق نے صوبائی حکومت کا پرخلوص ساتھ دیا۔

اے آر وائی نیوز کے مطابق وزیراعظم شہباز شریف نے وفاقی کابینہ اجلاس میں گفتگو کرتے ہوئے کہا کہ خیبر پختونخوا میں کلاؤڈ برسٹ اور سیلاب سے بے پناہ جانی ومالی نقصان ہوا۔ مصیبت کی اس گھڑی میں صوبائی حکومت کے ساتھ بہت خلوص کے ساتھ تعاون کیا۔

ان کا کہنا تھا کہ 2022 کے بعد ہم ایک بار پھر قدرتی آفات کا سامنا کر رہے ہیں۔ تین سال قبل سندھ اور بلوچستان اس کا نشانہ بنے تھے اور اب کے پی اور گلگت بلتستان میں تباہی آئی ہے۔

شہبا شریف نے کہا کہ اس وقت بے پناہ معاشی نقصان ہوا تھا جب کہ اب جانوں کا نقصان بہت زیادہ ہے۔ تین دن پہلے کراچی میں بھی تباہ کن بارشیں ہوئیں۔ اب تک پورے ملک میں بارشوں اور سیلاب سے 700 افراد جاں بحق ہوئے ہیں ان میں سے 400 اموات صرف کے پی میں ہوئیں۔

وزیراعظم نے بتایا کہ بونیر میں سب سے زیادہ تباہی ہوئی۔ اس کے ساتھ صوابی، سوات، شانگلہ، مانسہرہ میں بھی جانی اور مالی نقصان ہوا۔ افواج پاکستان امدادی کاموں میں بھرپور حصہ لے رہی ہیں اور سپہ سالار خود اس ریلیف کے کام کو لیڈ کر رہے ہیں۔ متاثرہ علاقوں میں ریسکیو کا کام تقریباً مکمل ہوچکا ہے، اور اب ریلیف اور ری ہبلٹیشن جاری ہے۔

شہباز شریف نے کہا کہ موسمیاتی تبدیلی سے ہونے والی تباہی کے بعد اب کسی قسم کی سستی کی گنجائش نہیں۔ آخر کب تک حکومتیں ان چیزوں کی امداد کریں گی جو غیر قانونی ہیں۔ دریاؤں کے اطراف ہوٹلز اور ریسٹورینٹس کے حوالے سے قوانین بنائیں گے۔ اس حوالے سے جلد ایک میٹنگ ہوگی جس میں ان مسائل کے حل کے لیے بات ہوگی۔

اسلام آباد (7 اگست 2025): وزیراعظم شہباز شریف نے کہا ہے کہ خواتین کو ملازمتوں میں زیادہ سے زیادہ مواقع فراہم کرنے کے لیے اقدامات کیے جائیں۔

اے آر وائی نیوز کے مطابق وزیراعظم شہباز شریف کی زیر صدارت اسلام آباد میں ملک میں بڑھتی آبادی سے متعلق اجلاس ہوا جس میں بڑھتی آبادی کے مسائل کے حل کیلیے اقدامات کا جائزہ بھی لیا گیا۔ متعلقہ حکام کی جانب سے اس حوالے سے متعدد تجاویز پیش کی گئیں۔

وزیراعظم شہباز شریف نے اجلاس سے خطاب کرتے ہوئے کہا نوجوانوں اور خواتین کو ملک کی معاشی ترقی کے لیے اہم قرار دیتے ہوئے کہا کہ خواتین ہماری افرادی قوت کا بہت بڑا حصہ ہیں۔ انہیں ملازمتوں کے زیادہ سے زیادہ مواقع فراہم کرنے کے لیے اقدامات کیے جائیں۔

وزیراعظم کا کہنا تھا کہ ملکی آبادی کا بڑا حصہ نوجوانوں پر مشتمل ہے اور یہ نوجوان ہمارے ملک کا انتہائی اہم اور قیمتی اثاثہ ہیں۔ نوجوانوں کو معاشی ترقی میں کردار ادا کرنے کے مواقع دینے کیلیے متعدد اقدامات کر رہے ہیں۔

وزیراعظم شہباز شریف نے اجلاس سے خطاب کرتے ہوئے کہا کہ پاکستان میں آبادی بڑھنے کی سالانہ شرح 2.55 فیصد ہے۔ اس بڑھتی آبادی کو معیشت کا فعال حصہ بنانے کے لیے منصوبہ بندی کی ضرورت ہے۔

انہوں نے کہا کہ بڑھتی آبادی اور اس سے پیدا ہونے والے مسائل کے حل کیلیے قومی سطح کی پالیسی کو وقت کی اہم ضرورت قرار دیتے ہوئے اس حوالے سے موثر پالیسی اور حکمت عملی مرتب کرنے کے لیے کمیٹی تشکیل دینے کی ہدایت کی اور کہا کہ بڑھتی ہوئی آبادی اور مسائل سے نمٹنے کے لیے صوبوں کے تعاون سے حکمت عملی تشکیل دی جائے۔