اسلام آباد : وزیراعظم شہبازشریف نے کفایت شعاری مہم کے تحت تمام لا انفورسمنٹ اداروں کے افسران کو 1800 سی سی گاڑیاں استعمال کرنے کی ہدایت کردی۔
تفصیلات کے مطابق وزیراعظم شہبازشریف نے کفایت شعاری مہم کے لئے خط لکھا ، جس میں تمام لا انفورسمنٹ اداروں کے افسران کو1800 سی سی گاڑیاں استعمال کرنے کی ہدایت کردی۔
پولیس، ایف آئی اے ، کسٹمز، کسٹمز انٹیلی جنس کے افسران کو بھی مراسلہ جاری کردیا گیا ، جس میں کہا گیا ہے کہ افسران ایس یووی اور سڈان گاڑیاں بھی 1800سی سی سے زائداستعمال نہ کریں۔
یاد رہے وزیراعظم شہباز شریف نے کفایت شعاری اقدامات کا اعلان کرتے ہوئے کہا تھا کہ وفاقی کابینہ کے تمام ارکان نے رضاکارانہ طور پر تنخواہیں اور مراعات نہ لینے کا فیصلہ کیا ہے۔
وزیراعظم نے بتایا تھا کہ تمام وزرا سے لگژری گاڑیاں واپس لی جا رہی ہیں، تمام کابینہ اراکین ملک و بیرون ملک اکانومی میں سفر کریں گے، تمام کابینہ ارکان اپنے یوٹیلٹی بلز خود ادا کریں گے۔
شہباز شریف کا کہنا تھا کہ موجودہ صورتحال کے تناظر میں آئندہ دو سال کے دوران کوئی انتظامی یونٹ، ڈویژن، ضلع یا تحصیل قائم نہیں کی جائے گی، جون 2024ء تک پرتعیش اشیا، سرکاری گاڑیوں کی خریداری پر پابندی ہو گی، ان اقدامات سے 200 ارب روپے سالانہ بچت ہو گی۔
