اسلام آباد : وزیراعظم شہبازشریف نے پریشان کن معاشی اعشاریوں پر تشویش کا اظہار کرتے ہوئے کہا کہ پاکستان کو معاشی طور پر مستحکم بنانے کیلئے ہنگامی اقدامات کر رہے ہیں۔
تفصیلات کے مطابق وزیراعظم شہباز شریف کی زیرصدارت معاشی صورتحال پر اعلیٰ سطح اجلاس ہوا ، جس میں وزارت خزانہ کی طرف سےمعیشت کی صورتحال پر تفصیلی طور پر بریفنگ دی گئی۔
اجلاس میں شاہد خاقان ،احسن اقبال، مفتاح اسماعیل، مریم اورنگزیب، محمد زبیر، عائشہ غوث پاشا، طارق پاشا سمیت متعلقہ اعلیٰ افسران شریک ہوئے۔
پریشان کن معاشی اعشاریوں پر وزیراعظم شہبازشریف نے اظہار تشویش کرتے ہوئے کہا پاکستان کومعاشی طورپرمستحکم بنانے کیلئے ہنگامی اقدامات کررہے ہیں، ہر صورت عام آدمی کےمعاشی حالات بہترکرنے کیلئے اقدامات کئےجائیں۔
شہباز شریف نے معاشی ٹیم کو معیشت کی بہتری کیلئے جامع حکمت عملی اور مہنگائی پر قابو پانے کیلئے ترجیحی بنیاد پر اقدامات کی ہدایت کردی۔
یاد رہے وزیراعظم شہباز شریف نے پشاورموڑ تا نیو اسلام آباد ایئرپورٹ میٹروبس سروس منصوبے کا دورہ کیا تھا، اس دوران وزیراعظم نے سوال کیا کہ اسلام آباد میٹرومنصوبہ طویل عرصے سے کیوں التوا کا شکار رہا؟ منصوبے پر التوا کا کوئی جواز نہیں بنتا۔
شہباز شریف نے اسلام آباد میٹرو بس منصوبے میں تاخیر پر تحقیقات کا حکم دیتے ہوئے ذمہ داروں کا تعین کرنےکی ہدایت کی تھی۔
