مکہ مکرمہ : وزیر اعظم شہباز شریف عمرے کے ادائیگی کے لیے پہنچے تو بیت اللہ خانہ کعبہ کا دروازہ خصوصی طور پر کھولا گیا، شہباز شریف نے وفد کے ہمراہ بیت اللہ کے اندر نوافل ادا کئے۔
تفصیلات کے مطابق وزیراعظم شہباز شریف نے وفد کے ہمراہ عمرے کی سعادت حاصل کرلی ، اس موقع پر سیکیورٹی حصار میں وفد نے طواف کیا۔
بیت اللہ پہنچنے پر وزیراعظم کے لئے خصوصی طور پر خانہ کعبہ کا دروازہ کھولا گیا، جہاں وہ وفد کے ساتھ بیت اللہ شریف میں داخل ہوئے، نوافل ادا کیےاور امت مسلمہ ، ملکی استحکام، ترقی اور امن و سلامتی کے لیے خصوصی دعائیں کیں۔
بلاول بھٹو زرداری، خالد مقبول صدیقی، چوہدری سالک حسین، شاہ زین بگٹی، مفتاح اسماعیل، خواجہ آصف اور محسن داوڑ بھی وزیر اعظم کے ہمراہ تھے۔
گذشتہ روز وزیراعظم شہباز شریف نے مسجد نبوی میں نمازِ جمعہ ادا کی تھی، سعودی حکومت کی ہدایت پر وزیراعظم کیلئے روضہ رسول ﷺ کا دروازہ کھولا گیا، وزیراعظم اور وفد کے ارکان نے روضہ رسول ﷺ کے اندر درود و سلام پیش کیا۔
