اسلام آباد : وزیراعظم عمران خان نے کہا ہے کہ بلوچستان کی تعمیر و ترقی اور وہاں کے طالب علموں کو تعلیم کے مواقع فراہم کریں گے، یہ بات انہوں نے کیڈٹ کالج مستونگ کے طلباء سے ملاقات کے موقع پر گفتگو کرتے ہوئے کہی۔
تفصیلات کے مطابق وزیراعظم عمران خان سے کیڈٹ کالج مستونگ کے طلباء نے وزیراعظم آفس میں ملاقات کی، ملاقات میں وفاقی وزیر برائے دفاعی پیداوار زبیدہ جلال بھی موجود تھیں، طلباء نے پروزیر اعظم سے مختلف موضوعات پر گفتگو کی۔
وزیراعظم نے طلباء سے کہا کہ انسان کی پہچان اس کے ارادوں اور اس کی سوچ سے ہوتی ہے، جو شخص بڑےخواب دیکھتا اور چیلنجز قبول کرتا ہے وہ اتنا ہی بڑا انسان ہوتا ہے، ہر چھوٹی کامیابی انسان کو بڑی کامیابیوں کیلئے تیار کرتی ہے، انسان جب تک محنت جاری رکھتا ہے وہ اتنا ہی بڑا شخص بنتا جاتا ہے۔
وزیراعظم کا مزید کہنا تھا کہ انسان ہارتا اس وقت ہے جب وہ ہار مان لیتا ہے، اچھا اور برا وقت زندگی کا حصہ ہوتے ہیں، برا وقت سبق سکھاتا ہے، عمران خان نے بلوچستان سے متعلق گفتگو کرتے ہوئے طلباء کو بتایا کہ ملک کے سب سے بڑے صوبے میں پانی کا مسئلہ ہے، جو بڑھتی ہوئی آبادی اور زیر زمین پانی کی سطح کم ہونے سے مزید سنگین ہوگیا ہے، پانی کے مسائل حل کرنے کے لئےجامع منصوبہ بندی کی ضرورت ہے۔
وزیراعظم کا کہنا تھا کہ ملک میں تین طرح کے نظام تعلیم نے مسائل کو جنم دیا ہے، مختلف طبقات کیلئے الگ نظام تعلیم کی کسی معاشرے میں گنجائش نہیں ہوتی، ہماری کوشش ہے ملک بھر میں یکساں اور معیاری نصابِ تعلیم رائج کیا جائے۔
مختلف وجوہات کی بنیاد پر بلوچستان ملک کے باقی حصوں سے پیچھے رہ گیا، کوشش ہے بلوچستان کی تعمیر و ترقی، طالبعلموں کو تعلیم کے مواقع فراہم کریں، بلوچستان کے طلبہ و طالبات کو وظائف دے کر تعلیم کے میدان میں آگے بڑھنے میں مدد دیں گے۔
وزیراعظم عمران خان نے بتایا کہ نئے بلدیاتی نظام میں ترقیاتی فنڈز نچلی سطح پر منتقل کئے جائیں گے، ترقیاتی فنڈز کی فراہمی سے بلوچستان کی پسماندگی دور کرنے میں مدد ملے گی، اس کے علاوہ ملک بھر میں اسپورٹس کا نیا نظام لائیں گے، نوجوانوں کو کھیل کے میدان میں صلاحیتیوں کے جوہر دکھانے کے مواقع دیں گے۔
ہم نے عہد کیا ہے پاکستان کو ریاست مدینہ کے اصولوں پر چلائیں گے، طالب علم ہمارے پیغمبر حضرت محمد کی زندگی سے متعلق تعلیم حاصل کریں، طالب علم سیرتِ طیبہ سے رہنمائی حاصل کریں، سیرت طیبہ پر ریسرچ کیلئے3بڑی جامعات میں سیرت چیئر قائم کی جارہی ہے۔
