اسلام آباد: اسپیکرقومی اسمبلی اسد قیصر نے اپنی پہلی تنخواہ ڈیم فنڈ میں عطیہ کرنے کا اعلان کیا ہے۔
تفصیلات کے مطابق سماجی رابطے کی ویب سائٹ ٹویٹر پراپنے پیغام میں اسپیکرقومی اسمبلی اسد قیصر نے کہا کہ پہلی تنخواہ وزیراعظم اورچیف جسٹس ڈیم فند میں عطیہ کر رہا ہوں۔
اسد قیصر نے کہا کہ پانی انسانی زندگی کی بنیادی ضرورت ہے جس کی قدر کرنی چاہیے، اس عظیم نعمت کے ذخیرے کے لیے ہم سب کو مل کر اقدامات کرنا ہوں گے۔
میں اپنی پہلی تنخواہ وزیراعظم اور چیف جسٹس ڈیم فنڈ کے لئے عطیہ کر رہا ہوں اور تمام پاکستانیوں سے اپیل کرتا ہوں کہ اپنے بچوں کے مستقبل کو بچانے کےلئے اس کار خیر میں حصہ لیں
— Asad Qaiser (@AsadQaiserPTI) September 8, 2018
اسپیکرقومی اسمبلی نے اپنے پیغام میں سب سے اپیل کی کہ وہ اپنے بچوں کے مستقبل کو بچانے کے لیے اس کار خیرمیں بڑھ چڑھ کرحصہ لیں۔
ریٹائرمنٹ کے بعد ڈیم پر پہرہ دوں گا، جھونپڑا بنا کر بھی رہنا پڑا تو رہوں گا‘ چیف جسٹس
یاد رہے کہ گزشتہ روز چیف جسٹس میاں ثاقب نثارکا کہنا تھا کہ ریٹائرمنٹ کے بعد ڈیم پرپہرہ دوں گا، جھونپڑا بنا کر ڈیم پر رہنا پڑا تو رہوں گا، جو کچھ اس دھرتی نے ہمیں دیا آج لوٹانے کا وقت آگیا ہے۔
واضح رہے 7 ستمبرکو وزیراعظم پاکستان نے اپنے خطاب میں ڈیم بنانے کے لیے قوم سے مدد مانگی تھی اور پیغام میں کہا تھا پاکستان بہت سے مسائل کا شکار ہے مگر سب بڑا مسئلہ پانی کی کمی ہے، ڈیم بنانا ناگزیر ہوگیا ہے۔
