اسلام آباد: وزیر اعظم پاکستان میاں محمد نواز شریف نے مسلم لیگ ن کے مرکزی کونسل کے چھٹے اجلاس سے خطاب میں کہا کہ انشاء اللہ 2018 میں خیبرپختونخوا میں ہماری حکومت ہوگی۔
تفصیلات کے مطابق وزیر اعظم نواز شریف نے مسلم لیگ ن کے مرکزی کونسل کے چھٹے اجلاس سے خطاب میں منتخب ہونے والے پارٹی عہدے داروں کو مبارکباد پیش کی۔
نوازشریف نے کارکنوں کو مخاطب کرتے ہوئے کہا کہ آپ کی محبت سے بار بار پارٹی کا صدر منتخب ہوا،میرے نزدیک پارٹی کارکنوں کا بہت اہم مقام ہے۔
وزیر اعظم کاکہناتھاکہ آپ نے صوبے میں کام کیا ہوتا تو لوگ آپ کے معترف ہوتے،خیبرپختونخوا کے لوگ دیکھتے ہیں نئے پاکستان کے نام پر ووٹ لینےوالا کنٹینر پر کھڑا ہے۔
انہوں نے کہا کہ 2013 کے پاکستان اور آج کے پاکستان میں زمین اور آسمان کا فرق ہے، تین سالوں میں زر مبادلہ کے ذخائر ریکارڈ 24 ارب ڈالر تک پہنچ گئے۔
انہوں نےکہا کہ 2018 میں خیبر پختونخوا میں بھی مسلم لیگ ن کی حکومت قائم ہوگی، لوڈ شیڈنگ ختم ہوگی اور مہنگائی میں کمی آئے گی۔
مزید پڑھیں: نوازشریف مسلم لیگ ن کے بلامقابلہ صدر منتخب
ان کا کہنا تھا کہ 2013 میں ایسا لگتا تھا کہ پاکستان دیوالیہ ہونے والا ہے،ملک دہشت گردی کا شکار تھا،20 گھنٹے لوڈ شیڈنگ تھی۔وزیر اعظم نے کہا کہ حکومت نہیں بلکہ دنیا کہہ رہی ہے کہ پاکستان سب سے زیادہ ترقی کرنے والے ملک میں شامل ہے۔
وزیر اعظم کا کہنا تھا کہ چین کاشکریہ اداکرتاہوں جنہوں نےبجلی کےکارخانوں کی سرمایہ کاری کاوعدہ کیا،بجلی کاکارخانہ لگانےکے لیے رقم نہیں تھی،ایک کارخانےپر ایک ارب ڈالر لگتے ہیں،2018 کے بعد 30ہزار میگاواٹ بجلی سسٹم میں شامل ہوگی۔
نواز شریف نے کہا کہ اپنی ایمانداری کی بدولت بجلی کے کارخانوں میں 100ارب روپے کی بچت کی ، ہم نے قوم سے لوڈشیڈنگ ختم کرنے کا وعدہ کیا تھا بجلی سستی کرنے کا نہیں، یہ قوم کے لیے بونس ہے۔
مزید پڑھیں:بدھ 2 نومبر کو اسلام آباد بند کردیں گے،عمران خان
واضح رہے کہ تحریک انصاف نے 2 نومبر 2016 کو اسلام آباد میں احتجاج کرتے ہوئے وفاقی دارالحکومت بند کرنے کا اعلان کیا ہے۔
