اسلام آباد: جمعیت علمائے اسلام کے سربراہ مولانا فضل الرحمٰن نے وزیرِاعظم نواز شریف سے ملاقات کی، ملاقات کے دوران دونوں رہنماؤں نے تیس نومبر کو درپیش حالات پر تبادلہ خیال کیا۔
مولانا فضل الرحمٰان نے وزیراعظم نواز شریف سے وزیرِاعظم ہاؤس میں ملاقات کی، ملاقات میں ملکی سیاسی صورتحال اور تیس نومبر کو تحریکِ انصاف کی جانب سے کئے جانے والے جلسے سے متعلق درپیش حالات پر تبادلہ خیال کیا۔
ملاقات میں جے یو آئی کے رہنماء عبدالغفور حیدری بھی شریک تھے۔
کھٹمنڈو: اٹھارہویں سارک سربراہ کانفرنس خطے میں خوراک کی کمی پوری کرنےسمیت چھتیس اہم نکات پر اتفاق کے ساتھ میں ختم ہو گئی ۔
سارک سربراہ کانفرنس کے اختتام پر جاری چھتیس نکاتی اعلامیہ میں کہا گیا ہے کہ سارک ممالک ریل اور سڑک کے ذریعے روابط میں اضافہ کریں گے جس سے خطے کے عوام کو آمد و رفت اور تجارت کے فوائد حاصل ہوں گے ۔ اعلامیہ میں علاقائی تعاون بڑھانے، جنوبی ایشیا اقتصادی یونین کے قیام پراتفاق کیا گیا، اس اقدام سے خطے کے غریب ممالک کو اپنی مالی ضروریات پوری کرنے اور اہم منصوبوں کیلئے فنڈ کی فراہمی ممکن ہو سکے گی۔
سارک ممالک نے سارک ترقیاتی فنڈ کے قیام پر اتفاق کیا ہے،سارک ممالک میں توانائی کی ضرورت پوری کرنے کے لئے رکن ممالک میں دستیاب وسائل جیسے ہوا،پانی،شمسی منصوبوں کے قیام پرا تفاق کیا گیا ہے تاکہ خطے کے عوام کو جدیدسہولتوں کے ساتھ ا ن کی معاشی ترقی کی راہیں کھل سکیں۔
کھٹمنڈو: سارک سربراہ کانفرنس کا اختتامی سیشن کے دوران وزیراعظم نوازشریف اور بھارتی وزیراعظم نریندرمودی نے خوشگوار موڈ میں مصافحہ اور جملوں کا تبادلہ کیا۔
نیپال کے دارالحکومت کھٹمنڈو میں سارک سربراہ کانفرنس کے اختتامی سیشن میں وزیراعظم نواز شریف نے خطاب کرتے ہوئے کہا کہ مہمان نوازی پر نیپال کی حکومت اورعوام کے شکرگزارہیں، کانفرنس میں بھرپور شرکت پر سارک وفود کےبھی شکرگزارہیں۔
وزیراعظم نواز شریف نے کہا کہ کانفرنس ترقی اور خوشحالی کیلئے منصفانہ اور مساویانہ شراکت داری کے عزم کا اعادہ ہے، خطاب کے بعد وزیراعظم نوازشریف اور بھارتی وزیراعظم نریندرمودی نے خوشگوار موڈ میں مصافحہ بھی کیا، دونوں رہنماؤں کے درمیان خوشگوار موڈ میں جملوں کا تبادلہ بھی ہوا۔
اختتامی سیشن میں سارک ممالک میں توانائی میں تعاون کے فریم ورک کے معاہدوں پردستخط کیے گئے، پاکستان کی طرف سے مشیر خارجہ سرتاج عزیز نے معاہدے پردستخط کئے، اس موقع پر نیپال کے وزیراعظم سُشیل کوئرالہ نے کہا کہ سارک ایجنڈے کے فروغ میں بھرپور کردار ادا کریں گے، مواصلات کے بہترذرائع ترقی میں کلیدی کردار ادا کرتے ہیں، آئندہ سارک سربراہ کانفرنس پاکستان میں ہوگی۔
کھٹمنڈو: اٹھارہویں سارک سربراہ کانفرنس کے موقع پر وزیر اعظم نواز شریف سے بنگلہ دیشی ہم منصب حسینہ واجد نے ملاقات کی۔
سارک سربراہ کانفرنس کے موقع پرملاقات میں دونوں وزرائےاعظم کاپاک بنگلا دیش تعاون پرتبادلہ خیال کیا،اس موقع پر وزیر اعظم نواز شریف کا کہنا تھا کہ دو نوں ملکوں کے باہمی تعاون سے تجارت اور خطے کی صورتحال میں بہتری آسکتی ہے،ملاقات میں حسینہ واجد نے پاکستان کیلئے خیر سگالی کا اظہار کیا، ان کا کہنا تھا کہ پاکستان اور بنگلہ دیش میں ترقی کے بہت مواقع ہیں جن سے استفادہ کرنے کی ضرورت ہے ، دونوں ملک خطے میں دہشتگردی کے خاتمے کیلئے بھی اہم کردار ادا کر سکتے ہیں۔
لاہور: وزیراعلٰی شہباز شریف اور وزیر داخلہ چودھری نثار علی خان کی زیر صدارت اجلاس میں فیصلہ کیا گیا ہے کہ امن و امان پر کوئی سمجھوتہ نہیں ہو گا اور قانون ہاتھ میں لینے والوں سے سختی کے ساتھ نمٹا جائے گا۔
وزیراعلیٰ شہباز شریف اور وفاقی وزیر داخلہ چودھری نثار علی خان کی زیر صدارت ہونے والے اعلیٰ سطح کے اجلاس میں وفاقی وزیر ریلوے خواجہ سعد رفیق، رکن قومی اسمبلی حمزہ شہباز شریف ، صوبائی وزراء کرنل (ر) شجاع خانزادہ ، بلال یاسین ، ایم پی اے رانا ثناءاﷲ، چیف سیکرٹری اور آئی جی پنجاب پولیس شریک تھے۔
اجلاس میں ملک بالخصوص پنجاب میں امن وامان اور سکیورٹی کی صورتحال کا جائزہ لیا گیا، اجلاس میں فیصلہ کیا گیا کہ امن و امان پر کوئی سمجھوتہ نہیں ہو گا اور قانون ہاتھ میں لینے والوں سے سختی کے ساتھ نمٹا جائے گا، اجلاس میں وفاقی اور پنجاب کے سکیورٹی اور انٹیلی جنس اداروں کے درمیان بہترین کوآرڈینیشن پر اظہار اطمینان کرتے ہوئے کہا گیا کہ ملک کی موجودہ سکیورٹی کی صورتحال کے تناظر میں اس میں مزید بہتری کی گنجائش موجود ہے۔
اجلاس میں پنجاب اور وفاق کے سکیورٹی اداروں میں کوآرڈینیشن اور انڈر سٹینڈنگ کو مزید بہتر بنانے کے حوالے سے مختلف آپشنز پر غور بھی کیا گیا، پنجاب حکومت نے وزیر داخلہ کو یقین دہانی کرائی کہ وفاقی حکومت جو پالیسی گائیڈ لائن دے گی، اس پر پوری طرح عملدرآمد کیا جائے گا، اس موقعے پر سیکرٹری داخلہ پنجاب نے امن وامان اور سکیورٹی کی صورتحال کے حوالے سے بریفنگ بھی دی۔
کھٹمنڈو: پاکستان کے وزیراعظم سارک سربراہ کانفرنس میں شرکت کے لیے کھٹمنڈو پہنچ گئے ہے اور ان کی آمد پر شاندار استقبال کیا گیا ہے۔ کانفرنس کے دوران پاک بھارت وزرا اعظم کے درمیان ملاقات کا امکان ظاہر کیا جا رہا ہے جس میں مسئلہ کشمیر سمیت دونوں ممالک کے درمیان باہمی تعلقات پر بات چیت ہوگی۔
وزیراعظم نواز شریف نے کھٹمنڈو جانے سے پہلے میڈیا سے بات چیت کے کرتے ہو ئے کہا کہ خطےمیں امن و استحکام چاہتے ہیں اور سارک کو یورپی یونین کی طرح خوشحال بنانے کی خواہش ہے۔
پاکستان اور بھارت کے حکام نے کھٹمنڈو میں سارک کانفرنس کے دوران نوازشریف اور مودی کی اسٹیک آؤٹ ملاقات کا امکان ظاہر کیا جارہا ہے۔ اسٹیک آؤٹ ماضی میں بھی پاکستان بھارت سربراہان حکومت کے درمیان رابطے کا اہم ذریعہ ثابت ہوا ہے۔
پاکستان اور بھارت کے درمیان موجودہ کشیدگی کے باعث اس اسٹیک آؤٹ کی اہمیت مزید بڑھ جاتی ہے، لیکن دفتر خارجہ کی ترجمان تسنیم اسلم کا ہفتہ وار بریفنگ میں کہنا تھاکہ دونوں سربراہان مملکت میں ملاقات ہو گی یانہیں، اس بارےمیں ابھی کچھ نہیں کہاجاسکتا۔
ادھر بھارتی دفترخارجہ کےترجمان سید اکبر الدین کاکہناہےکہ پاکستان کیجانب سے ملاقات کی درخواست نہیں کی گئی لیکن مسئلہ کشمیر کےحوالےسے پیشرفت کیلئےپاکستان اور بھارت کے پاس صرف شملہ معاہدہ اوراعلان لاہور ہی دو راستےہیں ،پاکستان کا ہمیشہ یہ موقف رہا ہے کہ خطے میں پائیدار امن کیلئے مسلئہ کشمیر کا حل ضروری ہے۔
اسلام آباد: وزیراعظم نواز شریف اٹھارویں سارک سربراہ کانفرنس میں شرکت کیلئے آج اسلام آباد سے کٹھمنڈو روانہ ہورہے ہیں۔
دفتر خارجہ کے مطابق نیپال کے دارالحکومت کٹھمنڈو میں ہونے والے دو روزہ سربراہ اجلاس میں وزیر اعظم نواز شریف پاکستانی وفد کی سربراہی کریں گے۔ وزیراعظم اپنے خطاب میں خطے میں قیام امن ترقی و خوشحالی کیلئے وژن پیش کرینگے۔
وزیر اعظم نواز شریفاپنے دورے میں نیپال، مالدیپ، سری لنکا، بھوٹان، افغانستان اور دیگر ممالک کے رہنماؤں سے ملاقاتیں بھی کریں گے۔ وزیر اعظم نواز شریف ریکارڈ چھٹی بار سارک کانفرنس میں شرکت کر رہے ہیں۔
اسلام آباد: وزیراعظم کی وفاقی وزیر داخلہ چوہدری نثار اور شہباز شریف ملاقات ہوئی۔ ذرائع کے مطابق ملاقات میں سیاسی صورتحال اورپی ٹی آئی کے جلسے کے حوالے سے تبادلہ خیال کیا گیا۔ تیس نومبر کے اسلام آباد جلسے پر حکومت کیا ارادے رکھتی ہے منظر نامہ دھندلا دھندلا سا ہے۔
لیکن وفاقی وزیر داخلہ اور وفاقی وزیراطلاعات کے عمران خان کیلئے کڑوے کسیلے بیانات اگر معمول کی کارروائی کا حصہ نہیں تو خطرے کی گھنٹی ضرور ہے، مخالفت کی فضا میں خواجہ سعد رفیق کا بیان کسی حد تک دوستانہ سا محسوس ہوتا ہے، خواجہ سعد رفیق کہتے ہیں عمران خان ریڈزون عبورنہ کرنےکی انتظامیہ کو ضمانت دیں تو جلسے کی اجازت مل سکتی ہے۔
لاہور: جماعت الدعوۃ کے سربراہ حافظ محمد سعید نے کہا ہے کہ وزیراعظم نواز شریف سارک کانفرنس میں اپنے بھارتی ہم منصب سے ملاقات اور مذاکرات ضرور کریں لیکن مسئلہ کشمیر کو پس پشت نہیں ڈالنا چاہیئے۔
جامعہ القادسیہ میں میڈیا سے گفتگو کرتے ہوئے جماعت الدعوۃ کے سربراہ حافظ محمد سعید نے اعلان کیا کہ ان کی جماعت نظریہ پاکستان کے تحفظ اور اتحاد امت کیلئے 4 اور 5 نومبر کو مینار پاکستان گراؤنڈ میں اجتماع کرے گی، جس کیلئے حکومت سے اجازت حاصل کر لی ہے۔
انہوں نے کہا کہ اس اجتماع میں ملک کو درپیش مسائل کے حل کیلئے قومی کانفرنس بھی بلائی جائے گی، جس میں تمام مذہبی اور سیاسی جماعتوں کو مدعو کیا جائے گا۔
جماعت الدعوۃ کے سربراہ کا کہنا تھا کہ بھارتی وزیراعظم نریندر مودی پرتشدد ذہنیت کا مالک ہے، نواز شریف ان سے مذاکرات ضرور کریں لیکن کسی دباؤ کے تحت نہیں اور بات چیت میں مسئلہ کشمیر کو سرفہرست رکھا جائے۔ انہوں نے کہا کہ داعش کا معاملہ مسائل سے صرف نظر کیلئے اٹھایا جا رہا ہے۔
جماعت اسلامی کے سابق امیر منور حسن کی جانب سے قتال فی سبیل اللہ کے بیان پر ان کا کہنا تھا کہ جماعت الدعوۃ صرف اس جہاد پر یقین رکھتی ہے، جس سے مظلوموں کو آزادی ملے۔
اسلام آباد: وزیراعظم محمد نواز شریف نے سارک سربراہی کانفرنس میں شرکت کیلئے اپنے طیارے میں جانے کے بجائے پی آئی اے سے بوئنگ 777 طیارے کی فرمائش کردی۔
وزیراعظم محمد نواز شریف نے سارک سربراہی کانفرنس میں شرکت کیلئے اپنے طیارے میں سفرکے بجائے پی آئی اے کےبو ئنگ سات سو ستتر کی فرما ئش کردی۔
ذرائع کا کہنا ہے کہ اس سلسلے میں وزیراعظم سیکریٹریٹ سے جاری خفیہ و فوری مراسلے کے ذریعے پی آئی اے انتظامیہ کو ہدایت کی گئی ہے کہ وزیراعظم کیلئے فوری طور پر بوئنگ 777 وی وی آئی پی طیارہ تیار کیا جائے۔
ذرائع کے مطابق بوئنگ 777 طیارے کی فراہمی سے پی آئی اے کو یومیہ کروڑوں روپے کا نقصان اور لاکھوں کا فیول استعمال ہوگا جبکہ وزیراعظم کیلئے ایئر بس اے 320 طیارے کو بھی اسٹینڈ بائی میں رکھنے کی ہدایت کی گئی ہے۔