شنگھائی : وزیراعظم عمران خان کا کہنا ہے کہ پاکستان میں حکومت کے ہرشعبے میں معنی خیز اصلاحت کررہے ہیں۔
تفصیلات کے مطابق وزیراعظم عمران خان نے شنگھائی درآمدی نمائش کی افتتاحی تقریب سے خطاب کرتے ہوئے کہا کہ سی پیک کے ذریعے فاصلوں میں کمی آئے گی، سی پیک سے سرمایہ کاری کے تازہ مواقع میسرآئیں گے۔
انہوں نے کہا کہ پی ٹی آئی نے گزشتہ الیکشن میں تبدیلی کے لیے مہم چلائی، ہماری حکومت نئے پاکستان کا نعرہ لگا کرآئی ہے۔
عمران خان نے تقریب سے خطاب کرتے ہوئے کہا کہ چین اورپاکستان کوسی پیک سے معاشی اور تجارتی فائدہ ہوگا۔
وزیراعظم پاکستان کا کہنا تھا کہ تمام ممالک کے لیے چینی دروازے وسیع کرنے کی بات کو سراہتے ہیں۔ انہوں نے چین کی مہمان نوازی پرشکریہ بھی ادا کیا۔
گلوبلائزیشن نے جنگل کے قانون کا خاتمہ کردیا ہے ‘ چینی صدر
اس سے قبل شنگھائی میں درآمدی نمائش کی افتتاحی تقریب سے خطاب کرتے ہوئے چینی صدر شی جن پنگ کا کہنا تھا کہ ڈیجیٹل ٹیکنالوجی ، مصنوعی ذہانت سے دنیا میں انقلاب برپا ہوا۔
چینی صدر شی جن پنگ کا مزید کہنا تھا کہ چین دیگرممالک کے ساتھ تجارتی فرق ختم کرنا چاہتا ہے، تمام ممالک کے لیے چین کے دروازے مزید وسیع کیے جائیں گے۔
وزیراعظم عمران خان اور روسی صدر ولادی میرپیوٹن سمیت مختلف ممالک کے سربراہان اور 130 ممالک کی 3 ہزار سے زائد کمپنیاں نمائش میں شریک ہیں۔
واضح رہے کہ وزیراعظم عمران خان 5 روزہ دورے پر یکم نومبر کو چین پہنچے تھے، عمران خان کا وزیراعظم منتخب ہونے کے بعد چین کا یہ پہلا دورہ ہے۔
