گوادر:وزیراعظم نواز شریف نے پاک چین اقتصادی راہداری منصوبے کے سلسلے میں گوادر فری ٹریڈ زون سمیت 5 مختلف منصوبوں کا سنگ بنیاد رکھ دیا.
تفصیلات کے مطابق وزیراعظم نوازشریف ایک روزہ دورے پرگوادر پہنچے تووزیراعلیٰ بلوچستان ثنااللہ زہری اور گورنر بلوچستان نے ان کا استقبال کیا.اس موقع پر لیفٹیننٹ جنرل ریٹائرڈ قادر بلوچ،ناصر خان جنجوعہ،احسن اقبال اور میر حاصل خان بزنجوبھی وزیراعظم کے ہمرا ہ تھے.
وزیراعظم نوازشریف نےگوادر میں ترقیاتی منصوبوں کی افتتاحی تقریب سےخطاب کرتے ہوئے کہا کہ گوادر کو بین الاقوامی شہر بنتا دیکھ کر بہت خوشی ہورہی ہے.
انہوں نے کہا کہ گوادر مستقبل میں پاکستان کا بہترین شہر ہوگا،یہاں جدید انٹرنیشنل ایئرپورٹ بھی ہوگا،جہاں سے گلف کے علاوہ یورپ کے لیے بھی پروازیں چلیں گی.
ان کا کہنا تھا کہ یہاں 50 ہزار ملازمتوں کے مواقع بھی پیدا کیے جائیں گے، جس میں مقامی افراد کو موقع دیا جائے گا.
وزیراعظم نے کہاکہ گوادر پورٹ سے ناصرف بلوچستان بلکہ ملک پر اچھے اثرات مرتب ہوں گے جبکہ اقتصادری راہداری میں گوادر کو مرکزی حیثیت حاصل ہے.
انہوں نے کہا یہاں 150 بستروں پر مشتمل ایک جدید اسپتال بنایا جارہا ہے،جسے بعد میں 300 بستروں پر مشتمل کردیا جائے گا.اس کے علاوہ پینےکےپانی کےلیےپلانٹ اور بجلی کےمنصوبوں پر کام جاری ہے.
وزیراعظم کا کہنا تھا کہ ان کا یہ دیرینہ خواب تھا اور یہ بڑی خوشی کی بات ہے کہ یہاں امن بھی قائم ہوا ہے، جس کے لیے انھوں نے فوج، پولیس اور انتظامیہ کو خراج تحسین پیش کیا.
وزیراعظم نے کہا کہ مجھے وہ دن نظر آرہا ہے جب ٹریفک چین سے گوادر اور گوادر سے چین جائے گی،جس کا فائدہ دونوں ملکوں کو ہوگا.
ان کا کہنا تھا کہ پاکستان میں بجلی کے بحران پر قابو پانے میں چین کا بڑا عمل دخل ہے اور یہ دیکھ کر بہت خوشی ہوتی ہے.
اس سے قبل وزیر اعظم نوازشریف نے گوادر میں 5 ترقیاتی منصوبوں کا سنگ بنیاد رکھا۔
ریڈیو پاکستان کی ایک رپورٹ کے مطابق ان منصوبوں میں فری ٹریڈ زون، بزنس کمپلیکس آف گوادر پورٹ اتھارٹی، پاک چین گورنمنٹ پرائمری اسکول فقیر کالونی، سوار اور شادی خور ڈیمز اور گوادر یونیورسٹی شامل ہیں.
وزیراعظم کو ان منصوبوں کے حوالے سے بریفنگ بھی دی گئی، جو پاک چین اقتصادی راہداری منصوبے کا حصہ ہیں.
گوادر میں ترقیاتی منصوبوں کی تقریب خطاب کرتے ہوئے وزیراعلیٰ بلوچستان ثنااللہ زہری نےکہا کہ گوادر منصوبے سے معاشی سرگرمیوں میں اضافہ ہورہا ہے اورگوادر کی ترقی اب حقیقت بنتی نظر آرہی ہے.
ثنااللہ زہری کا مزید کہنا تھا کہ گوادر منصوبے کی راہ میں حائل رکاوٹیں دور کرنےپروزیراعظم کےمشکور ہیں.وزیراعظم خود گوادر کےترقیاتی منصوبوں میں ذاتی دلچسپی لےرہےہیں.
وزیراعلیٰ بلوچستان نے بتایا کہ اب گوادر میں رئیل اسٹیٹ کےکاروبار کی قیمتیں3 گناتک بڑھ گئی ہیں،رئیل اسٹیٹ کاکاروبار ایک زمانے میں ختم ہوگیا تھا.
واضح رہے کہ گوادر فری زون 2300 ایکڑ رقبے پر تعمیر کیا جائےگا،چین اوور سیز پورٹ ہولڈنگ کمپنی کی جانب سے منصوبے کی تعمیر کی جائےگی جبکہ فری زون میں انڈسٹریل یونٹس کے قیام کےلیے صنعتی زون بھی بنایا جائےگا.
