اسلام آباد : الیکشن کمیشن آف پاکستان نے وزیر اعظم پاکستان کی اہلیت ختم کرنے کے لیے دائر ریفرنس پر قانونی اور آئینی چارہ جوئی کا آغاز کر تے ہوئے سیاسی جماعتوں کو نوٹس جاری کردیا۔
تفصیلات کے مطابق الیکشن کمیشن آف پاکستان نے وزیاراعظم کے خلاف ریفرنس جمع کروانے والی تمام سیاسی جماعتوں کو 3 اگست کو حاضر ہونے کا نوٹس جاری کردیا ہے،پاناما پیپرزسےمتعلق وزیراعظم نوازشریف کےخلاف نااہلی کی درخواستیں دینےوالی جماعتوں میں پیپلزپارٹی، تحریک انصاف، عوامی مسلم لیگ اور پاکستان عوامی تحریک شامل ہیں۔
اسی سے متعلق : الیکشن کمیشن کےنئےممبران نے عہدے کاحلف اٹھا لیا
واضح رہے پاناما انکشافات کے بعد بڑی سیاسی جماعتوں نے وزیراعظم کو نااہل قراردلوانے کیلئےالیکشن کمیشن کا دروازہ کھٹکھٹایا تھا تا ہم الیکشن کمیشن کے ممبران کی ریٹائرمنٹ کے بعد 12 جون سے کمیشن غیر فعال تھا،جس کے باعث اس ریفرنس پر کوئی قانونی چارہ جوئی نہ ہو سکی تھی تا ہم سپریم کورٹ کے حکم کے بعد الیکشن کمیشن کے ممبران کی تقرری کردی گئی ہے یوں الیکشن کمیشن فعال ہو گئی ہے۔
یاد رہے پانامہ لیکس میں وزیراعظم کے صاحبزادوں کی جانب بنائے گئے آف شور کمپنیوں کے انکشاف کے بعد سے وزیر اعظم سخت دباو کا شکار ہیں اور اس حوالے سے قومی اسمبلی میں پارلیمانی کمیٹی بھی تشکیل دے دی گئی ہے جس میں اپوزیشن اور حکومتی کمیٹی میں چار چار اراکین موجود ہیں جو پانامہ لیکس ،آف شور کمپینیوں اور منی لانڈرنگ وغیرہ جیسے اہم امور کی تحقیقات کر رہی ہیں۔
