ARYNews.tv | Urdu – Har Lamha Bakhabar

Tag: وزیراعظم

  • وزیراعظم کی وطن واپسی کیلئےخصوصی بوئنگ طیارہ آج رات روانہ ہوگا

    وزیراعظم کی وطن واپسی کیلئےخصوصی بوئنگ طیارہ آج رات روانہ ہوگا

    کراچی: وزیر اعظم کی لندن سے واپسی کے لیے سواری تیار ہوگئی، پی آئی اے کا بوئنگ ٹرپل سیون وزیر اعظم کو لندن لینے جائے گا۔

    وزیراعظم کولندن سے وطن واپس لانے لانے کے لئے پی آئی اے کا بوئنگ طیارہ سجناشروع ہوگیا، بوئنگ ٹرپل سیون خالی ہی لندن اڑان بھرے گا پاکستان انٹر نیشنل ائیرلائنزکےانجینئرزکودو بوئنگ طیاروں کو وی آئی پی بنانے کی ہدایت مل گئی۔انتظامیہ کوکھانا بھی وی آئی پی بنانےکے انتظامات کرنےکی ہدایت آئی ہے۔

    گزشتہ رات وزیر اعظم کی شاہی سواری کو تیار کرنے کیلئے قومی ایئرلائن کے عملے کی دوڑیں لگی رہیں، پی آئی اے کے بوئنگ ٹرپل سیون کی تمام سیٹیں نکال کر رات بھر جراثیم کش اسپرے کا عمل جاری رہا، جبکہ طیارے میں 24 وی آئی پی سیٹیں لگادیں گئیں۔

    وزیراعظم کی وطن واپسی کیلئے قومی ایئرلائن کے دو طیاروں کا انتخاب کیا گیا ہے ایک بوئنگ طیارے اسٹینڈ بائی پر رہے گا جبکہ دوسرا خصوصی طیارہ کراچی سے آج رات برطانیہ کے اسٹینسٹڈ ایئرپورٹ روانہ ہوگا، جس کے باعث پی آئی اے فیول کی مد میں لاکھوں ڈالر کے اخراجات برداشت کرے گا۔

    قومی ایئرلائن کے دو بوئنگ طیاروں کے ریزرو کرنے کی وجہ سے نیویارک ، ٹورنٹو ، پیرس جانے والی پروازوں کا شیڈول بری طرح متاثر ہوگا،جس کے باعث امریکہ کینیڈا اور پیرس کے مسافروں کی تقریبا 24 گھنٹے بعد واپسی ہوگی۔ ،

    ذرائع کا کہنا ہے وزیر اعظم اپنی شاہی سواری میں نو جولائی کواہلخانہ کے ہمراہ لندن کے وقت کے مطابق صبح آٹھ بجے لاہور کے لیے روانہ ہونگے۔

    وزیر اعظم کی شاہی سواری کو تیار کرنے کے لئے قومی ایئرلائن کو کروڑوں ڈالر کا نقصان برداشت کرنا پڑے گا تاہم پی آئی اے پہلے ہی بڑے خسارے سے دوچار ہے۔

    واضح رہے کہ وزیراعظم نواز شریف بائیس مئی کو علاج کے لیے لندن گئےتھے جہاں ہارلے اسٹریٹ اسپتال میں 31 مئی کوان کے دل کی سرجری ہوئی۔

  • صدر اور وزیراعظم کی قوم کو عید الفطر کی مبارک باد، تہنیتی پیغامات

    صدر اور وزیراعظم کی قوم کو عید الفطر کی مبارک باد، تہنیتی پیغامات

    اسلام آباد: صدرممنون حسین اور وزیر اعظم نواز شریف نے قوم کو عیدالفطر کی مبارکباد دی ہے۔ الگ الگ تہنیتی پیغامات میں دونوں رہنماؤں نے کہا ہے کہ عید الفطر مسلمانوں کے لئے خوشی اور تشکر کا دن ہے۔

    صدر ممنون حسین نے قوم کو عید کی مبارک باد دیتے ہوئے کہا ہے کہ عید ایک تہوار نہیں، اس کا تعلق رواداری ، برداشت اور امن سے ہے، انہوں نے کہا ہے کہ قوم عید کی خوشیوں میں شمالی وزیرستان کے اُن بہن بھائیوں کو بھی یاد رکھیں جو وطن عزیز کی سلامتی اور ہمارے روشن مستقبل کی خاطر بے گھر ہوئے ہیں۔

    وزیراعظم نواشریف کا کہنا تھاکہ عید الفطر مسلمانوں کے لئے خوشی اور تشکر کا دن ہے۔ وزیراعظم نے اپنے عید پیغام میں آپریشن ضرب عضب میں مصروف جوانوں کو بھی خراج تحسین پیش کیا۔

    عمران خان نے بھی قوم کو عید کی مبارک دی ہے اپنے پیغام میں ان کا کہنا ہے کہ ہمیں ذاتی مفادات سے بالاتر ہوکر سوچنا چاہیئے تاہم عمران خان عید کی نماز لاہور میں ادا کریں گے۔

    وزیراعلی سندھ قائم علی شاہ کہتے ہیں عید غریبوں، یتیموں اور نادار افراد کی مدد کا درس دیتی ہے اپنے پیغام میں انہوں نے ضرب عضب میں شہید جوانوں کو خراج عقیدت بھی پیش کیا ہے۔

  • نواز شریف کو نااہل قرار دینے کی پیپلز پارٹی کی درخواست بھی التوا کا شکار

    نواز شریف کو نااہل قرار دینے کی پیپلز پارٹی کی درخواست بھی التوا کا شکار

    اسلام آباد: وزیراعظم نواز شریف کو نااہل قرار دینے کی پیپلز پارٹی کی درخواست بھی التوا کا شکار ہوگئی، الیکشن کمیشن کا کہنا ہے کہ ہمارے ارکان کی تقرری تک درخواستوں پر کوئی کارروائی نہیں ہوسکتی۔

    تفصیلات کے مطابق سیکریٹری الیکشن کمیشن بابریعقوب نے وزیراعظم کے خلاف ریفرنسز موصول ہونے کی تصدیق کردی،ساتھ ہی پاکستان تحریک انصاف کے بعد الیکشن کمیشن نے پیپلز پارٹی کو بھی انتظار کرنے کی ہدایت کردی۔

    ان کا کہنا تھا کہ چیف الیکشن کمشنر اکیلے کسی درخواست کی شنوائی نہیں کرسکتے،کمیشن مکمل ہونے پرزیرالتوا کیسزکھولیں جائیں گے، الیکشن کمیشن کے ممبران کی تقرری تک کسی کو بھی نااہل قرار دینے کی درخواستیں التوا کا شکار رہیں گی۔

    سیکریٹری الیکشن کمیشن کا کہنا تھا صوبائی مبمران کےنہ ہونے سےخلا پیدا ہوا،حکومت کوممبران کی تعیناتی کےلئےخط لکھ دیا ہے، نااہلی کی تمام درخواستوں کو علیحدہ کرکے رکھ دیا گیا ہے۔

    واضح رہے کہ پی ٹی آئی کے بعد پیپلزپارٹی نے بھی الیکشن کمیشن میں وزیر اعظم اور ان کے چار رشتے داروں کے خلاف نااہلی ریفرنس دائر کی ۔

    یپلز پارٹی کے رہنمالطیف کھوسہ کاکہنا تھا کہ وزیر اعظم نواز شریف وزیر اعلی پنجاب شہبازشریف، وزیرخزانہ اسحاق ڈار اور اراکین قومی اسمبلی اور وزیر اعظم کے داماد کیپٹن صفدراور شہباز شریف کے بیٹے شریف کی حمزہ شہباز کے خلاف ریفرنس دائر کیا ۔

    لطیف کھو سہ نے کہا تھا کہ یہ پانچوں افرادآئین کےآرٹیکل باسٹھ اور تریسٹھ پرپورانہیں اترتے، الیکشن کمیشن میں پیپلز پارٹی کی جانب سے دائر ریفرنس ایک ہزارصفحات پرمشتمل ہے جس میں ثبوت کےطورپر ان کے متضاد بیانات کو شامل کیا گیا ہے۔

  • پیپلزپارٹی کا وزیر اعظم کی نااہلی کیلئےریفرنس تیار

    پیپلزپارٹی کا وزیر اعظم کی نااہلی کیلئےریفرنس تیار

    اسلام آباد: پی ٹی آئی کے بعد پیپلزپارٹی نے بھی وزیر اعظم اور انکے چار رشتے داروں کیخلاف ریفرنس دائر کرنے کی تیاری کرلی، ریفرنس پیر کو دائر کیا جائےگا۔

    تفصیلات کے مطابق وزیراعظم کے نااہلی کا معاملہ پی ٹی آئی کی جانب سے الیکشن کمیشن میں وزیراعظم کی نااہلی کی درخواست دائر کرنے کے بعد پیپلزپارٹی نے بھی وزیراعظم کیلئے خطرے کی گھنٹی بجا دی ہے۔

    پیپلزپارٹی کی جانب سے وزیراعظم اور ان کے قریبی رشتے داروں کی نااہلی کیلئے ریفرنس تیار کرلیا، نااہلی کے ریفرنس سے وزیراعظم پر دباؤ تو بڑھ گیا، لیکن الیکشن کمیشن کے صوبا ئی سربراہان کی غیرمو جودگی سوالیہ نشان ہے۔

    پیپلز پارٹی کے رہنمالطیف کھوسہ کاکہناہے وزیر اعظم نواز شریف وزیر اعلی پنجاب شہبازشریف، وزیرخزانہ اسحاق ڈار اور اراکین قومی اسمبلی اور وزیر اعظم کے داماد کیپٹن صفدراور شہباز شریف کے بیٹے شریف کی حمزہ شہباز کے خلاف ریفرنس دائر کیا جا ئے گا۔

    لطیف کھو سہ نے کہاکہ یہ پانچوں افرادآئین کےآرٹیکل با نسٹھ اور تریسٹھ پرپورانہیں اترتے، الیکشن کمیشن میں پیپلز پارٹی کی جانب سے دائر ریفرنس ایک ہزارصفحات پرمشتمل ہے جس میں ثبوت کےطورپر ان کے متضاد بیانات کو شامل کیا گیا ہے۔

    ریفرنس میں وزیراعظم اورانکےخاندان کےگوشواروں میں وزیراعظم،شہبازشریف،اسحاق ڈار کی غلط بیانی کوشامل شامل کیاگیا ہے۔

    وزیراعظم کی نااہلی ریفرنس کیلئے پیپلز پارٹی نے تحریک انصاف سے مدد مانگ لی ہے پی ٹی آئی رہنما فیصل ووڈا نے پی پی پی کے رہنما لطیف کھوسہ کو وزیر اعظم کے بیرون ملک اثاثوں کی تفصیلات دے دیئے ہیں۔

  • دھرنے اور اشتعال انگیز تقریروں سے جمہوریت کو کوئی خطرہ نہیں، پرویز رشید

    دھرنے اور اشتعال انگیز تقریروں سے جمہوریت کو کوئی خطرہ نہیں، پرویز رشید

    لندن : وفاقی وزیراطلاعات پرویزرشید کا کہنا ہے کہ دھرنے اور اشتعال انگیز تقاریر سے جمہوریت کو کو ئی خطرہ نہیں ہے.

    تفصیلات کے مطابق لندن پہنچنے پر میڈیا سے گفتگو میں پرویزرشیدکا کہنا تھا کہ پاکستان کا سیاسی نظام پہلے سے زیادہ مظبوط ہے،وزارت خارجہ قومی مفادات کے تحفظ کےلیے پورا کردار ادا کررہی ہے.

    وفاقی وزیر پرویزرشید کا مزید کہنا تھا کہ تحریک انصاف ٹی او آرز پر اس لیے اتفاق نہیں کررہی کیونکہ سب سے زیا دہ آف شور کمپنیاں پاکستان تحریک انصاف والوں کی ہیں ،اگر تحقیقات ہوئیں تو عمران خان بھی لپیٹ میں آئیں گے.

    انہوں نے کہا دھرنوں اور اشتعال انگیز تقریروں سے جمہوریت کو کوئی خطرہ نہیں ہے.

    یاد رہے کہ وزیراعظم نواز شریف کے بلاوے پرگذشتہ روز وفاقی وزیر اطلاعات پرویز رشید،معاون خصوصی طارق فاطمی اور فواد حسن فواد پی آئی اے کی پرواز پی کے 785 سے لندن روانہ ہوئےتھے.

    تینوں رہنما اسلام آباد سے لندن کےلیے روانہ ہوئے جہاں وہ وزیراعظم نوازشریف سے ملکی و سیاسی صورتحال پر تبادلہ خیال کریں گے،خیال رہے کہ وزیراعظم نواز شریف نے وزرا اور قریبی رفقا کو لندن میں طلب کیا تھا.

  • آرمی چیف، وزیر اعظم منہاج قاضی کے بیان کا نوٹس لیں، فاروق ستار

    آرمی چیف، وزیر اعظم منہاج قاضی کے بیان کا نوٹس لیں، فاروق ستار

    کراچی : متحدہ قومی موومنٹ کے ڈپٹی کنوینر ڈاکٹر فاروق ستار نے آرمی چیف جنرل راحیل شریف اور وزیر اعظم میاں نواز شریف سے منہاج قاضی کے ویڈیو بیان کا نوٹس لینے کا مطالبہ کیا ہے۔

    انہوں نے کہا کہ ایم کیو ایم پر الزامات غیرقانونی اور غیرآئینی ہیں، ان خیالات کا اظہار انہوں نے نائن زیرو پر وکلاء کے ہمراہ پریس کانفرنس سے خطاب کرتے ہوئے کیا.

    ڈاکٹر فاروق ستار کا کہنا ہے کہ انیس سو اٹھانوے میں حکیم محمد سعید کے قتل کے بعد پھر ایم کیوایم کا میڈیا ٹر ائل کیا جا رہا ہے.

    انہوں نے کہا کہ اس کیس میں پکڑے گئے ایم کیو ایم کے کارکنان الزامات ثابت نہ ہونے پرباعزت بری ہو گئے تھے، فاروق ستار نے کہا کہ ایم کیو ایم کو تنہا کرنے کے لئے پرانے الزامات لگائے جارہے ہیں اور نائن زیرو کے سابق سیکیورٹی انچارج منہاج قاضی نے رینجرز کی تحویل میں الزامات لگائے جسے یکسر مسترد کرتے ہیں۔

    ان کا کہنا تھا کہ اس ویڈیو کے پس پردہ عوامل اور مقاصد کا جائزہ لے رہے ہیں، ڈاکٹر فاروق ستار نے کہا کہ جنرل راحیل شریف اور وزیر اعظم سے مطالبہ کرتے ہیں کہ منہاج قاضی کے ساتھ خالد شمیم کے ویڈیو بیانات کا نوٹس لیا جائے ۔

    زور زبردستی اور تشدد کرکے زیرحرست ملزمان سے ایسے بیانات لینا کوئی مشکل کام نہیں۔ ان کا کہنا تھا کہ جو کچھ بھی ہو رہا ہے اس کا اچھا تاثر نہیں آئے گا، اس پر اداروں کو سوچنا چاہیئے۔

    ڈاکٹر فاروق ستار نے سپریم کورٹ سے بھی اپیل کی کہ وہ متحدہ قومی موومنٹ پر لگائے گئے الزامات پر ازخود نوٹس لے۔

     

  • فرانس کے وزیراعظم دو روزہ دورے پر یونان پہنچ گئے

    فرانس کے وزیراعظم دو روزہ دورے پر یونان پہنچ گئے

    ایتھنز: فرانسیسی وزیراعظم مینیوئل والس دوروزہ دورے پر یونان کے دارالحکومت ایتھنز پہنچ گئے،ان کا کہنا تھا کہ فرانس یونان کو معاشی بحران سے نکالنے میں مدد کرے گا.

    تفصیلات کے مطابق فرانسیسی وزیراعظم مینیوئل والس دوروزہ سرکاری دورے پر ایتھنز پہنچ گئے،فرانسیسی وزیراعظم کےہمراہ وزیرخزانہ اوراسٹیٹ سیکرٹری برائے یورپی اموربھی موجود ہیں.

    فرانسیسی وزیراعظم مینیوئل والس یونان میں فرانسیسی سرمایہ کاری سے متعلق مذاکرات کریں گے،دورےکےآغاز سےقبل انٹریومیں فرانسیسی وزیراعظم کاکہناتھاکہ فرانس یونان کی معاشی اورمہاجرین کےبحران سےنکلنےمیں ہرممکن مدد کرےگا.

    فرانسیسی وزیراعظم یونانی ہم منصب کےساتھ ملاقات کےبعد دونوں ممالک کےدوران اسٹریٹیجک پارٹنر شپ کےروڈمیپ پر دستخط کریں گے.

    یاد رہے اس سے قبل روسی صدر نے یونان کا دورہ کیا تھا،پیوٹن نے یونان کے وزیر اعظم کو معاشی بحران سے نکلنے کے لیے مدد کی پیشکش کی تھی.

  • اگر افتخار چوہدری چیف جسٹس ہوتے تو وہ اب تک وزیراعظم کے منصب پر بیٹھ جاتے، بلاول بھٹو

    اگر افتخار چوہدری چیف جسٹس ہوتے تو وہ اب تک وزیراعظم کے منصب پر بیٹھ جاتے، بلاول بھٹو

    اسلام آباد : پیپلزپارٹی کے چیئرمین بلاول بھٹو زرداری نے کہاہے اگر اس وقت افتخار چوہدری چیف جسٹس ہوتے تو خود کو وزیر اعظم کے منصب پر فائز کرلیتے۔ یہ بات انہوں نے سماجی رابطے کی ویب سائٹ ٹوئٹر پر اپنے پیغام میں کہی۔

    چیئرمین پیپلزپارٹی بلاول بھٹو زرداری نے ملک میں حکمرانوں کی غیر موجودگی پر شکوہ کرتے ہوئے کہا کہ ’’ملک میں اس وقت نہ وزیراعظم موجود ہیں اور نہ ہی وزیرخارجہ،جبکہ وزیر اعلٰی شہباز شریف بھی بیرون ملک میں مقیم ہیں‘‘۔

    اپنے ٹوئٹ میں ان کا کہنا ہےکہ ’’ یہ اچھی بات ہے کہ اس وقت افتخار چوہدری چیف جسٹس نہیں ہیں ورنہ وہ خود کو وزیراعظم کے منصب پر فائض کرلیتے‘‘۔

    دوسری جانب دو روز قبل سابق چیف جسٹس آف پاکستان افتخار محمد چوہدری نے حکومت سے مطالبہ کیا تھا کہ ملک میں آئینی بحران سے بچنے کے لیے وزیر اعظم کی غیر موجودگی میں فوری طور پر کسی دوسرے شخص اس منصب پر نامزد کیا جائے۔

    اس حوالے سے انہوں نے مزید کہا تھا کہ جنگ اور ایمرجنسی کی صورت میں اگر وزیر اعظم خود کسی دوسرے شخص کو  وزیر اعظم کے لیے منتخب کر کے ملکی صدر کو اپنی یہ تجویز ارسال کریں تو آئینی راستہ اختیار کرتے ہوئے اُس شخص کو وزارتِ عظمیٰ کے منصب پر فائز کیا جاسکتا ہے۔ 

    مزید پڑھیں : آئینی بحران سے بچنے کیلئے نئے وزیراعظم کی تقرری کی جائے، سابق چیف جسٹس

    واضح رہے وزیر اعظم پاکستان میاں محمد نواز شریف کی آج لندن میں ہونے والی سرجری کامیاب ہوئی ہے، جس پر اُن کی صاحبزادی نے اپنے ٹوئٹ کے ذریعے پیغام دیا ہے کہ ’’اللہ کے شکر سے آپریشن کامیاب ہوگیا ہے، اللہ رب العزت میرے والد کو صحت و تندرستی کے ساتھ لمبی زندگی عطاء فرمائے‘‘۔

  • وزیراعظم کےعلاج کے تمام اخراجات شریف خاندان برداشت کرے گا، ترجمان وزیراعظم ہاؤس

    وزیراعظم کےعلاج کے تمام اخراجات شریف خاندان برداشت کرے گا، ترجمان وزیراعظم ہاؤس

    اسلام آباد: ترجمان وزیراعظم ہاوس کا کہنا ہے کہ وزیراعظم میاں محمد نواز شریف لندن سے براہ راست امور مملکت چلا رہے ہیں۔

    وزیر اعظم ہاؤس سے جاری اعلامیے میں کہا گیا ہے کہ ریاستی امور کی ادائیگی میں کسی قسم کا تعطل نہیں ہے، وزیراعظم لندن سے براہ راست امور مملکت چلا رہے ہیں۔

    ترجمان کا کہنا ہےکہ سرجری کی بعد وزیراعظم ڈاکٹروں کےمشورے کےمطابق واپس پاکستان آئیں گے، اعلامیہ میں کہاگیا ہےامور مملکت چلانے میں پرنسپل سیکریٹری، ملٹری سیکریٹری اور دیگر اسٹاف اراکین انکی معاونت کررہے ہیں۔

    وزیراعظم کی ہدایات قاعدے اور قانون کے مطابق متعلقہ لوگوں تک پہنچائی جارہی ہیں، وزیراعظم اس تناظر میں کابینہ اراکین اورمتعلقہ افرادسے رابطوں میں ہیں۔

    ترجمان نے یہ بھی واضح کیا ہےکہ وزیراعظم کےعلاج کے تمام اخراجات انکے اہلخانہ برداشت کر رہے ہیں اور علاج کی غرض سے سرکاری خزانے کا بالکل استعمال نہیں کیا جارہا ہے۔

    دوسری جانب وزیر اعظم کی اوپن ہارٹ سرجری سے پیدا ہونے والی صورتحال پر غور کے لیے وفاقی وزیر خزانہ اسحاق ڈار کی زیر صدارت وزرا کا مشاورتی اجلاس ہوا۔

    اجلاس میں حکومتی امور اور بجٹ کے حوالے سے لائحہ عمل طے کیا گیا، اجلاس میں اسحاق ڈار کے علاوہ مریم نواز اور سنیئر وزرا خواجہ آصف، احسن اقبال اور دیگر شامل تھے۔

    اجلاس کے بعد میڈیا سے گفتگو کرتے ہوئے وفاقی وزیر اطلاعات پرویز رشید نے کہا کہ ملک میں کوئی بحرانی کیفیت نہیں، وزیر اعظم مسلسل رابطے میں ہیں، انہوں نے واضح کیا کہ وزیر اعظم کی عدم موجودگی میں قائم مقام کی کوئی ضرورت نہیں۔

    وزیر اطلاعات پرویز رشید کا کہنا تھا کہ اسحاق ڈار وزرا کی مشاورت سے امور چلا رہے ہیں، وزیر اعظم نے اہم امور پر رات کو بھی ہدایات جاری کیں۔

  • بلاول بھٹو زرداری اورعمران خان کا وزیراعظم کی صحت یابی کے لیے دعا

    بلاول بھٹو زرداری اورعمران خان کا وزیراعظم کی صحت یابی کے لیے دعا

    کراچی : پاکستان پیپلز پارٹی کے چیئرمین بلاول بھٹو زرداری نے وزیراعظم کےلیے دعائے صحت کی اپیل کی ہے،جبکہ تحریک انصاف کے چیئرمین نے بھی وزیراعظم کے جلد صحت یاب ہونے کی دعا کی.

    تفصیلات کے مطابق چیئرمین پاکستان پیپلز پارٹی بلاول بھٹو زرداری کی جانب سے ٹویٹر پیغام میں وزیراعظم پاکستان میاں نواز شریف کے لیےصحت کی اپیل کی ہے.

    بلال بھٹو زرداری کا اپنے ٹویٹر پیغام میں کہنا تھا کہ تمام پاکستانی وزیراعظم نوازشریف کی صحت کے لیے دعا کریں،ان کا کہنا تھا کہ وزیراعظم جلد صحت یاب ہو جائیں گے.

    دوسری جانب پاکستان تحریک انصاف کے چیئرمین عمران خان نے بھی وزیراعظم نوازشریف لے لیے نیک تمناؤں کا اظہار کرتے ہوئے ان کی جلد صحت یابی کے لیے دعا کی.

    یاد رہے کہ وزیراعظم پاکستان میاں محمد نوازشریف کو برطانوی ڈاکٹروں نےفوری طور پر اوپن ہارٹ سرجری کی ہدایت کی تھی،وزیر اعظم کی لندن میں منگل کو اوپن ہارٹ سرجری کی جائے گی.