ARYNews.tv | Urdu – Har Lamha Bakhabar

Tag: وزیراعظم

  • آن لائن انتہا پسندی ، نیوزی لینڈ کی وزیراعظم کا بڑا فیصلہ

    آن لائن انتہا پسندی ، نیوزی لینڈ کی وزیراعظم کا بڑا فیصلہ

    کرائسٹ چرچ: نیوزی لینڈ کی وزیراعظم جیسنڈا آرڈرن نے آن لائن انتہا پسندی سے نمٹنے کے لیے تفتیش کاروں کی ایک ٹیم تشکیل دینے کا فیصلہ کرلیا۔

    تفصیلات کے مطابق کرائسٹ مساجد حملوں کی ناکامی اور سانحہ کو سماجی رابطے کی ویب سائٹ فیس بک پر لائیو نشر کرنے کے بعد جیسنڈا آرڈرن ٹیکنالوجی کمپنیوں سے انتہا پسند مواد ہٹانے کے لیے بین الاقوامی سطح پر کوششیں کررہی ہیں۔

    غیر ملکی خبررساں ادارے کے مطابق اپنے ایک بیان میں جیسنڈا آرڈرن کاکہنا تھا کہ نیوزی لینڈ کی 2 مساجد کو نشانہ بنائے جانے سے یہ ظاہر ہوا کہ ہماری حکومت کو آن لائن نفرت انگیز مواد کے پھیلاؤ کو روکنے کے لیے وسائل میں بہتری کی ضرورت ہے۔

    انہوں نے کہا کہ ہمارے پاس ایک بہت اچھی ٹیم ہوگی جو ہمارے ڈیجیٹل چینلز پر پرتشدد انتہا پسند مواد کا پتہ لگائے گی اور اس کے پھیلاؤ کو روکنے پر توجہ مرکوز رکھے گی۔

    ان کا کہنا تھا کہ محکمہ داخلہ، تحقیقاتی، فرانزک اور انٹیلی جنس لحاظ سے 17 ماہرین منتخب کرے گا تاکہ آن لائن پرتشدد مواد کو ناکام بنانے پر توجہ مرکوز کی جاسکے۔

    سانحہ نیوزی لینڈ: آسٹریلوی شہری کا مسلمانوں سے منفرد انداز میں اظہار یکجہتی، ویڈیو وائرل

    علاوہ ازیں نیوزی لینڈ کے وزیر داخلہ ٹریسی مارٹن نے کہا کہ حکام کی جانب سے ردعمل کے وقت کو بہتر ہونے کی ضرورت ہے تاکہ قابل اعتراض مواد کو تیزی سے ہٹایا جائے اور انتہا پسندوں کے لیے ایک پلیٹ فارم بننے سے روکا جائے۔

    ان کا مزید کہنا تھا کہ 15 مارچ کو ہونے والا دہشت گردی کا حملہ جس آسانی اور تیزی سے آن لائن پھیلا اس سے ظاہر ہوتا ہے کہ ہمیں اپنے نظام کو بہتر بنانے کی ضرورت ہے۔

  • حیران ہوں عالمی میڈیا ہانگ کانگ احتجاج کی کوریج کر رہا ہے کشمیرکی نہیں، عمران خان

    حیران ہوں عالمی میڈیا ہانگ کانگ احتجاج کی کوریج کر رہا ہے کشمیرکی نہیں، عمران خان

    اسلام آباد: وزیراعظم عمران خان کا کہنا ہے کہ 9 لاکھ بھارتی فوجیوں نے 80لاکھ کشمیریوں کو یرغمال بنا رکھا ہے، حیران ہوں عالمی میڈیا ہانگ کانگ احتجاج کی کوریج کر رہا ہے کشمیرکی نہیں۔

    تفصیلات کے مطابق سماجی رابطے کی ویب سائٹ ٹویٹر پر وزیراعظم عمران خان نے اپنے پیغام میں کہا کہ پریشان ہوں عالمی میڈیا ہانگ کانگ کے احتجاج کو ہیڈلائن بنا رہا ہے۔

    انہوں نے کہا کہ عالمی میڈیا کشمیرمیں انسانی حقوق کی خلاف ورزیوں کو نظر انداز کر رہا ہے، بھارتی فورسزنے کشمیر پر غیرقانونی قبضہ کر رکھا ہے۔

    وزیراعظم نے کہا کہ مقبوضہ کشمیرعالمی سطح پر تسلیم شدہ متنازع علاقہ ہے، 9 لاکھ بھارتی فوجیوں نے 80لاکھ کشمیریوں کو یرغمال بنا رکھا ہے۔

    انہوں نے کہا کہ 2 ماہ سے کشمیرمیں مواصلاتی نظام کا مکمل بلیک آؤٹ ہے، کشمیری رہنماؤں ، بچوں سمیت ہزاروں کشمیری جیلوں میں ہیں۔

    وزیراعظم عمران خان نے مزید کہا کہ مقبوضہ کشمیر میں انسانی المیہ تیزی سے بحران کی طرف بڑھ رہا ہے، 30سال میں ایک لاکھ کشمیریوں کو شہید کیا گیا۔

    واضح رہے کہ مقبوضہ کشمیر میں بھارتی مظالم اُجاگر کرنے کے لیے آج یوم یکجہتی کشمیر منایا جا رہا ہے۔ کشمیریوں سے اظہار یکجہتی کے لیے آج اسلام آباد میں وزیراعظم عمران خان کی قیادت میں انسانی ہاتھوں کی زنجیر بنائی جائے گی۔

    معاون خصوصی برائے اطلاعات ڈاکٹر فردوس عاشق اعوان کے مطابق انسانی ہاتھوں کی زنجیر آج سہ پہر ساڑھے تین بجے کنونشن سینٹر سے ڈی چوک تک بنائی جائے گی۔ وزیراعظم عمران خان ڈی چوک میں شرکاء سے خطاب کریں گے۔

  • ملکی تاریخ کے تباہ کن زلزے میں جاں بحق ہونے والے آج بھی دلوں میں زندہ ہیں: سردار مسعود

    ملکی تاریخ کے تباہ کن زلزے میں جاں بحق ہونے والے آج بھی دلوں میں زندہ ہیں: سردار مسعود

    مظفرآباد: صدر آزاد کشمیر سردار مسعود خان کا کہنا ہے کہ 2005 کے زلزلہ میں ہم سے جدا ہونے والوں کی یادیں آج بھی ہمارے دل میں تازہ اور زندہ ہیں۔

    سردار مسعود خان نے اپنے ایک بیان میں افسوس کا اظہار کرتے ہوئے کہا کہ اس قدرتی آفت کا شکار ہوکر اپنے رب سے ملنے والوں کی مغفرت اور بلندی درجات کی دعا کے ساتھ یہ عہد کرتے ہیں کہ حکومت اپنی بساط کے مطابق آئندہ کسی قدرتی آفت سے ممکنہ نقصانات سے بچنے کو یقینی بنانے کے لیے ہر ممکن اقدامات کرے گی۔

    اکتوبر 2005کے زلزلے کے چودہ سال مکمل ہونے پر اپنے ایک پیغام میں صدر آزادکشمیر نے کہا کہ چودہ سال پہلے آج کے دن مظفرآباد، باغ اور پونچھ کے اضلاع کے علاوہ پاکستان کے صوبہ خیبر پختونخواہ کے علاقوں میں جو قیامت خیز زلزلہ آیا تھا اس نے ہزاروں بچوں، جوانوں، خواتین اور بزرگوں کو آن واحد میں ہم سے چھیننے کے علاوہ سرکاری و نجی املاک کو زمین بوس کر دیا تھا۔

    پاکستان کی تاریخ کے تباہ کن زلزلے کو 14 برس بیت گئے

    ان کا کہنا تھا کہ جن لوگوں نے اس قدرتی آفت کی تباہ کاریوں کو اپنی آنکھوں سے دیکھا وہ شاید ہی کبھی اسے بھلا پائیں، زلزلہ سے ہونے والے انسانی جانوں کے نقصان کی تلافی تو ممکن نہیں لیکن زلزلے کے بعد متاثرین کی بحالی اور تباہ شدہ انفرسٹرکچر کی تعمیر نو کے چیلنج سے حکومت نے کامیابی کے ساتھ نمٹنے کی مقدور بھر کوشش کی اور ان کوششوں میں ہمیں اللہ کے فضل سے بڑی کامیابیاں بھی حاصل ہوئیں۔

    صدر آزادکشمیر نے مزید کہا کہ اگرچہ تعلیم، صحت اور مواصلات کے شعبوں میں ابھی کئی منصوبے زیر تکمیل ہیں یا شروع نہیں کیے جا سکے لیکن الحمدوللہ تباہ شدہ انفرسٹرکچر کا ایک بڑا حصہ یا مکمل طور پر پہلے سے زیادہ بہتر انداز میں تعمیر کیا جاچکا ہے۔

  • وزیراعظم تین روزہ دورے پر چین پہنچ گئے، شاندار استقبال، گارڈ آف آنر پیش کیا گیا

    وزیراعظم تین روزہ دورے پر چین پہنچ گئے، شاندار استقبال، گارڈ آف آنر پیش کیا گیا

    بیجنگ: وزیراعظم عمران خان 3 روزہ دورے پر چین پہنچ گئے، ایئرپورٹ پر شاندار استقبال کے بعد بیجنگ پہنچنے پر وزیراعظم کو گارڈآف آنر پیش کیا گیا۔

    تفصیلات کے مطابق چین کے وزیرثقافت اور پاکستان میں تعینات سفیر نے وزیراعظم عمران خان کا استقبال کیا، چین میں پاکستانی سفیر نغمانہ ہاشمی بھی استقبال کے لیے ایئرپورٹ پر موجود تھیں۔

    بیجنگ پہنچنے پر وزیراعظم عمران خان کوگارڈآف آنرپیش کیاگیا، وزیراعظم عمران خان آج چینی ہم منصب سے ملاقات کریں گے اور چین کی کونسل فارپروموشن آف انٹرنیشنل ٹریڈ سے خطاب بھی کریں گے۔

    ملک کی خوشحالی، خطے کے امن اور مسئلہ کشمیر کو عالمی فورم پر اجاگر کرنے کے مشن پر وزیراعظم عمران خان تین روزہ دورے پر چین پہنچے ہیں۔

    دورے کے دوران معیشت اور اقتصادیات کے ساتھ مسئلہ کشمیر بھی زیربحث آئے گا، اس حوالے سے ذرائع کا کہنا ہے کہ دورہ چین میں ایم ایل ون کا بھی فیصلہ ہوگا، معیشت اور اقتصادیات کے ساتھ مسئلہ کشمیر بھی زیربحث آئے گا، اس دوران معیشت سے متعلق اہم فیصلے ممکن ہیں۔

    عمران خان کی آرمی چیف کے ہمراہ چین کے صدر شی جن پنگ اور وزیراعظم لی کی چیانگ سے اہم ملاقاتیں ہوں گی، مسئلہ کشمیر پر پاکستان کے موقف کی حمایت پر وزیراعظم چین کی قیادت کا شکریہ ادا کریں گے۔

    اس کے علاوہ سی پیک، ایم ایل ون، معیشت اور اقتصادیات پر بات چیت ہوگی، وزیراعظم پاکستان پاکستان میں سرمایہ کاری کے خواہشمند چینی تاجروں سے بھی ملاقاتیں کریں گے۔

    دورہ چین کے موقع پر متعدد مفاہمتی یاد داشتوں پر دستخط ہوں گے، سی پیک، پاک چین جوائنٹ کوآرڈی نیشن کمیٹی کے امور، ایم ایل ون اور دیگر معاملات بھی زیر غور آئیں گے، عمران خان کی جمعرات کو وطن واپسی ہوگی, حکومتی وفد میں وفد میں شاہ محمود قریشی، عبدالحفیظ شیخ، شیخ رشید اور خسروبختیار شامل ہیں۔

  • وزیراعظم عمران خان آج تین روزہ دورے پر چین جائیں گے

    وزیراعظم عمران خان آج تین روزہ دورے پر چین جائیں گے

    اسلام آباد: وزیراعظم عمران خان آج تین روزہ دورے پر چین جائیں گے، اس دوران معیشت اور اقتصادیات کے ساتھ مسئلہ کشمیر بھی زیربحث آئے گا۔

    تفصیلات کے مطابق دورہ چین کے موقع پر وفاقی وزرا شاہ محمود قریشی، عبدالحفیظ شیخ، شیخ رشید اور خسروبختیار بھی وزیراعظم عمران خان کے ہمراہ ہوں گے۔

    دورہ چین میں ایم ایل ون کا بھی فیصلہ ہوگا، معیشت اور اقتصادیات کے ساتھ مسئلہ کشمیر بھی زیربحث آئے گا، اس دوران معیشت سے متعلق اہم فیصلے ممکن ہیں۔

    وزیراعظم کے دورہ چین میں متعدد مفاہمتی یادداشتوں پر بھی دستخط ہوں گے جبکہ وہ چینی صدر شی جن پنگ سمیت اعلیٰ قیادت سے ملاقات کریں گے۔

    وزیراعظم کے دورہ چین میں پاک چین جوائنٹ کوآرڈی نیشن کمیٹی کےامور بھی زیر غور آئیں گے جبکہ عمران خان کی جمعرات کو وطن واپسی ہوگی۔

    وزیراعظم عمران خان کے دورہ چین کو حتمی شکل دے دی گئی

    یاد رہے چند روز قبل وزیراعظم عمران خان اعلیٰ سطح اجلاس کی صدارت کرتے ہوئے کہا تھا کہ سی پیک منصوبہ پاک چین دوستی کامظہر ہے، سی پیک کےتحت جاری منصوبوں میں رکاوٹیں دور کررہے ہیں, منصوبوں کی بروقت تکمیل حکومت کی اولین ترجیح ہے۔

    وزیراعظم کا کہنا تھا کہ آئندہ چند روز میں چین کا دورہ کروں گا، دورے میں چینی قیادت سے ملاقاتیں ہوں گی، ملاقاتیں پاک چین دوستی مزید مستحکم کرنے میں مدد گار ہوں گی، اہم دورہ دوطرفہ تعاون کو فروغ دینے میں معاون ثابت ہوگا۔

  • وزیراعظم کا دورہ چین دو طرفہ تعلقات کو مزید تقویت بخشے گا: خسرو بختیار

    وزیراعظم کا دورہ چین دو طرفہ تعلقات کو مزید تقویت بخشے گا: خسرو بختیار

    اسلام آباد: وفاقی وزیر برائے منصوبہ بندی ترقی واصلاحات مخدوم خسرو بختیار نے کہا ہے کہ وزیراعظم عمران خان کا چین کا دورہ دونوں اسٹرٹیجک پارٹنرز کے درمیان دوطرفہ تعلقات کو مزید تقویت بخشے گا.

    تفصیلات کے مطابق جمعرات کو وفاقی وزیر مخدوم خسرو بختیار سے چینی سفیر یاؤجنگ نے ملاقات کی، اس موقع پر دونوں رہنماؤں نے دوطرفہ تعلقات کی مضبوطی سمیت سی پیک پر بھی تبادلہ خیال کیا.

    ملاقات میں وزیراعظم کے دورہ چین کے علاوہ اسپیشل اکنامک زونز اور ایم ایل ون اور نومبر میں ہونے والی مشترکہ تعاون کمیٹی کا اجلاس زیر بحث آیا.

    اس موقع پر خسروبختیار کا کہنا تھا کہ موجودہ حکومت کے آنے سے سی پیک کے منصوبوں پر کام کی رفتار تیز ہو گئی ہے.

    پاک چین اقتصادی راہداری منصوبوں میں حائل رکاوٹیں دور کی جارہی ہیں، خسرو بختیار

    چینی سفیر نے سی پیک کی رفتار تیز کرنے پر وفاقی وزیر خسرو بختیار اور وزارت منصوبہ بندی کی کاوشوں کو سراہتے ہوئے کہا کہ دونوں دوست ممالک کے مابین دوطرفہ تعلقات مستقبل میں مزید مضبوط ہوں گے.

    وفاقی وزیر خسرو بختیار نے کہا کہ وزیراعظم کے دورہ کے دوران سی پیک کے تحت زراعت، صنعت اور سماجی و معاشی شعبوں میں تعاون کو وسعت دی جائے ی.

    انہوں نے مزید کہا کہ موجودہ حکومت کے آنے سے سی پیک کے منصوبوں پر کام کی رفتار تیز ہو گئی ہے.

  • عمران خان سے برطانوی اپوزیشن لیڈر کا رابطہ، کشمیر کی صورت حال پر گفتگو

    عمران خان سے برطانوی اپوزیشن لیڈر کا رابطہ، کشمیر کی صورت حال پر گفتگو

    لندن: وزیراعظم عمران خان سے برطانیہ کے اپوزیشن لیڈر جرمی کوربن نے ٹیلی فونک رابطہ کیا، اس دوران کشمیر کی تازہ صورت حال پر تبادلہ خیال ہوا۔

    تفصیلات کے مطابق عمران خان اور جرمی کوربن کے درمیان ہونے والی گفتگو میں اقوام متحدہ کا خطاب بھی موضوع بحث بنا، دونوں رہنماؤں نے کشمیر کی تازہ صورت حال پر تشویش کا اظہار کیا۔

    جرمی کوربن کا کہنا تھا کہ پاکستانی وزیراعظم سے ٹیلی فونک گفتگو ہوئی، عمران خان نے کشمیر کی صورت حال پر اپنی تشویش سے آگاہ کیا۔

    ان کا کہنا تھا کہ اقوام متحدہ پاک بھارت مذاکرات یقینی بناسکتا ہے، تنازع کا کوئی بھی سیاسی حل کشمیریوں کے انسانی حقوق کا ضامن ہونا چاہیے۔

    خیال رہے کہ وزیراعظم عمران خان نے اقوام متحدہ میں تاریخی خطاب کیا، اس دوران انہوں نے کشمیر کا مقدمہ رکھا اور دنیا کو بھارتی جارحیت سے آگاہ کیا۔

    اقوام متحدہ دو نیوکلیئر طاقتوں‌ کے آمنے سامنے آنے سے پہلے اپنا کردار ادا کرے، وزیراعظم

    وزیراعظم عمران خان نے کہا ہے کہ مودی کو اس کے غرور نے اندھا کردیا ہے، کرفیو اٹھنے کے بعد کشمیرمیں خون کی ندیاں بہیں گی، اقوام متحدہ کو کشمیریوں کو حق خود ارادیت دلانا پڑے گا۔

    وزیراعظم عمران خان نے اقوام متحدہ کی جنرل اسمبلی میں تاریخی خطاب کرتے ہوئے کہا کہ کیا مودی سمجھتا ہے کہ کرفیو کے بعد کشمیری خاموشی سے اسے قبول کرلیں گے، کرفیو اٹھنے کے بعد کشمیر میں خون کی ندیاں بہیں گی، بھارت مقبوضہ کشمیر میں فوری کرفیو اٹھائے اور سیاسی قیدیوں کو رہا کرے۔

  • وزیراعظم عمران خان سے امریکی سینیٹر کی ملاقات، کشمیر کی ابتر صورتحال پر گہری تشویش

    وزیراعظم عمران خان سے امریکی سینیٹر کی ملاقات، کشمیر کی ابتر صورتحال پر گہری تشویش

    واشنگٹن: وزیراعظم عمران خان سے امریکی سینیٹر لنزے گراہم نے ملاقات کی اس موقع پر مقبوضہ کشمیر بھی بھارتی جارحیت پر تبادلہ خیال کیا گیا۔

    تفصیلات کے مطابق عمران خان اور سینیٹر لنزے گراہم کے درمیان ملاقات میں دوطرفہ تعلقات اور خطے کی صورت حال پر خصوصی گفتگو ہوئی۔

    وزیراعظم نے دونوں ممالک کے تعلقات کو مستحکم کرنے میں لنزےگراہم کے تعاون کو سراہا، وزیراعظم نے مقبوضہ کشمیر کی ابتر صورت حالت پر گہری تشویش کا بھی اظہار کیا۔

    اس موقع پر عمران خان کا کہنا تھا کہ مقبوضہ کشمیر میں بھارتی لاک ڈاؤن سے انسانی بحران نے جنم لیا، مقبوضہ وادی میں بھارتی اقدام سے خطے کے استحکام کو خطرہ لاحق ہے۔

    میں پوری دنیا میں مظلوم کشمیریوں کا سفیر بنوں گا، وزیراعظم عمران خان

    انہوں نے کہا کہ مسئلہ کشمیر جنوبی ایشیا میں دیرپا امن کی راہ میں حائل بڑی رکاوٹ ہے، امریکا مسئلہ کشمیر کے حل میں مثبت کردار ادا کرسکتا ہے۔

    وزیراعظم کے واضح کیا کہ پاکستان افغانستان میں امن کا خواہاں ہے، افغان تنازع کے سیاسی حل کے لیے امریکا کے ساتھ کام کرنے کیلئے پر عزم ہیں، افغانستان میں بات چیت کی جلد بحالی کیلئے پُرامید ہیں۔

    خیال رہے کہ وزیراعظم عمران خان کا امریکا میں آج اہم دن ہے، وہ اقوام متحدہ کی جنرل اسمبلی سے خطاب کریں گے اور امریکی صدر ڈونلڈ ٹرمپ سے اہم ملاقات ہوگی۔

  • وزیراعظم عمران خان آج سعودی عرب سے امریکا روانہ ہوں گے

    وزیراعظم عمران خان آج سعودی عرب سے امریکا روانہ ہوں گے

    ریاض: وزیراعظم عمران خان سعودی عرب سے آج امریکا روانہ ہوں گے، دورہ امریکا میں اٹھارہ اہم ملاقاتوں کا شیڈول تیار کرلیا گیا۔

    مقبوضہ کشمیر میں بھارتی مظالم بے نقاب کرنے کے مشن کے تحت وزیراعظم عمران خان آج سعودی عرب سے امریکا روانہ ہوں گے، دورہ امریکا میں اٹھارہ اہم ملاقاتوں کا شیڈول تیار کرلیا گیا ہے۔

    وزیراعظم دس سے زائد ملکوں کے سربراہان سے ملاقاتیں کریں گے، عمران خان اور امریکی صدر ڈونلڈ ٹرمپ کی ملاقات پر اتفاق ہوگیا۔

    وقت آن گراؤنڈ شیڈول دیکھ کرطے ہوگا، وزیراعظم ورلڈ بینک کے صدر اور سربراہ مائیکروسافٹ بل گیٹس سے بھی ملیں گے، عمران خان ستائیس ستمبر کو جنرل اسمبلی میں مسئلہ کشمیر اٹھائیں گے۔

    خیال رہے کہ گذشتہ روز وزیر اعظم عمران خان نے سعودی فرمانروا شاہ سلمان بن عبدالعزیز سے ملاقات کی جس میں دونوں ممالک کے درمیان دو طرفہ تعلقات، علاقائی اور عالمی سیاسی صورت حال پر تبادلہ خیال کیا گیا۔

    وزیر اعظم کا سعودی عرب کی سلامتی کو خطرہ ہونے پر ساتھ کھڑے ہونے کا عزم

    واضح رہے کہ وزیر اعظم عمران خان سعودی عرب کے دو روزہ دورے پر گئے تھے، آج وہ اقوام متحدہ کی جنرل اسمبلی میں شرکت کے لیے امریکا روانہ ہوں گے۔

    دو روز قبل انھوں نے سعودی ولی عہد شہزادہ محمد بن سلمان سے بھی ملاقات کی، اور انھیں مقبوضہ کشمیر کی صورت حال سے آگاہ کیا، وزیر اعظم نے سعودی تیل تنصیبات پر حملے کی بھی شدید مذمت کی۔

  • کفایت شعاری اور سادگی، وزیراعظم کا دورۂ امریکا پر خصوصی طیارہ استعمال نہ کرنے کا فیصلہ

    کفایت شعاری اور سادگی، وزیراعظم کا دورۂ امریکا پر خصوصی طیارہ استعمال نہ کرنے کا فیصلہ

    اسلام آباد: وزیراعظم پاکستان عمران خان نے سادگی، کفایت شعاری کے رہنما اصول پر پابند رہتے ہوئے دورۂ امریکا کے لیے خصوصی طیارہ استعمال نہ کرنے کا فیصلہ کرلیا۔

    نمائندہ اے آر وائی نیوز عبدالقادر کے مطابق وزیراعظم عمران خان نے اس بار بھی کفایت شعاری اور سادگی کی مثال قائم کرتے ہوئے نجی پرواز سے امریکا روانہ ہوں گے۔

    اطلاعات کے مطابق وزیر اعظم کے دورۂ امریکا پر ماضی کے مقابلے میں اخراجات کم آئیں گے اور وہ صرف 1 لاکھ 62 ہزار ڈالر میں اپنا اہم دورہ مکمل کر کے وطن واپس لوٹیں گے۔

    مزید پڑھیں: وزیراعظم عمران خان کے دورہ امریکا کی تیاریاں، زلفی بخاری کی اہم ملاقاتیں

    یاد رہے کہ وزیر اعظم عمران خان اہم دورے پر امریکا روانہ ہوں گے جس کا شیڈول مرتب کرلیا گیا ہے، اس حوالے سے ذرائع کا کہنا ہے کہ عمران خان 21 ستمبر کو واشنگٹن پہنچے گے جہاں اُن کی صدر ٹرمپ سے دو اہم ملاقاتیں بھی ہوں گے۔

    وزیراعظم پاکستان اور امریکی صدر کی پہلی ملاقات ظہرانے اور دوسری ملاقات ہائی ٹی پر ہوگی۔ ذرائع کا کہنا ہے کہ وزیر اعظم کے دورہ امریکا کے دوران ملاقاتوں کے شیڈول پر بھی مشاورت کی گئی، یو این جنرل اسمبلی سیشن کے دوران پاکستانی اور کشمیری پرچم لہرانے پر بھی غور کیا گیا۔