لاہور: وزیراعظم نوازشریف اور وزیراعلیٰ پنجاب شہباز شریف کے دوران ملاقت میں پنجاب کابینہ کی توسیع کے حوالے سے مختلف ناموں پر غور کیا گیا۔
وزیراعظم میاں محمد نواز شریف سے وزیراعلیٰ پنجاب شہباز شریف کی ملاقات کے دوران صوبائی کابینہ کی توسیع کے حوالے سے مختلف ناموں پر غور کیا گیا،ذرائع کے مطابق پنجاب کابینہ میں رواں ماہ کے دوران توسیع کا امکان ہے، چار نئے وزراء کابینہ میں شامل کئے جاسکتے ہیں،ملاقات میں ملکی سیاسی صورتحال، دھرنوں اور دہشتگردوں کیخلاف جاری آپریشن پر بھی تبادلہ خیال کیا گیا۔
وزیرآباد: وزیراعظم نوازشریف نے کہا کہ سیلاب کی روک تھام کیلئے مربوط حکمت عملی وضع کرنا ہوگی۔
سیلاب متاثرین سے خطاب کے دوران وزیر اعظم میاں نواز شریف کا کہنا تھا کہ سیلاب کی روک تھام کیلئے اقدامات ضروری ہیں، ماحولیاتی تبدیلی سے خطہ متاثر ہورہا ہے، سیلاب سے بچاؤ کیلئےقومی سطح پر کمیٹی تشکیل دی جانی چاہئے۔
نواز شریف نے کہا کہ محدود وسائل کے باعث ہمیں اپنی ترجیحات طےکرناہوں گی،سیلاب متاثرین کے دکھ اور تکلیف کا احساس ہے، سیلاب متاثرین خود کو تنہا نہ سمجھیں حکومت ان کیساتھ ہے۔
وزیراعظم کا کہنا تھا کہ وزیراعلیٰ پنجاب کی کارکردگی قابل تحسین ہے،سیلاب سے گھروں کو نقصان پہنچا لوگ بےگھر ہوگئے،متاثرین کی مکمل بحالی تک چین سے نہیں بیٹھیں گے، فوج کے افسروں،جوانوں نے سیلاب متاثرین کی مدد کی ہے، پولیس کے جوانوں نے بھی سیلاب متاثرین کی بہت مدد کی ہے، زیادہ جانی نقصان چھتیں،دیواریں گرنےسےہوا، سیلابی پانی اترنے سے پہلے متاثرین کی امداد کی جارہی ہے، متاثرین کو25ہزار کی پہلی قسط آج سے دینا شروع کردی ہے۔،
اسلام آباد: وزیراعظم، وزیراعلیٰ پنجاب اوردیگر کے خلاف قتل کا مقدمہ درج کرلیا گیا، مقدمہ پاکستان عوامی تحریک کی جانب سے دی گئی درخواست پردرج کیا گیا
تفصیلات کے مطابق اسلام آباد ہائیکورٹ نے وزیراعظم پاکستان میاں نوازشریف وزیراعلیٰ پنجاب میاں شہبازشریف، وزیرداخلہ چوہدری نثار، وزیردفاع خواجہ آصف، وزیرریلوے خواجہ سعد رفیق سمیت گیارہ ملزمان کے خلاف تھانہ سیکریٹریٹ میں دفعہ دوسوچھ دہشت گردی ایکٹ کے تحت پاکستان عوامی تحریک کے تین کارکنان کےقتل کامقدمہ درج کر لیا گیا ہے۔
مذکورہ مقدمہ پاکستان عوامی تحریک کی جانب سے دی گئی درخواست پردرج کیا گیا اورمقدمہ میں انسداددہشت گردی ایکٹ کی دفعات شامل کی گئی ہیں، مقدمہ مقامی عدالت کے حکم پر درج کیا گیا۔
واضح رہے کہ گزشتہ روزاسلام آباد کی ڈسٹرکٹ اینڈ سیشن کورٹ نے وزیرِاعظم محمد نوازشریف ودیگرملزمان کے خلاف ایف آئی آردرج کرنے کے حوالے سے تحریری حکم نامہ جاری کیا تھا۔
اسلام آباد کی ڈسٹرکٹ اینڈ سیشن کورٹ نے گذشتہ روزپاکستان عوامی تحریک کی جانب سے ریڈ زون میں پولیس شیلنگ سے جاں بحق کارکنوں کے قتل کے مقدمے کے اندراج کے لئے درخواست کی سماعت کی تھی۔
پاکستان عوامی تحریک نے درخواست میں مؤقف اختیارکیاتھا کہ اسلام آباد میں تیس اوراکتیس اگست کی درمیانی شب پولیس نے دھرنے کے شرکاء کو تشدد کانشانہ بنایا، شیلنگ اورفائرنگ سے تین کارکن جاں بحق جبکہ سینکڑوں زخمی ہوئےتھے جس کی ذمے داری وزیرِاعظم سمیت اعلیٰ حکام پرعائد ہوتی ہے۔
اسلام آباد: وزیر اعظم نواز شریف کا کہنا ہے دھرنوں سے گھبرانے والے نہیں سیلابی صورتحال سے نمٹنے کے لیے ہر ممکن کوشش کریں گے۔
وزیر اعظم نواز شریف سیلابی صورتحال کا جائزہ لینے آزاد کشمیر پہنچے اس موقع پر بھی دھرنوں کا ذکر کئے بغیر نہ رہ سکے کہا کہ اسلام آباد میں کچھ سرکاری مصروفیات ہیں اور کچھ مصروفیات لوگوں نے بڑھا دی ہیں، وزیر اعظم نواز شریف کا کہنا تھا کہ چینی صدر کا دورہ پاکستان دھرنوں کی نذر ہوگیا۔
وزیر اعظم کا کہنا تھا کہ سیلاب نے بڑے پیمانے پر تباہی مچائی ہے، وزیر اعظم نواز شریف نے آزاد کشمیر میں سیلاب سے متاثرہ علاقوں کا بھی دورہ کیا اس موقع پر آزاد کشمیر کےصدر اور وزیر اعظم بھی نواز شریف کے ہمراہ تھے۔
لاہور: وزیرِاعلیٰ شہباز شریف نے بارش سے متاثرہ علاقوں کا دورہ کیا اور شدید بارشوں سے پیدا ہونے والی صورتحال کا جائزہ لیا۔
ذرائع کے مطابق وزیرِاعلیٰ پنجاب نے شدید بارشوں سے پیدا ہونے والی صورتحال کا جائزہ لینے کے لئے سیالکوٹ، کشمیر روڈ، ماڈل ٹاﺅن ،چائنہ ٹاﺅن،لاری اڈہ سمیت مختلف علاقوں کا دورہ کیا ۔
وزیرِاعلیٰ نےعوام سے ان کی مشکلات کے بارے میں دریافت کیا اوران کی شکایات حل کرنے کے لئےموقع پر ہی ہدایات جاری کیں-انہوں نے انتظامیہ کو ہدایت کرتے ہوئے کہا کہ نکاسیِ آب میں کوئی کوتاہی یاغفلت برداشت نہیں کی جائے گی۔
پی ڈی ایم اے کے ڈائرکٹر جنرل ظہیرعباس کا کہنا ہے کہ وزیراعلیٰ پنجاب کی ہدایت پربارشوں سے متاثرہ دس شہروں میں امدادی سرگرمیوں کو مزید تیز کر دیا گیا ہے کسی بھی ہنگامی صورتحال سے نمٹنے کے لئے حافظ آباد، ساہیوال، اوکاڑہ،گوجرانوالہ،سیالکوٹ،ٹوبہ ٹیک سنگھ، منڈی بہاؤالدین ، نارروال، چنیوٹ، خانیوال اور ننکانہ صاحب انتظامیہ کو چھوٹی بڑی موٹر بوٹس ،خیمے اور لائف جیکٹس فراہم کر دی ہیں۔
لاہور: لاہور ہائی کورٹ میں وزیراعظم اور وزیراعلیٰ پنجاب کو کام سے روکنے کی درخواست مسترد کردی گئی۔
عدالت نے درخواست ناقابل سماعت قرار دے کر مسترد کی، درخواست گزار نے موقف اختیار کیا تھا کہ افضل خان کے دھاندلی کے انکشاف سے پورا الیکشن مشکوک ہوگیا۔
عدالت افضل خان کو طلب کرکے بیان ریکارڈ کرے، سابق چیف الیکشن کمشنر فخر الدین جی ابراہیم کی تعیناتی کو کالعدم قرار دیا جائے اور کیس کے فیصلے تک وزیراعظم اور وزیراعلیٰ کو کام سے روکنے کا حکم دیا جائے۔
اسلام آباد : وزیر اعظم نواز شریف کہتے ہیں پارلیمنٹ کی اکثریت نے مجھ پر اعتبار کیا ہے استعفی نہیں دوں گا، پارلیمنٹ بھی اپنی مدت پوری کرے گی ۔
اسلام آباد میں دھرنوں پر بیٹھے ڈاکٹر طاہر القادری اور عمران خان کے وزیر اعظم سے استعفے کا پرزور مطالبے پر وزیر اعظم نواز شریف کہتے ہیں پارلیمنٹ کی اکثریت نے مجھ پراعتماد کیا ہے،استعفی نہیں دوں گا، مذاکرات کے لئے پہلے بھی تیار تھے، اب بھی ہیں، کسی کے ماورائے آئین مطالبات کو تسلیم نہیں کیاجاسکتا۔
وزیر اعظم نواز شریف نے ایوان صدر اسلام آباد میں صدر ممنون حسین سے بھی ملاقات کی ہے،ذرائع کے مطابق دوران ملاقات صدر اور وزیر اعظم نے اتفاق کیا کہ اسمبلیوں کو اپنی مدت پوری کرنی چاہئے،ذرائع کے مطابق وزیر اعظم اور صدر پاکستان کے درمیان ہونے والی ملاقات میں بھی وزیر اعظم کا موقف یہی تھا کہ وہ مستعفی نہیں ہوں اور موجودہ اسمبلیاں بھی اپنی مدت پوری کریں گی، دونوں رہنماوں نے اس بات پر اتفاق کیا کہ ڈاکٹرطاہرالقادری اور عمران خان کے جائزمطالبات کو تسلیم کیا جاسکتاہے ۔
اسلام آباد : وزیر اعظم میاں نواز شریف کی زیر ِ صدارت وفاقی حکومت کا ایک اعلیٰ سطحی اجلاس ہوا جس میں وزیرِاعظم نے استعفیٰ نہ دینے کا اصولی فیصلہ کیا ہے۔
پاکستان تحریک ِانصاف اور پاکستان عوامی تحریک کے احتجاجی دھرنوں کے باعث اسلام آؓباد میں پیدا ہونے والے صورتحال کے پیش ِ نظر ایک اعلیٰ سطحی میٹنگ منعقد ہوئی جس میں صورتحال کا بغور جائزہ لیا گیا۔
میٹنگ کے دوران میاں نواز شریف نے استعفیٰ دینے کے مطالبے کو قطعی رد کردیا جبکہ میٹنگ کے شرکاء نے بھیا س بات پر زوردیا کہ حکومت اپنی آئینی مدت پوری کرے۔
انہوں نے یہ بھی کہا کہ وسط مدتی انتخابات کا کوئی سوال پید انہیں ہوتا اور احتجاج کرنے والے نا امید ہوں گے۔
دوسری جانب عوامی تحریک اور تحریک انصاف کے مظاہرین پارلیمنٹ ہاؤس کی جانب بڑھ رہے ہیں اور اس دوران سرینا چوک کے مقام پر پولیس اور مطاہرین میں ایک جھڑپ بھی ہوچکی ہے۔
دریں اثنا اسلام آباد کی انتطامیہ نے یہ فیصلہ کیا ہے کہ کیونکہ حکومت کی جانب سے مظاہرین کو روکنے کے لئے کسی بھی قسم کے تحریری احکامات موصول نہیں ہوئے لہذا مظاہرین کی راہ میں حائل نہیں ہوا جائے جب تک کسی قسم کے تحریری احکامات موصول نہ ہوں۔
اسلام آباد: وزیراعظم نواز شریف نے پاکستان عوامی تحریک اور پاکستان تحریک انصاف کے ساتھ مذاکرات کیلئے ٹیم بنانے کا فیصلہ کرلیا۔
وزیراعظم نواز شریف نے انقلاب اور آزادی مارچ کی مانیٹرنگ کے لیئے چار رکنی کابینہ کمیٹی تشکیل دے دی ہے، کمیٹی وفاقی وزراء چودھری نثار علی خان خواجہ اصف ،احسن اقبال اور عبد القادر بلوچ پر مشتمل ہے، کابینہ کمیٹی ازادی اور انقلاب مارچ پر نظر رکھے گی اور وزیراعظم کو لمحہ بہ لمحہ تفصیلی رپورٹ بھی پیش کرے گی کابینہ کمیٹی صورتحال کے جائزے کے ساتھ ساتھ مسلے کے حل کے امور پر بھی غور کرے گی ۔
اسلام آباد: وزیراعظم محمد نواز شریف کے زیر صدارت رائیونڈ میں ہونے والے اعلی سطحی اجلاس میں موجودہ بحران پر قابو پانے کےلیے بڑی سیاسی جماعتوں کے ساتھ رابطے اور احتجاجی جماعتوں کے سربراہوں کے ساتھ براہ راست ڈائیلاگ شروع کرنے کا فیصلہ کرلیا گیا۔
مسلم لیگ ن کے ذمہ دار ذرائع کے مطابق رائیونڈ لاہور میں ن لیگ کے سربراہ نواز شریف کی زیر صدارت ہونے والے اجلاس میں فیصلہ کیا گیا کہ ملک کو بحرانی صورتحال سے نکالنے کےلیے پاکستان پیپلزپارٹی کے شریک چیئرمین آصف علی زرداری اور اتحادی جماعتوں سے رابطوں کے علاوہ حکومت پارلیمنٹ میں اپوزیشن جماعتوں کی قومی اسمبلی میں کمیٹی بنانے پر بھی رضامند ہوگئی ہے۔
ذرائع کا کہنا ہے کہ وزیر اعظم نواز شریف نے اس موقع پر پارٹی رہنماوں کو واضع پیغام دیا ہے کہ اُن کے استعفے کا کوئی اپشن موجود نہیں ، جبکہ دوسری جانب سانحہ ماڈل ٹاون میں ہونے والی خون ریزی پر بھی پنجاب حکومت کے ذمہ داروں نے صوبائی حکومت کو قانونی نکات پر اعتماد میں لیا۔