Tag: وزیراعلیٰ خیبرپختونخوا علی امین گنڈاپور

پشاور : وزیراعلیٰ خیبرپختونخوا علی امین گنڈاپور نے لوئر کرم کے علاقے بگن میں گاڑیوں کے قافلے پر فائرنگ کے واقعے کی رپورٹ طلب کرلی۔

تفصیلات کے مطابق وزیراعلیٰ خیبرپختونخوا علی امین گنڈاپور نے لوئر کرم کے علاقے بگن میں گاڑیوں کے قافلے پر فائرنگ کی مذمت کرتے ہوئے اعلیٰ حکام سے واقعے کی رپورٹ طلب کر لی

وزیراعلیٰ نے ڈی سی کرم اور دیگر زخمیوں کی جلد صحت یابی کیلئے نیک خواہشات کا اظہار کرتے ہوئے کہا کہ کرم امن معاہدے کے بعد اس طرح کا واقعہ انتہائی افسوسناک ہے اور امن کیلئے حکومتی کوششوں کو سبوتاژ کرنے کی مذموم لیکن ناکام کوشش ہے۔

علی امین کا کہنا تھا کہ فائرنگ میں ملوث عناصر کیخلاف سخت کارروائی عمل میں لائی جائے گی، واقعہ ان عناصر کی کارستانی ہے جو کرم میں امن کی بحالی نہیں چاہتے۔

انھوں نے کہا کہ حکومت امن کی بحالی اور عوام کو درپیش مشکلات حل کرنے کیلئے پُرعزم ہے، فریقین کے درمیان معاہدہ ثبوت ہے کرم کے لوگ علاقے میں امن چاہتے لیکن کچھ شرپسند عناصر کرم میں امن نہیں چاہتے، ان کی کوششیں کامیاب نہیں ہوں گی۔

مزید پڑھیں : لوئر کرم : ضلعی انتظامیہ کی گاڑی پر فائرنگ، ڈپٹی کمشنرجاوید اللہ محسود زخمی

وزیراعلیٰ خیبرپختونخوا کا کہنا تھا کہ حکومت اور علاقے کے لوگ ملکر ایسے عناصرکی مذموم کوششیں ناکام بنائیں گے، ایسے عناصر کو کیفر کردار تک پہنچانے میں حکومت اور انتظامیہ کیساتھ تعاون کریں تاہم واقعے سے حکومت اور علاقہ عمائدین کی امن بحال کرنے کی کوششیں متاثر نہیں ہوں گی۔

یاد رہے لوئرکرم کےعلاقے بگن میں ضلع انتظامیہ کی گاڑی پر نامعلوم افراد کی فائرنگ سے ڈی سی جاوید اللہ محسود سمیت چار افراد زخمی ہوگئے تھے۔

پولیس کا کہنا تھا کہ زخمیوں میں ایک پولیس اور دو ایف سی اہلکار شامل ہیں، اسپتال حکام نے بتایا تھا کہ ڈی سی جاویداللہ محسود کو کندھے اور پاؤں پر زخم آئے ہیں تاہم ان کی حالت خطرے سے باہر ہے۔

پشاور : وزیراعلیٰ خیبرپختونخوا علی امین گنڈاپور کا کہنا ہے کہ پی ٹی آئی سیاسی کمیٹی اجلاس کی صدارت بشریٰ بی بی نے نہیں کی۔

تفصیلات کے مطابق چیف جسٹس آف پاکستان کی تقریب حلف برداری میں وزیراعلیٰ خیبرپختونخوا علی امین گنڈاپور نے شرکت کی۔

اس موقع پر وزیراعلیٰ کے پی نے کہا کہ چیف جسٹس یحییٰ آفریدی کا تعلق ہمارے صوبے سے ہے اس لیے تقریب میں شریک ہوا تاہم چھبیس ویں آئینی ترمیم کو تسلیم نہیں کرتے۔

انھوں نے بتایا کہ تحریک انصاف کی سیاسی کمیٹی کے اجلاس کی صدارت بشریٰ بی بی نے نہیں کی۔

گذشتہ روز فوکل پرسن مشعال یوسفزئی نے بشریٰ بی بی کی جانب پارٹی کا ہنگامی اجلاس بلانے کی خبروں کی تردید کرتے ہوئے کہا تھا وہ گھریلوخاتون ہیں سیاست سےکوئی تعلق نہیں۔

اس سے قبل یہ خبر آئی تھی کہ بانی پی ٹی آئی کی اہلیہ نے پارٹی کا ہنگامی اجلاس طلب کرلیا، پارٹی ذرائع نے کہا تھا کہ وہ شبلی فراز،علی امین گنڈاپور کے ہمراہ سیاسی معاملات دیکھیں گی۔

ذرائع کا کہنا تھا کہ بانی پی ٹی آئی کی اہلیہ رہائی کے بعد آج پشاور میں ہنگامی اجلاس کی سربراہی کریں گی، عمرایوب، شبلی فراز اور علی امین گنڈاپور کو اجلاس میں طلب کر لیا گیا ہے۔

اسلام آباد : وزیراعلیٰ خیبرپختونخوا علی امین گنڈا پور چیف جسٹس یحییٰ آفریدی کی تقریب حلف برداری میں شریک ہوں گے۔

تفصیلات کے مطابق پاکستان تحریک انصاف ( پی ٹی آئی ) کے سیکریٹری اطلاعات شیخ وقاص اکرم نے سماجی رابطے کی ویب سائٹ ایکس پر اپنے بیان میں لکھا ‘ علی امین صوبے کے سربراہ کی حیثیت سے تقریب حلف برداری میں شرکت کریں گے۔

شیخ وقاص اکرم کا کہنا تھا کہ پی ٹی آئی چھبیس ویں ترمیم اورچیف جسٹس کی تعیناتی کے طریقہ کارکوغیرآئینی مانتی ہے، تاہم جب تک سپریم کورٹ ان ترامیم پرفیصلہ نہ دےتب تک یہ’لاآف دی لینڈ‘۔

خیال رہے نامزد چیف جسٹس یحییٰ آفریدی کی تقریب حلف برداری آج گیارہ بجے ایوان صدر میں ہوگی۔

مزید پڑھیں : جسٹس یحییٰ آفریدی آج پاکستان کے 30ویں چیف جسٹس کی حیثیت سے حلف اٹھائیں گے

صدر آصف زرداری نامزد چیف جسٹس سے حلف لیں گے، تقریب میں وزیراعظم اور سروسزچیفس شریک ہوں گے۔

ایوان صدر میں حلف برداری کے دعوت نامے جاری کردیے گئے ہیں، ارکان پارلیمنٹ کو بھی دعوت نامے جاری کیے گئے ہیں۔

واضح رہے خصوصی پارلیمانی کمیٹی نے جسٹس یحییٰ کے نام کی منظوری دی تھی ، وفاقی وزیر قانون اعظم نذیرتارڑ نے بتایا تھا کہ پارلیمانی کمیٹی نے جسٹس یحییٰ کو دو تہائی اکثریت سے نامزد کیا۔

بعد ازاں صدر مملکت آصف علی زرداری نے سپریم کورٹ کے جج جسٹس یحییٰ کی بطور چیف جسٹس آف پاکستان تعیناتی کی منظوری دی۔

جسٹس یحییٰ کی تعیناتی 26 اکتوبر سے 3 سال کیلئے کی گئی اور تعیناتی کی منظوری آئین کے آرٹیکل 175 اے (3)، 177 اور 179 کے تحت دی۔

پشاور : وزیراعلیٰ خیبرپختونخوا علی امین گنڈا پور کی نااہلی کیلئے درخواست دائر کردی گئی، جس میں استدعا کی گئی ہے کہ انھوں نے حلف کی خلاف ورزی کی، آرٹیکل 62 کے تحت نااہل کیا جائے۔

تفصیلات کے مطابق پشاور ہائی کورٹ وزیراعلیٰ خیبرپختونخوا علی امین گنڈا پور کی نااہلی کیلئے پشاور ہائیکورٹ میں درخواست میں دائر کردی۔

درخواست میں مؤقف اختیار کیا گیا ہے کہ وزیراعلیٰ کے پی نے جلسوں کیلئے سرکاری وسائل استعمال کیے، وزیراعلیٰ کا سیاسی مقاصد کیلئے سرکاری وسائل کا استعمال کرنا غیر قانونی ہے۔

درخواست میں کہا گیا وزیراعلیٰ کے پی نے لشکر کیساتھ وفاق پر چڑھائی کی جو تشویشناک ہے، وزیراعلیٰ خیبرپختونخوا کیخلاف پنجاب میں مختلف مقدمات درج ہیں۔

درخواست میں مزید کہنا تھا کہ وزیراعلیٰ لوگوں کا لشکر پنجاب لے جاتے ہیں اور قانون ہاتھ میں لیتے ہیں،استدعا ہے کہ وزیراعلیٰ نے حلف کی خلاف ورزی کی، آرٹیکل 62 کے تحت نااہل کیا جائے۔

وزیراعلیٰ علی امین گنڈاپور نے کہا ہے کہ پی ٹی آئی کو ختم کرنے کیلئے سب اکٹھے ہوئے، آئی جی اسلام آباد کو کےپی اسمبلی میں آکرمعافی مانگنی ہوگی۔

خیبر پختونخوا کے وزیراعلیٰ علی امین گنڈاپور نے منظر عام پر آنے کے بعد کے پی اسمبلی سے خطاب میں کہا کہ آئی جی اسمبلی میں آکر معافی نہیں مانگے تو جہاں ہوگا ہم بدلہ لیں گے، یہ سرکاری غنڈہ اس فلور پر آکر معافی مانگے گا، آئی جی جہاں بھی ہوگا اپنی بےعزتی کا بدلہ لیں گے۔

علی امین گنڈاپور نے کہا کہ آئی جی نے کےپی ہاؤس میں ابھی تک بندے بٹھائے ہوئے ہیں، اوئے آئی جی صاحب، تمہارا باپ یہاں کھڑا ہے کےپی ہاؤس میں نہیں، آئی جی سن لو، میں پوری رات اسلام آباد میں ہی تھا۔

انھوں نے کہا کہ آئی جی نے میری گرفتاری کےلیے 4 چھاپے مارے، آئی جی اسلام آباد معافی مانگیں، ورنہ ایف آئی آردرج کرائیں گے، آئی جی اسلام آباد معافی نہیں مانگے گا تو مقدمہ کرکے خود کارروائی کریں گے۔

وزیراعلیٰ کےپی نے کہا کہ میری گاڑی، ذاتی اسلحہ اورگارڈ بھی لےکر چلے گئے، کےپی ہاؤس پر تعینات ڈی ایس پی کو بٹ مارے گئے، یہ سرکاری غنڈا ہے۔

انھوں نے کہا کہ مجھے اپنے ہاؤس پر فخر ہے، پاکستان کےعوام کو سلام پیش کرتا ہوں کہ بانی پی ٹی آئی کے ساتھ کھڑے ہیں، پی ٹی آئی کو ختم کرنے کےلیے سب اکٹھے ہوئے اور ہم پر حملہ کیا، بانی پی ٹی آئی اس قوم کی جنگ لڑرہے ہیں، مجھے اپنے ہاؤس اور ارکان پر فخر ہے۔

علی امین گنڈاپور کا کہنا تھا کہ ہم اپنے ملک کے آئین کا تحفظ کریں گے، ایک شخص کےلیے قانون بنارہے ہیں لیکن 25 کروڑ عوام کی فکر نہیں، اس کےلیے سب کو اٹھا رہےہیں، نیا قانون بنا رہے ہیں کہ لوٹا کریسی جائز ہے۔

ہمارے لوگوں کو توڑا نہ جاتا تو کےپی اسمبلی میں اپوزیشن کا ایک رکن بھی نہ ہوتا، ہم سے ہماری دو تہائی اکثریت والی حکومت چھینی گئی، ہمیں جلسے کرنے کی اجازت نہیں، کیا یہ ملک کسی کے باپ کا ہے۔

وزیراعلیٰ کےپی علی امین گنڈاپور مجھے پہلے بھی روکا گیا تھا لیکن لاہور پہنچ گیا تھا، سنگجانی میں ایسا رستہ دیا گیا کہ ٹریفک جام ہوگیا پہنچنے میں تاخیرہوئی، اسلام آباد جلسے کےلیے ہم پر بدترین شیلنگ اور ظلم کیاگیا، ہمارے قافلے پر ہزاروں شیل برسائےگئے لیکن ہم پہنچے۔

علی امین نے کہا کہ انھیں کس چیز کا خوف ہے کیوں گھبراتے ہیں؟ کےپی ہاؤس ہمارے صوبے کی ملکیت ہے، کےپی ہاؤس پہنچے تو دھاوا بولا گیا شیلنگ اور فائرنگ کی گئی۔

انھوں نے کہا کہ جو پارٹی چھوڑ دیں وہ 9 مئی والے نہیں جو پارٹی میں ہیں وہ 9 مئی والے ہیں، پارٹی چھوڑنے والے بتائیں گے کرسی کےلیے پٹھانوں کی بے عزتی کی، جس نے پارٹی نہیں چھوڑی وہ غیرت مند لوگ ہیں، ہماری روایت ہےبرے وقت میں چھوڑنے والا غدار اور بزدل ہوتا ہے۔

علی امین گنڈاپور نے کہا کہ میں بے غیرت نہیں ہوں، کسی کے گھر چھاپا مارکر ماں بہن کی بےعزتی نہیں کرسکتا، مریم میڈم سن لو، کیا پاکستان میں صرف اکیلی مریم ہی عورت رہ گئی ہے۔

وزیراعلیٰ نے کہا کہ یاسمین راشد 2 سال سے جیل میں ہےبیمار بھی ہے کیا وہ عورت نہیں ہے، مریم نواز کہتی ہے میرا دروازہ توڑا گیا وہ دروازہ توڑنے والا کون ہے؟ مریم نواز تم صرف بوٹ پالش کررہی ہو۔

انھوں نے کہا کہ اصلاح کرلو، ہم بار بار ظرف کا مظاہرہ کررہےہیں، ہماری جنگ جاری ہے اور مرتے دم تک لڑیں گے۔

دریں اثنا وزیراعلیٰ کےپی علی امین گنڈاپور خیبرپختونخوا اسمبلی پہنچ گئے، وہ اچانک اسمبلی میں داخل ہوئے، ارکان اسمبلی نےعلی امین گنڈاپور کا پرتپاک استقبال کیا، علی امین گنڈاپور اسمبلی میں ارکان اسمبلی سے ملے۔