Tag: وزیراعلیٰ سندھ سید مراد علی شاہ

کراچی : سندھ حکومت نے رینجرز اختیارات کا معاملہ کابینہ میں لے جانے کا فیصلہ کیا ہے جو 21 اپریل کو بلائے جانے کا امکان ہے جہاں پنجاب میں رینجرز کو حاصل اختیارات کی بنیاد پر فیصلہ کیا جائے گا۔

اے آر وائی نیوز کے رپورٹر ارباب چانڈیو کے مطابق یہ فیصلہ وزیر اعلیٰ سندھ سید مراد علی شاہ کی زیر صدارت آج ہونے والے اجلاس میں کیا گیا جس میں سیکرٹری قانون سمیت اعلیٰ حکام نے شرکت کی اور وزیراعلیٰ کو اس آئینی اور قانونی معاملے بریفنگ بھی دی گئی۔

ذرائع کے مطابق وزیراعلیٰ سندھ سید مراد علی شاہ رینجرز اختیارات کے معاملے کو اپنی کابینہ میں زیر بحث لانا چاہتے ہیں اورمتفقہ طور پر کوئی لائحہ عمل طے کرنا چاہتے ہیں۔

صوبائی وزیر قانون سندھ ضیاءالحسن لنجار نے رینجرز اختیارات کا معاملہ سندھ کابینہ اجلاس میں لے جانے کی تصدیق کرتے ہوئے کہا کہ آئیں کے تحت رینجرز اختیارات پر سندھ حکومت مشاورت کر سکتی ہے جس سے مراد سندھ کابینہ ہی ہے اس لیے کابینہ اس معاملے پر جو فیصلہ دے گی اس پر عمل کیا جائے گا۔

خیال ظاہر کیا جا رہا ہے کہ سندھ میں رینجرز کو اختیارات پنجاب کی طرح پر تفویض کیے جائیں گے اور اس سلسلے میں پنجاب حکومت نے جو نوٹیفیکیشن جاری کیا اس سے استفادہ کیا جائے گا اور پنجاب میں حاصل اختیارات سندھ میں بھی دیئے جائیں گے۔

اے آر وائی نیوز کے رپورٹرارباب چانڈیو کا کہنا ہے کہ سانگھڑ میں ضمنی انتخاب ہونے جا رہے ہیں جہاں سندھ کے وزراء مصروف ہیں اس لیے سندھ کابینہ کا اجلاس 21 اپریل کو بلایا جائے گا اور رینجرز اختیارات پر حتمی فیصلہ کیا جائے گا۔

خیال رہے کہ سندھ میں رینجرز کو حاصل خصوصی اختیارات کی معیاد 15 اپریل کو ختم ہو چکی ہے اور سندھ حکومت کی جانب سے ابھی تک توسیع نہیں کی گئی ہے اس سلسلے میں وزیر اعلیٰ سندھ کی صدارت میں ہونے والے اجلاس میں بھی کوئی فیصلہ نہیں ہوسکا اور اب یہ معاملہ سندھ کابینہ میں زیر بحث لایا جائے گا۔

کراچی : وزیراعلیٰ سندھ سید مراد علی شاہ نے کہا ہے کہ چین کے تعاون سے سولر پینلز پراجیکٹ کے ذریعے دیہی علاقوں میں بجلی فراہم کریں گے۔

تفصیلات کے مطابق وزیر اعلیٰ سندھ سے چین کے قونصل جنرل وانگ یو نے کراچی میں وزیراعلیٰ ہاؤس میں ملاقات کی اور ملاقات کے دوران میں سولرولیج الیکٹریفکیشن پروگرام پر تبادلہ خیال کیا گیا جس کے ذریعے بجلی سے محروم سندھ کے دیہی علاقوں میں بجلی فراہم کی جائے گی۔

دورانِ ملاقات وزیراعلیٰ سندھ سید مراد علی شاہ نے کہا کہ ولیج الیکٹری فکیشن کے لیے2 بلین روپے اے ڈی پی میں اسکیم رکھی ہے جس کے ذریعے کاچھو اور کوہستان میں جہاں بجلی میسرنہیں وہاں پر بجلی دی جائے گی۔

وزیراعلیٰ سندھ نے کہا کہ بجلی بنیادی انسانی ضرورت ہے اس لیے سولرانرجی کے ذریعے دیہی علاقوں میں ہرگھر کو روشن دیکھناچاہتاہوں کیوں کہ پیپلز پارٹی کا بنیادی منشور عوام کو سستی بجلی کی فراہمی ہے۔

اس موقع پر قونصل جنرل وانگ یو نے وزیراعلیٰ سندھ کی کاوشوں کو سراہتے ہوئے کہا کہ ابتدائی طور پر سولر پینلزکی فراہمی کےلئے 80 ہزار ڈالر مختص کیے ہیں اور اس سلسلے میں چین سندھ حکومت کی مالی مدد بھی کرے گا۔

کراچی : وزیراعلٰی سندھ سید مراد علی شاہ نے کہا ہے کہ ہمیں کوئی اختیارات کی تقسیم کا نہ بتائے ہم نے وفاق سے صوبوں کو اختیارات منتقل کیے ہیں۔

یونیورسٹی روڈ پر جاری تعمیراتی کام کا جائزہ لینے کے دوران میڈیا سے بات کرتے ہوئے وزیراعلیٰ کا کہنا تھا کہ کراچی کےانفرا اسٹرکچر کے لیے دن رات کام کر رہے ہیں اور کراچی کے عوام جلد فرق محسوس کریں گے۔

انہوں نے بتا یا کہ وزارتِ اعلیٰ کا عہدہ سنبھالتے ہی صحت اور تعلیم کے شعبوں میں ایمرجنسی نافذ کردی تھی اور انفرا اسٹرکچر کی بہتری کے لیے اپنی ٹیم کے ساتھ مختلف منصوبوں پر کام کررہا ہوں۔

وزیراعلیٰ سندھ نے کہا کہ اختیارات کی تقسیم اور نچلی سطح تک منتقلی کے ہم چیمپئن ہیں اور ہم نے ہی وفاق سے اختیارات صوبوں کو منتقل کیے اس لیے کوئی ہمیں اختیارات کی تقسیم کا نہ بتائے۔

انہوں نے کہا کہ کراچی میں مسائل اس کا منصوبہ بندی کے بغیر پھیلاؤ کی وجہ سے ہوا بہرحال اب سندھ حکومت کو ہی اس غیر فطری پھیلاؤ کو بہتر بنانا ہے اور کراچی کو جدید شہروں کی فہرست میں شامل کرنا ہے۔

وزیراعلیٰ سندھ سید مراد علی شاہ نے کہا کہ طلبہ اس ملک کا مستقبل ہیں اور مستقبل میں ملک کی باگ ڈورطلبہ نے سنبھالنی ہے اور طلبہ نے ملکی ترقی کے لیےکچھ کرنا ہے توسب سے پہلےتعلیم پرتوجہ دیں۔

کراچی : وزیرِاعلیٰ سندھ سید مراد علی شاہ نے وفاقی وزارتِ پانی و بجلی کی ناقص کارکردگی پر برہمی کا اظہار کرتے ہوئے کہا ہے کہ سندھ کو بجلی نہیں دے سکتے تو یہاں سے چلے جائیں۔

وہ سندھ اسمبلی میں خطاب کر رہے تھے، انہوں نے حیدر آباد الیکٹرک سپلائی کمپنی اور سکھر الیکٹرک پاور سپلائی کمپنی کے حوالے سے عوامی شکایات پر کان نہ دھرنے پر دونوں اداروں کو آڑے ہاتھوں لیا۔

وزیراعلیٰ مراد علی شاہ کا کہنا تھا کہ حیسکو اور سیپکو ہمارے صوبے کو بجلی نہیں دے سکتےتو اپنا سامان اٹھائیں اور یہاں سے چلے جائیں کیوں کہ یہ دونوں ادارے عوام کے لیے مفید ہونے کے بجائے مشکلات کا باعث بن رہے ہیں۔

انہوں نے وفاق کی جانب سے نظر انداز کیے جانے پر تشویش کا اظہار کرتے ہوئے کہا کہ بجلی بحران سے نمٹنے کے لیے سندھ کو درکار وسائل سے محروم اور اختیارات استعمال کرنے سے سے روکا جا رہا ہے۔

وزیراعلیٰ سندھ نے کہا کہ وفاق وزارت پانی و بجلی سندھ کے ساتھ سوتیلی ماں جیسا سلوک کررہا ہے جب کہ وزیر مملکت موصوف الٹا سندھ کے باسیوں پر ہی برس پڑتے ہیں۔

واضح رہے کہ وفاقی وزیر مملکت برائے پانی و بجلی عابد شیر علی نے سندھ میں بجلی کے بحران کی ذمہ داری سندھ حکومت پر ڈالتے ہوئے سخت تنقید کا مظاہرہ کیا تھا۔