کراچی : وزیرِاعلیٰ سندھ سید مراد علی شاہ نے کہا ہے کہ چوہدری نثار ناکام وزیرداخلہ ہیں وہ نہ تو وزیراعظم کے خیرخواہ ہیں اور نہ ہی اپنی جماعت سے مخلص نظر آتے ہیں۔
وزیراعلٰی سندھ آج سیہون میں ہونے والے مختلف اجتماعات سے خطاب کر رہے تھے، انہوں نے وفاقی وزیرداخلہ کو شدید تنقید کا نشانہ بناتے ہوئے کہا کہ چوہدری نثار اپنی ہی حکومت کے لیے پریشانی کا باعث بنے ہوئے ہیں۔
وزیرِاعلیٰ سندھ نے کہا پیپلزپارٹی پنجاب میں ایک بار پھرمضبوط اور منظم ہورہی ہے کیوں کہ پیلزپارٹی ہی وہ واحد جماعت ہے جس کی جڑیں چاروں صوبوں میں موجود ہیں جس پر مسلم لیگ (ن) پریشان ہے۔
پاناما کیس کے حوالے سے پوچھے گئے ایک سوال کے جواب میں انہوں نے کہا کہ پاناما کیس ابھی عدالت میں ہے اوراس کا فیصلہ بھی عدالتوں میں ہونا ہے اس لیے کچھ بھی رائے دینا مناسب نہیں، عدالتوں پر پورااعتماد ہے۔
وزیراعلیٰ سندھ کا کہنا تھا کہ کراچی میں امن وامان کی صورت حال بہترہوئی ہے، دہشت گردی کا ڈٹ کر مقابلہ کر رہے ہیں اوراسٹریٹ کرائمز کے خاتمے کے لیے پولیس کو مزید متحرک کردیا ہے جلد ہی اس کے ثمرات عوام تک پہنچنا شروع ہوجائیں گے۔
ملک بھر میں شروع ہونے والی مردم شماری کے حوالے سے انہوں نے کہا کہ مردم شماری سے متعلق عوام کو آگاہی فراہم کر رہے ہیں اور مردم شماری کے پورے عمل کو محفوظ اور شفاف بنانے کے اقدامات کررہے ہیں۔
سندھ میں جاری ترقیاتی کاموں کی تفصیلات بتاتے ہوئے انہوں نے کہا کہ 225 ارب روپے عوامی فلاح و بہبود کی اسکیموں پرخرچ کیے جارہے ہیں جس سے عوام کا معیار زندگی بہتر ہوگا اور لوگوں کو ریلیف میئسر آسکے گا۔
