Tag: وزیراعلیٰ سندھ

کراچی: وزیراعلیٰ سندھ مراد علی شاہ کا کہنا ہے کہ آرٹیکل 158 میں واضح ہے جس صوبے سے گیس نکلے پہلا حق اس کا ہے۔

تفصیلات کے مطابق سندھ اسمبلی کے اجلاس میں وزیراعلیٰ سندھ نے کہا کہ وفاقی کابینہ نے سندھ کو گیس ڈیمانڈ پوری کرنے سے انکار کیا، آرٹیکل 158 میں واضح ہے جس صوبے سے گیس نکلے پہلا حق اس کا ہے۔

مراد علی شاہ نے کہا کہ وزیراعظم نے میرے خط کا پہلا جواب بھیج دیا ہے، آج وزیراعظم کو ایک اور خط لکھ دیا ہے، وفاق چاہتا ہے کہ سندھ کو مہنگی گیس دیں۔

وزیراعلیٰ سندھ نے کہا کہ سندھ کو 900 ایم ایم سی ایف ڈی گیس مل رہی ہے، سندھ کو 1500 ایم ایم سی ایف ڈی گیس درکار ہے، سندھ حکومت اپنے صوبے کے لوگوں کے حقوق پر نظر رکھتی ہے۔

سندھ اسمبلی کے اجلاس میں پیپلزپارٹی کےقاسم سراج سومرو کی جانب سے موئن جو دڑو کا نام تبدیل کرنے کی قرارداد پیش کی گئی۔ قرار داد میں کہا گیا کہ تاریخی حوالوں سے پتہ چلتا ہے کہ اصل نام موہن جو دڑو ہے، تاریخی حوالوں سے پتہ چلتا ہے کہ اصل نام موہن جو دڑو ہے۔

وزیر پارلیمانی امور کی درخواست پر قرارداد موخر کر دی گئی، بعدازاں اسپیکر نے سندھ اسمبلی کا اجلاس 22 جنوری تک ملتوی کر دیا۔

کراچی: وزیراعلیٰ سندھ مراد علی شاہ کا کہنا ہے کہ نیا سال ترقیاتی کاموں کو مکمل کرنے کا سال ہے، یہ سال تعلیم کے شعبے میں مزید بہتری لانے کا سال ہے۔

تفصیلات کے مطابق صوبائی دارالحکومت کراچی میں وزیراعلیٰ سندھ مراد علی شاہ کی زیرصدارت کابینہ کا اجلاس ہوا۔ اس موقع پر مراد علی شاہ نے کہا کہ آج یہ نئے سال کا پہلا کابینہ اجلاس ہے۔

وزیراعلیٰ سندھ نے کہا کہ نیا سال نئے جذبے، نئی لگن سے عوام کی خدمت کا سال ہے، غربت کا خاتمہ، ٹڈی دل کا خاتمہ، ترقیاتی کاموں کو مکمل کرنے کا سال ہے۔

انہوں نے تمام محکموں کو خالی اسامیاں 15 جنوری تک جمع کرنے کی ہدایت کرتے ہوئے کہا کہ اسامیوں کی پوزیشن بتائیں تاکہ بھرتی کے لیے اشتہار دے سکیں۔

اجلاس میں سندھ کابینہ نے پروفیسر ڈاکٹر مجیب الدین کی تقرری کی توسیع کردی، سندھ حکومت نے پروفیسر مجیب الدین میمن کو وائس چانسلر ٹنڈو جام یونیورسٹی مقرر کیا تھا۔ عدالت نے یہ فیصلہ غیرقانونی قرار دیا تھا کیونکہ کابینہ نے اس کی توسیع نہیں کی تھی۔

وزیراعلیٰ سندھ مراد علی شاہ کی زیر صدارت اجلاس میں سندھ کابینہ نے سندھ آکیوپیشنل سیفٹی اینڈ ہیلتھ رولز کی منظوری دے دی۔

کراچی: وزیراعلیٰ سندھ مراد علی شاہ کا کہنا ہے کہ سرد موسم میں کسی کو بے گھر کرنا تکلیف دہ ہے، جو بھی بے گھر ہو ان کو خیمے دیے جائیں۔

تفصیلات کے مطابق سندھ کابینہ کی جانب سے صوبے میں گھروں کو مسمار کرنے سے پہلے متبادل کا انتظام کرنے کا فیصلہ کیا گیا ہے۔ کابینہ کے مطابق جن لوگوں کو بے گھر کریں گے وہ کہیں اور جا کر قبضہ کر کے گھر بنائیں گے۔

صوبائی کابینہ کے اجلاس میں بریفنگ کے دوران بتایا گیا کہ سندھ کینال کے ساتھ تجاوزات کے خلاف آپریشن جاری ہے، بدین گھوٹکی ودیگر اضلاع میں ہزاروں لوگ بے گھر ہیں۔

وزیراعلیٰ سندھ مراد علی شاہ نے ضلعی سطح پر بےگھر خاندانوں کا سروے کرانے کی ہدایت کرتے ہوئے کہا کہ سرد موسم میں کسی کو بے گھر کرنا تکلیف دہ ہے۔

مراد علی شاہ نے عدالتوں سے درخواست کے لیے ایڈووکیٹ جنرل کو ہدایت کرتے ہوئے کہا کہ درخواست کر کے گھر مسمار سے پہلے متبادل انتظام کرنے کی اجازت لی جائے۔

وزیراعلیٰ سندھ نے چیف سیکریٹری، وزیرریونیو، وزیر کچی آبادی پر مشتمل کمیٹی قائم کی ہے جو کمیٹی بے گھر ہونے والے افراد کی نقصانات کا جائزہ لے گی۔

کراچی: وزیراعلیٰ سندھ مراد علی شاہ کا کہنا ہے کہ سندھ میں سرمایہ کاری کے بہترین ریٹرن ہیں، سرمایہ کاروں کو بہترین سہولتیں اورمراعات فراہم کر رہے ہیں۔

تفصیلات کے مطابق وزیراعلیٰ سندھ سید مراد علی شاہ سے چین کے سابق سفیر شا زوکانگ کی سربراہی میں 40 رکنی وفد نے ملاقات کی۔

وزیراعلیٰ سندھ نے کہا کہ سندھ براہ راست سرمایہ کاری اور پبلک پرائیوٹ پارٹنرشپ کے لیے بہترین ہے، سندھ میں سرمایہ کاری کے بہترین ریٹرن ہیں، سرمایہ کاروں کو بہترین سہولتیں اورمراعات فراہم کر رہے ہیں۔

ترجمان وزیراعلیٰ سندھ نے کہا کہ وفد نے ہاؤسنگ، زراعت، پانی، ہائیڈرو پاور میں دلچسپی ظاہر کی، اجلاس میں مختلف گروپس بنائے گئے جو متعلقہ شعبوں میں کام کریں گے۔

25ونڈ پاورکے پروجیکٹس منظوری کے مراحل میں ہیں، وزیراعلیٰ سندھ

یاد رہے کہ گزشتہ ہفتے وزیراعلیٰ سندھ مراد علی شاہ کا کہنا تھا کہ اس وقت 14 ونڈ پاورکے پروجیکٹس منظور ہوگئے ہیں، 25 ونڈ پاورکے پروجیکٹس منظوری کے مراحل میں ہیں۔

مراد علی شاہ کا کہنا تھا کہ سندھ گورنمنٹ ڈینش گورنمنٹ براہ راست معاہدہ کریں، سندھ حکومت اور ڈینش حکومت بہتر اندازمیں کام کرسکتے ہیں۔

کراچی: وزیراعلیٰ سندھ مراد علی شاہ نے پولیس پر برہمی کا اظہار کرتے ہوئے کہا کہ کیا میرے خلاف کوئی سازش تیار کی گئی ہے، لگتا ہے متعلقہ ایس ایس پی میرے خلاف سازش میں ملوث ہے۔

تفصیلات کے مطابق وزیراعلیٰ سندھ مراد علی شاہ نے آئی جی سندھ کلیم امام اور اے آئی جی غلام نبی میمن کی سرزنش کرتے ہوئے کہا کہ کیا میرے خلاف کوئی سازش تیار کی گئی ہے۔

مراد علی شاہ نے کہا کہ ایک دہشتگرد سے یہ کہلوایا گیا کہ میں نے ان سے ملاقات کی، کسی سے ملنا ہوتا تو کیا میں ہاؤس طلب نہیں کرسکتا تھا، ملنے کیوں جاتا، لگتا ہے متعلقہ ایس ایس پی میرے خلاف سازش میں ملوث ہے۔ انہوں نے آئی جی سندھ پولیس سے کہا کہ آپ اس سے پوچھیں اور بتائیں، ایسا کیوں اور کس کے کہنے پر کیا؟

وزیراعلیٰ سندھ نے کہا کہ کل میڈیا پر میرا نام دہشت گرد سے ملاقات سے منسوب ہوتا رہا، آئی جی صاحب آپ بتائیں ایسا کیوں ہو رہا ہے، میں اس دہشت گرد کو جانتا بھی نہیں، نہ کبھی ملا ہوں۔ انہوں نے آئی جی سندھ پولیس کو ہدایت کی کہ ایس ایس پی کے خلاف ایکشن نظرآنا چاہیے۔

مراد علی شاہ نے مجھ سے کہا تم کو دوبارہ زندہ کیا جارہا ہے، ٹارگٹ کلر کا انکشاف

یاد رہے کہ گزشتہ روز گرفتار ٹارگٹ کلر یوسف عرف ٹھیلے والا نے انکشاف کیا تھا کہ میں دنیا کی نظر میں مردہ ہو چکا تھا، مجھے دوبارہ زندہ کیا گیا۔ ملزم نے بتایا تھا کہ جس دن گرفتاری ظاہر کی گئی اسی دن وزیراعلیٰ سندھ مراد علی شاہ مجھ سے ملنے بھی آئے تھے، مراد علی شاہ نے کہا تھا کہ تم دنیا کی نظر میں مر چکے ہو، اب تمہیں دوبارہ زندہ کیا جا رہا ہے۔

کراچی: چیئرمین پیپلزپارٹی بلاول بھٹو زرداری کا کہنا ہے کہ کوئی کارکن کارکردگی نہیں دکھائے گا تو دیگر آپشنزموجود ہیں، کابینہ میں ایسے لوگوں کو موقع دیا جاسکتا ہے جو کارکردگی دکھائیں۔

تفصیلات کے مطابق سربراہ پیپلزپارٹی بلاول بھٹو زرداری کی زیرصدارت سندھ کابینہ کے ارکان کا اجلاس ہوا جس میں وزیراعلیٰ سندھ، صوبائی وزرا، مشیر ومعاونین خصوصی نے شرکت کی۔ ارکان نے بلاول بھٹو کو سندھ میں زرعی پانی کی قلت، فنڈزکی عدم دستیابی سے آگاہ کیا۔

بلاول بھٹو زرداری نے کہا کہ مجھےعوام وکارکنان اور ارکان اسمبلی سے شکایات ملی ہیں، وزرا اگردفاتر میں نہیں ہوں گے تو مسائل کیسے سنیں گے؟ پہلے بھی کہا تھا وزرا اور ارکان اسمبلی کی کارکردگی پر نظر رکھوں گا۔

ذرائع کے مطابق انہوں نے سندھ کابینہ کی کارکردگی پرعدم اعتماد کا اظہار کرتے ہوئے کہا کہ میں سندھ کابینہ کی کارکردگی سے مطمئن نہیں ہوں، کابینہ ارکان کارکردگی کو بہتربنائیں۔

بلاول بھٹو نے کہا کہ کوئی کارکن کارکردگی نہیں دکھائے گا تو دیگر آپشنزموجود ہیں، کابینہ میں ایسے لوگوں کو موقع دیا جاسکتا ہے جو کارکردگی دکھائیں۔ انہوں نے کہا کہ وزیراعلیٰ صاحب اپنے وزرا کی کارکردگی کو بہتربنائیں، جس پر وزیراعلیٰ سندھ نے کہا کہ جی بالکل کابینہ کارکردگی کی ذمہ داری مجھ پرعائد ہوتی ہے۔

چیئرمین پیپلزپارٹی نے کہا کہ وزرا کو پیپلزپارٹی منشور کی فکر ہے نہ پارٹی امیج کا خیال ہے۔ انہوں نے کابینہ کے ارکان کو وراننگ دی کہ اپنا قبلہ درست کرلیں، میرے پاس بہت آپشن ہیں، زیادہ برداشت نہیں کرسکتا۔

ذرائع کے مطابق بلاول بھٹو نے بلدیات اور صحت کے محکموں کی کارکردگی پر شدید تنقید کرتے ہوئے کہا کہ سیاسی جدوجہد کو وزرا کی خراب کارکردگی متاثر کر رہی ہے۔