وزیراعلیٰ پنجاب مریم نواز نے کہا ہے کہ اپنی چھت اپنا گھر پروگرام کے تحت شہری 15 لاکھ روپے تک قرض لے سکتے ہیں۔
تفصیلات کے مطابق وزیراعلیٰ مریم نواز سے صوبائی وزرا، پارلیمانی اور انتظامی سیکریٹریز نے ملاقات کی، اس موقع پر مریم نواز نے کہا کہ پانچ سال میں 5 لاکھ گھر بنانے کاہدف حاصل کریں گے، 15 لاکھ روپے کا قرض 7 سال میں 14 ہزار ماہانہ قسط پر ادا کرنا ہوگا۔
مریم نواز نے پارلیمانی سیکرٹریز کی میٹنگ سے خطاب میں کہا کہ چینی سرمایہ کاروں نے پنجاب کو مواقع سے بھرپور سرزمین قرار دیا، سیاسی مخالفت کو دشمنی میں بدلنے کے رجحان نے پاکستان کو نقصان پہنچایا۔
انھوں نے کہا کہ 4 سال نالائقوں کے ہاتھ میں حکومت رہی، 40 سالہ ترقی کو تباہ وبرباد کردیا، شہباز شریف کا ترقی کرتا ہوا پنجاب ملتا تو بہت تیزی آگے بڑھتے۔
وزیراعلیٰ پنجاب نے کہا کہ محنت کی ہے لیکن 6 ماہ میں مثالی بہتری کا دعویٰ نہیں کرسکتے، عوامی نمائندہ ہوں، عوام کی بہتری کیلئےکبھی چھٹی نہیں کی، میرا کام سے چھٹی نہ کرنا کسی پر احسان نہیں بلکہ میرافرض ہے۔
مریم نواز نے کہا کہ جتنا بھی کام کرلوں اپنے کام سے کبھی مطمئن نہیں ہوتی، باقی باتیں کرتے رہیں، 5 سال میں کوئی اتنی اسکیمیں نہیں لاسکتا جو 6 ماہ میں ہم کرچکے۔
مہنگائی کم ہورہی ہے پہلے قیمتوں کا گراف اوپر جاتا تھا اب نیچےجارہا ہے، آٹا، دودھ اور ضروری اشیا کے نرخ اب بھی کم ہیں، پنجاب میں آٹا 800 کے لگ بھگ ہے دیگرصوبوں میں 1400 پر پہنچ چکا۔
انھوں نے کہا کہ پنجاب میں 12، 13 روپے کی روٹی مل رہی ہے، باقی صوبوں کا حال آپ جانتے ہیں، آفس میں بیٹھ کر اسکرین پر اشیائے خورونوش کے نرخ لائیو چیک کرتی ہوں۔
مریم نواز کا کہنا تھا کہ تقریباً 4 لاکھ لوگوں کیلئے کسان کارڈ ایشو ہورہے ہیں، وزیراعلیٰ نے اجلاس میں پارلیمانی سیکریٹریز سے 5 سالہ وژن ڈاکیومنٹ طلب کیا جبکہ انھوں نے محکمانہ میٹنگ میں متعلقہ پارلیمانی سیکرٹری کو مدعو کرنے کی ہدایت کی۔
