لاہور: وزیراعلیٰ پنجاب شہبازشریف نےپلی بارگین کرنے والوں کےحوالے سےکہا کہ پلی بارگین ایک فراڈ ہے۔
تفصیلات کےمطابق پلی بارگین پر تحریک انصاف کےسربراہ عمران خان اوروفاقی وزیرداخلہ چوہدری نثارعلی خان کے بعد وزیراعلیٰ پنجاب شریف نےبھی پلی بارگین کرنےوالوں کوشدید تنقید کا نشانہ بنایا ہے۔
وزیراعلیٰ پنجاب شہبازشریف نےپلی بارگین کرنے والوں کو آڑھےہاتھوں لیتےہوئےکہاکہ اربوں روپےکھاکرچند کوڑیوں کو واپس کردو۔
خیال رہے کہ اس سے قبل وفاقی وزیرداخلہ چوہدری نثارعلی خان نے بھی عمران خان کے پلی بارگین سےمتعلق موقف کی حمایت کی تھی۔
لاہور: بلوچستان سے تعلق رکھنے والے طلبا و طالبات نے وزیر اعلیٰ پنجاب سے تندو تیز سوالات کیے اور کہا کہ سی پیک گوادر میں بن رہا ہے تو ترقی لاہور میں کیوں ہورہی ہے؟ چینی زبان سیکھنے کے لیے صرف پنجاب کے طلبا کو ہی کیوں بھیجا گیا؟ سوالات پر شہباز شریف الجھ کر رہ گئے۔
تفصیلات کے مطابق لاہور کے دورے پر آنے والے بلوچ طلبا و طالبات کے اعزاز میں تقریب کا انعقاد کیا گیا، تقریب میں وزیر اعلیٰ پنجاب میاں شہباز شریف کے خطاب کے بعد ان سے بلوچ طلبا و طالبات نے تلخ سوالات کیے جس پر شہباز شریف الجھ کر رہ گئے۔
طلباء و طالبات کا کہنا تھا کہ سی پیک کا سن سن کر تھک چکے ہیں، سی پیک گوادر میں بن رہا ہے مگر ترقی لاہور میں کیوں ہو رہی ہے؟
طلبا نے مزید کہا کہ سیاست دان گوادر کا دورہ کرتے ہیں تو لوڈ شیڈنگ ختم ہو جاتی ہے اور ان کی واپسی کے بعد لوڈ شیڈنگ دوبارہ سے شروع ہو جاتی ہے،ہمارے پاس تو کپڑے استری کرنے کے لیےبھی بجلی نہیں ہوتی“جس کے جواب میں میاں شہباز شریف نے کہا کہ ماضی میں ترقی کا راستہ روکنے والوں نے پنجاب کا نام لے کر نفرتوں کو پروان چڑھایا۔
جواب میں وزیر اعلیٰ پنجاب نے کہا کہ پنجاب کو ہمیشہ بڑا بھائی کہہ کر طعنہ زنی ہوتی رہی، پنجاب سے متعلق باتیں اور بیانات غلط ہیں، چاروں صوبوں میں ترقی کا پہیہ اسی رفتار سے چلنا چاہیئے جس کا تقاضا عوام کرتے ہیں۔
وزیراعلیٰ پنجاب نے کہا کہ غلط فہمی کی بنا پر بلوچستان کے عوام کو وفاق سے جائز شکایات ہوئیں بلوچ عوام نہ صرف محب وطن بلکہ پاکستان کی تشکیل میں بھی ان کا اہم کردار ہے، بلوچستان کے مسائل کو کافی حد تک حل کر لیا گیا ہے۔
طلبا نے وزیراعلیٰ شہباز شریف سے شکایت کی کہ چینی زیان سیکھنے کے لیے گوادر کے بجائے پنجاب سے طلبا کو چین بھیجا گیا جو کہ سراسر ناانصافی ہے جس پر وزیراعلیٰ پنجاب نے یقین دہانی کرائی کہ آئندہ 20 طلبا گوادر سے چین کا دورہ کریں گے۔
شہبازشریف نے طلبا کو بتایا کہ میٹرو بس سی پیک سے پہلے لاہور میں چل رہی تھی جبکہ سڑکوں کا جال اور دانش اسکول بھی سی پیک منصوبے سے پہلے بنائے گئے ہیں۔
بعد ازاں اے آر وائی نیوزسے گفتگو کرتے ہوئے گوادر سے آئے طلبا و طالبات اپنے علاقوں میں بنیادی سہولیات کی عدم فراہمی پر پھٹ پڑے۔
وزیراعلیٰ نے اس موقع پر گوادر سے تعلق رکھنے والے بیس طلبا و طالبات کو چین اسکالرشپ پر بھجوانے کے اعلان کے ساتھ دورے پر آئے ہوئے طلباء میں لیپ ٹاپس بھی تقسیم کیے۔
لاہور: وزیراعلیٰ شہبازشریف کا کہناہے کہ”ہم“ کی روش پر چلنا ہوگا،ذاتی انا اور”میں“ کی روش نےملک کو بے پناہ نقصان پہنچایا ہے۔
تفصیلات کےمطابق وزیر اعلیٰ شہباز شریف سے سندھ کے وزیراعلیٰ مراد علی شاہ نے لاہور میں ملاقات کی اور باہمی دلچسپی کے امور سمیت صوبوں کے مابین تعلقات کے فروغ پر تبادلہ خیال کیا۔
وزیراعلیٰ سندھ اور وزیراعلیٰ پنجاب کی ملاقات میں دونوں وزرائے اعلیٰ نے بین الصوبائی ہم آہنگی کو فروغ دینے پر اتفاق کیا۔
اس موقع پر وزیراعلیٰ شہباز شریف کا کہنا تھا کہ پاکستان کو آگے لے جانے کےلیے ”ہم“ کی روش پر چلنا ہو گا، ذاتی انا اور ”میں“ کی روش نے ملک کو بے پناہ نقصان پہنچایا ہے۔
انہوں نے کہا کہ پاکستان چار اکائیوں،گلگت بلتستان اور آزاد کشمیر پر مشتمل ہے،جب چاروں اکائیاں ترقی کریں گی تو ملک آگے بڑھے گا اور ہم سب نے مل کر ملک کی ترقی اور خوشحالی کےلیے کام کرنا ہے۔
وزیراعلیٰ سندھ سید مراد علی شاہ نے وزیراعلیٰ شہبازشریف کےلیے نیک خواہشات کا اظہار کیا۔انہوں نے نے شہباز شریف کوگلدستہ بھی پیش کیا۔
لاہور : وزیراعلیٰ پنجاب میاں شہباز شریف نے کہا ہے کہ ایک سیاسی جماعت کی جانب سے اسلام آباد بند کرنے کی دھمکیوں کے پیچھے دراصل ملک کی تیزرفتارترقی کا خوف تھا۔ اب ملک سے جہالت اور بے روزگاری کے اندھیرے چھٹنےکاوقت آگیا ہے۔
ان خیالات کا اظہار انہوں نے اپنے ایک جاری بیان میں کیا، وزیراعلی پنجاب کا کہنا تھا کہ دھرنا گروپ خوفزدہ ہے کہ ترقیاتی منصوبے مکمل ہوگئے تو ان لوگوں کی سیاست ہمیشہ کے لئے دفن ہو جائے گی۔
دھرنا گروپ ترقیاتی منصوبوں سےخوفزدہ ہے، با شعورعوام ان کی انتشار کی سیاست سے یکسرلاتعلق رہے، انہوں نے کہا کہ اب ملک سے جہالت اور بے روزگاری کے اندھیرے چھٹنےکا وقت آگیا ہے۔ سی پیک منصوبہ ملک کی ترقی و خوشحالی کا ضامن ہے۔
انہوں نے کہا کہ سی پیک منصوبوں کی تکمیل سے پاکستان میں تجارتی معاشی اورسماجی سرگرمیاں بڑھیں گی۔ اربوں ڈالر کے منصوبوں کی تکمیل سے ملک کے عوام کی تقدیر بدل جائے گی۔
وزیراعلیٰ پنجاب نے کہا کہ ان توانائی منصوبوں کی تکمیل سے لوڈشیڈنگ کے عذاب میں مبتلا قوم کو جلد راحت ملے گی۔
لاہور: وزیر اعلیٰ شہباز شریف نے کہا ہے کہ دھرنے اور شہر بند کرنے والے ترقی اور خوشحالی کا راستہ روکنا چاہتے ہیں۔
تفصیلات کےمطابق لاہورمیں ترکی کے 93ویں قومی دن پر ترک سفیر کے اعزاز میں عشائیے سے خطاب کرتے ہوئے شہباز شریف نے کہا کہ ترک صدر کی ایک کال پر ترک عوام نے فوجی بغاوت کو ناکام بنا دیا۔
انہوں نے کہا کہ آج ترکی دنیا کا ترقی یافتہ ملک بن چکا ہے۔ترکی صحت، تعلیم اور دیگر شعبوں میں ہمیں تعاون فراہم کررہا ہے۔
شہبازشریف کا کہناتھا کہ آج پاکستان میں دھرنوں کے ذریعےملک کی ترقی اور خوشحالی کا دروازہ بند کرنے کی کوشش کی جا رہی ہے۔ پاکستان کے باشعور عوام اس کوشش کو ناکام بنائیں گے۔
یاد رہے کہ گزشتہ روز وزیراعظم نواز شریف کا کہناتھاکہ ہم سڑکیں بنا رہے ہیں اور لوگ سڑکیں بند کر نے کی دھمکیاں دے رہے ہیں جس سے پتا چل جاتا ہے کہ کون عوام کی خدمت کرنا چاہتا ہے اور کون انتشار پھیلانا چاہتا ہے۔
واضح رہے کہ وزیراعظم نے پھول نگر کے عوام کو مخاطب کرتے ہوئے کہا کہ عوام اطمینان رکھیں کیونکہ آپ کی حکومت نہ صرف یہ پانچ سال پورے کرے گی بلکہ اگلے پانچ سال بھی پورے کرے گی۔
لاہور: وزیراعلیٰ پنجاب شہباز شریف نے تحریک انصاف کے سربراہ عمران خان کو 26ارب روپے ہرجانے کا قانونی نوٹس بھیج دیا۔
تفصیلات کےمطابق وزیر اعلیٰ پنجاب نے کرپشن کے الزام لگانے پرعمران خان کوقانونی نوٹس کو بھجوا دیا۔شہبازشریف نے چودہ دن میں الزام واپس لے کر معافی نہ مانگنے پر26 ارب ہرجانے کا دعوےکرنےکی وارننگ دے دی۔
عمران خان کو بھیجے گئےلیگل نوٹس میں کہا گیا ہے جاوید صادق کےحوالے سے شہباز شریف پر لگائے گئے تمام الزامات جھوٹے اور بے بنیاد ہیں،الزامات عائد کرکے ساکھ کو شدید نقصان پہنچایا،پورے خاندان اور کارکنوں کی دل آزاری ہوئی۔
شہباز شریف نے نوٹس میں کپتان کو 14دن کا وقت دیتے ہوئے کہا وہ الزامات واپس لےکر معافی مانگیں،ایسا نہ کیا تو26 ارب روپے ہرجانے کا دعوے اور فوجداری کارروائی کے لئے تیار رہیں۔
یاد رہے کہ دوروز قبل شہباز شریف نے کہاتھاکہ عمران خان نے مجھ پر اربوں روپےکی کرپشن کے دعوے کیے لیکن ثبوت آج تک پیش نہ کرسکے،عمران خان پر 26 ارب روپے ہرجانے کا دعویٰ دائر کروں گا۔
واضح رہےکہ دوروز قبل پاکستان تحریک انصاف کے چیئرمین عمران خان کا کہناتھا کہ وزیر اعلیٰ شہباز شریف کرپشن میں ملوث ہیں،ان کے فرنٹ مین جاوید صادق ہیں جو اب تک مختلف ٹھیکوں کے ذریعے 15 ارب روپے کمیشن وصول کرچکے ہیں۔
لاہور: وزیراعلیٰ پنجاب شہباز شریف نے کہا ہے کہ عمران خان کو جھوٹ نہیں بولنا چاہیے،عمران خان نے اب تک 35 ارب روپے کی کرپشن کے دعوے کیے لیکن ثبوت آج تک پیش نہ کرسکے، مجھ پر لگائے گئے الزامات میں صداقت نہیں، ان کے الزامات کا جواب نہیں دوں گا اور عمران خان پر 26 ارب روپے ہرجانے کا دعویٰ دائر کروں گا۔
عمران خان کی جانب سے کرپشن کے الزامات کے بعد لاہور میں پریس کانفرنس کرتے ہوئے وزیراعلیٰ پنجاب نے کہا کہ جھوٹ کی انتہا کردی گئی ہے جاوید صادق کو میرا فرنٹ مین کہا گیا، کچھ کاغذات دکھائے گئے، یہ بات سن کر میں اسلام آباد سے بھاگا بھاگا یہاں آیا تاکہ حقائق بتا سکوں، مجھ پر کرپشن ثابت ہوجائے تو 20 کروڑ عوام کا مجرم ہوں گا۔
انہوں نے کہا کہ سچی اور کھری بات کی جائے، خان صاحب آج تک 35 ارب روپے کی کرپشن کے دعوے کرچکے لیکن ثبوت پیش نہیں کیے، میں نے کوئی کرپشن نہیں کی، اگر میری بات غلط ثابت ہوجائے تو قیامت کے دن منہ دکھانے کے لائق نہ ہوں، مجھ پر جتنے الزامات عائد کیے گئے اس میں سے کسی کا بھی ثبوت پیش نہیں کیا گیا۔
اس موقع پر انہوں نے اپنے ترقیاتی منصوبوں کی تفصیلات پیش کیں اور اس میں بچائے گئے اربوں روپے کی تفصیلات پیش کیں اور کہا کہ قوم کے اربوں روپے بچائے گئے کرپشن کہاں ہے؟
انہوں نے کہا کہ سال 2014ء کے دھرنوں میں بھی پاک چین دوستی کو نقصان پہنچانے سے گریز نہیں کیا گیا،چین کے صدر کا دورہ پاکستان پی ٹی آئی کی وجہ سے ہی منسوخ ہوا، ہم پاکستان کا خزانہ بھرنے کے لیے چینی حکام سےملاقاتیں کرتے ہیں ، دھرنوں کی وجہ سے سی پیک کا اعلان 2014ء کے بجائے اب کیا گیا۔
لاہور : وزیراعلیٰ پنجاب شہباز شریف نے کہا ہے کہ شہروں کو بند کرنے والے سی پیک، توانائی منصوبوں، موٹرویز اور صنعت و حرفت کے منصوبوں کے خلاف ہیں، تبدیلی کی باتیں کرنیوالوں نے منفی سیاست کے سوا کچھ نہیں کیا۔
یہ بات انہوں نے لاہور میں میڈیا سے بات چیت کرتے ہوئے کہی، شہباز شریف کا کہنا تھا کہ ایسے عناصر کو ملکی ترقی اورعوامی مسائل سے کوئی سروکار نہیں۔ یہ عناصر غیر جمہوری اقدام کے درپے ہیں اور شہروں کو بند کرکے ترقی کے سفر کو روکنا چاہتے ہیں۔
شہباز شریف نے کہا کہیہ لوگ نہیں چاہتے کہ سی پیک، توانائی منصوبے مکمل ہونے سے اندھیر دور ہوں، صنعت و حرفت کا پہیہ چلے اور بیروزگاری کا خاتمہ ہو، اگر آئندہ 18 ماہ میں یہ منصوبے مکمل ہو گئے تو انہیں ایک مرتبہ پھر شکست کی دھول چاٹنی پڑے گی۔
وزیراعلیٰ پنجاب نے کہا کہ ملک کی ترقی کو روکنے والے ایک بار پھر اپنے عزائم میں ناکام ہوں گے، پاکستان کے 18 کروڑ عوام کبھی بھی ان کی سازش کو کامیاب نہیں ہونے دیں گے۔ ان کا ایجنڈا صرف اور صرف ملک میں افراتفری اور منفی سیاست کو فروغ دینا ہے۔
انہوں نے عمران خان کا نام لیے بغیر ان پرتنقید کرتے ہوئے کہا کہ دھرنا سیاست والوں کے پاس نہ تو ملک کی ترقی اور عوام کی خوشحالی کا کوئی ایجنڈا ہے اور نہ ہی وہ سیاسی اقدار پر یقین رکھتے ہیں۔
منفی سیاست کرنے والے اپنے طرز سیاست پر نظرثانی کریں۔ انہوں نے کہا کہ عالمی سطح پر جگ ہنسائی، ترقی دشمن عناصر کا اصل ایجنڈا ہے۔
لاہور: وزیر اعلیٰ میاں پنجاب شہباز شریف نے ایک بار پھر دعویٰ کیا ہے کہ آئندہ سال ملک سے نہ صرف لوڈ شیڈنگ ختم ہوجائے گی بلکہ وافر مقدار میں بجلی بھی دستیاب ہوگی۔
پوزیشن ہولڈر طلبا کی تقریب تقسیم انعامات سے خطاب کرتے ہوئے وزیر اعلیٰ پنجاب شہباز شریف کا کہنا تھا کہ ’’اگلے سال نہ صرف ملک سے لوڈ شیڈنگ ختم ہوجائے گی بلکہ وافر مقدار میں بجلی کی پیداوار شروع ہوجائے گی‘‘۔
وزیر اعلیٰ پنجاب کا کہنا تھا کہ ’’آج کے نوجوانوں کو کل ملک کی باگ ڈور سنبھالنی ہے اس کے لیے انہیں دل لگا کر تعلیم حاصل کرنی ہوگی، امتحانات میں پوزیشن حاصل کرنے والے طلبہ کو لیپ ٹاپ تقسیم کرتے ہوئے وزیر اعلیٰ نے کہا کہ حکومت نے طلبہ کو جدید سہولیات فراہم کیں تاکہ ہمارے بچے جدید تعلیم سے آراستہ ہو سکیں۔
انہوں نے کہا کہ شورو غل ملکی مفاد میں نہیں ہے اس لیے تمام جماعتوں کو مل کر ملک کی تعمیر و ترقی کے لیے اپنا کردار ادا کرنا ہوگا، عمران خان کی جانب سے اورنج لائن منصوبے پر تنقید کے حوالے سے وزیر اعلیٰ نے کہا کہ ’’عوام کے لیے شروع کیے گئے منصوبوں پر وہ لوگ تنقید کرتے ہیں جو خود طیاروں اور ہیلی کاپٹروں میں سفر کرتے ہیں‘‘۔
اس موقع پر وزیر اعلیٰ پنجاب نے آئی ٹی یونیورسٹی کو انڈوومنٹ فنڈ کی مد میں 50 کروڑ روپے دینے کا بھی اعلان کیا۔
لاہور : وزیراعلیٰ پنجاب محمد شہباز شریف نے کہا ہے کہ دھرنے والے ترقی روکنے کیلئے شکلیں بدل کر سامنے آرہے ہیں، مگر اب ان کی ہوا نکل چکی ہے تاہم اگر اورنج لائن سمیت پنجاب میں جاری کسی بھی منصوبے میں ایک پائی کی بھی کرپشن ثابت ہوجائے تو مخالفین قیامت تک ان کا گریبان پکڑ سکتے ہیں۔
ایوان وزیراعلیٰ میں لاہور ایوان صعنت و تجارت کی ایکسپورٹ ٹرافی کے سلسلے میں منقعد تقریب سے خطاب کرتے ہوئے شہباز شریف پاکستان تحریک انصاف اورعوامی تحریک کے رہنماؤں کا نام لیے بغیر خوب برستے رہے۔
انہوں نے کہا کہ دھرنے والوں نے دو ہزار چودہ میں چینی صدر کی آمد پر سی پیک جیسے منصوبے کو روکنے کی بھرپور کوششیں کیں۔
وزیراعلیٰ کا کہنا تھا کہ اب بھی دھرنے والے شکلیں بدل کر سامنے آرہے ہیں مگر ان کی ہوا نکلی ہوئی ہے۔ وزیراعلیٰ نے اس موقع پر اورنج لائن کی مخالفت کرنے والوں کو بھی آڑے ہاتھوں لیا۔
ان کا کہنا تھا کہ تاریخی عمارتوں کا رونا رونے والوں نے کبھی شالیمار باغ کی شکل نہیں دیکھی تاہم عدالت کی جانب سے ملنے والے حکم امتناعی کو مانتے ہیں مگرعدلیہ کے فیصلے نے ثابت کردیا ہے کہ ان کے خلاف کسی قسم کی بدعنوانی ثابت نہیں ہوئی اور اگر کبھی ایسا ہوا تو قوم ان کا گریبان پکڑ سکتی ہے۔
