لاہور : وزیراعلی پنجاب مریم نواز نے کسان کارڈ کے ذریعے لون ڈیڑھ لاکھ سے بڑھا کر 3لاکھ روپے کرنے اور زرعی ٹیوب ویل کی سولرائزیشن پر 95 فیصد تک سبسڈی کا اعلان کیا۔
تفصیلات کے مطابق وزیراعلی پنجاب مریم نواز شریف کے گندم کے کاشتکاروں کے لئے اہم اعلانات سامنے آئے، تقریب سے خطاب میں مریم نواز نے کسان کارڈ کے ذریعے لون ڈیڑھ لاکھ سے بڑھا کر 3لاکھ روپے کرنے اور زرعی ٹیوب ویل کی سولرائزیشن پر 95 فیصد تک سبسڈی کا اعلان کیا۔
وزیراعلی پنجاب نے کسان کارڈ نہ رکھنے والے کاشتکاروں کے لئے ایس ایم ایس اور ہیلپ لائن سسٹم لانچ کرنے ، اگلے سال 20ہزار کاشتکاروں کو سبسڈی پر گرین ٹریکٹر دینے اور ہر تحصیل میں رینٹل ایگری کلچر مشینری سنٹرقائم کرنے کا اعلان بھی کیا۔
اس موقع پر مریم نواز شریف نے سب سے پہلے کاشتکاروں بھائیوں کو آپریشن بنیان مرصوص کی کامیابی پر مبارکباد پیش کرتے ہوئے وزیراعظم محمد شہباز شریف،آرمی چیف جنرل عاصم منیر ،پاک فوج کے ہر افسر اورجوان خراج عقیدت پیش کیا اور رینجرز،پولیس،سول ڈیفنس،انتظامیہ اور تمام سرکاری اداروں کو شاباشی دی۔
انھوں نے کہا کہ افواج پاکستان پر فخر ہے،قوم نے متحد ہو کر ملک کی سلامتی کے لئے اہم کردار ادا کیا، پاکستان ہے تو ہم ہیں،کاشتکار ہے،زمینیں ہیں اور خوشحال ہے۔اللہ تعالی ملک کو تاقیات سلام رکھے۔
وزیراعلیٰ کہنا تھا کہ جب ملکی سلامتی کی بات ہو تو کوئی اختلاف اور تقسیم نہیں ہونی چاہے ، نفرت کی سیاست نے پاکستان کو کیا دیا؟ جنگ شروع ہوئی تو لوگ کہتے تھے کہ یہ چھوٹا سا ملک ہے اور یہ سب آپس میں لڑتے رہتے ہیں ، اللہ تعالی نے مدد کی اور دشمن کو دھول چٹائی۔
انھوں نے کہا کہ اللہ تعالی کی مدد،بدنیت اور نفرتیں پیدا کرنے والوں پر نہیں آتیں،سیاسی، عسکری قیادت عوام اور میڈیا نے جنگ کے دوران بھرپور ساتھ دیا، کسان بھائیوں،کاشتکاروں اور عوام کی طرف سے سیاسی اور فوجی قیادت کو سلام پیش کرتے ہیں۔
مریم نواز شریف کا مزید کہنا تھا کہ یہ سرحدوں کی جنگ نہیں بلکہ نظریہ اور جذبوں کی جنگ تھی، جنگ میں فتح کے بعد دنیا بھر میں پاکستان کو مضبوط اور طاقتور ملک تسلیم کیا جارہے، چین،ترکیہ اوروسط ایشیائی ممالک کا پاکستان کے ساتھ ڈٹ کر کھڑے ہونا تاریخی فتح ہے۔
وزیراعلیٰ پنجاب نے کہا کہ پاکستان کی معیشت ڈوبنے کی پشین گوئی کرنے والے اب اسے معجزہ قرار دے رہے ہیں، پاکستان کی اکانومی معجزہ بن چکی ہے،40فیصد سے تقریبا صفر پر مہنگائی کا آنا معجزے سے کم نہیں۔
ان کا کہنا تھا کہ لاہور کے دورے کے دوران خاتون نے سبزیوں کے نرخ کم ہونے پر مبارکباد دی، پنجاب میں جو پیاز300روپے کلو بکتا تھا،50 روپے میں مل رہا ہے، غریب کے لئے آٹے اور روٹی کے نرخ کم ہونے کی وجہ سے پیٹ بھر کر کھانا آسان ہوا ہے ، نااہل حکومت کی وجہ سے سابقہ دور میں بجلی کے بلوں میں ہوش ربا اضافہ ہوا۔
انھوں نے بتایا کہ وزیراعظم محمد شہباز شریف محنت کرکے بجلی کے نرخ نیچے لارہے ہیں، بجلی کے نرخ کم ہونے کی وجہ سے اب بجلی کا بل بھی کم آئے گا۔
وزیراعلیٰ نے مزید کہا کہ پنجاب کے کسان تاریخی پیکج سے مستفید ہورہے ہیں، کسان بھائیوں نے پراپیگنڈے پر کان نہیں دھرے اور میری اپیل پر گندم اگائی، میں نے کہا کہ تھا کہ کاشتکار بھائی بے دھڑک گندم اگائیں،نقصان نہیں ہونے دیں گے، گندم کی سپورٹ پرائس کی بجائے کاشتکار کو ڈائریکٹ سبسڈی دے رہے ہیں۔
ان کا کہنا تھا کہ روٹی،آٹا سستا ہونے کی وجہ سے غریب کے لئے پیٹ بھرنا آسان ہو گیا ہے، چاہتی ہوں تمام وسائل کسان بھائیوں کے قدموں میں رکھ دیں لیکن توازن قائم کرنے کے لئے بعض سخت فیصلے بھی کرنے پڑتے ہیں، گندم کے کاشتکاروں کو 5ہزار فی ایکڑ سپورٹ پرائس دی جارہی ہے اور بیج،کھاد اور پیسٹی سائز،ٹیوب ویل کے بجلی بل اور ڈیزل کا خرچ کم کرنے کی پوری کوشش کررہے ہیں۔
انھوں نے بتایا کہ لوگوں نے کہا کسان کو قرض نہ دو،واپس نہیں ملے گا، کسان کارڈ سے85فیصدرقوم واپس ہو چکی ہیں، پہلے محمد نواز شریف کی حکومت میں گرین ٹریکٹر ملے،اب بھی نواز شریف کی حکومت آئی ہے تو گرین ٹریکٹر مل رہے ہیں۔
وزیراعلی نے صوبائی وزیر زراعت عاشق کرمانی،سیکرٹری زراعت افتخار سہو اور پورے ایگری کلچر ڈیپارٹمنٹ کو شاباش بھی دی اور کہا خواہش ہے کہ ہر کاشتکار خوشحال ہو اور پاکستان زراعت کے شعبے میں سب سے آگے ہو، رزق اللہ تعالی دیتا ہے لیکن زمین پر رزق اگانے کے لئے کاشتکار محنت کرتا ہے۔
