Tag: وزیرِ خارجہ جان کیری

واشنگٹن :امریکا کے وزیرِ خارجہ جان کیری نے کہا ہے کہ اتحادی افواج کی کارروائی میں شدت پسند تنظیم داعش کے نصف سے زائد اہم رہنماء ہلاک ہو چکے ہیں۔

برطانیہ کے دارالحکومت لندن میں داعش کے خلاف مشترکہ حکمت عملی وضع کرنے کے لیے اجلاس منعقد ہوا، اجلاس کے بعد نیوز کانفرنس میں امریکی وزیرِ خارجہ جان کیری کا کہنا تھا کہ امریکہ کی قیادت میں اتحادی افواج کے فضائی حملوں کے نتیجے میں داعش کا زور ٹوٹ رہا ہے، داعش کے ہزاروں جنگجووں کو مار بھگایا گیا ہے اور اس کے پچاس فیصد رہنماء مارے گئے ہیں۔

امریکی وزیرِ خارجہ کا کہنا تھا کہ حالیہ ماہ میں ہم نے عراق اور شام میں ان کی پیش قدمی کو روکا ہے۔

اجلاس میں شریک عراق کے وزیرِاعظم حیدر العبادی نے خبردار کیا کہ عالمی منڈی میں تیل کی قیمتوں میں کمی کی وجہ سے ان کے ملک کی شدت پسندی کے خلاف لڑنے کی صلاحیت متاثر ہو رہی ہے۔

برطانوی وزیر خارجہ نے بتایا کہ تمام اتحادی ممالک داعش کو شکست دینے کے لیے پر عزم ہیں۔

کانفرنس میں آسٹریلیا، بحرین، بیلجیئم، کینیڈا، ڈنمارک، مصر، فرانس، جرمنی، اٹلی، ، اردن، کویت، نیدرلینڈز، ناروے، قطر، سعودی عرب، اسپین، ترکی اور متحدہ عرب امارات نے بھی شرکت کی۔