اسلام آباد : وزیر اعظم شہباز شریف نے اتحادیوں اور پی ڈی ایم جماعتوں کا اہم اجلاس بلالیا، جس میں شہباز شریف اتحادیوں سے نگران وزیر کے ناموں پر اہم مشاورت کریں گے۔

تفصیلات کے مطابق نگراں وزیراعظم کا نام فائنل کرنے کیلئے رابطوں میں تیزی آگئی، وزیر اعظم شہباز شریف نے اتحادی ،پی ڈی ایم جماعتوں کا اہم اجلاس طلب کرلیا۔

ذرائع نے بتایا ہے کہ وزیر اعظم آج رات اتحادی ،پی ڈی ایم رہنماؤں کےاعزاز میں عشائیہ بھی دیں گے ، آصف زرداری، بلاول بھٹو ، مولانا فضل الرحمان کو دعوت بھجوا دی گئی۔

ذرائع کا کہنا ہے کہ خالد مقبول صدیقی،خالد مگسی، ساجد میر، اویس نورانی کو بھی دعوت پر بلا لیا جبکہ ایمل ولی خان،عبدالملک بلوچ، آفتاب شیرپاؤبھی اجلاس، عشائیہ میں شرکت کریں گے۔

ذرائع کے مطابق فضل الرحمان وزیر اعظم سے پارٹی رہنماؤں کے ہمراہ الوداعی ملاقات بھی کریں گے ، ملاقات میں جمعیت علمااسلام کے ارکان پارلیمنٹ شرکت کریں گے۔

اجلاس میں وزیراعظم شہباز شریف اتحادیوں سے نگران وزیر کے ناموں پر اہم مشاورت بھی کریں گے ، اتحادیوں کے مشاورت کے بعد وزیر اعظم اپوزیشن لیڈر کو اعتماد میں لیں گے۔

کراچی : وزیرِ اعظم شہباز شریف آج کراچی پہنچیں گے ، جہاں وہ پاک بحریہ کے جنگی بحری جہاز طارق کی افتتاحی تقریب میں شرکت کریں گے۔

تفصیلات کے مطابق وزیرِ اعظم محمد شہباز شریف آج کراچی کا ایک روزہ دورہ کریں گے ، وفاقی وزرا بھی شہبازشریف کے ہمراہ کراچی جائیں گے۔

دورے میں وزیرِ اعظم کراچی میں پاک بحریہ کے جنگی بحری جہاز طارق کی افتتاحی تقریب میں شرکت کریں گے۔

پی این ایس طارق ملجم کلاس کارویٹ جنگی جہاز ان چار بحری جہازوں میں سے ایک ہے، جو ترکیہ ٹیکنالوجی کی منتقلی کے معاہدے کے تحت ترکیہ اور پاکستانی انجنئرز مل کر بنا رہے ہیں۔

تقریب میں ترک نائب صدر جودت یلماز بھی تقریب میں شرکت کریں گے۔

دورے کے دوران وزیرِ اعظم شہباز شریف سے کراچی میں ترک نائب صدر کی ملاقات بھی ہوگی ، پاکستان اور ترکی میں دفاع سمیت مختلف شعبوں میں تعاون کیلئے مفاہمت کی یادداشتوں پر دستخط متوقع ہیں۔

شہباز شریف کراچی چیمبر آف کامرس اینڈ انڈسٹری کے نمائندہ وفد سے بھی ملاقات کریں گے۔

اسلام آباد : وزیر اعظم شہباز شریف نے بابو سر ٹاپ حادثے میں 8 افراد کے جاں بحق ہونے پر گہرے دکھ کا اظہار کیا۔

تفصیلات کے مطابق وزیر اعظم شہباز شریف نے بابو سر ٹاپ حادثے میں 8 افراد کے جاں بحق ہونے پر گہرے دکھ کا اظہار کرتے ہوئے جاں بحق ہونے والوں کیلئے مغفرت اور اہلخانہ کیلئے صبرجمیل کی دعا کی۔

شہبازشریف نے زخمیوں کی جلد صحتیابی کیلئےبھی دعا کی اور متعلقہ حکام کو زخمیوں کو بہترین طبی سہولیات فراہم کرنے کی ہدایت کردی۔

یاد رہے گلگت بلتستان کے شہر چلاس میں ہونے والے خوفناک ٹریفک حادثے میں 8 افراد جاں بحق اور 09 زخمی ہوگئے تھے، جھلس کر مرنے والوں کا تعلق ایک ہی خاندان سے تھا۔

ریسکیو حکام کے مطابق حادثے میں ٹکراؤ کے بعد مسافروں سے بھری ہائی روف گہری کھائی میں جاگری اور گرتے ہی اس میں آگ لگ گئی، حادثے کا شکار ہونے والی ہائی روف میں سیاح سوار تھے۔