Tag: وزیر اعظم عمران خان

اسلام آباد: وزیر اعظم عمران خان نے کہا ہے کہ حکومت نے فیصلہ کیا ہے کہ کوئلے سے مزید توانائی پیدا نہیں کریں گے۔

اے آر وائی نیوز کے مطابق وزیر اعظم عمران خان آج موسمیاتی تبدیلیوں پر پیرس معاہدے کی پانچویں سال گرہ پر بین الاقوامی ورچوئل سمٹ سے خطاب کر رہے تھے۔

انھوں نے کہا ہم نے فیصلہ کیا ہے کہ کوئلے سے مزید توانائی پیدا نہیں کریں گے، کوئلے سے چلنے والے پلانٹ کی جگہ ہائیڈرو پاور پلانٹ لگائیں گے۔

وزیر اعظم نے کہا پاکستان نے 2030 تک مجموعی توانائی کے 60 فی صد کو کلین انرجی پر منتقل کرنے کا ہدف مقرر کیا ہے، پاکستان کا ماحولیاتی آلودگی میں حصہ ایک فی صد سے بھی کم ہے، جب کہ بدقسمتی سے پاکستان ماحولیاتی آلودگی سے دنیا میں پانچواں سب سے زیادہ متاثر ہونے والا ملک ہے۔

ان کا کہنا تھا پاکستان کلین انرجی کی جانب گامزن ہے، 2030 تک 30 فی صدگاڑیوں کو بجلی پر منتقل کرنے کا ہدف مقرر کیا گیا ہے، پاکستان ماحولیاتی تبدیلی کے اثرات پر قابو پانے کے لیے تمام ممکن اقدامات کرے گا۔

وزیر اعظم نے کہا ہم نیشنل پارک کی تعداد 30 سے بڑھا کر 45 کر رہے ہیں، اگلے 3 سال میں 10 ارب پودے بھی لگائیں گے۔

اسلام آباد: وزیر اعظم عمران خان نے بل گیٹس سے ٹیلی فونک رابطہ کیا ہے، جس میں پاکستان میں کرونا کی صورت حال اور پولیو کے خاتمے کی کوششوں پر تبادلہ خیال کیا گیا۔

تفصیلات کے مطابق وزیر اعظم پاکستان نے مائیکرو سافٹ کے بانی بل گیٹس کو فون کر کے صحت اور معیشت پر وبائی امراض کے مضر اثرات کو قابو کرنے پر بات چیت کی ہے۔

وزیر اعظم نے بل گیٹس کو وبائی مرض سے متعلق پاکستان کی پالیسی سے آگاہ کیا، اور پاکستان کی قومی مربوط کوششوں پر بھی اعتماد میں لیا، وزیر اعظم نے کرونا کی دوسری لہر کا مقابلہ کرنے کے لیے حکومتی عزم کا اظہار بھی کیا۔

وزیر اعظم نے کہا اسمارٹ لاک ڈاؤن سے لوگوں کو کرونا اور بھوک سے بچایا گیا، اس بار ایس او پیز پر عمل درآمد زیادہ مشکل ہے۔

دونوں شخصیات کے درمیان احساس پروگرام پر بھی تبادلہ خیال کیا گیا، وزیر اعظم نے گیٹس فاؤنڈیشن کی جانب سے ویکسین کی فراہمی کے لیے وکالت کی تعریف کی۔

انھوں نے کہا ملک سے پولیو کا خاتمہ حکومت کی ایک اولین ترجیح ہے، پولیو کے خاتمے کے لیے انتظامی مدد پرگیٹس فاؤنڈیشن کے شکر گزار ہیں، ملک بھر میں انسداد پولیو مہم کو تیز کیا جا رہا ہے، ہماری صحت ٹیم پولیو کے خاتمے کے لیے فاؤنڈیشن کے ساتھ تعاون جاری رکھے گی۔

بل گیٹس نے وبائی امراض کا مقابلہ کرنے کے لیے پاکستان کی کوششوں کو سراہا، اور کہا پاکستان نے اقتصادی سرگرمیوں کو بحال رکھ کر وبائی مرض کا مقابلہ کیا۔

وزیر اعظم عمران خان اور بل گیٹس نے پولیو اور وبائی امراض کا مقابلہ کرنے کے کوششوں پر اتفاق کیا۔

اسلام آباد: وزیر اعظم عمران خان نے کہا ہے کہ اپوزیشن جلسوں کے ذریعے کرونا پھیلا رہی ہے، کرپشن چھپانے کے لیے جلسوں کا سہارا لیا جا رہا ہے، کرونا سے نمٹنے کے لیے لوگوں کو احتیاطی تدابیر سے متعلق آگاہی دی جائے۔

تفصیلات کے مطابق آج اسلام آباد میں وزیر اعظم عمران خان کی زیر صدارت وفاقی کابینہ کا اجلاس منعقد ہوا، جس میں کرونا سے متعلق کابینہ میں طویل بریفنگ دی گئی، وزیر اعظم نے خود بھی بات کی۔

انھوں نے کہا کرونا کی دوسری لہر خطرناک ثابت ہو رہی ہے، وبا سے اموات بڑھنا تشویش ناک ہے، جلسوں میں جانے سے لوگوں کی زندگی کو خطرہ ہے، پہلے سے زیادہ احتیاط برتی جائے۔

وزیر اعظم نے ہدایت کی کہ اسپتالوں میں آکسیجن کی دستیابی یقینی بنائی جائے، اسپتالوں میں پہلے سے بھی بہتر انتظامات کیے جائیں۔ وزیر اعظم نے وفاقی وزیر اسد عمر کو بھی دوبارہ روزانہ بریفنگ دینے کی ہدایت کی۔

اجلاس میں معاونین خصوصی سے متعلق ہائی کورٹ کے فیصلے پر بھی تبادلہ خیال کیا گیا، فرانس سے تعلقات منقطع کرنے سے متعلق اسلام آباد ہائی کورٹ کی پٹیشن بھی زیر بحث آئی، وزیر اعظم نے وزیر خارجہ کو دوبارہ اسلامی ممالک سے رابطوں کا ٹاسک سونپ دیا۔

اجلاس میں او آئی سی میں اسلامو فوبیا پر قرارداد کی منظوری کو پاکستان کی کامیابی قرار دیا گیا، ارکان کا کہنا تھا کہ مسئلہ کشمیر اور اسلامو فوبیا پر قرارداد کامیاب خارجہ پالیسی کا مظہر ہے، وزیر اعظم نے توقع سے زائد امت مسلمہ کی ترجمانی کی، اور دنیا کے ہر فورم پر مقدس ہستیوں کے احترام پر زور دیا۔

وفاقی کابینہ نے انسداد منشیات سے متعلق خصوصی کمیٹی بھی تشکیل دے دی، جس میں اعظم سواتی، وزیر اعلیٰ کے پی، کور کمانڈر کے پی، ڈاکٹر فیصل سلطان شامل کیے گئے، وزیر اعظم نے انسداد منشیات کے حوالے سے اقدامات پر بھی بات کی، کہا ملک میں 68 لاکھ لوگوں کا منشیات استعمال کرنا قابل تشویش ہے۔ وفاقی کابینہ نے فیصلہ کیا کہ یہ کمیٹی ڈریپ کے ساتھ مل کر کام کرے گی۔

زلفی بخاری نے بھی بریفنگ دی، کہا کہ پاکستان کا مستقبل سیاحتی ترقی سے جڑا ہے، پی ٹی ڈی سی میں تربیت یافتہ لوگوں کی ضرورت ہے، تاہم وفاقی کابینہ نے ایم ڈی پی ٹی ڈی سی کی تقرری کا معاملہ مؤخر کر دیا۔