Tag: وزیر اعظم عمران خان

اسلام آباد: ملک میں کرونا کے اثرات کم ہوتے ہی سیاحتی انڈسٹری کو دوبارہ فروغ دینے کا فیصلہ کر لیا گیا۔

تفصیلات کے مطابق وزیر اعظم عمران خان نے سیاحت سے متعلق اعلی سطح اجلاس طلب کر لیا، یہ اجلاس آج شام وزیر اعظم ہاؤس میں ہوگا۔

ذرایع کا کہنا ہے کہ پنجاب، خیبر پختون خوا کے وزرائے اعلیٰ سمیت چیف سیکریٹریز اس اجلاس میں شریک ہوں گے، معاون خصوصی زلفی بخاری، وفاقی و صوبائی وزرا، گلگت بلتستان اور آزاد کشمیر کے چیف سیکریٹریز بھی اجلاس میں شرکت کریں گے۔

پی ٹی ڈی سی حکام نئی سیاحتی پالیسی پر بریفنگ دیں گے، صوبائی حکام بھی اپنے صوبوں کی سیاحتی پالیسی سے آگاہ کریں گے، ذرایع کا کہنا ہے کہ سیاحتی مقامات پر غیر قانونی تجاوزات کے خلاف کارروائی پر مشاورت ہوگی۔

آزاد کشمیر حکومت نے کرونا کے باعث 5 ماہ سے بند سیاحتی مقامات کو کھول دیا

اجلاس میں وفاق اور صوبوں میں سیاحت کے فروغ کی راہ میں حائل زیر التوا امور پر بھی غور ہوگا، اور سیاحت کے فروغ کے لیے قومی سطح کی حکمت عملی پر مشاورت کی جائے گی۔

یاد رہے کہ 11 اگست کو آزاد کشمیر کی حکومت کرونا کے باعث 5 ماہ سے بند سیاحتی مقامات کو کھول چکی ہے، جس کے بعد ایس او پیز کے تحت سیاحوں کو آنے کی اجازت مل گئی ہے، سیکریٹری سیاحت کے مطابق پہلے مرحلے میں فیملیز اور گروپ کی صورت میں آنے والے سیاحوں کو اجازت دی گئی ہے۔

اسلام آباد: وزیر اعظم عمران خان نے وفاقی وزیر برائے توانائی عمر ایوب کو خصوصی ہدایت کی ہے کہ آئی پی پیز معاہدوں کے بعد صارفین کو اس کے ممکنہ فوائد سے عوام کو آگاہ کیا جائے۔

تفصیلات کے مطابق وزیر اعظم عمران خان کی زیر صدارت پاور سیکٹر میں اصلاحات سے متعلق اجلاس کا اعلامیہ جاری کر دیا گیا ہے، جس میں کہا گیا ہے کہ اجلاس میں بجلی کے شعبے سے متعلق امور، اصلاحات اور تنظیم نو کے مجوزہ روڈ میپ پر تبادلہ خیال کیا گیا، گردشی قرضوں کے معاملے اور آئی پی پیز کے ساتھ بات چیت سمیت دیگر متعلقہ امور بھی زیر بحث آئے۔

اعلامیے کے مطابق اجلاس میں وزیر اعظم نے آئی پی پیز کے ساتھ معاہدوں میں باہمی اتفاق رائے سے ہونے والی تبدیلیوں میں پیش رفت کو سراہا۔

وزیر اعظم عمران خان نے اجلاس میں کہا کہ معاہدوں میں نظرثانی سے سرکلر ڈیٹ کو کم کرنے میں مدد ملے گی، بجلی کا شعبہ ملک کی معاشی نمو کو متاثر کر رہا تھا، صارفین پر موجودہ بوجھ کو کم کرنے کے لیے فوری طور پر بحالی اور اصلاحی عمل ضروری ہے۔

بجلی سستی کرنے پر توجہ مرکوز ہے، آئی پی پیز کے ساتھ معاہدے کر لیے: عمر ایوب

اجلاس میں وزیر اعظم نے پہلے سے منظور شدہ تنظیم نو کے روڈ میپ پر جلد عمل درآمد کی ہدایت کی، اور عمر ایوب سے کہا کہ عوام کو آئی پی پیز کے ساتھ معاہدوں کے بعد صارفین کو اس کے ممکنہ فوائد کے بارے میں آگاہ کریں۔

یاد رہے کہ آج وفاقی وزیر توانائی عمر ایوب نے میڈیا سے گفتگو کرتے ہوئے کہا تھا کہ حکومت کے آئی پی پیز کے ساتھ معاہدے طے پائے ہیں، اور وسیع تر ملکی مفاد میں ہم آہنگی کے ساتھ معاملات طے کیے گئے ہیں، ان نئے معاہدوں سے گردشی قرضوں میں کمی آئے گی اور صنعتوں کو فروغ ملے گا، انھوں نے کہا کہ پاور سیکٹر میں اصلاحات کے لیے حکومت کو 3 ہفتے درکار ہیں۔

اسلام آباد: وزیر اعظم عمران خان نے ترسیلات زر میں اضافے پر اطمینان کا اظہار کر دیا ہے۔

تفصیلات کے مطابق آج وزیر اعظم عمران خان کی زیر صدارت معاشی ٹیم کا اجلاس منعقد ہوا جس میں ترسیلات زر اور ملکی زر مبادلہ کے ذخائر میں اضافے پر غور کیا گیا۔

وزیر اعظم نے ترسیلات زر میں اضافے پر اظہار اطمینان کرتے ہوئے کہا بیرون ملک مقیم پاکستانی ملک و قوم کا قیمتی اثاثہ ہیں، بیرون ملک پاکستانیوں کو ہر ممکنہ سہولت فراہم کرنا ہماری ترجیح ہے۔

اجلاس میں مشیر خزانہ حفیظ شیخ، گورنر اسٹیٹ بینک رضا باقر، سیکریٹری خزانہ، چیئرمین ایف بی آر، شہزاد اکبر، عشرت حسین اور دیگر حکام بھی شریک ہوئے، اجلاس میں زر مبادلہ میں مزید اضافے کے لیے مجوزہ تجاویز و اقدامات پر بھی غور کیا گیا، جب کہ ترسیلات زر میں مزید اضافے کے لیے وزارتِ خزانہ، ایف بی آر اور اسٹیٹ بینک کو ٹاسک دیا گیا۔

ایک ماہ میں ملکی تاریخ کی بلند ترین ترسیلات زر موصول

وزیر اعظم نے اس موقع پر ہدایت کی کہ ترسیلات زر اور زر مبادلہ میں اضافے کے لیے مزید اقدامات تجویز کیے جائیں، تاکہ اندرون و بیرون ملک مقیم پاکستانیوں کی حوصلہ افزائی ہو اور اوورسیز پاکستانی ملکی معیشت کے استحکام میں بڑھ چڑھ کر حصہ لے سکیں۔

پاکستانی معیشت کیلئےایک اورخوشخبری: جولائی 2020 میں سمندرپارپاکستانیوں کیجانب سےبھجوائی جانےوالی ترسیلاتِ زر 2768 ملین ڈالرز تک پہنچ گئیں جوملکی تاریخ میں 1 ماہ میں بھجوایاجانےوالا سب سےزیادہ سرمایہ ہے۔یہ ترسیلاتِ زر جون 2020 کی نسبت 12.2%جبکہ جولائی 2019 کی نسبت 36.5% زیادہ ہیں۔

— Imran Khan (@ImranKhanPTI) August 17, 2020

واضح رہے کہ آج اسٹیٹ بینک آف پاکستان کی جانب سے کہا گیا ہے کہ جولائی کے مہینے میں ملکی تاریخ کی بلند ترین ترسیلات زر 2 ارب 76 کروڑ ڈالر موصول ہوئیں، یہ جون 2020 کی نسبت 12.2 فی صد جب کہ جولائی 2019 کی نسبت 36.5 فی صد زیادہ ہیں۔

اسلام آباد: وزیر اعظم عمران خان نے کاروباری برادری کی جانب سے بھرپور اعتماد پر اطمینان کا اظہار کیا ہے۔

تفصیلات کے مطابق وزیراعظم کی زیرصدارت مختلف ہاؤسنگ منصوبوں کی تعمیر سے متعلق جائزہ اجلاس ہوا جس میں حماد اظہر، علی زیدی، شیخ رشید، عاصم سلیم باجوہ، چیئرمین نیا پاکستان ہاؤسنگ اتھارٹی، متعلقہ وزارتوں کے سیکرٹریز اور معروف کاروباری شخصیت عارف حبیب نے شرکت کی۔

اجلاس میں بریفنگ کے دوران بتایا گیا کہ حکومتی پالیسیوں کی بدولت معاشی اعشاریوں میں بہتری آئی ہے،بہتر حکمت عملی کی بدولت کرونا نقصانات کو ہر ممکنہ حدتک روکاگیا۔

عارف حبیب نے مراعاتی پیکیج، سہولت کاری،آسان وآن لائن بنانے پر وزیر اعظم کاشکریہ ادا کرتے ہوئے کہا کہ تعمیرات کےشعبے میں مراعات،سہولت کاری سے کاروباری برادری کی حوصلہ افزائی ہوئی ہے۔

اجلاس میں بتایا گیا کہ پہلی دفعہ نجی بینکوں کی جانب سے تعمیرات کے شعبے کی حوصلہ افزائی کی جا رہی ہے۔عارف حبیب نے اپنی کمپنی کی جانب تعمیراتی منصوبے شروع کرنے کی یقین دہانی کرائی۔

اس موقع پر وزیراعظم عمران خان نے کاروباری برادری کی جانب سے بھرپور اعتماد پر اطمینان کا اظہار کرتے ہوئے کہا کہ تعمیرات، چھوٹے اور درمیانے درجے کی صنعتوں کا فروغ حکومت کی اولین ترجیح ہے۔

وزیراعظم کا کہنا تھا کہ ان شعبوں سے معاشی سرگرمیوں کو فروغ ملےگا،روزگارکے مواقع پیدا ہوں گے،حکومت کاروباری برادری کی سہولت کاری کے لیے ہر ممکنہ کوشش جاری رکھےگی۔