ARYNews.tv | Urdu – Har Lamha Bakhabar

Tag: وزیر اعظم عمران خان

  • وزیر اعظم کل زلزلے سے متاثرہ علاقوں کا دورہ کریں گے

    وزیر اعظم کل زلزلے سے متاثرہ علاقوں کا دورہ کریں گے

    میرپور: وزیر اعظم عمران خان کل میرپور آزاد کشمیر جا کر زلزلے سے متاثرہ علاقوں کا دورہ کریں گے۔

    تفصیلات کے مطابق وزیر اعظم عمران خان کل بذریعہ ہیلی کاپٹر زلزلہ متاثرہ علاقوں کا دورہ کریں گے، اور ڈویژنل ہیڈ کوارٹر اسپتال میں زلزلہ متاثرین سے ملیں گے۔

    آج چیئرمین این ڈی ایم اے لیفٹیننٹ جنرل محمد افضل نے میرپور آزاد کشمیر میں زلزلے سے متاثرہ علاقوں کا دورہ کیا۔

    چیئرمین این ڈی ایم اے نے کہا کہ زلزلے کے باعث 5 ہزار گھر بری طرح متاثر ہو چکے ہیں، سب سے زیادہ تباہی ساہنگ کے قریب گاؤں میں ہوئی۔

    یاد رہے کہ اسلام آباد اور پنجاب کے متعدد شہروں سمیت آزاد کشمیر میں منگل کی سہ پہر کو 5.8 کی شدت کا زلزلہ آیا تھا جس کے باعث 25 افراد جاں بحق جب کہ 452 افراد زخمی ہوئے۔

    یہ بھی پڑھیں:  آزاد کشمیر زلزلہ، قدرت کا معجزہ، تین روز بعد لڑکی زندہ سلامت ملبے سے برآمد

    زلزلے کے باعث آزاد کشمیر میں میرپور، بھمبر اور جاتلاں کے علاقے زیادہ متاثر ہوئے جہاں زلزلے نے زبردست تباہی پھیلائی، جہاں بڑی تعداد میں مکانات، عمارتیں اور دیواریں منہدم ہوئیں۔

    موصولہ اطلاعات کے مطابق آزاد کشمیر میں آیا زلزلہ اگرچہ درمیانی شدت کا تھا لیکن احتیاطی تدابیر نہ ہونے کے سبب شہریوں کو زیادہ جانی و مالی نقصان کا سامنا کرنا پڑا۔

    این ڈی ایم اے کے مطابق ضلع میرپور میں زلزلے کے باعث پندرہ سو سے زاید مکانات مکمل طور پر تباہ ہوئے جب کہ سات ہزار سے زیادہ کو جزوی نقصان پہنچا۔

    اس زلزلے میں میرپور کو جاتلاں سے ملانے والی مرکزی شاہراہ بھی شدید ٹوٹ پھوٹ کا شکار ہو گئی ہے، جگہ جگہ سڑک دھنس گئی، ایک پل کو بھی نقصان پہنچا۔

  • آئیں سب مل کر وزیر اعظم کا شان دار استقبال کریں: جہانگیر ترین کا ٹویٹ

    آئیں سب مل کر وزیر اعظم کا شان دار استقبال کریں: جہانگیر ترین کا ٹویٹ

    اسلام آباد: پاکستان تحریک انصاف کے سینئر رہنما جہانگیر ترین نے ٹویٹ کے ذریعے کہا ہے کہ وزیر اعظم عمران خان نے دلیرانہ انداز میں کشمیر کا مقدمہ لڑا۔

    تفصیلات کے مطابق وزیر اعظم عمران خان کی امریکا سے وطن واپسی پر جہانگیر ترین نے ٹویٹ کرتے ہوئے کہا ہے وزیر اعظم کام یاب دورۂ امریکا کے بعد کل اسلام آباد پہنچ رہے ہیں۔

    جہانگیر ترین نے کہا کہ آئیں ہم سب مل کر وزیر اعظم کا وطن واپسی پر شان دار استقبال کریں۔

    ٹویٹ میں انھوں نے لکھا کہ اقوام متحدہ میں وزیر اعظم کی تقریر نے عالمی سطح پر پاکستان کا تشخص بدل کر رکھ دیا۔

    واضح رہے کہ وزیر اعظم عمران خان نیویارک سے وطن واپسی کے لیے روانہ ہو چکے ہیں، وہ جدہ ایئرپورٹ پر اتریں گے، جہاں وہ تین گھنٹے قیام کریں گے، اور ان کا رائل ٹرمینل پر استقبال ہوگا۔

    یہ بھی پڑھیں:  وزیر اعظم عمران خان کا یو این جنرل اسمبلی سے خطاب

    وزیر اعظم نے اقوام متحدہ میں مقبوضہ کشمیر کا مقدمہ شان دار طریقے سے لڑ کر دنیا کو باور کرا دیا ہے کہ بھارت جموں و کشمیر میں لوگوں پر بے پناہ مظالم ڈھا رہا ہے اور دنیا کو اس صورت حال میں فوری ایکشن لینا چاہیے۔

    کشمیریوں کے مؤقف کی درست ترجمانی کرنے، گزشتہ روز اقوام متحدہ کی جنرل اسمبلی میں وزیر اعظم عمران خان کے خطاب پر مقبوضہ کشمیر میں جشن بھی منایا گیا۔

  • وزیر اعظم عمران خان نے چمن دھماکے کی شدید مذمت کر دی

    وزیر اعظم عمران خان نے چمن دھماکے کی شدید مذمت کر دی

    نیویارک: وزیر اعظم عمران خان نے چمن دھماکے کی شدید مذمت کرتے ہوئے دھماکے میں مولانا محمد حنیف سمیت قیمتی جانوں کے ضیاع پر اظہار افسوس کیا۔

    تفصیلات کے مطابق وزیر اعظم عمران خان کو نیویارک میں چمن دھماکے کی خبر دی گئی، انھوں نے واقعے کی مذمت کرتے ہوئے غم زدہ خاندانوں سے اظہار تعزیت کیا اور صبر جمیل کی دعا۔

    وزیر اعظم عمران خان نے زخمیوں کو بہترین طبی امداد فراہمی کی ہدایت بھی کی۔

    خیال رہے کہ وزیر اعظم امریکا سے جدہ کے لیے روانہ ہو چکے ہیں، جہاں تین گھنٹے قیام کے بعد وہ وطن لوٹیں گے۔

    تازہ ترین:  چمن دھماکا، جے یو آئی کے رہنما مولانا محمد حنیف سمیت 3 افراد جاں‌ بحق

    آج صوبہ بلوچستان کے شہر چمن میں تاج روڈ پر جمیعت علمائے اسلام (ف) کے رہنما مولانا محمد حنیف کے قافلے پر دھماکا کیا گیا، جس کے نتیجے میں مولانا محمد حنیف سمیت 3 افراد جاں بحق اور 9 زخمی ہوئے۔

    پولیس کے مطابق دھماکا خیز مواد موٹر سائیکل میں نصب تھا، دھماکے سے قریبی عمارتوں کے شیشے بھی ٹوٹ گئے۔

    وزیر داخلہ اعجاز شاہ نے کہا کہ چمن دھماکا سیکورٹی اداروں کے عزم اور حوصلے کو پست کرنے کی بزدلانہ کوشش ہے، حملے میں ملوث عناصر کو کیفر کردار تک پہنچائیں گے۔

    انھوں نے کہا ملک دشمن عناصر خوف زدہ ہیں کہ چمن میں معمولاتِ زندگی بہتر ہو رہے ہیں، ہم تجارت سے لے کر بارڈر سیکورٹی کا کام یقینی بنائیں گے۔

  • وزیر اعظم کے خطاب پر مقبوضہ کشمیر میں جشن، عوام کرفیو توڑ کر نکل آئے

    وزیر اعظم کے خطاب پر مقبوضہ کشمیر میں جشن، عوام کرفیو توڑ کر نکل آئے

    اسلام آباد: کشمیریوں کے مؤقف کی درست ترجمانی کرنے پر گزشتہ روز اقوام متحدہ کی جنرل اسمبلی میں وزیر اعظم عمران خان کے خطاب پر مقبوضہ کشمیر میں جشن منایا گیا۔

    تفصیلات کے مطابق گزشتہ روز وزیر اعظم عمران خان کی تقریر ختم ہوتے ہی مقبوضہ کشمیر میں عوام کرفیو توڑ کر باہر نکل آئے اور انھوں نے جشن منایا۔

    بھارتی فوج اور پولیس کے ہاتھوں پچاس دنوں سے زیادہ اپنے گھروں میں محبوس کشمیری عوام نے خوب آتش بازی کی اور انڈیا کے خلاف پر جوش نعرے لگائے۔

    ادھر بھارتی فوج نے جشن کے بعد مقبوضہ کشمیر میں پہرا سخت کر دیا ہے۔

    کشمیر میڈیا سروس کے مطابق گزشتہ روز وزیر اعظم عمران خان کی تقریر جیسے ہی ختم ہوئی، کرفیو اور سخت سیکورٹی کے باوجود مقبوضہ کشمیر کے مختلف علاقوں میں کشمیری گھروں سے نکل آئے اور جشن منایا۔

    یہ بھی پڑھیں:  اقوام متحدہ کو کشمیریوں کو حق خود ارادیت دلانا پڑے گا: عمران خان

    واضح رہے کہ بھارتی فوج نے مقبوضہ کشمیر میں 5 اگست سے کرفیو نافذ کر رکھا ہے جس کے باعث کشمیری اپنے گھروں میں محبوس ہیں، وادی میں 56 روز سے انٹرنیٹ، موبائل سروس اور کاروبار بند ہیں، ہزاروں کشمیری گرفتار کیے جا چکے ہیں۔

    یاد رہے گزشتہ روز جنرل اسمبلی سے خطاب میں عمران خان نے مقبوضہ کشمیر کا مقدمہ بھرپور طریقے سے پیش کیا، اور دنیا کو واضح پیغام دیا کہ بھارتی فوج کی جانب سے وادی میں ظلم و بربریت کا بازار گرم کیا گیا ہے۔

    وزیر اعظم نے کہا مودی کو اس کے غرور نے اندھا کر دیا ہے، کرفیو اٹھنے کے بعد کشمیر میں خون کی ندیاں بہیں گی، اقوام متحدہ کو کشمیریوں کو حق خود ارادیت دلانا پڑے گا۔

  • وزیراعظم پانچ ترقیاتی منصوبوں کا افتتاح کرنے جلد کراچی آئیں گے، گورنرسندھ

    وزیراعظم پانچ ترقیاتی منصوبوں کا افتتاح کرنے جلد کراچی آئیں گے، گورنرسندھ

    کراچی: گورنرسندھ عمران اسمعیل کا کہنا ہے کہ وزیر اعظم عمران خان جلد ہی پانچ ترقیاتی منصوبوں کا افتتاح کرنے کراچی آئیں گے، کچرے کی صفائی ایک دن کا کام نہیں روز ہونا چاہیے۔

    تفصیلات کے مطابق گورنرسندھ عمران اسمعیل ڈاؤ یونیورسٹی آف ہیلتھ سائنسز میں عالمی یومِ امراضِ قلب کے حوالے سے شروع ہونیوالی آگہی مہم میں سیمنار سے خطاب اور میڈیا کے سوالوں کے جواب دے رہے تھے، اس موقع پر ڈاؤ یونیورسٹی کے وائس چانسلر پروفیسر محمد سعید قریشی، ڈاؤ یونیورسٹی کے رجسٹرار پروفیسر امان اللہ عباسی، پرنسپل ڈاؤ میڈیکل کالج پروفیسر امجد سراج میمن، ڈائریکٹر اسپورٹس پروفیسر مکرم علی، پروفیسر شجاع فرخ، پروفیسر نصرت شاہ سمیت سینئر فیکلٹی ممبرزٍ اور طلبہ کی بڑی تعداد موجود تھی۔

    اس موقع پر گورنر سندھ نے کہا کہ پہلے مرحلے میں سندھ کے پانچ اضلاع میں صحت کارڈ دینے کا اغاز کیا جائے گا، تھر سے صحت کارڈ دینے کا آغاز کیا جائے گا۔ ایک سوال کے جواب میں انہوں نے کہا کہ مراد علی شاہ نے شہر میں کچرا اٹھانے کی مہم شروع کی ہے، یہ اچھی بات ہے، مگر یہ کام مستقل بنیادوں پر کرنے کی ضرورت ہے، اور مستقل طورپر کچرا اٹھانے کا کام ساری دینا میں میئر کی ذمے داری ہوتی ہے، یہاں بھی ذمہ داری میئر کو ہی دی جانی چاہیے۔

    ایک اور سوال کے جواب میں انہوں کہا کہ وزیرِ اعظم عمران خان تین فلائی اوورز ،گرین لائن کے متوازی دوسرے منصوبے، لیاری اور ماری پور کے 2ترقیاتی منصوبوں سمیت 5منصوبوں کا افتتاح کرنے جلد کراچی آئیں گے، اس سلسلے میں ان سے وقت مانگا ہے، ایک اور سوال کے جواب میں انہوں نے کہا کہ جامعات ہی نہیں ملک بھر میں مجموعی طور پر گرانٹس میں مالی کٹوتی کی گئی ہے۔

    قبل ازیں آگہی سیمینار سے خطاب کرتے ہوئے گورنر سندھ نے کہا کہ دل کا کام صرف جسم کو خون کی فراہمی نہیں بلکہ یہ جسم کی رہنمائی بھی کرتا ہے، دل کے فیصلے سچائی پر مبنی ہوتے ہیں، اور اپنے بھائیوں کی مشکلات پر دل دکھتا اور دل روتا بھی ہے، انہو ں کہا کہ چھوٹے دل والے چھوٹی بات کرتے ہیں اور بڑے دل والے بڑی بات کرتے ہیں، دل کی سچائی ہی انسان کو بہادر بناتی ہے، یہی وجہ ہے کہ عمران خان امریکا میں بیٹھ کر بہادری کے ساتھ کشمیر کا مقدمہ لڑ رہے ہیں۔

    گورنر سندھ نے کہا کہ پاکستان میں دل کی بیماریاں بڑھ رہی ہیں، ڈاؤ یونیورسٹی کی جانب سے آگہی مہم کا آغاز خوش آئند ہے ابھی سیمینار میں پروفیسر محمد سعید قریشی اور دیگر ماہرین نے بتایا کہ دل کی بیماریوں کی روک تھام کے لیے ہمیں اپنا لائف اسٹائل تبدیل کرنا ہوگا۔

    اس تقریب کے موقع پر گورنر سندھ عمران اسمعیل نے ڈاؤ میڈیکل کالج میں درخت بھی لگایا اور تقریبات کا آغاز کرنے کے لیے کیک بھی کاٹا، تقریب کے آخر میں گورنر سندھ کو وائس چانسلر پروفیسر محمد سعید قریشی نے اجرک اور ٹوپی بھی پیش کی۔

  • اسلاموفوبیا کے مقابلے کے لیے ترکی، ملائیشیا اور پاکستان کا انگریزی چینل کھولنے کا فیصلہ

    اسلاموفوبیا کے مقابلے کے لیے ترکی، ملائیشیا اور پاکستان کا انگریزی چینل کھولنے کا فیصلہ

    اسلام آباد: وزیر اعظم عمران خان نے ٹویٹ کے ذریعے کہا ہے کہ ترکی، ملائیشیا اور پاکستان مشترکہ طور پر انگریزی چینل کھولیں گے۔

    تفصیلات کے مطابق وزیر اعظم عمران خان نے ٹویٹر اکاؤنٹ پر لکھا کہ آج ان کی رجب طیب اردوان اور مہاتیر محمد سے اہم ملاقات ہوئی ہے جس میں انھوں نے فیصلہ کیا ہے کہ مشترکہ طور پر ایک انگریزی چینل شروع کیا جائے گا۔

    وزیر اعظم نے کہا انگریزی زبان کے چینل کا مقصد اسلامو فوبیا کا مقابلہ کرنا ہے، اور دنیا کو اسلام کے بارے میں آگاہی دینا ہے، چینل کا مقصد عظیم مذہب اسلام کے بارے میں غلط تاثر کا خاتمہ ہے۔

    انھوں نے کہا ایسی تمام غلط فہمیوں کا ازالہ کیا جائے گا جو لوگوں کو مسلمانوں کے خلاف یک جا کرتی ہیں۔

    انھوں نے ٹویٹ میں لکھا کہ اس چینل کے ذریعے مسلمانوں کے بارے میں غلط تاثرات ٹھیک کیے جائیں گے۔

    وزیر اعظم کا کہنا تھا چینل کے ذریعے توہین رسالت کے معاملے پر دنیا کو آگاہی، مسلمانوں کی تاریخ پر مبنی فلموں کے ذریعے دنیا کو تعلیم دی جائے گی۔

    تازہ ترین:  مسلمانوں کے خلاف نفرت انگیز بیانیے کا ازالہ ضروری ہے: عمران خان

    انھوں نے لکھا چینل کے ذریعے مسلمانوں کو میڈیا پر مکمل نمایندگی ملے گی۔

    واضح رہے آج پاکستان، ملائیشیا اور ترکی نے مشترکہ طور پر اقوام متحدہ ہیڈ کوارٹرز میں ’نفرت انگیز تقاریر‘ کی روک تھام کے سلسلے میں ایک اہم کانفرنس کا انعقاد کیا تھا۔

    کانفرنس سے خطاب میں وزیر اعظم عمران خان نے کہا مذہب کا دہشت گردی سے کوئی تعلق نہیں ہے، مذہبی دہشت گردی کے پیچھے حقیقت کی بہ جائے سیاست ہے، مسلمانوں کے خلاف نفرت انگیز بیانیے کا ازالہ کیا جانا ضروری ہے۔

  • وزیر اعظم عمران خان کی ملائیشین ہم منصب مہاتیر محمد سے اہم ملاقات

    وزیر اعظم عمران خان کی ملائیشین ہم منصب مہاتیر محمد سے اہم ملاقات

    نیویارک: وزیر اعظم عمران خان نے ملائیشین ہم منصب مہاتیر محمد سے اہم ملاقات کی، جس میں مقبوضہ کشمیر، باہمی دل چسپی اور دیگر امور پر تبادلہ خیال کیا گیا۔

    تفصیلات کے مطابق نیو یارک میں ملائیشیا کے ہم منصب ڈاکٹر مہاتیر محمد سے وزیر اعظم عمران خان نے اہم ملاقات کی، مقبوضہ کشمیر کی صورت حال پر آواز اٹھانے پر عمران خان نے مہاتیر محمد کا شکریہ ادا کیا۔

    دونوں رہنماؤں نے ملاقات میں پاکستان اور ملائیشیا کے باہمی تعلقات بڑھانے پر اتفاق کیا۔

    قبل ازیں، پاکستان، ملائیشیا اور ترک سربراہان نے سہ فریقی اجلاس میں شرکت کی، تینوں ملکوں نے خطے کی تیزی سے بدلتی صورت حال اور عالمی تبدیلیوں پر بات چیت پر اتفاق کیا۔

    تازہ ترین:  مسلمانوں کے خلاف نفرت انگیز بیانیے کا ازالہ کیا جانا ضروری ہے: عمران خان

    رہنماؤں نے باہمی شراکت داری کو مزید مضبوط بنانے اور مختلف شعبوں میں تعاون بڑھانے پر تبادلۂ خیال کیا۔

    پاکستان، ملائیشیا اور ترکی نے مشترکہ طور پر اقوام متحدہ ہیڈ کوارٹرز میں ’نفرت انگیز تقاریر‘ کی روک تھام کے سلسلے میں کانفرنس کا بھی انعقاد کیا۔

    کانفرنس سے خطاب میں وزیر اعظم عمران خان نے کہا مذہب کا دہشت گردی سے کوئی تعلق نہیں ہے، مذہبی دہشت گردی کے پیچھے حقیقت کی بہ جائے سیاست ہے، مسلمانوں کے خلاف نفرت انگیز بیانیے کا ازالہ کیا جانا ضروری ہے۔

    انھوں نے نیویارک ٹائمز کے ایڈیٹوریل بورڈ سے ملاقات میں کہا کہ وہ دنیا کو یہ باور کرانے آئے ہیں کہ بھارت عالمی قوانین کی خلاف ورزی کر رہا ہے۔

  • جنرل اسمبلی اجلاس کے دوران وزیر اعظم عمران خان کی مقبولیت عروج پر

    جنرل اسمبلی اجلاس کے دوران وزیر اعظم عمران خان کی مقبولیت عروج پر

    نیویارک: اقوام متحدہ کی جنرل اسمبلی اجلاس کے دوران وزیر اعظم عمران خان کی مقبولیت عروج پر پہنچ گئی ہے، وہ یو این لیڈرز میں دوسرے نمبر پر رہے۔

    تفصیلات کے مطابق اقوام متحدہ جنرل اسمبلی اجلاس کے موقع پر گوگل سرچ میں عمران خان دوسرے نمبر پر رہے، گوگل سرچ میں امریکی صدر ڈونلڈ ٹرمپ کے بعد سب سے زیادہ عمران خان کو سرچ کیا گیا۔

    عمران خان کی مقبولیت کا اندازہ اس بات سے بھی لگایا جا سکتا ہے کہ ان کی امریکی صدر کے ساتھ مشترکہ پریس کانفرنس کے موقع پر ٹرمپ نے صحافیوں سے کہا کہ یہ وہ لیڈر ہیں جن سے میں خود ملنا چاہتا تھا حالاں کہ دنیا کے کئی رہنما مجھ سے ملنا چاہتے ہیں۔

    وزیر اعظم عمران خان نے اقوام متحدہ میں عالمی رہنماؤں سے ملاقاتوں میں مقبوضہ کشمیر سے متعلق پاکستانی مؤقف کو بھرپور طریقے سے پیش کیا۔

    تازہ ترین:  مذہب کا دہشت گردی سے کوئی تعلق نہیں ہے: وزیر اعظم عمران خان

    انھوں نے دنیا پر واضح کیا کہ مقبوضہ کشمیر جو پچاس دنوں سے جیل بن چکا ہے، بھارتی اقدامات کے باعث ایک المیے کی صورت اختیار کرتا جا رہا ہے۔

    عمران خان نے نفرت انگیز تقاریر کی روک تھام کے سلسلے میں منعقدہ کانفرنس میں بھی پاکستان اور اسلام کے تناظر میں واضح اور مضبوط مؤقف اپنایا اور پرزور الفاظ میں کہا کہ مذہب اور دہشت گردی کا آپس میں کوئی تعلق نہیں ہے۔

    واضح رہے کہ وزیر اعظم عمران خان 27 ستمبر کو اقوام متحدہ کی جنرل اسمبلی سے خطاب کریں گے، اپنے خطاب میں وہ مقبوضہ کشمیر میں بھارتی بربریت کے معاملے کو اٹھائیں گے۔

  • مسلمانوں کے خلاف نفرت انگیز بیانیے کا ازالہ کیا جانا ضروری ہے: عمران خان

    مسلمانوں کے خلاف نفرت انگیز بیانیے کا ازالہ کیا جانا ضروری ہے: عمران خان

    نیویارک: وزیر اعظم عمران خان نے کہا ہے کہ مذہب کا دہشت گردی سے کوئی تعلق نہیں ہے، مذہبی دہشت گردی کے پیچھے حقیقت کی بہ جائے سیاست ہے، مسلمانوں کے خلاف نفرت انگیز بیانیے کا ازالہ کیا جانا ضروری ہے۔

    تفصیلات کے مطابق اقوام متحدہ ہیڈ کوارٹرز میں ’نفرت انگیز تقاریر‘ کی روک تھام کے سلسلے میں کانفرنس کا انعقاد کیا گیا، اس کانفرنس کا اہتمام پاکستان، ملائیشیا اور ترکی کی جانب سے مشترکہ طور پر کیا گیا، ترک صدر رجب طیب اردوان بھی کانفرنس میں شریک ہوئے۔

    وزیر اعظم نے اسلامو فوبیا پر خصوصی بات کی، کہا مغربی دنیا میں اسلامی فوبیا سے متعلق بہت کچھ دیکھا، اسلامی دہشت گردی اور انتہا پسندی کے نعرے مغربی دنیا کے رہنماؤں نے گھڑے، اس کا غلط تاثر لیا جاتا ہے، اسلام کو سب سے زیادہ نقصان نائن الیون کے بعد دہشت گردی سے جوڑنے پر پہنچا۔

    تازہ ترین:  دہشت گردی اور اسلحے کے پھیلاؤ کو روکنا ضروری ہے: سیکریٹری جنرل اقوام متحدہ

    انھوں نے مزید کہا عالمی رہنماؤں تک نے اسلام کو دہشت گردی سے جوڑا، مذہبی دہشت گردی کے پیچھے حقیقت کے بجائے سیاست ہے، کوئی ہندو ازم میں خود کش حملے پر بات نہیں کرتا، تمل ٹائیگرز کے اور دوسری جنگ عظیم میں جہازوں پر حملوں کو کسی نے مذہب سے نہیں جوڑا، دنیا کی ہر دہشت گردی کا تعلق سیاست سے ہے۔

    عمران خان نے کہا نائن الیون سے پہلے 75 فی صد خود کش حملے تمل ٹائیگرز نے کیے جو ہندو تھے، نیویارک میں بیٹھ کر کوئی کیسے بتا سکتا ہے کہ کون انتہا پسند کون معتدل ہے، مغرب میں خود کش حملہ ہو تو مسلمان پریشان ہو جاتے ہیں کہ کہیں یہ مسلم نہ ہو، نائن الیون کے بعد امریکی صحافی نے فون کر کے کہا تمہیں شرم نہیں آتی، جواب دیا دنیا میں کوئی مسلمان غلط کام کرے تو سب مسلمانوں کا اس سے کیا تعلق۔

    وزیر اعظم عمران خان نے کہا توہین رسالت پر مسلمانوں کو تکلیف ہوگی کیوں کہ حضورﷺ مسلمانوں کے دلوں میں زندہ ہیں، اللہ کے رسولﷺ ہمارے دلوں میں رہتے ہیں، کوئی توہین کرے تو ہمارے دلوں میں درد ہوتا ہے، یورپی معاشرے مذہب کو ایسے نہیں دیکھتے جیسے ہم دیکھتے ہیں۔

    انھوں نے کہا ہولو کاسٹ پر یہودیوں کے احساسات کا خیال رکھا جاتا ہے، توہین رسالت سے متعلق بھی مسلمانوں کے احساسات کا خیال رکھا جائے، ہر کچھ دن بعد یورپ یا امریکا میں کوئی توہین آمیز کام ہو جاتا ہے، مسلمان رد عمل دیں تو کہتے ہیں یہ کیسا انتہا پسند اسلام ہے، میں جنرل اسمبلی سے خطاب میں توہین رسالت کا معاملہ بھی اٹھاؤں گا۔

  • وزیر اعظم عمران خان آج مہاتیر محمد اور بل گیٹس سے ملاقات کریں گے

    وزیر اعظم عمران خان آج مہاتیر محمد اور بل گیٹس سے ملاقات کریں گے

    نیویارک : وزیر اعظم عمران خان آج ملائیشیا کے ہم منصب مہاتیر محمد اور مائیکروسافٹ کے بانی بل گیٹس سے ملاقات کریں گے اور پاکستان، ترکی اور ملائیشیا کے درمیان سہ فریقی کانفرنس میں شرکت کریں گے۔

    تفصیلات کے مطابق وزیراعظم عمران خان کی آج اقوام متحدہ میں مصروفیات کا شیڈول جاری کردیا گیا ، شیڈول کے مطابق وزیراعظم عمران خان اقوام متحدہ کی جنرل اسمبلی اجلاس میں شرکت کریں گے اور نفرت انگیز مواد کی روک تھام سے متعلق کانفرنس سے خطاب کریں گے۔

    نیو یارک ٹائمز کے ایڈیٹوریل بورڈ سے ملاقات بھی وزیراعظم کے شیڈول میں شامل ہیں ، عمران خان پاکستان، ترکی اور ملائیشیا کے درمیان سہ فریقی کانفرنس میں شرکت کریں گے اور ملائیشیا کے ہم منصب مہاتیر محمد سے بھی ملاقات کریں گے۔

    وزیراعظم کی آج سب سے اہم ملاقات مائیکروسافٹ کے بانی بل گیٹس سے ہوگی جبکہ ناروے کے ہم منصب اور پاکستانی ٹیکنالوجی گروپ کے وفد سے ملاقات  بھی وزیراعظم کے شیڈول کا حصہ ہیں۔

    یاد رہے گذشتہ روز وزیر اعظم عمران خان نے ایرانی صدر حسن روحانی ،  ترک صدر رجب طیب اردوان اور  نیوزی لینڈ کی وزیر اعظم جاسنڈا آرڈن سے ملاقاتیں کیں تھیں ۔

    مزید پڑھیں :  وزیر اعظم عمران خان سے طیب اردوان اور حسن روحانی کی ملاقات

    ترک صدر اردوان اور عمران خان ملاقات میں تزویراتی معاشی لائحہ عمل پر تبادلہ خیال کیا گیا، وزیر اعظم نے ترک صدر کو مقبوضہ کشمیر کی سنگین صورت حال سے  آگاہ کیا جبکہ  ایرانی صدر حسن روحانی سے ملاقات میں دو طرفہ تعلقات اور علاقائی صورت حال پر تبادلہ خیال کیا تھا۔

    عمران خان اور جاسنڈا آرڈن کے مطابق اسلاموفوبیا اور مسلمان مخالف جذبات سےمتعلق چیلنجز پر تبادلہ خیال ہوا تھا ، اس موقع پر وزیراعظم نےمقبوضہ وادی میں کشمیریوں کی نسل کشی سےبھی آگاہ کرتے ہوئے کہا تھا کہ مقبوضہ کشمیرسےکرفیو اٹھنے کے بعد شدید بحران جنم لے گا۔

    خیال رہے وزیراعظم عمران خان 27 ستمبر کو جنرل اسمبلی اجلاس سے خطاب کریں گے  اور 27 ستمبر کوہی نیویارک میں پریس کانفرنس بھی کریں گے۔