Tag: وزیر اعظم عمران خان

اسلام آباد: وزیر اعظم عمران خان نے وفاقی اور صوبائی محکموں کو اقتصادی زونز کے قیام کا عمل مکمل کرنے کی ہدایت کرتے ہوئے کہا ہے کہ اس میں حائل رکاوٹیں دور کرنے کے لیے باہمی رابطوں اور تعاون کو فروغ دیا جائے۔

تفصیلات کے مطابق آج وزیر اعظم کی زیر صدارت اقتصادی زونز کے قیام سے متعلق اجلاس منعقد ہوا جس میں پنجاب اور خیبر پختون خوا میں قایم اقتصادی زونز کی پیش رفت کا جائزہ لیا گیا اور وزیر اعظم کو دونوں صوبوں میں قایم اقتصادی زونز پر تفصیلی بریفنگ دی گئی۔

اجلاس میں وزیر اعلیٰ پنجاب عثمان بزدار، وزیر اعلیٰ کے پی کے محمود خان، عمر ایوب، عبد الرزاق داؤد، فردوس عاشق اعوان، چیئرمین سرمایہ کاری بورڈ، صوبائی وزیر صنعت اور دیگر افسران نے شرکت کی۔

وزیر اعظم نے ہدایت کی کہ مشیر تجارت آلات اور مشینری پر ٹیکس چھوٹ کی رپورٹ فراہم کریں۔ انھوں نے کہا کہ کاروباری برادری کے لیے آسانیاں پیدا کرنا حکومت کی ترجیح ہے، اقتصادی زونز کی تکمیل سے کاروباری برادری کو روزگار ملے گا۔

قبل ازیں، اجلاس میں وزیر اعظم کو بریفنگ دیتے ہوئے کہا گیا کہ علامہ اقبال انڈسٹریل سٹی فیصل آباد منصوبہ دسمبر تک مکمل کیا جائے گا، قائداعظم اپیرل پارک اور بہاولپور انڈسٹریل اسٹیٹ مارچ 2020 تک مکمل ہوگا، رشکئی اقتصادی زون کی تکمیل کا کام اگلے سال جون تک مکمل ہوگا۔

اجلاس میں چھوٹے اور درمیانے کاروبار (ایس ایم ایز) کے لیے کاٹیج بزنس ریذیڈنٹ پارکس کے قیام کی تجویز دی گئی، بریفنگ میں کہا گیا کہ منصوبے کا پہلا مرحلہ پنجاب کے 10 اضلاع سے شروع ہوگا، بتدریج اضافہ کر کے اس منصوبے کا دائرہ کار دیگر اضلاع تک بڑھایا جائے گا۔

بریفنگ میں کہا گیا کہ اس منصوبے سے مختلف شہروں کی مخصوص صنعتوں کو فرو غ حاصل ہوگا، خواتین کو اپنی ہی چھت تلے کاروبار کے مواقع میسر آئیں گے۔

دریں اثنا، وزیر اعظم کو پنجاب میں ہیلتھ سٹی کے قیام پر بھی تفصیلی بریفنگ دی گئی، وزیر اعظم نے اسپتالوں میں استعمال درآمد آلات پر ٹیکس چھوٹ کی تفصیلات طلب کر لیں۔

اسلام آباد: وزیر اعظم عمران خان سے وزیر اعلیٰ پنجاب عثمان بزدار نے ملاقات کی ہے، جس میں پنجاب حکومت سے متعلق اہم امور پر تبادلۂ خیال کیا گیا۔

تفصیلات کے مطابق پنجاب کے وزیر اعلیٰ عثمان بزدار نے آج وزیر اعظم ہاؤس میں وزیر اعظم سے ملاقات کی اور انھیں صوبے میں پولیس اصلاحات سے متعلق اقدامات سے آگاہ کیا۔

موصولہ اطلاعات کے مطابق وزیر اعظم عمران خان پنجاب میں پولیس کی کارکردگی سے سخت ناخوش تھے، جس پر انھوں نے وزیر اعلیٰ کو اسلام آباد طلب کیا تھا۔

وزیر اعلیٰ نے اس سلسلے میں پنجاب پولیس ریفارمز کے معاملے پر وزیراعظم کو ون آن ون ملاقات میں بریفنگ دی۔

یہ بھی پڑھیں:  وزیراعظم پنجاب پولیس کی کارکردگی سے ناخوش ، وزیراعلیٰ پنجاب کواسلام آباد طلب کرلیا

ذرایع کا کہنا ہے کہ وزیر اعظم نے پنجاب میں پولیس گردی کے واقعات پر شدید ناراضگی اور تشویش کا اظہار کیا تھا۔

یاد رہے پنجاب میں 8 ماہ میں پولیس کی حراست میں 17 ملزمان کی ہلاکتوں کا انکشاف ہوا تھا ، ذرایع کے مطابق 14 ہلاکتوں پر 84 پولیس افسران و اہل کاروں کے خلاف مقدمات درج ہوئے ہیں، پنجاب پولیس ناقص کارکردگی کو بچانے کے لیے واقعات کو دبانے پر مصروف عمل ہے۔

آج وزیر اعلیٰ پنجاب کے ترجمان شہباز گل نے کہا ہے کہ پولیس تشدد اور ٹارچر کے لیے نہیں عوام کی خدمت کے لیے ہے، پنجاب پولیس میں کچھ اصلاحات فوری اور کچھ لانگ ٹرم میں لائیں گے، آیندہ کبھی ٹارچرسیل ملا تو ڈی ایس پی اور ڈی پی او پر مقدمہ ہوگا۔

اسلام آباد : وزیراعظم عمران خان کے مظفر آباد جلسہ کے شیڈول کو حتمی شکل دے دی گئی، مظفر آباد میں جلسہ 13 ستمبر کو نماز جمعہ کے بعد شروع ہوگا اور وزیراعظم جمعہ کو دوپہر 3 بجے کے بعد مظفرآباد جلسے سے خطاب کریں گے۔

تفصیلات کے مطابق وزیر اعظم عمران خان نے مظفر آباد جلسے سے متعلق پارٹی رہنماؤں سے مشاورت شروع کردی ہے اور جلسہ گاہ ، ریلیوں کی آمد، جلسے کیلئے سیکیورٹی انتظامات پر تبادلہ خیال کیا گیا۔

مظفر آباد جلسہ کے شیڈول کو حتمی شکل دیدی گئی ، جس کے مطابق مظفر آبادمیں جلسہ13 ستمبر کونماز جمعہ کےبعدشروع ہوگا ، وزیر اعظم عمران خان نماز جمعہ سے قبل مظفر آبادروانہ ہوں گے اور جمعہ کو دوپہر 3 بجے کے بعد مظفرآباد جلسے سے خطاب کریں گے۔

مظفرآبادجلسےسے آزاد کشمیر کےرہنمابھی خطاب کریں گے جبکہ مانسہرہ سمیت  مختلف شہروں سے قافلے مظفر آباد پہنچیں گے۔

مزید پڑھیں : وزیراعظم عمران خان کا 13 ستمبر کو مظفرآباد میں بڑا جلسہ کرنے کا اعلان

یاد رہے وزیراعظم عمران خان نے سماجی رابطے کی ویب سائٹ ٹویٹر پر 13 ستمبر کو آزاد کشمیر کے دارالحکومت مظفرآباد میں بڑا جلسہ کرنے کا اعلان کیا تھا اور کہا تھا کہ دنیا کو بتاؤں گا کہ وادی کشمیر پر بھارتی فوج کا قبضہ ہے، کشمیروں کو یقین دلاؤں گا کہ پاکستان ان کے ساتھ کھڑا ہے۔

خیال رہے کہ 6 ستمبر کو وزیراعظم عمران خان اور آرمی چیف جنرل قمر جاوید باجوہ نے لائن آف کنٹرول کا دورہ کیا تھا اور وزیراعظم عمران خان نے اس عزم کا اعادہ کیا تھا کہ پاکستان حق خود ارادیت دلانے کے لیے کشمیریوں کے ساتھ کھڑا ہے۔

وزیراعظم عمران خان کا کہنا تھا کہ بھارت کی جانب سے آزاد جموں وکشمیر کے نہتے شہریوں کو جان بوجھ کر نشانہ بنانا اور مقبوضہ کشمیر میں طویل محاصرہ انسانی حقوق کی خلاف ورزیوں کی بدترین مثال ہے، ہماری افواج کسی بھی بھارتی مہم جوئی کا منہ توڑ جواب دینے کے لیے پوری طرح تیار ہیں۔

اسلام آباد: چیئرمین ایف بی آر نے وزیر اعظم کو ایک سال کی کارکردگی پر بریفنگ دیتے ہوئے کہا ہے کہ رواں مالی سال میں اگست تک 579 ارب ریونیو اکٹھا کیا جا چکا ہے، جو پچھلے سال کے مقابلے میں 14.65 فی صد زائد ہے۔

تفصیلات کے مطابق وزیر اعظم عمران خان کی زیر صدارت ایف بی آر اصلاحات سے متعلق اجلاس منعقد ہوا جس میں ایف بی آر کی کارکردگی اور اب تک ہونے والی اصلاحات کا جائزہ لیا گیا۔

چیئرمین ایف بی آر نے بتایا کہ رواں سال فائلرز کی تعداد میں 7 لاکھ 83 ہزار افراد کا اضافہ ہوا، 2017 میں یہ تعداد 1514817 تھی جواب 2561099 ہو گئی، ڈومیسٹک ٹیکس کلیکشن میں 28 فی صد اضافہ ریکارڈ ہوا۔

بریفنگ میں چیئرمین نے کہا کہ ایف بی آر اہل کاروں سے شخصی رابطہ قائم کرنے کی ضرورت ختم کی جا رہی ہے، اور رجسٹریشن، ٹیکس سرٹیفکیٹ اجرا، ٹیکس ریٹرن جمع کرانے کے معاملات کو کمپیوٹرائزڈ کیا جا رہا ہے، آڈٹ سمیت دیگر مراحل کو بھی کمپیوٹرائزڈ کیا جا رہا ہے۔

چیئرمین نے کہا کہ نادرا کی شراکت سے ’سہولت‘ ویب پورٹل کا اجرا کر دیا گیا ہے، ایف بی آر کو موصول مالی تفصیلات آن لائن دستیاب ہوں گی، شکایات کے ازالے کے لیے آن لائن نظام کو مزید مؤثر بنایا جا چکا ہے۔

انھوں نے بتایا کہ گزشتہ سالوں سے زیر التوا 16 ارب روپے ری فنڈز واپس کیے جا چکے ہیں، دکان داروں اور ریٹیلرز کے لیے ٹیکس سسٹم کو مزید آسان بنایا جا رہا ہے، ٹیکس گزاروں کی سہولت کے لیے ’ٹیکس آسان‘ کے نام سے موبائل ایپ کا اجرا کر دیا، ٹیکس کے فارمز کا اردو میں ترجمہ بھی کیا جا چکا ہے، ایف بی آر کی ویب سائٹ کو بھی اردو میں بنانے پر کام جاری ہے۔

چیئرمین نے مزید بتایا کہ متحرک ٹیکس گزاروں کی فہرست کو باقاعدگی سے اپ ڈیٹ کیا جا رہا ہے، ایف بی آر تجارت میں سہولت کاری کے حوالے سے اقدامات کر رہا ہے، برآمدات آسان اسکیم کے تحت برآمدات کو آسان بنایا جا رہا ہے۔

ان کا کہنا تھا کہ مختلف کسٹم اسٹیشنز پر اسکینرز نصب کر دیے گئے ہیں، طور خم بارڈر پر کسٹم کی سہولت 24 گھنٹے فراہم کر دی گئی ہے، کرتارپور راہداری پر کسٹم آپریشنز آیندہ چند ہفتے میں شروع کر دیے جائیں گے، موبائل اسمگلنگ روک تھام سے متعلق اقدامات تیز کر دیے گئے ہیں اور ہوائی اڈوں پر کرنسی ڈیکلیئر سسٹم متعارف کرایا جا رہا ہے۔

کراچی: وزیر اعظم عمران خان کی خصوصی ہدایت پر سول ایوی ایشن نے بزرگ ،خواتین اور خصوصی افراد کے لیے بہتر سہولیات کی فراہمی کی خاطر اقدامات شروع کردیے۔

تفصیلات کے مطابق سول ایوی ایشن اتھارٹی کی جانب سے باقائدہ نوٹی فکیشن جاری کیا گیا ہے جس کے تحت ملک بھر کے ایئر پورٹس پر بزرگ افراد، نو مولود بچوں کے ہمرا ہ خواتین اور خصوصی افراد کو خصوصی سہولیات فراہم کی جائیں گی۔

سول ایوی ایشن کی جانب سے جناح انٹر نیشنل ایئرپورٹ سمیت ملک بھر کے ایئرپورٹس کے لیے 9 نکاتی ہدایت نامہ جاری کردیا گیا ہے۔ حکم نامے کے تحت عمر رسیدہ، خصوصی افراد، اور خواتین جن کے ساتھ دو سال سے کم عمر بچے ہوں ، ان کو ترجیحی بنیادوں پر سہولیات فراہم کی جائیں گی اور اس مقصد کے لیے کراچی ایئرپورٹ پر اعزازی سہولت کے کاونٹر بھی قائم کردیئے گئے ہیں۔

سول ایوی ایشن اتھارٹی نے اے ایس ایف ،کسٹمز اور دیگر متعلقہ اداروں کو ہدایت جاری ہے کہ تلاشی کے دوران مذکورہ بالا افراد کے سامان کا خیال رکھا جائے۔

ساتھ ہی ساتھ عوام کو سہولیات کی فراہمی یقینی بنانے کے لیے کراچی سمیت مختلف ایئرپورٹس پر ملازمین اپنی سرکاری فرائض کی ادائیگی کے دوران موبائل فونز کے استعمال پر پابندی عائد کردی گئی ہے۔

حکم نامے میں یہ بھی کہا گیا ہے کہ سول ایوی ایشن اتھارٹی کا کوئی بھی ملازم پان ،گٹکا یا نسوار کھاتے ہوئے پکڑا گیا تو اس کے خلاف سخت کاروائی عمل میں لائی جائے گی۔ پاکستانی ہوا بازی کی مثبت شناخت اجاگر کرنے کے لیے عملے کو پابند کیا گیا ہے کہ وہ ایئرپورٹ پر مسافروں کی آمد اور روانگی کے کاونٹر پر ان سے خوش اخلاقی سے پیش آئے۔

یاد رہے کہ وزیر اعظم عمران خان نے ملک میں سیاحت کے فروغ اور معاشرے کے مذکورہ بالا طبقات یعنی بزرگ ، خواتین اور خصوصی افراد کے لیے ایئر پورٹس پر سہولیات فراہم کرنے کے لیے خصوصی ہدایات جاری کی تھیں جن پر عمل در آمد شروع ہوگیا ہے۔

پشاور: وزیر اعظم آفس کی جانب سے 41 محکمہ جات کو ہدایت نامہ ارسال کر کے نئے سٹیزن پورٹل کو متعارف کرانے سے گریز کرنے کی ہدایت کی گئی ہے۔

تفصیلات کے مطابق وزیر اعظم نے نئے سٹیزن پورٹل متعارف کرانے سے گریز کی ہدایت کر دی ہے، اس سلسلے میں وزیر اعظم آفس سے متعدد محکمہ جات کو ہدایت نامہ جاری کیا گیا۔

ہدایت نامے کے متن میں کہا گیا ہے کہ وزیر اعظم سٹیزن پورٹل ہی سے شہریوں کے مسائل حل ہو رہے ہیں، محکمے 21 دن میں ضرورت کے مطابق پورٹل سے متعلق تجاویز دیں۔

ہدایت نامے میں یہ بھی کہا گیا کہ پاکستان سٹیزن پورٹل 8 ہزار مختلف سرکاری محکموں سے منسلک ہے، اس پورٹل کے توسط سے اب تک 987140 شہریوں کی شکایات حل ہوئی ہیں۔

یہ بھی پڑھیں:  سول ایوی ایشن تھارٹی: سٹیزن پورٹل کے قیام کی منظوری دے دی گئی

واضح رہے کہ 23 اگست کو سِول ایوی ایشن اتھارٹی نے بورڈ آف ڈائریکٹرز کے اجلاس میں مسافروں کی شکایات کے ازالے کے لیے سٹیزن پورٹل کے قیام کی منظوری دی تھی۔

گزشتہ ماہ وزیر اعظم نے پاکستان سٹیزن پورٹل سے متعلق آگاہی مہم چلانے کی ہدایت کی تھی، وزیر اعظم آفس کی جانب سے وزارتوں، محکموں اور ڈویژن کو مراسلہ جاری کر کے کہا گیا کہ سٹیزن پورٹل کی سہولت سے لوگوں کی بڑی تعداد ناواقف ہے، اس لیے عوام کو اس سلسلے میں بہتر طور پر آگاہ کیا جائے۔