ARYNews.tv | Urdu – Har Lamha Bakhabar

Tag: وزیر اعظم

  • وزیراعظم اورآرمی چیف کا دورہ شمالی وزیرستان، فاٹا کو قومی دھارے میں لانے کے عزم کا اعادہ

    وزیراعظم اورآرمی چیف کا دورہ شمالی وزیرستان، فاٹا کو قومی دھارے میں لانے کے عزم کا اعادہ

    راولپنڈی: وزیراعظم شاہد خاقان عباسی اورآرمی چیف جنرل قمر جاوید باجوہ نے شمالی وزیرستان کا دورہ کیا ہے.

    پاک فوج کے شعبہ برائے تعلقات عامہ (آئی ایس پی آر) کے مطابق وزیراعظم اور آرمی چیف نے میران شاہ اور غلام خان کا دورہ کیا.

    اس دورے میں وزیر اعظم نے یادگار شہدا پرحاضری دی، پھول چڑھائے اور فاتحہ پڑھی، وزیر اعظم نے میران شاہ مارکیٹ کمپلیکس اور غلام خان ٹریڈ ٹرمینل کا بھی افتتاح کیا.

    اس موقع پر وزیر اعظم نے کہا کہ سماجی واقتصادی ترقی کے منصوبے فاٹا کو قومی دھارے میں لانے میں مدد کریں گے، فاٹا میں مزید کئی ترقیاتی منصوبے تکمیل کے مراحل میں ہیں.

    وزیر اعظم نے کہا کہ متاثرین کی بحالی اورفاٹا کی ترقی بنیادی ترجیحات میں شامل ہے، دہشت گردی کے خلاف قبائلی بھائیوں نے جرات وبہادری کا مظاہرہ کیا. فاٹا کو قومی دھارے میں لانے کے اقدامات جاری ہیں.

    وزیر اعظم نے کہا کہ پاک فوج کی قربانیوں اور کوششوں کا دنیا نے اعتراف کیا ہے، پاک فوج نے اپنا فریضہ سرانجام دے دیا اب انتظامیہ کی ذمہ داری ہے، فاٹا میں امن ہوگا تو پاکستان میں بھی امن ہوگا.

    شاہد خاقان عباسی نے کہا کہ فاٹا کے عوام کو مساوی وسائل اور مواقع ملنے چاہییں، سیاسی وعسکری قیادت امن کی کوششوں پر متفق ہیں. فاٹا کےمتاثرہ تاجروں کومتبادل سامان دیا جائے گا.

    یاد رہے کہ یہ وزیراعظم شاہدخاقان کا آپریشن کے بعد شمالی وزیرستان کا یہ پہلا دورہ ہے۔ اس دورے میں ڈی جی آئی ایس پی آرکا تاجروں کو معاوضےکا وعدہ بھی پورا ہوگیا.

    آرمی چیف سرکاری دورے پر روس پہنچ گئے، فوجی سربراہ سے ملاقات

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • نئے اسلام آباد انٹرنیشنل ایئرپورٹ کا افتتاح کل وزیراعظم کریں گے

    نئے اسلام آباد انٹرنیشنل ایئرپورٹ کا افتتاح کل وزیراعظم کریں گے

    اسلام آباد: دس سال کے عرصے میں مکمل ہونے والے نئے اسلام آباد انٹرنیشنل ایئر پورٹ کا افتتاح کل وزیر اعظم شاہد خاقان عباسی کریں گے۔

    تفصیلات کے مطابق نئے اسلام آباد ایئر پورٹ کا کل افتتاح کیا جائے گا۔ ایئرپورٹ کی تعمیر پر 106 ارب روپے لاگت آئی ہے۔

    اسلام آباد ایئرپورٹ کا سنگ بنیاد 7اپریل 2007 میں جنرل ریٹائرڈ پرویز مشرف نے رکھا تھا اور اسے تین سال کے عرصے میں مکمل ہونا تھا، تاہم تعطل کا شکار رہنے کے سبب کام وقت پر مکمل نہیں کیا جاسکا اور اب دس سال بعد کل وزیر اعظم شاہد خاقان عباسی اس کا افتتاح کریں گے۔

    اس سے قبل وفاقی کابینہ کے اجلاس میں ایئرپورٹ کے لیے متعدد نام زیر بحث رہے جن میں عبدالستار ایدھی، لیاقت علی خان، فاطمہ جناح، گندھارا اور نیو اسلام آباد ایئرپورٹ کے نام زیر بحث آئے تاہم کل کے لیے جاری کیے جانے والے دعوت ناموں اس کا نام اسلام آباد انٹرنیشل ایئر پورٹ درج کیا گیا ہے۔

    اسلام آباد انٹر نیشنل ائیرپورٹ کو فعال بنانے کے لئے پاک فضائیہ کی معاونت

    علاوہ ازیں قومی اداروں کی معاونت میں پاک فضائیہ کی درخشاں روایات اور اس کی اعلیٰ قیادت کی ہدایات کی روشنی میں پاک فضائیہ نے نئے تعمیر شدہ اسلام آباد انٹر نیشنل ائیرپورٹ پر منظم اور محفوظ آپریشنز کے آغاز کے لئے سول ایوی ایشن اتھارٹی کو بھر پور تعاون فراہم کیا ہے۔

    اسی تناظر میں جمعہ کے روز سول ایوی ایشن اتھا رٹی کی درخواست پر مسافروں اور سامان سے لدا ہوا پاک فضائیہ کا ایک سی 130طیارہ اس ائیر پورٹ پر اترا جس کا مقصد انسٹرومنٹ لینڈنگ پیٹرن او ر رن وے کے معیار کو جانچنا تھا۔

    یہ لینڈنگ اس سلسلے کی ایک کڑی تھی جس میں پاک فضائیہ کے کم وزن تربیتی طیا رے سپر مشاق سے لے کر بھاری بھر کم سی-130 طیارے بھی اس رن وے پر کامیابی سے اتر تے رہے اور اسی ماہ ہونے والی پی آئی اے کی پہلی آزمائشی پرواز کی کامیاب لینڈنگ کو ممکن بنانے میں اہم کردار ادا کیا۔

    پاک فضائیہ نے سول ایوی ایشن اتھارٹی کے ساتھ مل کر اپنی فضائی تربیتی حدود کا ازسرنو تعین کیا ہے تاکہ اس ائیر پورٹ پرفضائی ٹریفک کی ہموار آمدورفت کو یقینی بنایا جا سکے۔

    علاوہ ازیں پاک فضا ئیہ نے اپنے تربیت یافتہ افراد سے لیس ایک جدید ائیر ٹریفک کنٹرول اسکواڈرن بھی قائم کیا ہے جو کہ ائیر پورٹ پر منظم فضائی آمدورفت میں ہمہ وقت معاون ثا بت ہوگا۔

    قائم مقام ڈائریکٹر جنرل سول ایوی ایشن اتھارٹی ائیر وائس مارشل عسید الرحمان عثمانی نے اس نئے ائیر پورٹ کو فعال بنانے میں پاک فضائیہ کی بھر پور معاونت کو سراہا اور امید ظاہر کی کہ شاندار منصوبہ ملک میں خوشحالی کے ایک نئے دور کا آغا ز ثابت ہو گا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • حکومت کو مینڈیٹ ملا ہے کہ آخری دن تک کام کیا جائے: وزیر اعظم

    حکومت کو مینڈیٹ ملا ہے کہ آخری دن تک کام کیا جائے: وزیر اعظم

    حیدر آباد: وزیر اعظم شاہد خاقان عباسی کا کہنا ہے کہ لوگ باتیں کرتے تھے ہم نےعوام دوست بجٹ میں کر دکھایا۔ تنقید ہوئی کہ حکومت کو یہ بجٹ پیش نہیں کرنا چاہیئے تھا۔ حکومت کو مینڈیٹ ملا ہے کہ آخری دن تک کام کیا جائے۔

    تفصیلات کے مطابق وزیر اعظم شاہد خاقان عباسی نے صوبہ سندھ کے شہر ٹنڈو جام میں گیس پروسیسنگ کی فیسیلٹی کا افتتاح کیا۔

    افتتاحی تقریب سے خطاب کرتے ہوئے وزیر اعظم شاہد خاقان عباسی نے کہا کہ اہم قومی منصوبوں کی تکمیل اور افتتاح کی خوشی ہے۔ او جی ڈی سی ایل نے ثابت کیا کہ اپنا کام مقرررہ وقت پر کر سکتا ہے۔

    انہوں نے کہا کہ نہ صرف پرانے منصوبے مکمل کیے بلکہ نئے منصوبے بھی شروع کیے۔ ’ساڑھے 300 ٹن ایل پی جی یہاں سے نکل رہی ہے۔ ملک میں گیس کے معیار کو بہتر بنانے پر توجہ نہیں دی گئی تھی‘۔

    انہوں نے کہا کہ ہم سے گیس، سڑکوں اور تعمیرات کے منصوبوں پر بحث کرلیں۔ 65 سال سے جو کام نہیں ہوئے وہ مسلم لیگ ن نے مکمل کیے۔ اداروں میں کام کرنے والے گواہ ہیں ہمیشہ کام کرنے کی بات کی۔

    وزیر اعظم نے کہا کہ کراچی میں لوگ گھروں سے نکلنے سے گھبراتے تھے۔ آج دیہی اور شہری سندھ کی صورتحال آپ دیکھ لیں۔ لوگوں نے پیش گوئیاں کیں یہ حکومت نہیں چلے گی۔ حکومت نے اپنی مدت پوری کی اور منصوبے بھی مکمل کیے۔

    انہوں نے کہا کہ اس مرتبہ عوام دوست بجٹ پیش کیا گیا۔ تنقید ہوئی کہ حکومت کو یہ بجٹ پیش نہیں کرنا چاہیئے تھا۔ حکومت کو مینڈیٹ ملا ہے کہ آخری دن تک کام کیا جائے۔ ’ بجٹ ہم نے پیش کیا، اگلی حکومت اس میں تبدیلی کر سکتی ہے‘۔

    ان کا کہنا تھا کہ عوام پر جو ٹیکس 35 فیصد تک جاتا ہے وہ 15 فیصد پر ختم کردیا۔ ٹیکس ریفارمز پر تنقید کرنے والے پہلے اپنا ٹیکس ریکارڈ پیش کریں۔ ٹیکس ادا کرنا یا نہ کرنا آپ کی مرضی نہیں، ٹیکس ادا کرنا ہوگا۔

    شاہد خاقان عباسی نے مزید کہا کہ ہمیشہ سنتے آئے تھے تھر میں بہت کوئلہ ہے۔ حکومت محنت نہ کرتی تو تھر کا کوئلہ زمین میں ہی رہتا۔ کوشش ہے کہ ریکوڈک کے وسائل بھی ملک کے کام آئیں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • صدر اور وزیر اعظم کل کراچی کا دورہ کریں گے

    صدر اور وزیر اعظم کل کراچی کا دورہ کریں گے

    کراچی: صدر مملکت ممنون حسین اور وزیر اعظم شاہد خاقان عباسی کل کراچی کا دورہ کریں گے۔ دورے کے موقع پر دونوں کی مختلف مصروفیات ہوں گی۔

    تفصیلات کے مطابق صدر مملکت ممنون حسین اور وزیر اعظم شاہد خاقان عباسی کل صوبہ سندھ کے دارالحکومت کراچی کا دورہ کریں گے۔

    ذرائع کے مطابق اپنے دورے کے دوران وزیر اعظم نجی اسپتال کے ڈائلاسز یونٹ کا افتتاح کریں گے جبکہ صدر مملکت جامعہ کراچی میں سیرت چیئر کی عمارت کا سنگ بنیاد رکھیں گے۔

    وزیر اعظم کل صبح ٹنڈو آدم میں گیس منصوبے کا بھی افتتاح کریں گے۔

    بعد ازاں گورنر ہاؤس میں وزیر اعظم کی زیر صدارت کراچی کے مختلف منصوبوں پر اجلاس ہوگا۔

    خیال رہے کہ وزیر اعظم نے چند روز قبل بھی کراچی کا دورہ کیا تھا جب شہر قائد میں بجلی کا بحران اپنے عروج پر پہنچ گیا تھا۔

    وزیر اعظم نے کے الیکٹرک اور سوئی سدرن گیس کمپنی کو اپنے آپس کے معاملات حل کر کے شہر کو بجلی کی فراہمی کی ہدایت کی تھی۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • کراچی میں بجلی کا بحران: وزیر اعظم کی معاملات 15 روز میں حل کرنے کی ہدایت

    کراچی میں بجلی کا بحران: وزیر اعظم کی معاملات 15 روز میں حل کرنے کی ہدایت

    کراچی: وزیر اعظم شاہد خاقان عباسی کی زیر صدارت کابینہ کی توانائی کمیٹی کے خصوصی اجلاس میں وزیر اعظم نے سوئی سدرن اور کے الیکٹرک کو معاملات 15 روز میں حل کرنے کی ہدایت دے دی۔

    تفصیلات کے مطابق وزیر اعظم شاہد خاقان عباسی کی زیر صدارت کابینہ کی توانائی کمیٹی کا خصوصی اجلاس ہوا۔

    اجلاس میں گورنر، وزیر اعلیٰ سندھ سید مراد علی شاہ اور وزیر اعلیٰ پنجاب شہباز شریف، وزیر توانائی اویس لغاری، مشیر خزانہ مفتاح اسماعیل اور دیگر اعلیٰ حکام شریک ہیں۔

    اجلاس سے قبل کے الیکٹرک اور سوئی سدرن گیس کے درمیان تنازعہ حل کرنے کے لیے وزارت پانی و بجلی نے حکمت عملی تیار کرلی۔ حکمت عملی میں قابل تقسیم محاصل میں سوئی سدرن کو ادائیگی کی تجویز شامل ہے۔

    دوسری جانب وزارت خزانہ بھی سوئی سدرن اور نیشنل ٹرانسمیشن اینڈ ڈسپیچ کمپنی (این ٹی ڈی سی) کے واجبات کی یک مشت ادائیگی پر رضامند ہے۔

    وزارت خزانہ ادائیگی اس یقین دہانی پر کروائے گی کہ رقم ڈیویز بل پول سے مل جائے۔

    اس وقت واٹر بورڈ پر کے الیکٹرک کے واجبات کا حجم 52 ارب روپے ہے جبکہ سوئی سدرن کے کے الیکٹرک پر 80 ارب اور این ٹی ڈی سی پر 30 ارب کے واجبات ہیں۔

    ذرائع کا کہنا ہے کہ اجلاس میں حکومت نے کے الیکٹرک پر جرمانے اور مارک اپ کی رقم کو معاف کرنے سے انکار کردیا ہے۔

    حکومت کا کہنا ہے کہ کے الیکٹرک صارفین سے لیٹ پیمنٹ سر چارج لیتا ہے تو خود بھی ادا کرے۔

    اجلاس کے بعد ترجمان وزیر اعلیٰ سندھ کا کہنا تھا کہ وزیر اعظم نے کے الیکٹرک کو گیس دینے کی ہدایت کردی۔ انہوں نے سوئی سدرن اور کے الیکٹرک کو معاملات 15 روز میں حل کرنے کی بھی ہدایت کی۔

    بعد ازاں وزیر اعظم نے میڈیا سے گفتگو کرتے ہوئے کہا کہ سوئی سدرن کو ہدایت کی ہے کہ کے الیکٹرک کو گیس دیں، کے الیکٹرک کو بھی ہدایت کی ہے کہ صارفین کے بجلی فراہم کریں۔ ’دونوں کمپنیوں کو مسائل حل کرنے کی ہدایت کی‘۔

    انہوں نے کہا کہ کراچی میں بجلی بھی ہوگی اور پانی بھی فراہم کیا جائے گا۔ کے الیکٹرک کو ضرورت کے مطابق گیس دی جائے گی۔

    وزیر اعظم کا کہنا تھا کہ کے الیکٹرک کو کوئی سرکاری تحویل میں نہیں لے سکتا۔ کے الیکٹرک چارج کر سکتی ہے نہ سر چارج نکال سکتی ہے۔

    انہوں نے کہا کہ ملک بھر میں بجلی کی طلب سے زیادہ بجلی موجود ہے۔ جس علاقے میں بجلی چوری ہوتی ہے وہاں لوڈ شیڈنگ کی جاتی ہے۔ ’ملک میں بجلی کی پیداوار طلب سے زیادہ ہے‘۔

    خیال رہے کہ موسم گرما کے آغاز سے ہی شہر کراچی میں بجلی کا بحران عروج پر پہنچ گیا ہے اور پورے شہر میں کئی کئی گھنٹوں کی غیر اعلانیہ لوڈشیڈنگ جاری ہے۔

    نیشنل پاور اینڈ ریگولیٹری اتھارٹی (نیپرا) نے کراچی میں بجلی کے بحران کا سختی سے نوٹس لیتے ہوئے اس کا ذمہ دار کے الیکٹرک کو ٹھہرایا ہے۔

    اپنی جاری کردہ رپورٹ میں نیپرا کا مؤقف تھا کہ گیس نہیں ہے تو کے الیکٹرک فرنس آئل سے بجلی کیوں نہیں بنارہی؟ رپورٹ میں کہا گیا ہے کہ کے الیکٹرک کورنگی کمبائنڈ پلانٹ اور بن قاسم پلانٹ دو متبال فیول سے چلائے تو لوڈشیڈنگ میں کمی آسکتی ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • اقتصادی راہداری منصوبے سے پاکستان کو ترقی کی بنیاد ملی: وزیر اعظم

    اقتصادی راہداری منصوبے سے پاکستان کو ترقی کی بنیاد ملی: وزیر اعظم

    کراچی: وزیر اعظم شاہد خاقان عباسی کا کہنا ہے کہ اقتصادی راہداری وقتی نہیں بلکہ نسلوں کا منصوبہ ہے۔ سی پیک سے توانائی، انفرا اسٹرکچر سمیت دیگر سہولتیں میسر آئیں گی۔

    تفصیلات کے مطابق صوبہ سندھ کے دارالحکومت کراچی میں وزیر اعظم شاہد خاقان عباسی نے پاک چین اقتصادی راہداری سیمینار سے خطاب کیا۔

    اپنے خطاب میں ان کا کہنا تھا کہ 2015 تک سی پیک سے کوئی آگاہ نہیں تھا۔ چینی صدر نے علاقائی روابط کا منصوبہ پیش کیا۔ سی پیک وقتی نہیں بلکہ نسلوں کا منصوبہ ہے۔

    انہوں نے کہا کہ سی پیک نہ صرف پاکستان، افغانستان بلکہ وسط ایشیائی ریاستوں کو دنیا سے منسلک کرے گا۔ سی پیک سے توانائی، انفرا اسٹرکچر سمیت دیگر سہولتیں میسر آئیں گی۔

    وزیر اعظم نے کہا کہ سی پیک 2 ممالک میں شراکت داری کا منصوبہ ہے۔ منصوبے سے پاکستان کو ترقی کی بنیاد ملی۔

    ان کا کہنا تھا کہ سی پیک کےتحت توانائی کے 2 منصوبے مکمل ہو چکے ہیں، ایک مکمل ہونے جارہا ہے۔ سی پیک کے تحت موٹر ویز بنائی جا رہی ہیں۔ منصوبے کے باعث تھر کول سے بجلی کے حصول کا خواب پورا ہوگا۔

    وزیر اعظم نے مزید کہا کہ اقتصادی راہداری کے منصوبے سے تجارت کو فروغ ملے گا۔ معاشی فوائد کے ساتھ ماحولیاتی تحفظ کو مد نظر رکھا جا رہا ہے۔ ’پاکستان سی پیک سے نہ صرف اپنی ترقی بلکہ خطے کی خوشحالی چاہتا ہے‘۔

    خیال رہے کہ وزیر اعظم شاہد خاقان ایک روزہ دورے پر کراچی پہنچے ہیں جہاں وہ شہر میں توانائی کے بحران سے متعلق اہم اجلاس کی صدارت کریں گے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • شہر میں بجلی کا بحران: وزیر اعظم شاہد خاقان عباسی کراچی پہنچ گئے

    شہر میں بجلی کا بحران: وزیر اعظم شاہد خاقان عباسی کراچی پہنچ گئے

    کراچی: وزیر اعظم شاہد خاقان عباسی صوبہ سندھ کے دارالحکومت کراچی پہنچ گئے۔ وزیر اعظم بجلی بحران پر توانائی کیبنٹ کمیٹی اجلاس کی صدارت کریں گے۔

    تفصیلات کے مطابق وزیر اعظم شاہد خاقان عباسی ایک روزہ دورے پر کراچی پہنچ گئے۔

    خیال رہے کہ وزیر اعظم کی آمد کراچی میں بجلی کی غیر اعلانیہ لوڈ شیڈنگ پر نوٹس لینے کے بعد ہوئی ہے۔ وزیر اعظم بجلی کے بحران پر توانائی کیبنٹ کمیٹی اجلاس کی صدارت کریں گے۔

    اجلاس گورنر ہاؤس میں ہوگا جس میں وفاقی وزیر سردار اویس خان لغاری، مشیر برائے خزانہ مفتاح اسماعیل، کے الیکٹرک کے سی ای او طیب ترین، سوئی سدرن کے ایم ڈی امین راجپوت اور سیکریٹری فنانس شرکت کریں گے۔

    اس موقع پر وزیر اعظم کو بجلی کے بحران کے حوالے سے رپورٹ بھی پیش کی جائے گی جبکہ کے الیکٹرک اور سوئی سدرن گیس سے بھی بجلی کے بحران کے حوالے سے رپورٹ طلب کی جائے گی۔

    خیال رہے کہ نیشنل پاور اینڈ ریگولیٹری اتھارٹی (نیپرا) نے کراچی میں بجلی کے بحران کا سختی سے نوٹس لیتے ہوئے اس کا ذمہ دار کے الیکٹرک کو ٹھہرایا ہے۔

    اپنی جاری کردہ رپورٹ میں نیپرا کا مؤقف تھا کہ گیس نہیں ہے تو کے الیکٹرک فرنس آئل سے بجلی کیوں نہیں بنارہی؟ رپورٹ میں کہا گیا ہے کہ کے الیکٹرک کورنگی کمبائنڈ پلانٹ اور بن قاسم پلانٹ دو متبال فیول سے چلائے تو لوڈشیڈنگ میں کمی آسکتی ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • پولیو کا مرض اپنے خاتمے کے قریب ہے: وزیر اعظم

    پولیو کا مرض اپنے خاتمے کے قریب ہے: وزیر اعظم

    اسلام آباد: وزیر اعظم شاہد خاقان عباسی کا کہنا ہے کہ ملک میں پولیو کا مرض اپنے خاتمے کے قریب ہے، جلد چھٹکارا پالیں گے۔ ملک میں صحت پروگرام کا دائرہ کار وسیع کر دیا ہے۔

    تفصیلات کے مطابق وزیر اعظم شاہد خاقان عباسی نے صحت سے متعلق تقریب سے خطاب کیا۔

    اپنے خطاب میں ان کا کہنا تھا کہ عوام کو صحت کی اعلیٰ معیار کی سہولتیں فراہم کرنے کے لیے پرعزم ہیں۔ صحت کی سہولتوں کی فراہمی صوبوں کی ذمہ داری ہے۔

    وزیر اعظم کا کہنا تھا کہ 5 سال میں صحت سہولتیں بہتر بنانے کے لیے اقدامات کیے ہیں۔ پولیو کا مرض اپنے خاتمے کے قریب ہے، جلد اس مرض سے چھٹکارا پالیں گے۔

    انہوں نے کہا کہ ملک میں صحت پروگرام کا دائرہ کار وسیع کردیا ہے۔ صحت پروگرام کے نتائج حوصلہ افزا ہیں۔

    خیال رہے کہ ملک بھر میں پولیو کے خاتمے کے لیے بھرپور اور مؤثر کوششیں کی جارہی ہیں۔ سنہ 2016 میں ملک میں پولیو کے 20 جبکہ اس کے مقابلے میں 2017 میں صرف 8 کیسز رپورٹ کیے گئے۔

    سال 2018 میں اب تک صوبہ بلوچستان سے ایک پولیو کا کیس منظر عام پر آیا ہے۔

    پولیو کے خلاف جنگ میں برسر پیکار بل و میلنڈا گیٹس فاؤنڈیشن کے سربراہ بل گیٹس نے بھی انسداد پولیو جنگ میں پاکستان کی کامیابیوں کا اعتراف کیا ہے۔

    بل گیٹس نے کچھ عرصہ قبل وزیر صحت سائرہ افضل تارڑ کو خط لکھا تھا جس میں ان کا کہنا تھا کہ انسداد پولیو جنگ میں پاکستان کا کردار قابل تعریف ہے۔ پولیس کی روک تھام کے لیے حکومت نے لاجواب اقدامات کیے ہیں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • جنرل سیکریٹری اقوام متحدہ کشمیر میں بھارتی مظالم دنیا کے سامنے لانے میں کردار ادا کریں: وزیر اعظم

    جنرل سیکریٹری اقوام متحدہ کشمیر میں بھارتی مظالم دنیا کے سامنے لانے میں کردار ادا کریں: وزیر اعظم

    سنیا: وزیر اعظم شاہد خاقان عباسی نے اقوام متحدہ کے جنرل سیکریٹری انتونیو گتریس پر زور دیا ہے کہ وہ مقبوضہ کشمیر میں بھارتی مظالم دنیا کے سامنے لانے میں اپنا کردار ادا کریں۔

    تفصیلات کے مطابق وزیر اعظم شاہد خاقان عباسی باؤ فورم اجلاس کے لیے چین کے شہر سنیا میں موجود ہیں۔ کانفرنس کے سائیڈ لائن ایونٹس میں وزیر اعظم نے اقوام متحدہ کے جنرل سیکریٹری انتونیو گتریس پر زور دیا کہ وہ بھارتی مظالم دنیا کے سامنے لانے میں اپنا کردار ادا کریں۔

    وزیر اعظم کا کہنا تھا کہ لائن آف کنٹرول اور ورکنگ باؤنڈری پر بھارتی فائرنگ سے شہری شہید ہو رہے ہیں۔ بھارت کی جنگ بندی معاہدے کی خلاف ورزیاں امن کے لیے خطرہ ہیں۔

    انہوں نے کہا کہ پاکستان دہشت گردی کے خلاف عدم برداشت کی پالیسی پر عمل پیرا ہے۔ ’دہشت گردی کے خلاف پاکستان نے بے شمار قربانیاں دیں، دنیا ان کا اعتراف کرے‘۔

    مزید پڑھیں: 2050 میں پاکستان دنیا کی بڑی معیشتوں میں شامل ہوگا، وزیر اعظم

    ملاقات میں اقوام متحدہ کے جنرل سیکریٹری انتونیو گتریس نے کہا کہ پاکستان نے افغان مہاجرین کی انسانی بنیاد پر مدد کی۔ پاکستان کے اقوام متحدہ کے امن مشن میں معاونت قابل تعریف ہے۔

    انہوں نے کہا کہ مسئلہ کشمیر کے حل کے لیے سنجیدہ مذاکرات کرنے پر زور دیتے رہے ہیں۔

    خیال رہے کہ باؤ فورم ایک غیر سرکاری اور غیرمنافع بخش بین الاقوامی تنظیم ہے جس کا باضابطہ طور پرقیام 2001 میں عمل میں لایا گیا تھا۔ فورم کا مقصد دنیا کے دیگر ممالک اور ایشیا کے مابین گہرے اقتصادی تعاون، روابط اور تعلقات کو فروغ دینا ہے۔

    باؤ فورم حکومتی سربراہان، کاروباری برادری، ماہرین اور اسکالرز کو معیشت، سرمایہ کاری، ٹیکنالوجی اور توانائی کے شعبوں میں تعاون کے لیے اعلیٰ سطح کے تبادلہ خیال کا موقع فراہم کرتا ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • جس نے یونین کونسل نہیں چلائی، وہ کہہ رہا ہے، مجھے وزیراعظم بناؤ: احسن اقبال

    جس نے یونین کونسل نہیں چلائی، وہ کہہ رہا ہے، مجھے وزیراعظم بناؤ: احسن اقبال

    اسلام آباد: وفاقی وزیر داخلہ احسن اقبال نے کہا ہے کہ موجودہ حالات میں‌ ملک کسی اناڑی کے ہاتھ میں جانے کا متحمل نہیں ہوسکتا.

    تفصیلات کے مطابق ن لیگ کے سینئر رہنما نے مخالفین پر کڑی تنقید کرتے ہوئے کہا کہ جس نے یونین کونسل نہیں چلائی، وہ کہہ رہا ہے کہ وزیراعظم بناؤ، ملک ان حالات میں‌ کسی اناڑی کے ہاتھ میں‌ نہیں دیا جاسکتا.

    انھوں نے کہا کہ وزیراعظم نے آج افغانستان کا اہم دورہ کیا، دونوں‌ ممالک کے درمیان مثبت ماحول میں بات ہوئی، افغان قیادت کو واضح کیا کہ پاکستان افغانستان میں امن کے خواہاں ہے اور پڑوسی ملک سے بھرپور تعاون کے لیے تیار ہے.

    انھوں نے کہا کہ قیام امن کےلئے افغان حکومت اورعوام کی رائے کا احترام کریں گے، افغان حکومت جس طرح کا تعاون چاہے گی، فراہم کیا جائے گا.

    وفاقی وزیر نے کہا کہ افغانستان کا امن اندرونی معاملہ ہے، ہم مداخلت نہیں کریں گے، افغانستان کے ساتھ مل کروسطی ایشیا سے جڑنا چاہتے ہیں.

    [bs-quote quote=”وزیراعظم نے آج افغانستان کا اہم دورہ کیا، افغان قیادت کو واضح کیا کہ پاکستان افغانستان میں امن کے خواہاں ہے” style=”style-2″ align=”left” author_name=”احسن اقبال”][/bs-quote]

    انھوں نے کہا کہ آج وسطی ایشیا سے جڑنے کے لیے اچھی بنیاد رکھی گئی ہے، اب ہمیں اس اقتصادی ایجنڈے پر توجہ دینی ہے، جس کی بنیاد رکھ دی گئی، دنوں ممالک کا مستقبل اسی سے وابستہ ہے.

    یاد رہے کہ آج وزیر اعظم پاکستان شاہد خاقان عباسی نے افغان صدر کی دعوت پر کابل کا دورہ کیا، جہاں‌ ان کی صدر اشرف غنی اور چیف ایگزیکٹو عبداللہ عبداللہ سے ملاقاتیں‌ ہوئیں.

    اس دورے میں‌ دونوں‌ ممالک نے افغان مسئلے کو مذاکرات اور مفاہت سے حل کرنے اور دہشت گردی کو مشتترکہ دشمن قرار دینے پر پر اتفاق کیا.

    وزیر اعظم کا دورہ کابل، دونوں ممالک کا دہشت گردی کو  مشترکہ دشمن قرار دینے پر اتفاق

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔