Tag: وزیر اعظم

اسلام آباد: وزیر اعظم نواز شریف کا کہنا ہے کہ ملک کی ترقی کے لیے ہمہ جہت اقدامات کر رہے ہیں۔ رواں سال ترقی کی شرح 5.5 فیصد تک لے کے گئے ہیں۔ انہوں نے سنہ 2025 تک پاکستان کو دنیا کی 20ویں بڑی معیشت بنانے کے عزم کا اظہار کیا۔

تفصیلات کے مطابق وفاقی دارالحکومت اسلام آباد میں وزیر اعظم نواز شریف نے مختلف عالمی کمپنیوں کے سربراہوں سے ملاقات اور گفت و شنید کی۔

اس موقع پر وزیر اعظم کا کہنا تھا کہ غیر ملکی سرمایہ کاری لانے کے لیے پرعزم ہیں۔ ملک میں اقتصادی حالات بہتر ہو رہے ہیں۔ ’جب ہم نے اقتدار سنبھالا تو پاکستان شدید قسم کے توانائی اور معاشی بحران کا شکار تھا‘۔

وزیر اعظم نے کہا کہ ہم نے تمام چیلنجز کو قبول کرتے ہوئے تمام مسائل کو حل کرنے کا عزم کیا اور اس کے لیے کام کیا۔ رواں سال ترقی کی شرح کو 5.5 فیصد تک لے کر گئے ہیں۔ ملک میں ترقی کے لیے کثیر الجہت اصلاحات کر رہے ہیں۔

انہوں نے کہا کہ ملکی خسارہ 8.2 کم ہو کر 4.3 فیصد پر آگیا ہے، ملک میں صارفین کی قوت خرید میں اضافہ ہو رہا ہے اور پاکستان کی معیشت تیزی سے ترقی و استحکام کی جانب بڑھ رہی ہے۔

ان کا کہنا تھا کہ ہمارے اقدامات کی بدولت ملک میں افراط زر میں کمی آئی جبکہ صنعتی شعبہ کی کارکردگی میں بھی نمایاں بہتری دیکھنے میں آئی۔

وزیر اعظم نواز شریف نے اپنے خطاب میں سنہ 2025 تک پاکستان کو دنیا کی پہلی 20 بڑی معیشتوں میں شامل کرنے کے عزم کا اظہار کیا۔

انہوں نے عالمی کمپنیوں کے چیف ایگزیکٹوز سے خطاب کرتے ہوئے کہا کہ آپ کا دورہ پاکستان سرمایہ کاری، تجارت کے نئے مواقع فراہم کرے گا۔ انہوں نے بتایا کہ غیر ملکی سرمایہ کاروں کو سازگار ماحول اور مراعات دے رہے ہیں، جبکہ غیر ملکی سرمایہ کاری کے لیے خصوصی صنعتی زونز بھی قائم کیے جارہے ہیں۔

انہوں نے بتایا کہ پاکستان بیرونی سرمایہ کاروں کے لیے پر کشش مقام ہے اور پاکستان اسٹاک مارکیٹ کا شمار خطے کی بڑی منڈیوں میں ہوتا ہے۔

سی پیک کے حوالے سے وزیر اعظم کا کہنا تھا کہ اقتصادی راہداری کے تحت 55 ارب ڈالر سے زائد سرمایہ کاری ہو رہی ہے۔ سی پیک سے گوادر اور چین آپس میں منسلک ہوں گے جبکہ یہ راستہ وسط ایشیائی ممالک کو بھی منسلک کرے گا۔

شیخوپورہ: وزیر اعظم نواز شریف نے کہا ہے کہ میں نے قوم سے سچ بولا، قوم نے ووٹ دے کر ہم پر اعتماد کیا۔

وزیر اعظم نواز شریف نے بھکی پاور پلانٹ کی افتتاحی تقریب سے خطاب کرتے ہوئے کہا کہ کچھ لوگوں کا پاکستان کی ترقی کے ساتھ کوئی تعلق نہیں ہے۔ میں نے قوم سے سچ بولا اور قوم نے ووٹ دے کر ہم پر اعتماد کیا۔

وزیر اعظم کا کہنا تھا کہ بھکی پاور پلانٹ ملک میں توانائی بحران کے خاتمے کے لیے مددگار ثابت ہوگا۔ اس موقع پر انہوں نے ایک بار پھر اپنی حکومت کے توانائی بحران کو ختم کرنے کا عزم دہرایا۔

انہوں نے واضح کیا کہ یہ میگا پروجیکٹس نہ صرف قومی ترقی کو آگے بڑھا رہے ہیں، بلکہ ان کی تعمیر کے دوران کفایت شعاری کے ذریعہ ایک بڑی رقم بھی بچائی جارہی ہے۔

نواز شریف نے کہا کہ ملک آگے بڑھ رہا ہے تو عوام آئیں اور ہمارا ہاتھ بٹائیں۔

وزیر اعظم کا کہنا تھا کہ ملک سے دہشت گردی کے خاتمے کی کوششیں رنگ لا رہی ہیں۔ کراچی کو پرامن شہر بنانے کے لیے کوششیں کی ہیں۔ وزیر اعظم نے مخالفین کو تنبیہہ کرتے ہوئے کہا کہ ملک کے خلاف سازشیں کرنا چھوڑ دو۔

اپنے خطاب سے قبل وزیر اعظم نے بھکی پاور پلانٹ کے مختلف حصوں کا دورہ کیا اور ترقیاتی کام کا جائزہ لیا۔

چکوال: وزیر اعظم نواز شریف نے ہندوؤں کے تاریخی مقام کٹاس راج کا دورہ کرتے ہوئے کہا کہ پاکستان میں رہنے والے تمام ہندو، سکھ، پارسی اور دیگر تمام مذاہب کے ماننے والوں کی خوشیاں اور دکھ سانجھے ہیں۔ انسانیت ہماری مشترکہ اساس ہے۔

تفصیلات کے مطابق وزیر اعظم نے کٹاس راج کے دورے کے موقع پر اپنی خوشی کا اظہار کرتے ہوئے کہا کہ یہ مقام نہ صرف ہندوؤں کے لیے امتیازی حیثیت رکھتا ہے بلکہ سکھ، بدھ مت کے ماننے والوں، اور مسلمانوں کی ثقافت کا سنگم ہے۔

انہوں نے کہا کہ میں صرف مسلمانوں کا نہیں، تمام پاکستانیوں کا وزیر اعظم ہوں۔ ’یہاں پر 5 مذاہب کے ماننے والے پاکستانیوں کا اجتماع میری خوشی کا باعث ہے‘۔

وزیر اعظم کا کہنا تھا کہ اس اجتماع سے پوری دنیا کو واضح پیغام گیا ہے کہ پاکستان میں ہندو، سکھ، پارسی اور تمام مذاہب کے ماننے والوں کو برابر کا شہری مانا جاتا ہے۔ ’تمام مذاہب کے ماننے والے انسانیت کے رشتے میں بندھے ہیں اور پاکستان کی ترقی، استحکام، امن اور خوشحالی کے لیے ہاتھوں میں ہاتھ ڈال کر کام کر رہے ہیں‘۔

انہوں نے کہا کہ ہم نے اپنے عمل سے ثابت کیا کہ مذہب سب کا اپنا اپنا لیکن انسانیت ہماری مشترکہ اساس ہے۔

اپنے خطاب میں وزیر اعظم نے قرآن کریم کا حوالہ دیتے ہوئے کہا کہ تمام انبیا اور تمام کتابوں پر ایمان لانا ہمارے ایمان کا حصہ ہے۔ یہی نہیں ہمیں اقلیتوں کے ساتھ بہترین سلوک اور ان کے حقوق کے تحفظ کی ہدایت بھی کی گئی ہے۔

انہوں نے امید ظاہر کی کہ ایک وقت آئے گا کہ پاکستان کو اقلیت دوست ملک کے طور پر جانا جائے گا۔

خطاب میں وزیر اعظم سیاسی گفتگو کرنا نہ بھولے۔ انہوں نے کہا کہ نیا پاکستان بنانے والے کچھ نہیں بنا رہے۔

انہوں نے ماضی کی حکومتوں کو بھی لتاڑتے ہوئے کہا کہ جو پہلےحکمران رہے، ہم ان کے صوبے میں بھی ہم موٹر وے بنا رہے ہیں۔ انہوں نے کہا کہ سیاست میں ایسے لوگ آگئے ہیں جوروز نیا جھوٹ بولتے ہیں۔

وزیر اعظم نے مخالفین کو اللہ سے معافی مانگنے کا بھی مشورہ دیا۔

تقریب کے بعد وزیر اعظم محمد نواز شریف نے ہندؤوں کے مقدس مقام امرت جل میں واٹر فلٹریشن پلانٹ کا افتتاح بھی کیا۔ فلٹریشن پلانٹ سے مذہبی رسومات کے لیے آنے والے ہندوؤں کو صاف پانی میسر ہوگا۔

دورے کے موقع پر وزیر اعظم نے کٹاس راج میں ہندوؤں کے تاریخی مندر کے مختلف حصے بھی دیکھے۔

اس موقع پر وزیر مذہبی امور سردار محمد یوسف، چیئرمین متروکہ وقف املاک صدیق الفاروق اور دیگر اہم شخصیات بھی وزیر اعظم کے ہمراہ تھیں۔

بعد ازاں وزیر اعظم نے کٹاس راج میں ہندوؤں کے مذہبی رہنما شیو جی کے مندر کے قریب پودا بھی لگایا اور ملک و قوم کی ترقی اور خوشحالی کے لیے دعا مانگی۔