اسلام آباد: وزیر اعظم پاکستان محمد نواز شریف کا کہنا ہے کہ پر امن بقائے باہمی، معاشی رابطوں پر مبنی خطہ پاکستان کی خواہش ہے۔

تفصیلات کے مطابق وفاقی دار الحکومت اسلام آباد میں وزیر اعظم نواز شریف کی زیر صدارت اعلیٰ سطح کا اجلاس ہوا۔ اجلاس میں اسحٰق ڈار، چوہدری نثار، سرتاج عزیز، ڈی جی آئی ایس آئی اور آرمی چیف شریک ہیں۔

اجلاس میں نیشنل ایکشن پلان اور آپریشن ضرب عضب سے متعلق امور زیر غور آئے۔ اجلاس میں پاکستان کی اندرونی و بیرونی سلامتی صورتحال کا جائزہ لیا گیا۔

ترجمان کے مطابق اجلاس میں خارجہ پالیسی، ہمسایہ ممالک اور اسٹریٹجک پارٹنرز سے شراکت داری پر تبادلہ خیال کے ساتھ ساتھ ہمسائیہ ممالک سے دو طرفہ اور کثیر الجہتی تعلقات کا بھی جائزہ لیا گیا۔

اجلاس کے شرکا کا کہنا تھا کہ دہشت گردی کے خلاف جنگ میں پاکستان کی جانی اور مالی قربانیوں کے مثبت نتائج برآمد ہوئے ہیں اور پاکستان کی قربانیوں کا عالمی سطح پر اعتراف کیا گیا ہے۔ اجلاس میں علاقائی استحکام کے لیے مستقبل کے لائحہ عمل پر بھی بات چیت کی گئی۔

اجلاس میں اظہار خیال کرتے ہوئے وزیر اعظم نے کہا کہ پر امن بقائے باہمی احترام اور معاشی طور پر مربوط خطہ ہمارا مقصد ہے جس کے حصول کے لیے کوششیں جاری رکھنا ہوں گی۔ امن، خوشحالی اور ترقی کے عزم پر قائم رہتے ہوئے ہی ایسا مکمن بنایا جاسکتا ہے۔

مظفر آباد: وزیر اعظم نواز شریف کا کہنا ہے کہ کوئی میثاق جمہوریت تسلیم نہ کرے تو کیا کر سکتے ہیں۔ ہم تو معاہدے پر کاربند ہیں۔ جمہوریت کا مطلب ایک دوسرے کو برداشت کرنا ہے۔

تفصیلات کے مطابق وزیر اعظم نواز شریف آج مظفر آباد پہنچے جہاں ان کا استقبال صدر آزاد کشمیر محمد مسعود خان اور وزیر اعظم آزاد کشمیر راجہ فاروق حیدر نے کیا۔

Prime Minister Muhammad Nawaz Sharif reaches Muzafarabad, AJK to attend the 53rd Budget Session of AJK Council. pic.twitter.com/5O8eNs4qT4

— PML(N) (@pmln_org) December 29, 2016

اس موقع پر وزیر خزانہ اسحٰق ڈار، وزیر برائے امور کشمیر و گلگت بلتستان برجیس طاہر، وزیر تجارت خرم دستگیر اور سینیٹر پرویز رشید بھی ان کے ہمراہ تھے۔

پاکستان مسلم لیگ ن کے ٹوئٹر اکاؤنٹ کے مطابق وزیر اعظم، آزاد کشمیر کونسل کے 53 ویں بجٹ اجلاس میں شرکت کرنے کے لیے پہنچے تھے۔ وزیر اعظم نے آزاد کشمیر کونسل سے خطاب بھی کیا۔

اس موقع پر انہوں نے نام لیے بغیر مخالفین پر طنز و تنقید کی روایت برقرار رکھی۔ ان کا کہنا تھا کہ جمہوریت کا مطلب ہی ایک دوسرے کو برداشت کرنا ہے۔ کوئی میثاق جمہوریت کو تسلیم نہ کرنا چاہے تو ہم کیا کر سکتے ہیں۔

انہوں نے کہا کہ ن لیگ کو مثالی مینڈیٹ ملا۔ ایسا مینڈیٹ قسمت سے ہی کسی جماعت کو ملتا ہے۔

وزیراعظم کا مزید کہنا تھا کہ سٹرکوں کا جتنا بڑا جال بچھ رہا ہے اس کی ملک میں کوئی مثال نہیں ملتی۔

اسلام آباد: وزیر اعظم نے چشمہ میں سی 3 پاور پلانٹ کا افتتاح کردیا۔ وزیر اعظم کی آمد کے موقع پر میانوالی سرگودھا روڈ کو ہر قسم کی ٹر یفک کے لیے بند کردیا گیا۔

تفصیلات کے مطابق وزیر اعظم نے چشمہ نیو کلیئر پاور پراجیکٹ 3 کا افتتاح کیا۔ اس موقع پر ان کے ہمراہ وفاقی وزیر برائے پانی و بجلی خواجہ آصف اور وزیر اعظم کے مشیر خصوصی برائے امور خارجہ سرتاج عزیز بھی موجود تھے۔

یہ پلانٹ پاکستان اٹامک انرجی کمیشن اور چائنہ نیشنل نیو کلیئر کارپوریشن کے تعاون سے تیار کیا گیا ہے۔

حکام کا کہنا ہے کہ پاکستان اٹامک انرجی کمیشن اور چائنہ نیشنل نیو کلیئر کارپوریشن کے تعاون سے بنائے گئے اس نیو کلیئر پاور پلانٹ سے 340 میگا واٹ بجلی پیدا ہوگی جو چشمہ 1 اور چشمہ 2 کے بعد یہ تیسرا پراجیکٹ ہے۔ چشمہ نیو کلیئر پاور پلانٹ 4 کا افتتاح سنہ 2017 میں کیا جائے گا۔

ذرائع کا کہنا ہے کہ کراچی نیو کلیئر پاور پراجیکٹ کے 2 اور کے 3 کا قیام سنہ 2030 تک عمل میں لایا جائے گا جس سے 8800 میگا واٹ بجلی 2030 تک نیشنل گرڈ کو فراہم کی جائے گی۔

واضح رہے کہ یہ تمام نیو کلیئر پاور پراجیکٹس پاکستان نیو کلیئر ریگولیٹری اتھارٹی فار سیف گارڈ سے پاس کروائے گئے ہیں۔

:وزیر اعظم کا خطاب

بعد ازاں وزیر اعظم نے تقریب سے خطاب کرتے ہوئے کہا کہ یہ پاور پلانٹ سائنس اور ٹیکنالوجی کے میدان میں پاک چین مشترکہ تعاون کا منہ بولتا ثبوت ہے۔ اس اشتراک سے خطے میں ترقی کے نئے دور کا آغاز ہوگا۔

وزیر اعظم کا کہنا تھا کہ مجھے امید ہے چشمہ یونٹ 4 اپنی مقررہ مدت سے قبل یعنی سنہ 2017 کے وسط تک بجلی کی فراہمی شروع کردے گا۔

انہوں نے کہا کہ چشمہ میں چلنے والے نیو کلیئر پاور پلانٹس ملک کے تمام بجلی گھروں سے بہترین کارکردگی کے حامل ہیں اور یہ 600 میگا واٹ بجلی نیشنل گرڈ کو فراہم کر رہے ہیں۔

وزیر اعظم کا کہنا تھا کہ مجھے یاد ہے کہ چینی ساختہ پہلے جوہری بجلی گھر چشمہ یونٹ سی ون کی تعمیر کا معاہدہ ہمارے پہلے دور حکومت میں ہوا تھا۔ اس معاہدے نے توانائی کے شعبہ میں دونوں ممالک کے درمیان دوستی کی نئی مثال قائم کی۔

وزیر اعظم نے مظفر آباد میں بھی 3 بجلی گھروں کی تعمیر کا اعلان کیا۔

اس موقع پر وہ مخالفین پر وار کرنا بھی نہیں بھولے۔ انہوں نے کہا کہ پاکستان کو دھرنوں اور احتجاج کی ضرورت نہیں ہے۔ یہ دھرنے پاکستان کے لیے نقصان دہ ہیں۔ سیاست کی خاطر ملکی مفاد قربان نہ کیا جائے۔ پاکستان ہم سب کا ہے، اس کی ترقی میں رکاوٹ نہ ڈالی جائے۔

وزیر اعظم نواز شریف نے چین کے اداروں کی جانب سے معاونت پر ان کا شکریہ بھی ادا کیا۔

اسلام آباد: وزیر اعظم نواز شریف کی زیر صدارت لائن آف کنٹرول کی صورتحال پر اہم اجلاس ہوا۔ وزیر اعظم نے کہا کہ کشمیریوں کی سفارتی، سیاسی اور اخلاقی مدد جاری رکھیں گے۔ اجلاس میں لائن آف کنٹرول پر بھارتی جارحیت سے بین الاقوامی برادری کو آگاہ کرنے کا فیصلہ بھی کیا گیا۔

تفصیلات کے مطابق وزیر اعظم نواز شریف کی زیر صدارت ایل او سی کی صورتحال پر اہم اجلاس ہوا جس میں وادی نیلم میں مسافر بس پر حملے کے بعد کی صورتحال کا جائزہ لیا گیا۔

اجلاس میں وزیر اعظم نواز شریف کو بریفنگ دی گئی کہ بھارتی فوج نے مسافر بس کو دانستہ نشانہ بنایا۔ اس کے بعد بھارتی فوج نے زخمیوں کو لانے والی ایمبولینسز کو بھی نشانہ بنایا۔

بھارتی فوج کی وادی نیلم میں مسافر بس پر فائرنگ، 9 شہری شہید *

اجلاس میں لائن آف کنٹرول پر بھارتی جارحیت سے بین الاقوامی برادری کو آگاہ کرنے کا بھی فیصلہ کیا گیا۔ اجلاس میں کہا گیا کہ عالمی برادری پر زور دیا جائے گا کہ ایل او سی پر بگڑتی صورتحال کم کرنے کے لیے کردار ادا کرے۔ عالمی برادری بھارت کی طرف سے کشیدگی بڑھانے کا نوٹس لے۔ اجلاس میں لائن آف کنٹرول پر بھارتی جارحیت سے نمٹنے پر بھی غور کیا گیا۔

اجلاس کی صدارت کرتے ہوئے وزیر اعظم نواز شریف کا کہنا تھا کہ کشمیریوں کی سفارتی، سیاسی اور اخلاقی مدد جاری رکھیں گے۔ اجلاس میں مادر وطن کے دفاع کے لیے جانیں قربان کرنے والے شہیدوں کی جرات اور بہادری کو بھی خراج عقیدت پیش کیا گیا۔

بھارتی فوج کی فائرنگ، 3 فوجی شہید، 7 بھارتی فوجی ہلاک *

اجلاس میں مشیر خارجہ سرتاج عزیز، مشیر قومی سلامتی، ڈی جی آئی ایس آئی سمیت اعلیٰ حکام شریک تھے۔