لاہور: وزیر اعلیٰ پنجاب مریم نواز کا کہنا ہے کہ مخالفین کو پتا ہی نہیں کہ سچی محبتیں کیا ہوتی ہیں۔
اے آر وائی نیوز کے مطابق ڈی جی خان میں وزیر اعلیٰ پنجاب مریم نواز اسکالر شپ تقسیم کرنے کے بعد طلبا سے گھل مل گئیں اور ان کے ساتھ سیلفیاں بھی بنوائیں اور طالبہ سے کہا کہ آپ نے مجھ سے بھی اچھی تصویر بنادی۔
انہوں نے کہا کہ مخالفین میری عوام سے محبت کو ناٹک، ڈراما کہتے ہیں، انہیں سمجھ نہیں آرہی اس محبت کو کیا نام دیں۔
مریم نواز نے کہا کہ کوئی کہہ دے اسکالر شپ سفارش پر ملی ہے تو استعفیٰ دے کر گھر چلی جاؤں گی، انہوں نے جھوٹ میں آنکھ کھولی، پلے بڑھے اور جھوٹ میں ہی چلے جائیں گے۔
وزیر اعلیٰ نے کہا کہ کل میں ٹی وی دیکھ رہی تھی تو کہا جارہا تھا کہ یہ سارا پہلے سے طے ہوتا ہے چند بچوں کو اکٹھا کیا ہوتا ہے وہ سب یہ کرتے ہیں تو میں یہ سمجھ رہی تھی ان کا کا قصور نہیں ہے انہیں پتا ہی نہیں سچی محبتیں کیا ہوتی ہیں۔
انہوں نے کہا کہ بچوں جو آپ نے محبت دی ہے اب میرے کندھوں پر ذمہ داریوں کا بوجھ اور بھی بڑھ گیا ہے، اس کا جواب اور زیادہ محبت، خدمت اور اسکیم لاکر دوں گی۔
مریم نواز نے کہا کہ میں لاہور سے ڈی جی خان آئی ہوں کہ مجھے احساس ہے کہ پاکستان کے بیٹے اور بیٹیوں کی ذمہ داریوں کا بوجھ ہے جسے آپ کے ساتھ مل کر ادا کرنا چاہتی ہوں۔
