Tag: وزیر اعلیٰ پنجاب

لاہور: وزیر اعلیٰ پنجاب عثمان بزدار نے کہا ہے کہ حکومت نے بے پناہ محنت سے ملک درست سمت میں گامزن کر دیا ہے، عدم استحکام کی سازشیں کرنے والوں کے عزائم پورے نہیں ہوں گے۔

وزیر اعلیٰ پنجاب عثمان بزدار نے اپنے بیان میں کہا کہ وزیر اعظم عمران خان کی قیادت میں ملک پائیدار ترقی کی جانب بڑھ رہا ہے، لیکن کچھ عناصر نہیں چاہتے کہ پاکستان آگے بڑھے اور ترقی کی راہ پر گامزن ہو، عوام نے تحریک انصاف کی حکومت کو 5 سال کا مینڈیٹ دیا ہے، حکومت اپنی مدت پوری کرے گی۔

عثمان بزدار کا کہنا تھا کہ عدم استحکام کی سازشیں کرنے والوں کے عزائم پورے نہیں ہوں گے، اداروں میں تصادم کی خواہش رکھنے والوں کو منہ کی کھانا پڑی ہے۔

انھوں نے مزید کہا کہ ماضی کی حکومتوں نے کرپشن کر کے اداروں کو کنگال کیا، وزیر اعظم عمران خان نے بڑے بڑے کرپٹ عناصر کو بے نقاب کر دیا ہے، ہم نے عزم کیا ہے کہ وزیر اعظم کی قیادت میں پاکستان کو کرپشن سے پاک کریں گے۔

تازہ ترین:  آج دنیا بھر میں ایڈز سے بچاؤ اور آگاہی کا دن منایا جا رہا ہے

دریں اثنا، وزیر اعلیٰ پنجاب نے ایچ آئی وی ایڈز سے بچاؤ کے عالمی دن پر پیغام جاری کرتے ہوئے کہا ہے کہ ایڈز ایک مہلک مرض ہے، اس سے بچاؤ کے لیے احتیاط لازم ہے، ایڈز سے متعلق مؤثر آگاہی مہم سے نتیجہ خیز نتائج برآمد ہو سکتے ہیں، روک تھام کے لیے سب کو مشترکہ جدوجہد کرنا ہوگی، مشترکہ کاوشوں سے ایڈز کے مرض کو کنٹرول کیا جا سکتا ہے۔

لاہور: وزیر اعلیٰ پنجاب عثمان بزدار نے شمالی وزیرستان میں بارودی دھماکے میں 3 فوجی جوانوں کی شہادت پر افسوس کا اظہار کرتے ہوئے دھماکے کی مذمت کی ہے۔

تفصیلات کے مطابق پنجاب کے وزیر اعلیٰ نے وزیرستان میں دہشت گردی کے واقعے پر رد عمل ظاہر کرتے ہوئے کہا کہ بارودی سرنگ کا دھماکا قابل مذمت ہے، مادر وطن پر قربان ہونے والے بہادر سپوتوں کو خراج عقیدت پیش کرتا ہوں۔

عثمان بزدار نے کہا کہ اپنی جانوں کا نذرانہ پیش کرنے والے بہادر سپاہی ہمارا افتخار ہیں، وطن کی حفاظت کے لیے شہدا کی عظیم قربانیوں کو فراموش نہیں کر سکتے، وطن بے مثال قربانیوں کے باعث امن کی جانب بڑھ رہا ہے۔

یہ بھی پڑھیں:  شمالی وزیرستان میں بارودی سرنگ کا دھماکا، 3 جوان شہید

وزیر اعلیٰ پنجاب نے کہا کہ پوری قوم شہدا کی عظیم قربانیو ں کو سلام پیش کرتی ہے۔

واضح رہے کہ گزشتہ روز شمالی وزیرستان میں دیسی ساختہ بارودی سرنگ کے دھماکے کے نتیجے میں پیٹرولنگ ٹیم کے پاک فوج کے 3 جوان شہید ہو گئے تھے، جب کہ ایک زخمی ہوا تھا۔

آئی ایس پی آر کے مطابق شہدا میں سپاہی ساجد، ریاست اور بابر شامل تھے، واقعے کے بعد سیکورٹی فورسز نے علاقے کا محاصرہ کر کے سرچ آپریشن کیا۔ یاد رہے کہ رواں سال جولائی میں بھی شمالی وزیرستان میں پاک افغان سرحد پر پاک فوج کے جوانوں پر سرحد پار سے فائرنگ کی گئی تھی جس کے نتیجے میں پاک فوج کے 6 جوان شہید ہوگئے تھے۔